google-site-verification: googlefbfddf59e706b96b.html

Latest topics

» KHAWV KOOB
by koobpovtxuj 30th September 2017, 4:29 pm

» Koobpovtxuj.
by koobpovtxuj 25th September 2017, 10:00 am

» tus Tswv Cheem Rog yog leeg twg ?
by koobpovtxuj 13th August 2017, 9:03 pm

» Nco txog Phas Nyas Tub Npis Lis Foom Txiaj Ntsim.
by Admin 1st August 2017, 5:12 pm

» Kiab toom lauj npliaj yob lub qub tsev.
by Admin 1st August 2017, 5:04 pm

» Kawm LUS ROV
by koobpovtxuj 10th July 2017, 1:54 pm

» Hmong dance hiphop 2017 [ dance zoo siav heev li]
by zabyaj 15th June 2017, 12:05 pm

» Ua zaub tsib
by koobpovtxuj 3rd June 2017, 10:33 pm

» Keeb Kwm Hmoob mus nyob Guyane
by koobpovtxuj 25th May 2017, 4:13 pm

» kuv cov duab.
by koobpovtxuj 23rd May 2017, 3:47 am

» pajhuam nrhiav mekabnoog tuaj ploj dua twg lawm
by PajYeebLaim 19th May 2017, 2:52 pm

» Xiong Chang
by koobpovtxuj 1st May 2017, 5:12 am

» 22 LEEJ NEEG HMOOB FOOB XEEB XYOOJ & HMONG TEBCHAWS
by Liajntsuab 30th April 2017, 7:00 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    NKAUJ PLIS POOB QAB CUB

    Share
    avatar
    koojziagkabzaug
    Moderator
    Moderator

    Messages : 3532
    Date d'inscription : 2010-02-28

    NKAUJ PLIS POOB QAB CUB

    Post  koojziagkabzaug on 5th March 2015, 1:45 pm



                                       

    NKAUJ PLIS POOB QAB CUB


    1.Paj tawg siv saub..saub sib lug nkauj es paj tawg niam nkauj lis plig kus tav no, tav no cas caj suab nyob lawm caj suab hos cag suv nyob lawm cag suv es tus caj suab yuav hlav lag luj lis luas mus tim tau cag suv, cag suv yuav hlav lag luj lis luas mus tim tau caj nqeeb es caj nqeeb yuav qhuav nkig lawm tej mus sis nkub, xyoo no niam nkauj lis plig yuav tsim duj lis dheev lawm niam dab taus npau ntub, nws yuav txia lis ntshis ua kab npliaj liag kab xiv xi es yuav los xiv luj lis laws rau tub tij tus yees nthab ces tub tij sawv lis tsees los noj tshais los noj tsis qab, tub tij li nkaus lis hlo cwj xyab yuav mus saib xyab lawm tej txiv muam mab nyob ntuj sua txoj mus kev dav, tub tij ntauj lis tawv mus txog nws yuav muab tus cwj xyab txhos lis ntsho rau txiv muam mab lub mus thaj xyab, nws yuav los duj hau kus txho caug rau txiv muam mab lub qab mus plaj xab, txiv muam mab yuav los muab tub tij tus cwj xyab hlawv tus pa qaug lis lais tuaj rov tom qab ces txiv muam mab yuav los siv loj qhub rau tub tij tias cas nyuj dab los tsis tim, npua tais tsuas tsis qiag uas yuav mus qiag tau niam nkauj lis plig ib lub mus kauj vab no suj.

