Copyrigth@20010-2011 /HMONG PEOPLE FORUM UNIVERS

Tsev seev PajHuam

Hmong beauty nature

Compteur visitor

hnub 18/09/2010 los mus

    SAIB MEM TOJ

    Share

    koojziagkabzaug
    Moderator
    Moderator

    Messages: 3209
    Date d'inscription: 2010-02-28

    SAIB MEM TOJ

    Post  koojziagkabzaug on 29th June 2010, 8:30 pm





    TXHEEJ TXHEEM SAIB MEM TOJ




    YOG IB FEEM TXUJ CI NYOB HAUV LUB TSWV YIM RHAWV ZEJ TSA ZOS


    Tsoom Hmoob feem ntau puav leej sib sau los nyob ua ke nrog rau tej chaw uas Hmoob rhawv zej tsa zos puav leej yog muaj roob, muaj kwj ha, muaj dej, hauv caug toj, ntug dej, tej dej nkhaus, qhov ntau muaj ib ntsug tiaj nyob ntawm lub hau zos ntej, lub zos yuav tig mus li cas mas yuav ntsia raws lub roob laug los mus kho, kuj muaj tej qhov chaw uas yuav tig mus raws li lawv lub xeem nyiam.

    NQE 01: TEJ ZEJ ZOG HMOOB

    Hmoob kuj nyiam cog tej xyoob tej ntoo los ncig tej zej zog, ntoo Foom Swm, ntoo Txiv Thooj Ntxig, ntoo Yuj, ntoo Tsav, ntoo Txiaj Kub, ntoo Xib, dua no tseem cog Txoob thiab cog Xyoob txuam rau hauv, ib ncig lub vaj lub tsev tej qab vag tsib taug tseem cog muaj txiv hmab txiv ntoo, cog txiv duaj, txiv nkhawb, txiv zuaj, txiv kab ntxwv, cog ntoo paj ntaub, txiv cawv, txiv qiav. yog lub zos twg cog muaj tej no mas thaum tuaj deb saib yuav pom tej pa taws ncho puj pauv nce ntuj zoo li tej tauv me paj huab, pom tej vaj tse ploj pes loog xyaw tej txiv hmab txiv ntoo mas ua rau lub neej Hmoob hais tau tias zoo lawm ntsiag to.

    Qib 01:
    Kev soj ntsuas mem toj, tiam sis Hmoob txoj kev rhawv zej tsa zos no Hmoob tsis lam tau lam ua, kev rhawv zos los yog tsa ib lub tsev, nyob ntawm Hmoob lub tswv yim ntiag tug feem ntau yuav tsum xaiv ''Mem Toj'' vim Hmoob muab Mem Toj los ua qhov tseem ceeb, Hmoob kev xaiv chaw los rhawv zos mas muaj ob yam xws li:

    Yam A:
    Kev xaiv mem toj, kev xaiv Mem Toj rhawv zos yog yuav tsum mus tshuaj xyuas thaj chaw ntawd muaj qhov deb, qhov ze, qhov dav, qhov nqaim, yuav ua neej zoo los tau neej phem, yog neej chaw los dab chaw, feem ntau mas yuav tau saib raws tej toj roob hauv pes puas khav zoo, puas pheej yaj los puas dav, puas muaj dej, tej av puas rog, puas sawv Roob.

    Yam B:
    Kev xaiv mem tog tsim zos, kev soj ntsuam Mem Toj yog ib yam uas yuav tsum mus saib tej toj Roob hauv Pes los ntaus nqi rau kev muaj thiab kev pluag, saib lub neej yuav nce qib los yuav poob, yuav nto koob meej los yuav kob huam, ntsuas tej toj roob hauv pes saib puas haum lub xeem, saib lawv lub xeem puas yuav huaj vam, saib puas yuav tshwm Nom tswv los tshwm kev Nplua Nuj.

    Raws li kev soj ntsuam pom mas tej Roob uas muaj Dej kuj yog ib qho chaw zoo, teb tab Yaj yog koob hmoov, tej no yog ib yam txuj ci saib Mem Toj. av yog tib neeg txoj sia, Roob yuav muaj dej, teb yuav tab Yaj mas thiaj yog chaw zoo cog qoob cog loo, Hmoob ua neej nyob tsuas xav kom qoob loo puv txhab, tsiaj txhu puv nkuaj, nyiaj txiag puv nas, li no thiaj yog tau ib lub zoo neej nrog luag, tej roob ncig yuav loj yuav tus mas ua neej thiaj li yuav nplua nuj, tej Roob yuav ntseg yuav siab thiaj tshwm taus Nom, tej toj roob hauv pes tus yam ntxwv yuav haum rau lub xeem nrog rau tej ntawv nyiaj keeb puaj txwm thiaj yuav ua neej zoo.

