google-site-verification: googlefbfddf59e706b96b.html

Latest topics

» Kuv 1 Vuagdua
by ibvuagdua 4th December 2016, 3:38 pm

» Keeb Kwm Hmoob mus nyob Guyane
by cvang71 28th November 2016, 7:34 pm

» cwjmemdub lub tsev pajhuam
by koojziagkabzaug 23rd November 2016, 10:53 am

» PAWG HMOOB TRUSTEES UAS TUAV LUB KOOMHAUM LAO FAMILY CENTER YAV DHAU LOS ROV LOS TXEEB TAU LUB KOOMHAUM THIAB LOS TUAV LUB TSIAB30 THIAB LUB KOOBTSHEEB JUL 4TH
by Liajntsuab 20th November 2016, 5:06 am

» Xov Xwm hmoob Nyab Laj sawv tsam mus hais vim Nyab Laj tsi hlub peb haib hmoob
by Liajntsuab 18th November 2016, 8:25 am

» NPE ME NYUAM TUB thiab NPE LAUS
by koojziagkabzaug 15th November 2016, 12:12 pm

» NPE ME NYUAM NTXHAIS
by koojziagkabzaug 15th November 2016, 12:10 pm

» QHIA TSO DUAB thiab Video HAUV VAS SAB
by Tub kev deb 8th November 2016, 3:37 am

» Pojniam Qaug Qav thaum xeeb tub
by PIJPAUJ 6th November 2016, 12:46 am

» Los qhia koj zaj dab neeg
by Khosiab 3rd November 2016, 1:27 am

» TSIS TAU LOS TSIS CHIM
by Khosiab 2nd November 2016, 1:24 am

» Leej twg puas txawj sau nkauj ( suab paj nruag)
by Khosiab 2nd November 2016, 1:11 am

» Lub Neej Lwj Siab
by Khosiab 2nd November 2016, 1:00 am

Tsev seev PajHuam

Hmong beauty nature

Compteur visitor

hnub 18/09/2010 los mus

    Yeej Thoj Nam Noom Khais

    Share

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Yeej Thoj Nam Noom Khais

    Post  koojziagkabzaug on 4th March 2010, 6:57 am






    YEEJ THOJ NAM NOOM KHAIS

    Cov lug lwm txoj kev khiav tawm

    Thaum hnov zoj ____________ tub r-og nyab laj
    kwv phom daj ____________ zov txhua txoj kev
    Hmoob siab ntev____________ nce roob toj txhab
    hla roobNnab_______________ mus rau Paj Xas
    tshwm Npows Kas ___________nyob rau sab Thaib
    ho tig saib ____________ rau sab Nas Nyaus
    zoov tuab txaus_________Hmoob khiav hla nkaum
    txawm luag caum ____________Hmoob kuj hla dhau
    los tshwm rau______________ lub nroog Paj Xoos
    Thaib muab koos_______________ xa rau Vib Nais
    tig rov hais________________ cov nyob Nong Qhais
    tag tub ntxhais__________poj niam txiv neej
    txhua txhua leej__________ txom nyem kawg siab
    ntuj tsaus nciab____________ los nag tsij tsuaj
    cov hmoov muaj __________ ces pw tsev ntoo
    lawv tau zoo _____________ thiab tsis kho siab
    nyob tsw ntxhiab _____________ tsis muaj tsev dej
    npaum cog nplej____________ khawb qhov faus quav
    yeej kawg ntuav_____________ thaum koj mus ze
    nyob ua ke_______________ muaj neeg coob tuaj
    thiaj puas tsuaj ___________ muaj neeg tuag ntau
    cov me yau_____________ tshaib plab tuag tas
    thaum qhoos kas_____________ tseem tsis tau ti
    thiaj sib ntxhi ______________ npaj khiav rov qab
    ev loo hnab____________ rov hla dej naj
    Lis Tsom tshaj___________ kom Hmoob txhob khiav
    hais txhais ntsia-v ______________ hauv xov tooj cua
    thiaj li ua ________________ ib co nyob ruaj
    xya caum cuaj __________Hmoob pib nyuaj siab
    muaj nyiaj txhiab__________ tsis muaj tsoos yuav
    nphob xwb xuav _____________ ntuj teb ntsiag to
    caij ntuj no _________________ tsis muaj pam vov
    kuj ho hnov _____________ tias cov nyob Thaib
    nom tswv faib_____________ khoom noj khoom haus
    kuj ntau txaus______________ pam vov chaw pua
    faib txhij txhua _______________ tsis ua tau noj
    tub r-og zoj _______________ ntes xa mus kawm
    thiaj khiav tawm _____________kom dim txoj sia
    nrog khaws cia______________ tau ua dab neeg hais os lawv.