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas caj suab nyob lawm caj suab hos cag suv nyob lawm cag suv es tus caj suab yuav hlav lag luj lis luas mus tim tau cag suv, cag suv yuav hlav lag luj lis luas mus tim tau caj nqeeb es caj nqeeb yuav qhuav nkig lawm tej mus sis nkuav, xyoo no niam nkauj lis plig yuav tsim duj lis dheev lawm niam dab taus npau suav, nws yuav txia lis ntshis ua kab npliaj liag kab xiv xi es yuav los xiv luj lis laws rau tub viv tus yees tsev ces tub viv sawv lis tsees los haus yeeb los tsis qab yeeb, tub viv li nkaus lis hlo cwj xyab yuav mus ntoj neeb lawm tej txiv muam neeb nyob ntuj sua txoj mus kev deb, tub viv ntauj lis tawv mus txog, nws yuav muab tus cwj xyab txhos lis ntsho rau txiv muam neeb lub mus thaj npleg, nws yuav los duj hau kus txho caug rau txiv muam neeb lub qab mus plaj tse, txiv muam neeb yuav los muab tub viv tus cwj xyab hlawv tus pa qaug lis lais tuaj rov tom tsev ces txiv muam neeb yuav los siv loj qhub rau tub tij tias cas nyuj dab los tsis tim, npua tais tsuas tsis qiag uas yuav mus qiag tau niam nkauj lis plig ib lub mus kauj lev no suj.

    2.Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub tij ntauj lis tawv rov los txog, nws yuav nkaus li hlo rab ko pluaj voom tuaj ntawm npab es yuav mus ua tau plaj qoob tuaj mus nto hav, ua tau qoob siav tuaj mus puv txhab, nws yuav mus tu tau tus txiv pwj npua mus dawb plab, yuav mus cub tau dej cawv qab zib lis liaj xws zib ntab ces li yuav coj los daws tau niam nkauj lis plig lub mus kauj vab no suj.

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub viv ntauj lis tawv rov los txog, nws yuav nkaus li hlo rab ko pluaj voom tuaj ntawm tes, yuav mus ua tau plaj qoob tuaj mus nto peg, ua tau qoob siav tuaj mus puv tsev, nws yuav mus tu tau tus txiv pwj npua mus dawb ceg, yuav mus cub tau dej cawv qab zib liaj xws zib mes ces li yuav coj los daws tau niam nkauj lis plig lub mus kauj lev no suj.

    3.Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub tij yuav los ua qoob ua loo mus raug muaj hos tu tsiaj tu txuv mus raug tau, cas tshuav hneev nthav raug tsis muaj hos hneev nti raug tsis tau, tub tij yuav mus sab laj ncig noog rau kev zej tias, pem ntuj ces txawm li tsi, pem teb ces txawm li cas, kev zej yuav tias, pem ntuj ces txawm lawm caj tsua, pem teb ces txawm lawm caj zeb, caj tsua ces yuav txawm lawm txooj mus ntoo ntsig, caj zeb ces yuav txawm lawm txooj mus ntoo ntab, tub tij li tes lauj qaim lis qho txuas tuaj ntawm duav, lauj nas qaim lis qho ntaj tuaj ntawm npab, nws yuav ntauj lis tawv mus txog, yuav mus ntov lis nrawv txooj mus ntoo ntsig qaug lis yi tuaj mus sib ris, txooj mus ntoo ntab qaug lis lag tuaj mus sib ncag, nws yuav mus muab txooj ntoo ntab phua lis phlawv ua niam mus ob sab, coj los txws tawv tsis txws to txws tawv to tau niam rab hneev nthav muaj ib plus taub ob plus nta ces li yuav coj mus tos tau niam nkauj lis plig tej yas kab rov los daws lawm nws lub mus kauj vab no suj..


