google-site-verification: googlefbfddf59e706b96b.html

Latest topics

» KHAWV KOOB
by koobpovtxuj 30th September 2017, 4:29 pm

» Koobpovtxuj.
by koobpovtxuj 25th September 2017, 10:00 am

» tus Tswv Cheem Rog yog leeg twg ?
by koobpovtxuj 13th August 2017, 9:03 pm

» Nco txog Phas Nyas Tub Npis Lis Foom Txiaj Ntsim.
by Admin 1st August 2017, 5:12 pm

» Kiab toom lauj npliaj yob lub qub tsev.
by Admin 1st August 2017, 5:04 pm

» Kawm LUS ROV
by koobpovtxuj 10th July 2017, 1:54 pm

» Hmong dance hiphop 2017 [ dance zoo siav heev li]
by zabyaj 15th June 2017, 12:05 pm

» Ua zaub tsib
by koobpovtxuj 3rd June 2017, 10:33 pm

» Keeb Kwm Hmoob mus nyob Guyane
by koobpovtxuj 25th May 2017, 4:13 pm

» kuv cov duab.
by koobpovtxuj 23rd May 2017, 3:47 am

» pajhuam nrhiav mekabnoog tuaj ploj dua twg lawm
by PajYeebLaim 19th May 2017, 2:52 pm

» Xiong Chang
by koobpovtxuj 1st May 2017, 5:12 am

» 22 LEEJ NEEG HMOOB FOOB XEEB XYOOJ & HMONG TEBCHAWS
by Liajntsuab 30th April 2017, 7:00 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    TXIS MEJ KOOB (Niam txiv tog ntxhais)

    Share
    avatar
    koojziagkabzaug
    Moderator
    Moderator

    Messages : 3532
    Date d'inscription : 2010-02-28

    TXIS MEJ KOOB (Niam txiv tog ntxhais)

    Post  koojziagkabzaug on 5th March 2015, 1:38 pm


                                                TXIS MEJ KOOB (Niam txiv tog ntxhais)

                                                                     Hais rau txiv laj zeej

    1/.Yawg (B) thov koj mog, yeeb vim txheej tshoj thaum ub, poj tau rawv kab yawm tau nrhawv kev los ntuj thaum ntev, yawg (A) nws muaj ntxhais hlob tiav ces, ntxhais thiaj yuav mus ua luag sev, yeeb vim txheej tshoj thaum I, poj tau rawv kev yawm tau rawv kab los ntuj tom qab yawg (A) nws muaj ntxhais hlob tiav npab, ntxhais thiaj yuav mus ua luag nyab rau saum qhua neej qhua tsav.

    2/.Hnub no niam txiv tom ub yuav coj nws ntxhais nws vauv rov tuaj fim yawg (A) ua niam ua txiv, tuaj nrog nws tis nruab tis ze, tis neej tis tsav, yog li nws tsis pom qab vam khom txog leej twg, thiaj yuav vam txog koj yawg (B) tuaj ua txiv laj zeej. Txawm tias koj muaj koj caij qas los rawm num, caij qoob los raws loo los yuav vam koj tso qa tso num tseg, tso laj tso kam cia tuaj nrog yawg (A) leg nws rooj tshoob rooj kos.

    3/.Koj ncig lis yeev tuaj txog niam txiv tom no lub qab plaj txuas, nws plaj tshoob kev kos, kev neej kev qhua los yuav vam koj tuaj nrog xyuas. Koj ncig lis yeev tuaj txog niam txiv tom no lub qab plaj xab, nws plaj tshoob kev kos, kev neej kev tsav los yuav vam koj tuaj nrog tab.

    4/.Yuav vam koj ua lub siab ntuj lis ntev coj koj lub phlu txiaj phlu ntsim tuaj ntaiv hnub ntaiv hli, tuaj nrog leg nws plaj tshoob mus kom thoob, ntos nws kev kos mus kom kaj, kom tsheej neej tsheej tsa, koj lub txiaj ntsha peb yuav nqa. Yuav vam koj tuaj nrog leg nws plaj tshoob mus kom thoob, ntos nws kev kos mus kom nto ntsis, muab nws ntxhais nws vauv txis kom tsheej cuab ntseg yim, koj tus txhiaj ntsim ces peb yuav ris mus ib sim, thov ua koj ib lub tsaug yim no auv…..
     