    Tus sau: Vaj Ntxoov L.



    'Ntxoov L. Vaj' date='28 April 2009 - 01:32 AM'


    LUB NEEJ TAWG R-OG NYOB YEEJ NOOM QHAIS

    Yeej Noom Qhais yog ib thaj chaw txais cov neeg tawg r-og tawm hauv lub teb chaws nplog los rau sab Thaib teb tom qab tsov r-og Vietnam. Pib thaum nrab hli lub 5 hlis xyoo 1975. Cov neeg los hla dej Naj Khoos txij li vaasvam Loei nqis los txog rau sab asphaws Boew Kang vaasvam Noom Qhais, cov neeg hlab ntu dej no puav leej raug xa los rau lub yeej Nam Phong, thaum lub yeej Nam Phong puv tsis muaj chaw txaus lawm ces cov neeg tawg puv ntawd thiaj li khuam nyob rau Noom Qhais. Ntu sij hawm lub 5 hlis 1975 txog rau lub qab xyoo 1976. Cov neeg tawg nyob Noom Qhais tseem sib txiv nyob rau ntawm Tosxosdos, thaj chaw rau cov tub r-og zov ciam teb. Nyob deb ntawm lub nroog Noom Qhais li 6 km sab qab teb raws txoj kev Nong Khai Boew Kang. Thaj chaw ntawd nws tsuas dav li 1km xim fab xim meem xwb tab sis ntim neeg coob txog li ntawm 7.000 tus neeg.

    Thawj zaug pom tib neeg rub tsev ntaub yas nyob cuag nceb lau qaib. Tsev ntaub yas lub tib lub npaum ib lub toj ntxas nyob puv nkaus lub tiaj. Lub tsham thawj 5 hlis txog 8 hlis yog lub caij ntuj nag nqis nyob sab ntuj ntawd. Tsuj qhov twg los dej xwb. Txhua tus neeg los rau thaj chaw no puav leej ntsib kev txom nyem muaj mob plab dias hau. Qhov tseem ceeb yog tsis muaj cov tsev dej txaus rau sawv daws tawm rooj. Sawv daws kav xyeem lub caij tsaus ntuj es mam khawb qhov faus quav npaum cog taum. Kaj ntug hnub tawm ces yeej pom sawv daws tso zis hlab tej nyom tuag ntuas rau txhua qhov chaw. Nkag rau tom hav fab, yeej xaiv tsis tau ib taws zoo tsuj uas yuav tsis muaj quav. Lub caij ntawd mas tsuas pom yoov ya npaum ntab muv tsiv. Ib hlis tom qab sawv daws ua tau cov tsev dej ntau lub lawm, txoj kev xos liam mam ib nyuag khees me ntsis tuaj.

    Txhua hnub txhua hmo mas tsuas hnov neeg tuag yam tsawg ob los peb leeg. Sawv daws nyob mas tsuas hnov nyiav zom zaws qhov tuaj, ib pliag nyiav zom zaws qhov tuaj ua rau txias siab kawg nkaus. Yeej tsis paub tias yuav dim txoj sia rau ntawm thaj chaw ntawd li. Qhov kev muaj mob muaj nkeeg muaj ploj muaj tuag ntawd vim sawv daws yoog tsis tau haum tej huab cua, tsis muaj kev huv txaus thiab tsis muaj zaub mov noj txaus.