    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub viv yuav los ua qoob ua loo mus raug muaj hos tu tsiaj tu txuv mus raug tau, cas tshuav hneev nthav raug tsis muaj hos hneev nti rau tsis tau, tub viv yuav mus sab laj ncig noog rau kev zos tias, pem ntuj ces txawm li cas, pem teb ces txawm li tsi, kev zos yuav tias, pem ntuj ces txawm lawm caj tsua, pem teb ces txawm lawm caj zeb, caj tsua ces yuav txawm lawm txooj mus ntoo ntab, caj zeb ces yuav txawm lawm txooj mus ntoo ntsig, tub viv li tes lauj qaim lis qho ntaj tuaj ntawm npab, lauj nas qaim lis qho txuas tuaj ntawm duav, nws yuav ntauj lis tawv mus poob, yuav mus ntov lis nrawv txooj mus ntoo ntab qaug lis lag tuaj mus sib ncag, txooj mus ntoo ntsig qaug lis yi tuaj mus sib rig, nws yuav mus muab txooj ntoo ntsig phua lis phlo ua niam mus ob txhib, coj los txws tawv tsis txws to txws tawv to tau niam rab mus hneev nti muaj ib plus taub ob plus qeb ces li yuav coj mus tos tau niam nkauj lis plig tej yas kev rov los daws lawm nws lub mus kauj lev no suj..

    4.Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub tij yuav los ua qoob ua loo mus raug muaj hos tu tsiaj tu txhuv mus raug tau, hneev nti los txws tau tiav, hneev nthav los txws tau tag, tub tij yuav mus tos tau kooj ziag tub coj kab teej tum tub tuav npab ncig lis yeev tuaj txog nws lub qab mus plaj xab, tub tij yuav mus tuav tau ncuav plej liag lis nplaum siav lub ncab coj los nrom lis nroos tuaj rau nruab vab, nws yuav nkaus lis hlo rab hneev ntav tuaj ntawm npab ces yuav coj mus tos tau niam nkauj lis plig tej mus yas kab rov los daws lawm nws lub mus kauj vab, tub tij ntauj lis tawv mus txog nram hav, yuav mus tuaj qab ntxas hu niam mus peb los, qaum ntxa hu niam mus peb zag yuav tsis hnov niam nkauj lis plig lub suab ncha ces tub tij li quaj lis lag rais lis lees rov fib vag no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub viv yuav los ua qoob ua loo mus raug muaj hos tu tsiaj tu txuv mus raug tau, hneev nthav los txws tau tag, hneev nti los txws tau tiav, tub viv yuav mus tos tau kooj ziag tub coj ke teej tum tub tuav tes ncig lis yeev tuaj txog nws lub qab mus plaj tse, tub viv yuav mus tuav tau ncuav plej liag lis nplaum siav lub nte coj los nrom lis nroos tuaj rau nruab le, nws yuav nkaus lis hlo rab hneev nti tuaj ntawm te ces yuav coj mus tos tau niam nkauj lis plig tej mus yas kev rov los daws lawm nws lub mus kauj le, tub viv ntauj lis tawv mus txog nram dej es yuav mus tuaj qab ntxas hu niam mus peb zag, tuaj qaum ntxa hu niam mus peb npe yuav tsis hnov niam nkauj lis plig lub suab teb ces tub viv li quaj lis dhe rais lis lees rov fib tse no suj..

    5.Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub tij yuav ntauj lis tawv mus txog tej mus qab nrag, yuav mus tuaj qab ntxas hu niam mus peb npe, tuaj qaum ntxa hu niam mus peb zag yuav tsis hnov niam nkauj lis plig lub suab ncha, yuav hnov dab toj ntxas hais tias, cas ntuj tsim peg nrab hnub txog tav no yog leej twg lub suab hu qhov twg tuaj nis, niam nkauj lis plig yuav teb tias, yog tau ntaj lig thaum ntxov ub nws cev ntaj ntsug qaug lis yeev los mus nws yuav tseg tau nws tub nws kiv nyob tuaj rov tom qab, xyoo no es ntshai yog nws tub nws kiv mus ua qoob ua loo mus puv txhab, mus tua tau ncuav plej liag lis nplaum siav lub ncab es nws yuav tuaj tos tau niam nkauj lis plig rov mus daws nws lub mus kauj vab no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas tub tij yuav ntauj lis tawv mus txogtej mus qab peg, yuav mus tuaj qaum ntxa hu niam mus peb zag tuaj qab ntxas hu niam mus peb npe, yuav tsis hnov niam nkauj lis plig lub suab teb, yuav hnov dab toj ntxas hais tias, cas ntuj tsim peg nrab hnub txog tav no yog leej twg lub suab hu qhov twg tuaj nis, niam nkauj lis plig yuav teb tias, yog tau ntaj lig thaum ntxov ub nws cev ntaj ntsug qaug lis yeev los mus nws yuav tseg tau nws tub nws kiv nyob tuaj rov tom tsev, xyoo no es ntshai yog nws tub nws kiv mus ua qoob ua loo mus puv tsev, mus tua tau ncuav plej liag lis nplaum siav lub ntev es nws yuav tuaj tos tau niam nkauj lis plig rov mus daws nws lub mus kauj le no suj..