                                                                           Hais rau mej koob

    2/.Hnub no niam txiv tom ub yuav coj nws ntxhais nws vauv rov tuaj fim yawg (A) ua niam ua txiv, tuaj nrog nws tis nruab tis ze, tis neej tis tsav, yog li nws tsis pom qab vam khom txog leej twg, thiaj yuav vam txog koj yawg (B) tuaj ua txiv tuam mej koob. Txawm tias koj muaj koj caij qas los rawm num, caij qoob los raws loo los yuav vam koj tso qa tso num tseg, tso laj tso kam cia mus nrog yawg (A) leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab tsev loog, nws plaj tshoob los yuav vam koj tuaj nrog thoob. Koj ncig lis yeev tuaj txog niam txiv tom no lub qab plaj txos, nws txoj kev kos los yuav vam koj tuaj nrog ntos.

    1/.4/. Hais ib yam li hais rau laj zeej
                                                                                Tshaij phaj

    2/.Hnub no niam txiv tom ub yuav coj nws ntxhais nws vauv rov tuaj fim yawg (A) ua niam ua txiv, tuaj nrog nws tis nruab tis ze, tis neej tis tsav, yog li nws tsis pom qab vam khom txog leej twg, thiaj yuav vam txog koj yawg (B) tuaj ua tub tshaij phaj. Txawm tias koj muaj koj caij qas los rawm num, caij qoob los raws loo los yuav vam koj tso qa tso num tseg, tso laj tso kam cia tuaj nrog yawg (A) leg nws rooj tshoob rooj kos.

    3/.Koj ncig lis yeev tuaj txog niam txiv tom no lub qab plaj txuas, nws plaj tshoob kev kos, rooj noj rooj haus los yuav vam koj tuaj nrog ua. Koj ncig lis yeev tuaj txog niam txiv tom no lub qab plaj, nws plaj tshoob kev kos, rooj noj rooj haus los yuav vam koj tuaj nrog npaj.

    1/. 4/. Hais ib yam li hais rau laj zeej
                                                                                  Tub tuav txiaj

    2/.Hnub no niam txiv tom ub yuav coj nws ntxhais nws vauv rov tuaj fim yawg (A) ua niam ua txiv, tuaj nrog nws tis nruab tis ze, tis neej tsis tsav, yog li nws tsis pom qab vam khom txog leej twg, thiaj yuav vam txog koj yawg (B) tuaj ua tub tuav txiaj. Txawm tias koj muaj koj caij qas los rawm num, caij qoob los raws loo los yuav vam koj tso qa tso num tseg, tso laj tso kam cia tuaj nrog yawg (A) leg nws rooj tshoob rooj kos.

    3/.Koj ncig lis yeev tuaj txog niam txiv tom no lub qab plaj txuas, nws plaj tshoob kev kos, pib deg pib caw los yuav vam koj tuaj nrog nws tuav. Koj ncig lis yeev tuaj txog niam txiv tom no lub qab plaj tse, nws plaj tshoob kev kos, pib deg pib caw los yuav vam koj tuaj nrog ce.

    1/. 4/. Hais ib yam li hais rau laj zeej

                                 COV LUS TEB NTAWM COV TUB TSHOOB, KOS, (tog ntxhais) (1)

    1/. Sawv tsis txhob pe lauj.., yeeb vim txheej tsho thaum ub, poj tau nrhawv kev yawm tau nrhawv kab, ntxhais hlob tiav npab ntxhais thiaj yuav tau mus ua luag nyab. yog li yawg (A) muaj ntxhais tsawb rau saum tshoob saum kos, nws thiaj yuav vam khom txog kuv tuaj ua (Laj zeej, mej koob, tshaij phaj, tub tuav txiaj), nrog ntoj nws plaj tshoob kev kos, tab sis zaj twg kuv twb paub tsis txhua, ntshai twb tuaj pib tsis tau lub qab mus nto lub luag, tsav twg twb txawj tsis txhij, ntshai twb tuaj pab tsis tau lub paus nto lub ntsis, ntshai twb ua tsis tau raws li nws lo lus txib es tsis txhob pe..