    Nyob hauv nruab nrab ntawm thaj chaw ntaws nws muaj 4 lub tsev loj thiab xov vaj loog ncig. Cov nyob hauv 4 lub tsev loj ntawd, tsuas yog tsis ntub nag xwb tab sis txom nyem tsev plhob heev vim cov tsev dej tsis txaus rau cov neeg. Cov neeg los tshiab tseem tsis tau txawj siv tsev dej ces tso quav pleev lub tsev tsis tau chaw tsuj chaw zaum li. Cov dej yuav siv los yaug ntxuav los yeej muaj tsis txaus mas yog ib yam xos liam kawg nkaus nyob rau hauv lub vaj loog hauv. Nyob hauv lub loog ntawd kuj xov ntom, tsis raug cua thiab mas yim huab sov heev lub caij tshav ntuj.

    Cov tawm mus ua tsev ntaub yas pw rau sab loog nraud, ib tsis puv tau chaw dim pa me ntsis tab sis kuj ho pw tsau dej tsau nag xwb. Thaum cov neeg los nyob coob lawm sawv daws kuj muab faib ua 8 pawg kom yooj yim rau kev tuav ntaub ntawv ua hauj lwm rau cov pej xeem sawv daws. Lub caij ntawd Lis Nom Tsas yog tus raug sawv daws xaiv los ua tus coj cov hmoob nyob ntawm lub yeej no.

    KEV TXOM NYEM NYOB YEEJ NOOM QHAIS

    Thawj 2 lub hlis uas nom tseem tsis tau tuaj pab khoom noj khoom haus rau tsoom hmoob tawg r-og cov los nyob Noom Qhais, yeej yog ib yam nyuaj kawg nkaus tsis pom qab yuav rau txoj sia rau qhov twg. Kev muaj mob muaj tuag coob zuj zus, thiaj ua rau ib nrab Hmoob txiav siab khiav rov qab mus Nplog lawm.

    Cov thawj tseem ceeb uas txiav siab rov qab mus Nplog muaj xws li:
    Thoj Xaiv Tub, Hawj Soob Nchai, Yaj Nkaj Vwj, Yaj Xaiv Txiab thiab Tsom Lis. Thaum cov neeg no rov qab mus txog tim Vientiane lawm Tsom Lis thiaj li tau mus tshaj tawm xov tooj cua Vientiane tias muaj kev txom nyem loj heev nyob sab Thaib ua rau cov Hmoob txom nyem twb tuag yuav tas thiaj ua rau ib tsoom Hmoob cov npaj siab yuav khiav tawm lub teb chaws tau nres tas ib lub sij hawm. Tsis ntev tom qab uas Tsom Lis tau tshaj xov tooj cua tas, Lee Teck kuj tuaj hu kom cov Hmoob yuav tsum rov qab. Nws tsav ib lub tsheb Zeep tuaj nres rau tim txoj kev ntsuab, nws tawm los mus hais kom sawv daws yuav tsum rov mus vaj mus tsev. Cov Hmoob uas raug Lee Teck lawv cov txiv tub muab puav tua ntawm Heem Hawj tus choj Naj Liv, lawv chim siab rau Lee Teck, lawv kuj muab Lee Teck raws hauv lub vaj loog tawm los nce tsis tsheej tsheb khiav rov mus rau tom nroog Noom Qhais. Tsis ntev ntawd txoj kev cai Koom Sam (communist) pib txhom tej thawj coj tseem ceeb nrog rau Lee Teck tib si. Tsoom Hmoob sawv daws thiaj rov nrhiav kev tawm los hla sab Boew Kang uas ncaj rau Pak San los yam tsis ntshais ploj tsis ntshai tuag.