    6.Paj tawg siv saub..saub sib lug nkauj es paj tawg niam nkauj lis plig kus tav no, tav no cas niam nkauj lis plig sawv lis tseem ncoj tsho lis tho dab toj ntxas dai lis hlo, nws ncoj tiab lis thawv dab toj ntxas dai lis zawv, niam nkauj lis plig yuav nrog xib xub siav txhais txhais lis npluav sib tw ya los txog lawm tej mus yas kab, yog tau leej twg txws lawm rooj vag, yog tau xeev txwj xeev laus tub txawj lis nquag, tej lauj txiav pos tauj, lauj nas txiav pos ncag los txws lawm rooj vag, qas tsi zov lawm rooj vag yog tau dev txaij dev kuas zov lawm rooj vag, dev txaij dev kuas yuav rua ncauj lis hlo xws lawm ncauj tso, dab toj ntxas saib tsis tseeb ces dab toj ntxas yuav rov lawm tej sib lis hlo no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas niam nkauj lis plig sawv lis tseem nws ncoj tiab lis thawv dab toj ntxas dai lis zawv, nws ncoj tsho lis tho dab toj ntxas dai lis hlo, niam nkauj lis plig yuav nrog xib xub siav txhais txhais lis npluav sib tw ya los txog lawm tej mus yas kev, yog tau leej twg txws lawm rooj loog, yog tau xeev txwj xeev laus tub txawj lis nquag, tej lauj txiav pos tauj, lauj nas txiav pos ncoom los txws lawm rooj loog, qas tsi zov lawm rooj loog yog tau dev txaij dev kuas zov lawm rooj loog, dev txaij dev kuas yuav rua ncauj lis nreb xws lawm ncauj zeb, dab toj ntxas saib tsis tseeb ces dab toj ntxas li yuav rais rov feb no suj..

                               (Yog hais poob qab cub, txog txwm no quas qeej lawm)

    7.Paj tawg siv saub..saub sib lug nkauj es paj tawg niam nkauj lis plig kus tav no, tav no cas niam nkauj lis plig, thaum niam nkauj lis plig tseem ua neej nyob nws ntoo phuam ces yuav ntoo 19 ncab, nws yuav ploog ntuj ploog teb txhua txoj mus hauv kab, niam nkauj lis plig yuav mus ntej niaj kus ntau xyoo nws tus me tsoos maj nyob mus lwj tag, nws yuav rais tsis tau rov los daws nws lub kauj vab, nws tub nws kiv yuav muab tau txoj phuam ntaj suab los tuav nws npab rau lub mus kauj vab es nws li yuav rais tau rov mus fib vag no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas niam nkauj lis plig, thaum niam nkauj lis plig tseem ua neej nyob nws hnav tsoos ces yuav hnav 19 nce, nws yuav ploog ntuj ploog teb txhua txoj mus hauv kev, niam nkauj lis plig yuav mus ntej niaj kus ntau xyoo nws tus me tsoos npuag nyob lwj lis dhe, nws yuav rais tsis tau rov los daws nws lub kauj le, nws tub nws kiv yuav muab tau txoj phuam ntaj suab los tuav nws tes rau lub mus kauj le es nws li yuav rais tau rov mus fib tse no suj..