                                           TIAM MEJ KOOB (Niam txiv, tog ntxhais)

                           Hais rau txiv laj zeej, mej koob, Tshaij phaj, Tub tuav txiaj, niam txais ntsuab.

    1/.Yawg (B) ua tsaug mog, yeeb vim txheej tshoj thaum ub, poj tau nrhawv kab yawm tau nrhawv kev los ntuj thaum ntev, yawg (A) muaj ntxhais hlob tiav ces, ntxhais thiaj tau mus ua luag sev. Yeeb vim txheej tshoj thaum I, poj tau nrhawv kev yawm tau nrhawv kab los ntuj tom qab, yawg (A) muaj ntxhais hlob tiav npab, ntxhais thiaj tau mus ua nyab rau saum neej saum tsav.

    2/.Hnub no niam txiv tog tom ub, thiaj tau coj nws ntxhais nws vauv rov tuaj fim yawg (A) ua niam ua txiv, tuaj nrog nws tis nruab tis ze, tis neej tsis tsav, yog li nws tsis pom qab vam khom txog leej twg, thiaj yuav vam txog koj yawg (B) tuaj ua txiv laj zeej  txiv mej koob, Tshaij phaj,  Tub tuav txiaj, niam txais ntsuab. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog yawg (A) leg nws rooj tshoob rooj kos, koj tuaj muab niam txiv tom ub tom no, plaj tshoob ntos mus thoob, kev kos ntos mus nto, niam txiv ob tog thiaj tau txoj kev ntoj.

    3/.Nyob li yawg (A) txawj ua neej ces, saum rooj yuav npaj kom tau ib tug zoo kab phaj, ib rawg zoo ntxuag los rau koj khaws, kaum rooj yuav npaj kom muaj ib pib zoo dej pas zoo caw xaws los rau koj tsaws, tab sis yawg (A) los ua lub neej tsis xauv nto, nws twb npaj tsis tau ib tug zoo kab phaj, ib rawg zoo ntsuag los rau koj chob, twb npaj tsis tau ib kab zoo luam yeeb rau koj xob, twb ua tsis tau koj tsaug ib los.

    4/.Koj tuaj muab niam txiv ob tog tis tau neej tau tsa, muab tus plaj tshoob leg mus thoob, kev kos ntos mus nrog kaj, koj tus txiaj ntsha peb yuav nqa. Koj tuaj muab nws ntxhais nws vauv tis tsheej cuab ntseg yim, muab tus plaj tshoob leg mus thoob, kev kos ntos mus nto ntsis, koj tus txhiaj ntsim peb yuav ris mus ib sim, peb tsuas ua koj ib los tsaug yim xwb no auv..

    5/.Yog tias hnub qab nram lub ntsis, koj tsis muaj tub muab nyab, muaj ntxhais qhua los tseg, yog koj muaj tub muab nyab, muaj ntxhais qhua, koj muaj tus plaj tshoob raug los poob, koj vam tsis txog peb tsev kwv tij txiv tub los tseg, yog koj vam txog peb tsev kwv tij txiv tub, peb muaj tus, muaj zoo laj lim mus paub thoob, nws yuav tuaj ntaus koj ntej lis ntiag mus nrog thoob koj rooj tshoob.Yog tias peb tsis muaj tus tab koob mus tsawb txooj, tuaj nrog koj ntis tsis tau lub hnoob los yuav tuaj ntis daim nplooj, tuaj ua tsis tau koj txiv tuam mej koob los yuav tuaj nrog koj xiab tus ceg rooj.