    Ua ntej cov neeg rua-m yuav txiav siab rov qab mus Nplog, tau muaj ob tug tub sab nyiag Nkaj Vwj Yaj cov nyiaj tas nrho. Cuag li hmoov muaj, Nkaj Vwj Yaj fiv yeem loj heev ob tug tub sab thiaj rov tuaj xauj, Nkaj Vwj cuab kwv tij thiaj li ntes tau ob tug tub sab ntawd. Thaum sawv daws coj ob tug tub sab ntawd mus khawb tau Nkaj Vwj cov nyiaj rov lo sib nrab lawm. Nkaj Vwj thiaj ua ib siab txiav siab nrog cov khiav rov qab.

    NEEG TUAG TSIS MUAJ AV FAUS

    Nyob yeej Noom Qhais lub caij thaum sawv daws nyuam qhuav los nyob tshiab, vim neeg kuj tuag coob heev, cov hla dej Naj Khoos es poob dej tuag los muaj, cov los muaj mob hauv yeej tuag los muaj pua leej coj los faus rau ntawm lub xoom Nplog xwb. Tsis tau ntev txog xyoo thaj chaw ua lub xoom Nplog ncaj kiag ntawm tus tsuam tob nkag rau hauv lub xoom Nplog sab laug sab xis raws ob sab kev ntawd rau tom ze lub xoom hmoob mas ntxa liab vog faus neeg tshiab tshiab qub qub. Tsis paub tus number tias cov hmoob los tuag rau ntu thaum sawv daws nyuam qhuav los nyob tshiab tshiab ntawd muaj coob npaum li cas tab sis thaj av ua lub xoom nplog mas faus Hmoob tuag coob heev rau hauv li ua ntej ua lub xoom nplog rau.

    Tus sau tseem nco txog lub caij uas nws tus kwv Zeb tau tag sim neej rau hauv lub yeej Noom Qhais, thaum sawv daws coj tus kwv Zeb mus faus mas yeej xaiv tsis tau ib qhov av zoo khawb qhov faus li. Lam khawb rau ntawm tej ntug pas dej faus xwb, dej ntau li ntau, ib ke khawb qhov ib ke daus dej pov tseg. Thaum khawb tau lub qhov muab lub hleb tso rau hauv lub hleb ntab nplas li lub nkoj xwb, xav txog tej dab neeg no mas txaus tu siab heev.

    THAIB ZOV TWM RAWS HMOOB NTAUS

    Kwv yees li lub 9 hli los 10 hli 1975, muaj 2 kwv tij Hmoob Ham uas niam no yog ib tug phab ej hmoob tus muaj cov hniav zoo kaws dib ob kwv tij zoo tib lub ntsej muag, nkawv ib leeg ev ib tug me nyuam nrog nkawv ob tug poj niam mus ntxhua khawb ncaws nram liaj. Nkawv kuj ib leeg khaws tau ob peb lub qwj ntsaws rau hauv nkawv hnab tshos. Muaj 6 tus Thaib daum yug twm los muab nkawv puav ntaus thiab raws nkawv nram liaj los ti nkaus rau ntawm tug xoom. Nkawv tab tom taug kev los yuav luag txog ntawm ntug xoom, ncaj cov tsev police station. Ntawd nws muaj ib lub hawv twm nyob ze ntawd. Tus saud tus tij laug thiab nws nkawv tab tom mus ua si ntawm lub tiaj ntawd. Pom neeg khiav haiv hwv thiab tig ntsia 6 tus Thaib raws 2 kwv tij hmoob Ham los txog ntawd. Thaum los ze police station lawm, nkawv ob kwv tij mam tig tiv thaiv nkawv tus kheej. Tus tij laug mas sia ib rab riam ntawm duav. Hos tus kwv tej zaum yuav muaj khauj tsiav hlau nrog nws.