    7.Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag mus kab zaug yuav tawg qeej lis lees niam mus peb zag, yuav deev tau niam nkauj lis plig nce li hlo lub mus kauj vab, teej tum tub tuav npab yuav los tuav tau niam nkauj lis plig npab rais li lees rov fib vag, yuav rov los daws lawm nws lub mus kauj vab no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag mus kab zaug yuav tawg qeej lis lees niam mus peb npe, yuav deev tau niam nkauj lis plig nce li hlo lub mus kauj le, teej tum tub tuav tes yuav los tuav tau niam nkauj lis plig tes rais li lees rov fib tse, yuav rov los daws lawm nws lub mus kauj le no suj..

    8.Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag tub coj kab teej tum tub tuav npab yuav tuav niam nkauj lis plig npab rais lis lees rov los poob lis nthav rau nws tub nws kiv tej mus qab cais, nws yuav los muab qab cub ncig lawm niam mus peb lwm, muab qaum cais ncig lawm niam mus peb ncig, nws yuav los zaum lis nthua rau tej mus qab cais, yuav los ua rau nws tub nws kiv lub chaws hlub, los ua rau kev zej kev zos lub chaws hais no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag tub coj ke teej tum tub tuav tes yuav tuav niam nkauj lis plig tes rais lis lees rov los txog lis ntua rau nws tub nws kiv tej mus qab cub, nws yuav los muab qab cais ncig lawm niam mus peb ncig, muab qaum cub ncig lawm niam mus peb lwm, nws yuav los zaum lis nthua rau tej mus qab cub, yuav los ua rau kev zej kev zos lub chaws hais, los ua rau nws tub nws kiv lub chaws hlub no suj..

    9.Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag tub coj kab teej tum tub tuav npab yuav tuav niam nkauj lis plig npab rais lis lees rov los poob, nws yuav los muab qab cub zaum mus puv caij hos muab qaum cais zaum mus puv nyoog, nkawm kooj ziag tub coj kab teej tum tub tuav npab yuav coj tau niam nkauj lis plig mus zaum li ntua rau nws tub nws kiv lub qab mus plaj xab, nws yuav los nyob tos tau nws tub nws kiv tus txiv pwj npua mus dawb plab no suj..

    -Paj tawg siv saub..saub sib lug nkauj es paj tawg niam nkauj lis plig kus tav no, tav no cas nkawm kooj ziag tub coj ke teej tum tub tuav tes yuav tuav niam nkauj lis plig tes rais lis lees rov los txog, nws yuav los muab qab cais zaum mus puv nyoog, muab qaum cub zaum mus puv caij es nkawm kooj ziag tub coj ke teej tum tub tuav tes yuav coj tau niam nkauj lis plig mus zaum li ntua rau nws tub nws kiv lub qab mus plaj tse, nws yuav los nyob tos tau nws tub nws kiv tus txiv pwj npua mus dawb tes no suj..

    (Txog theeem no, yog hais poob qab cub no ces xaus qhov no, thaum noj su tas mam hais toom xa mus txuas ntxiv, “Tab sis yog hais thaum noj su xwb no ces hais los txog theem no mam quas qeej thiab hais theem xa txuas ntxiv mus”).


    Vam Meej Yaj.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Re: NKAUJ PLIS POOB QAB CUB

    Post  Hmoob ntuj qub qab on 6th March 2015, 12:28 am

    Nyob zoo niam tij koojziagkabzaug
    Ua tsaug nws coj zaj Nkauj plig qab cub no tuaj rau peb kawm yog cov muaj siab kawm yuav coj mus siv tau rau peb Hmoob kab lis kev cai.

      Current date/time is 22nd October 2017, 6:48 pm