    6/.Yog tias hnub qab nram lub ntsis, koj tsis muaj tub muab nyab muaj ntxhais qhua los tseg, yog koj muaj tub muab nyab muaj ntxhais qhua, koj muaj tus kev kos raug los txog, koj vam tsis txog peb tsev kwv tij txiv tub los tseg, yog koj vam txog peb tsev kwv tij txiv tub, peb muaj tus thoob tsib to nrog, nws yuav tuaj ntaus koj ntej lis ntiag mus nrog ntos koj rooj kos, yog tias peb tsis muaj tus txawj huj mus paub tab, tuaj ua tsis tau tus ncej ru los yuav tuaj ua tus ncej tas, tuaj ntim tsis tau koj ib pob su los yuav tuaj nrog koj tshaij ib lub phaj, nrog koj cheb tus pluas plav, pauj koj tus txiaj ntsha rov tom qab kom tau no es thov ua koj tsaug..auv..

    Cov tub tshoob tub kos yuav ua ib zaug hais xwb los tau, yuav hais ib tug zuj zus los tau, tab sis hais ib yam nkaus xwb.

                                       COV LUS TEB NTAWM COV TUB TSHOOB, KOS, tog ntxhais (2)

    1/. Sawv tsis txhob pe laus.., yeeb vimtxheej tshoj thaum ub, poj tau nrhawv kev yawm tau nrhawv kab, ntxhais hlob tiav npab ntxhais thiaj yuav tau mus ua nyab. Yog li yawg (A) muaj ntxhais tsawb rau saum tshoob saum kos, nws thiaj yuav vam khom txog kuv tuaj ua (Laj zeej, mej koob, tshaij phaj, tub tuav txiaj), nrog ntoj nws plaj ntshoob kev kos, peb tau tuaj muab nws plaj tshoob ntos mus thoob, kev kos ntos mus nto, niam txiv ob tog thiaj tau neej tau tsav, tau kev txheeb kev ze, tau txoj kev ntoj mus tsis nploj.
    2/.Tab sis zaj twg twb paub tsis txhij, twb pib tsis tau lub paus kom nto lub ntsis, tsav twg los twb txawj tsis txhua, twb pib tsis tau lub qab kom nto lub luag, twb tuaj pab tsis tau raws li nws lub siab qhua es tsis txhob pe..
                                               TXIS MEJ KOOB (Niam txiv tog tub).

                                                                         Hais rau txiv laj zeej

    1/. Yawg (B) thov koj mog, yeeb vimtxheej tshoj thaum ub, poj tau rawv kev yawm tau rawv kab los ntuj tom qab yawg (A) muaj tub hlob tiav npab, tub thiaj tau mus yuav nyab. Yeeb vim txheej tsho thaum I, poj tau rawv kab yawm tau nrhawv kev los ntuj thaum ntev yawg (A) muaj tub hlob tiav ces, tub thiaj tuav mus yuav sev, nws tub thiaj tau mus txob poj txob sev los txog vaj txog tsev.

    2/.Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua txiv laj zeej. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab plaj txuas, niam txiv tog ub tog no, plaj tshoob kev kos, kev neej kev qhua, yuav vam koj ua tus mus nrog xyuas. Koj ncig lis yeev tuaj txog niam txiv tom no lub qab plaj xab, niam txiv tog ub tog no, plaj tshoob kev kos, kev neej kev tsav, yuav vam koj ua tus mus nrog tab.

    4/.Luag hais tias, tsis thov koj zog ces yog phooj ywg zog, hnub no niam txiv thov txog koj zog ces yog nyiaj kub zog, yog li nws thiaj yuav vam khom txog koj tuaj ua nws cwj nrig mus kom dhau zoov, tuav nws tes mus kom dhau dej, yuav vam koj coj koj lub phlu txiaj phlu ntsim, mus nrog ntaiv hnub ntaiv hli, mus chawj niam chawj txiv, kom tau neej tau tsav, kom tshoob tsheej tshoob kos tsheej kos, kom niam txiv ob tog tau txoj kev ntoj. Tus rauj thaiv ces yuav raug rau saum koj, tab sis tus roj ntsha ces yuav raug rau saum niam txiv no auv..  

    5/.Yuav vam koj ua lub siab ntuj ntev mus muab niam txiv tom ub tom no, plaj tshoob ntos mus kom thoob, kev kos nta mus kom kaj, koj tus txiaj ntsha ces nws yuav nqa. Yuav vam koj ua lub siab ntuj ntev mus muab niam txiv tom ub tom no, plaj tshoob leg kom thoob, kev kos lis mus kom nto ntsis, koj lub txhiaj ntsim ces nws yuav muab ris, es thov ua koj ib los tsaug yim no auv....