    Thaum 2 tug 2 tug Thaib tauj ib tug hmoob hos ob tug ces tswj lawv cov twm. Cov Thaib nqa ib leeg ib rab qws ntev ib mev luaj dab teg los hom rau ob kwv tij Hmoob ntawd. Thaum Thaib hom mas Thaib hom li yuav ntaus hauv nkawv ko taw, tab sis thaum Thaib ntaus kiag lawm yog Thaib tsom nkawv ob tug me nyuam uas nkawv ev saum nrab qaum ntaus. Nkawv los yeej txawj tes taw thiab, thaum pom ob tug Thaib thooj txhij ib tsaug qws rau tus tij laug, xav tias ntshe yuav raug nws sab heev li los sis nws tus me nyuam nraum nrab qaum ces ntshe yuav tsis muaj txoj sia li. Tab sis nws keej kawg, nws thav ua Thaib ob rab qws dam tas nrho ntawm nws txhais caj npab, nws tseem txeeb tau Thaib ib yav qws los muab Thaib ntaus ntog rau hauv pas dej, ua plaub tes plaub taw tsa tas rau saum ntuj. Tus kwv ob tug ces nws rho khauj tsiav hlau rau ua Thaib tawv tob hau yaws tas ua ntshav ntws sis xwb.

    Tub ceev xwm Thaib saib tsis qoos thiaj tua phom saum ntuj Thiab muab lawv cheem tau. Cov Thaib ces tau mus pw tsev kho mob hos ob kwv tij Hmoob ntawd tau mus tom court tab sis ua ntej nkawv nce tsheb mus hais plaub, nkawv rab riam thiab lub khauj tsiav hlau twb muab cev los rau cov Hmoob coj mus zais lawm. Thaum mus hais plaub txog tom nroog, nkawv rho tau ib leeg ob peb lub qwj hauv hnab tshos los rau nom tswv saib xwb. Nkawv tsis tau nyiag Thaib dab tsi thiab nom tswv kuj los tshawb nkawv tsis muaj ib yam khoom tawv nyob ntawm nkawv lub cev li.

    6 tus Thaib uas los koom ntaus nkawv ob kwv tij puav leej raug ntes kaw, hos ob kwv tij ntawd ces rov qab los tsev yam tsis muaj plaub muaj ntug.

    Tom qab no nkawv los rau Vibnais nyob khej 3 nruab nrab ntawm khoob 1 thiab 2. Hmoov tsis muaj, ib tug tau mus nce ntoo muab me nyuam noog laum nkaub, poob ntoo sav duav lawm. Tshuav ib tug tseem niaj hnub ua movie tuaj rau hmoob txawv teb chaws saib. Nkawv txiav siab tsis tuaj mus txawv teb chaws, thiaj nkag mus nyob xyaw hmoob thaib lawm.

    SIB TXEEB Q MUS NOJ MOV THIAB HAUS MIS

    Nyob yeej Noom Qhais tsis ntev tom qab uas cov Hmoob los nyob, koom haum Food For The Hungry kuj tuaj ua tau ib lub tsev haus mis thiab ua zaub mov rau cov me nyuam Hmoob noj. Muaj ib hnub tus sau tsis tuag ywm, cav mus nrog me nyuam hmoob ua Q noj mov. Sawv daws sib thawb vig voog rau tom ntej vig voog rau tom qab. Muaj 4 tug me nyuam thav hluas saib tus sau nab qa thiab ntxim txaus lawv ntxub heev. 4 tug me nyuam thav hluas ntawd yuav los muab tus sau koom ntaus. Tus sau paub tias sib ntaus los yuav raug mob dawb thiab nws yuav tsis tau txiaj ntsim dab tsi. Yus ib leeg lawv muaj peb plaub leeg, cia hais lus zoo thiab nyoo lawv xwb thiaj tsis muaj teeb meem.

    Tus sau tau cev lus rau cov tub ua hauj lwm saib zaub mov, qhia txog cov xwm txheej uas cov thav hluas yuav muab tus sau quj kua txob, kuj ua rau cov me nyuam thav hluas ntawd plam tsis tau mov noj vim lawv tsim teeb meem. Txij thaum ntaws los pab me nyuam thav hluas ntawd ciaj yeeb ncuab rau tus sau, ua rau tus sau tseg ncua txoj kev mus zov lawv tej mov noj tsis mus ib zaug ntxiv li lawm. Niam no pom cov ntsej muag tseem nco tau lub caij thaum s/d yuav muaj kev sib tawm tsam. Tab sis ntseeg tias tsuas yog tus sau thiaj tseem nco tau lawv tus puav xwb hos cov ntawd ces tsis nco txog tus sau ib qho li lawm.

    UA THAIB ZOG

    Thaum sawv daws los nyob tus, nom tswv kuj muab kev yooj yim tso neeg tawm yos ywj siab, cov Hmoob sawv daws kuj muaj cuab kav tawm mus nrhiav zog ua tsis hais tom nroog los sis ruab liaj nruab teb. Tus sau tseem nco lub caij sawv daws mus ua Thaib zog luaj teb thiab khawb ntswg liaj. Txawm tias mus ua luag qhev tau nyiaj me me xwb los kuj lom zem, tawm mus ncig rau tej zos Thaib ib qho dhau qho. Feem ntau cov Hmoob kuj mus ua zog ti nkaus rau Phong Mixai thiab Boen Kang.

    Cov Thaib los lawv yeej paub tias Hmoob yog ib cov neeg ncaj ncees thiab rau siab ua hauj lwm. Kev luaj teb ntov ntoo ces yog Hmoob txoj hauj lwm uas Hmoob yeej ua tas niaj tas xyoo hauv lub teb chaws Nplog. Thaum los nyob sab Thaib es ho tau mus ua Thaib zog los Hmoob yeej txawj luaj teb thiab rau siab heev ces cov Thaib kuj tuaj nrhiav Hmoob mus ua zog tsis so.

    Qhov tseem ceeb, luag neeg Thaib ces paub txog txoj cai tias yog luaj teb es cov neeg zov xyoob ntoo roj tsuag tuaj txhom tau ces nws yog txim yog thuv xwb, yeem ntiav cov Hmoob mus luaj teb ntov ntoo rau lawv. Yam ib yog lawv tsis tau siv lub zog luaj thiab ntov, yam ob yog tiv thaiv lawv tus kheej txawm tias yog koos-pam-maib tuaj ntes los kom ntes tau Hmoob mus kaw xwb. Muaj zaum puav sawv daws mus luaj teb tag tus tswv kuj tsis kam them nyiaj los muaj.

    CUAB HLUA THIAB KHAWB NAS

    Nyob yeej Noom Qhais, lub 12 hlis mas no tshaj plaws, sawv ntxov nws twb muaj taus te khov taus ice. Tus sau tseem nco qab tias txhua tag kis tseem tau sawv ntxov mus suav hluas raws tej ntswg liaj, vim nws muaj cov nas tsuag loj loj noj Thaib tej nplej liag. Thaib luag muaj noj muaj haus lawm ces luag kuj tsis cuab cov nas tsuag ntawd heev. Me nyuam Hmoob mas nyiam mus cuab hlua raws ntswg liaj. Txhua tag kis tom qab Thaib hlais nplej tas ces sawv daws mus cuab nas yam lom zem. Tus sau tseem nco tias muaj ib tag kis los te, nws no heev, twb tsis muaj khau qhwv rau, rau khau khiab xwb los tseem cav mus suav hlua puag nram liaj, mus mus ib chim ko taw txhav tas, xyov khau twb plam khau thaum twg twb tsis hnov. Ko taw mas mob ntsim npaum taw yuav dam.