                                                                      Hais rau mej koob

    2/. Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua txiv mej koob. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab tsev loog, niam txiv tog ub tog no, plaj tshoob los yuav vam koj ua tus mus nrog thoob. Koj ncig lis yeev tuaj txog niam txiv tom no lub qab plaj txos, niam txiv tog ub tog no, plaj kos los yuav vam koj ua tus mus nrog ntos.

    1/. 4/.5/. Hais ib yam li hais rau laj zeej
                         
                                                                     Hais rau tshaij phaj.

    2/. Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua tub tshaij phaj. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab tsev txuas, niam txiv tog ub tog no, plaj tshoob kev kos, rooj noj rooj haus, yuav vam koj ua tus mus nrog ua. Koj yuav ncig lis yeev tuaj txog niam txiv tom no lub qab plaj xab, niam txiv tog ub tog no, plaj tshoob kev kos, rooj noj rooj haus, yuav vam koj ua tus mus nrog nta.

    1/. 4/.5/. Hais ib yam li hais rau laj zeej





                                                                        Hais rau tub tuav txiaj.

    2/. Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua  tub tuav txiaj. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab tsev txuas, niam txiv tog ub tog no, plaj tshoob kev kos, pib deg pib caw, yuav vam koj ua tus mus nrog tuav. Koj yuav ncig lis yeev tuaj txog niam txiv tom no lub qab plaj tse, niam txiv tog ub tog no, plaj tshoob kev kos, pib deg pib caw yuav vam koj ua tus mus nrog ce.

    1/. 4/.5/. Hais ib yam li hais rau laj zeej

                                                                       Hais rau tub phij laj.

    2/. Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua tub phij laj. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab plaj txuas, niam txiv tom no, yuav vam koj mus phim nraug vauv mus nrog tiam nws kev neej kev qhua. Koj ncig lis yeev tuaj txog niam txiv tom no lub qab plaj xab, niam txiv tog no, yuav vam koj mus phim nraug vauv mus nrog tiam nws kev neej kev tsav.

    1/. 4/.5/. Hais ib yam li hais rau laj zeej

                                                                        Hais rau niam txais ntsuab.

    2/. Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua niam txais ntsuab. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos.

    3/.Koj yuav ncig lis yeev tuaj txog niam txiv tom no lub qab plaj txuas, niam txiv tom no nkauj nyab ces yuav vam koj mus nrog xyuas. Koj yuav ncig lis yeev tuaj txog niam txiv tom no lub qab plaj, niam txiv tom no nkauj nyab ces yuav vam koj mus nrog kav.

    1/. 4/.5/. Hais ib yam li hais rau laj zeej


                                                COV LUS TEB NTAWM COV TUB TSHOOB, KOS, tog tub (1)

    1/. Sawv tsis txhob pe laus.., yeeb vim txheej tshoj thaum ub, poj tau nrhawv kab yawm tau nrhawv kev, tub hlob tiav ces, tub thiaj yuav tau mus txob poj txob sev, yog li yawg (A) muaj tub mus txob poj txob sev los txog vaj txog tsev, nws thiaj yuav vam khom txog kuv tuaj ua (Laj zeej, mej koob, tshaij phaj, tub tuav txiaj, tub phij laj, niam txais ntsuab), mus nrog ntoj nws plaj ntshoob kev kos, cia peb mam mus nrog laj niam laj txiv, saib niam txiv tom ub puas yuav muab nws txoj kab tshoob rau peb thoob, txoj kev kos rau peb nto, tus rauj thaiv ces yuav raug rau saum peb, tab sis tus roj ntsha ces tseem yuav raug rau saum niam txiv no auv... es sawv tsis txhob pe mog…


                                             TIAM MEJ KOOB (Niam txiv tog tub, cov tub tshoob).

       Hais rau txiv laj zeej, txiv tuam mej koob,  tub tshaij phaj, tub tuav txiaj, tub phij laj, niam tais ntsuab

    1/. Yawg (B) ua tsaug mog, yeeb vim txheej tshoj thaum ub, poj tau rawv kev yawm tau rawv kab los ntuj tom qab yawg (A) nws muaj tub hlob tiav npab, tub thiaj tau mus yuav nyab. Yeeb vim txheej tshoj thaum I, poj tau rawv kab yawm tau nrhawv kev los ntuj thaum ntev, yawg (A) nws muaj tub hlob tiav ces, tub thiaj tuav mus yuav sev, nws tub thiaj tau mus txob poj txob sev los txog vaj txog tsev.

    2/.Hnub no yawg (A) ua niam ua txiv tsis pom qab vam khom txog leej twg, thiaj yuav vam txog koj yawg (B) mus ua txiv laj zeej, txiv tuam mej koob, tub tshaij phaj, tub tuav txiaj, tub phij laj, niam txais ntsuab. Txawm tias koj yuav muaj koj caij qas los rawm num caij qoob los rawm loo los yuav vam koj tso qav tso num tseg tso laj tso kam cia tuaj nrog coj yawg (A) nws tub nws nyab rov mus fim niam txiv tog tom ub, mus nrog nws tis nruab tis ze, tis neej tsis tsav, leg nws rooj tshoob rooj kos. (hais ib tug zuj zus los tau, ua ib zaug hais los tau)

    3/.Luag hais tias, thov tsis txog koj zog ces yog phooj ywg zog, hnub no peb thov txog koj zog ces yog nyiaj kub zog, yog li koj thiaj tau tuaj ua peb cwj mus dhau zoov, tuav peb tes mus dhau dej, koj tau coj koj lub phlu txiaj phlu ntsim mus nrog ntaiv hnub ntaiv hli, laj niam laj txiv, mus muab niam txiv tom ub tom no, plaj tshoob ntos mus thoob, kev kos ntos mus nto, coj nkauj nyab nraug vauv rov los txog.

    4/.Nyob li yog yawg (A) txawj ua neej ces, saum rooj yuav npaj kom tau ib tug zoo kab phaj ib rawg zoo ntxuag los rau koj khaws, kaum rooj yuav npaj kom muaj ib pib zoo dej pas zoo caw xaws los rau koj tsaws, tab sis yawg (A) twb ua lub neej tsis xauv nto, nws twb npaj tsis tau ib tug me kab phaj ib rawg me ntsuag los rau koj chob, twb npaj tsis tau ib kab zoo luam yeeb los rau koj xob, twb ua tsis tau koj tsaug ib los.

    5/.vam² koj mus muab yawg (A) tus plaj tshoob leg mus thoob, kev kos ntos mus nrog kaj, nws thiaj tau kev kev tsav, koj lub txiaj ntsha ces peb tsev kwj tij txiv tub yuav nqa. Koj mus muab nws tus plaj tshoob leg mus thoob, kev kos ntos mus nto ntsis, muab nkauj nyab nraug vauv tis tsheej cuab ntseg yim, koj tus txhiaj ntsim peb tsev kwv tij txiv tub yuav ris mu sib sim, peb tsuas ua koj ib los tsaug yim xwb no auv...

    6/.Yog tias hnub qab nram lub ntsis, koj tsis muaj tub muab nyab, muaj ntxhais qhua los tseg, yog koj muaj tub muab nyab, muaj ntxhais qhua, koj muaj tus plaj tshoob raug los poob, koj vam tsis txog peb tsev kwv tij txiv tub los tseg, yog koj vam txog peb tsev kwv tij txiv tub, peb muaj tus, muaj zoo laj lim mus paub thoob, nws yuav tuaj ntaus koj ntej lis ntiag mus nrog thoob koj rooj tshoob.Yog tias peb tsis muaj tus tab koob mus tsawb txooj, tuaj nrog koj ntis tsis tau lub hnoob los yuav tuaj ntis daim nplooj, tuaj ua tsis tau koj txiv tuam mej koob los yuav tuaj nrog koj xiab tus ceg rooj.