    Ntaus zaus cov pob luaj nyob tom Thaib tej liaj, muaj muaj qhov nas, ces Hmoob tsis leem cai kiag, kuj pab muab tej pob luaj ntaws khawb ua tiaj tas rau Thaib tau ua liaj. Zaum khawb tau nas kuj muaj, zaum khawb tau nab kuj muaj, muaj tej zaum mus tsheej hnub khawb tsis tau dab tsi li los muaj. Cov zes liaj tom qab xoom tshiab thoob lub tiaj nrag ntawd, mas Hmoob lais txhua. Tej me pob luaj uas muaj qhov nas ces Hmoob muab khawb tiaj tas feem ntau.

    ROV MUS SAIB XOOM TSHIAB

    Tus sau thiab tsev neeg twb tawm khiav hauv yeej Noom Qhais Tosxosdos mus rau yeej Vibnais thaum lub 7 hlis xyoo 1976 lawm. Lub caij ntawd lub xoom Nplog tseem tab tom pib ua txog tog thiab ib cov nplog twb pib nkag los nyob lawm. Ntawm lub xoom Hmoob tseem tab tom pib nrau xwb ces tus sau tsev neeg khiav los rau Vibnais. Nrab xyoo 1978, tus sau tau nyiag kev pem Vibnais rov tuaj saib lub yeej Noom Qhais. Tus sau tau tuaj nrog Tub Tsob Hwb Nyiaj Nkaub Hawj tus kwv Tsav Xyooj Hawj ua si nyob rau xoom Noom Qhais. Lub caij ntawd tus sau tseem yog me nyuam nab qa xwb, mus twg los twg los kuj tsis tau them nqi tsheb ntau. Tej Thaib khiav taxi taug kev los lawv siab kuj zoo kawg li thiab, zaum muaj nyiaj kuj muab nqi tsheb rau lawv zaum tsis muaj los kuj ua zoo hais tias tsis muaj nyiaj thov lawv zam.

    Tus sau tseem nco txog lub caij yuav tsaus ntuj mas tej hluas nkauj hluas nraug sib yaum tawg kev ncig lub yeej tsheej pab xwb. Tsaus ntuj, tus sau thiab phooj ywg Tsav Xyooj Hawj wb tau nce mus rau puag saum lub naab pab pas, nuam yaj thiab lam cua yam kho siab.

    Lub qab xyoo 1978, tus sau muaj ib tug tij laug tau los sab Nplog teb los tshwm rau Noom Qhais, tus sau kuj tuaj muab tus tij laug ntawd nyiag kev tawm khiav los nyob Vibnais yam tsis muaj hmab dawm tes hlua dawm taw. Muab xav txog lub neej qub nyob rau tej yeej tawg ro g ntawd mas kuj tseem kho siab hauj sim. Niam no phooj ywg Tsav Xyooj Hawj nyob teb chaws Nkis Yas. 22 lub xyoos lawm uas tsis tau sau ntawv sib nug moo li. Yog nws muaj caij tau tuaj hauv cab sab no es ho nco txog tej qub phooj ywg no ho sau tuaj teb. Tus sau tseem nco txog lub caij thaum sawv daws kawm ntawv nyob Nplog teb. Phooj ywg Tsav Xyooj Hawj tus kwv Ntxhos wb yog ob tug uas kawm ntawv tsis tshua keej, thiab nais khu tab muab wb los sib ntswj pob ntseg tim kab daas rau sawv daws ntsia. Phooj ywg Ntxhos thiab nkawv tus kwv Khwb los puav leej nyob teb chaws Nkis Yas.




    Yeej Thoj Nam Noom Khais ( Yeej tshiab)

    Koom Txoos Kas Tos Liv mus tsim tsev kawm ntawv rau cov Hmoob Thoj Nam nyob Noom Khais.





    Tsev kawm ntawv Noom Khais





    Cov xib hwb qhia ntawv nyob Nong Khais.




    Tshav caws pob Noom Khais.



    [/color]

      Current date/time is 11th December 2016, 6:45 am