    7/.Yog tias hnub qab nram lub ntsis, koj tsis muaj tub muab nyab muaj ntxhais qhua los tseg, yog koj muaj tub muab nyab muaj ntxhais qhua, koj muaj tus kev kos raug los txog, koj vam tsis txog peb tsev kwv tij txiv tub los tseg, yog koj vam txog peb tsev kwv tij txiv tub, peb muaj tus thoob tsib to nrog, nws yuav tuaj ntaus koj ntej lis ntiag mus nrog ntos koj rooj kos, yog tias peb tsis muaj tus txawj huj mus paub tab, tuaj ua tsis tau tus ncej ru los yuav tuaj ua tus ncej tas, tuaj ntim tsis tau koj ib pob su los yuav tuaj nrog koj tshaij ib lub phaj, nrog koj cheb tus pluas plav, pauj koj tus txiaj ntsha rov tom qab no es ua koj tsaug auv..

                                       COV LUS TEB NTAWM COV TUB TSHOOB, KOS, tog tub (2)

    1/.Sawv tsis txhob pe laus.,  yeeb vim txheej tshoj thaum ub, poj tau nrhawv kab yawm tau nrhawv kev, tub hlob tiav ces, tub thiaj tau mus txob poj txob sev, yog li yawg (A) muaj tub mus txob poj txob sev los txog vaj txog tsev, nws thiaj yuav vam khom txog kuv mus ua: (Laj zeej, mej koob, tshaij phaj, tub tuav txiaj, tub phij laj, niam txais ntsuab), nrog ntoj nws plaj ntshoob kev kos, peb cov tub tshoob tub kos thiaj tau mus muab niam txiv ob tog tus plaj tshoob ntos mus thoob kev kos ntos mus nto, niam txiv ob tog thiaj tau neej tau tsav, tau kev txheeb kev ze, tau kev thuv kev ntoj…

    2/.Tab sis kuv ces zaj twg los twb paub tsis txhij, twb tsis paub mus pib lub paus kom nto lub ntsis, tsav twg los twb txawj tsis txhua, twb tsis paub mus pib lub qab kom nto lub luag, twb mus pab tsis tau raws li nws lub siab qhua..tus rauj thaiv ces kuj raug rau saum peb cov tub tshoob tub kos, tab sis tus roj ntsha ces yeej yog raug rau saum niam txiv, hnub no peb mus muab plaj tshoob ntos thoob, kev kos ntos nto, cov tau tub nyab rov los txog, tab sis peb mus siv niam txiv me tsiaj mus lawm tsis los, me nyiaj txiag tas lawm ib niag tog, me txhuv mus lawm nqha vaj, me nyiaj txiag lawm nqha nas, twb pab tsis tau raws li nws li siab xav es tsis txhob pe mog..

    Tus sau: Vam Meej Yaj


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    xiongchang
    Moderator
    Moderator

    Messages : 5048
    Date d'inscription : 2012-04-16

    Re: TXIS MEJ KOOB (Niam txiv tog ntxhais)

    Post  xiongchang on 5th March 2015, 8:04 pm

    ......Zaj lug nov....Kuv piav txog....Thaum coj nkauj nyab txog tsev....Nkag qhov rooj....Nrhiav tug neeg lwm qaib....Nrhiav txiv tuam me koob....Lwm mej koob....Phij laj....Ris nra....Niam ua luag....Niam txiv lav tshoob nres kos....Nrhiav tug muaj txij nkawm xwb os?....Yog cov neeg tseem ceeb tshaj plawg....Ntawm lub neej ntag os?....Yuav tau saib xyuas meej pem tias tiag....Tsi dog dig nawb mog.

    ......Luag tej laug....Piav piv ntuj nrag lug tias....Yaj los kib txoob....Xyom hauj....Xyom sem....Ib nqaj nto ntuj....Ib ploog nto ntsis....Cheb plaj tsev qawj....Ntxuav yias to....Tug nkauj xwb....Nrhiav tug....Tsi sem cuab yig....Ib zaug li os?....Tug sem cuab ib zaug lawm....Thov tsi tau ua nawb mog....Yav ntuj thaum....Peb nyob teb chaws nplog....Nroog looj ceeb....Caiv heev os?....Tsi zoo li....[Tam sim no]

      Current date/time is 22nd October 2017, 3:01 pm