    Ob yam piav no yog puav lee muaj mas zoo kawg nkaus, kuj muaj tej qhov xws li ib qhov phem qhov zoo, mas yuav tau ntsuam xyuas saib qhov phem ntau dua los qhov zoo ntau dua, ntsuam zoj yog qhov phem ntau dua mas tsis tas yuav mus nyob ntawd, saib zoj yog qhov zoo ntau dua ces cia li kho qhov phem los ntxiv kom qhov zoo yuam tau qhov phem tas lawm ces tsis muaj dab tsi mus nyob tau.

    Qib 02:
    Txuj ci xaiv mem toj rhawv zej tsa zos, Hmoob txoj kev saib teb saib chaws los rhawv zej tsa zos, yog ua raws li Hmoob tej txuj ci saib ''Looj Mem''. phau ntawv hu ua ''kev lis kev cai pej xeem xwm leej'' tau sau cim tseg tias, ''Hmoob lam ntseeg kev cai Mem Toj'' kev saib mem toj yog ib yam txuj ci uas tau ri mus dav heev nyob rau hauv tsoom Hmoob lub neej, tej Hmoob tsis hais leej twg twb puav leej ntseeg, tiam sis ib suam teb chaws kuj hais sib txawv me ntsis tab mas tus txheej txheem thiab lub ntsiab sib thooj, cov neeg uas paub txog txoj kev saib looj mem no zoo mas sawv daws muab hu ua ''Kws Looj Mem'' tej kws looj mem no kuj tsis muaj ib lub tsev kawm, kuj tsis muaj sau ua ib phau ntawv tiam sis tus xib hwb qhia li cas ces sawv daws tsuas nco li ntawd rau hauv nruab siab xwb, txhua txhia lub zos mas nyias kuj muaj nyias ib tug kws Mem Toj, tus kws Mem Toj ntawd nws yuav tsum yog ib tug neeg uas paub txhais tej toj roob hauv pes los kom haum lub neej qhov tseeb, kev saib looj mem yog ib feem hauv Hmoob tej txuj ci tseem ceeb uas cov laus thaud tseg cia rau tej xeeb zeej xeeb ntxwv tau siv.

    Hmoob lub hauv paus txuj ci Neeb ntawm Chus Kuj yog Hmoob li txuj ci, kev saib looj mem ntawm Hmoob yog ib yam txuj ci uas Hmoob xub siv ntxov tshaj nrog rau lub ntsiab tob heev, raws li cov kws txuj ntaus nqi mas pom tias qhov lawv yuav txhawb tau mas tsawg, cov kws txuj txheej tshiab no siv cov txuj ci thaud los ua hauj lwm kuj pom tau tias haum kawg, puas yuav yog tias tej txuj ci thaud thiab tej kev tshawb nrhiav txheej tshiab no los sib dhos lam sib haum, tseem tsis tau muaj leej twg yuav paub txog thiab qhia tau meej, tsoom Hmoob muab txoj kev saib mem toj coj los ua ib yam txuj ci Faj Lem, Hmoob yeej ntseeg kawg siab kawg ntsws coj ib tiam dhau ib tiam, tom qab no cov kws txuj thiaj ho muab suav cov ntawv los sau Hmoob tej txuj ci saib looj mem no ua ib phau tseg thiab muab kho ntxiv, niaj hnub no Hmoob tej txuj ci saib looj mem tsheej ib yam txuj ci tseem ceeb heev.

    Raws li cov kws Looj Mem piav hais tias, looj mem txawm yog toj roob hauv pes, nws lub ntsiab tseem mas yog looj meem txawm yog mem toj, mem toj txawm yog sawv roob, tsis muaj dej sawv toj kuj nyob tsis taus, yuav tsum muaj dej mos ua pa, ho siv pa los yug dej ces yog lub zoo chaw dej txawm yog looj mem mem toj li ntshav thiab yog mem toj lub chaw ua pa, mem toj tsis muaj dej txhawv txawm tsis paub nws lub chaw chiv, chaw tsis muaj pa dej txawm tsis paub mem toj li qhov chaw xaus, Dej Looj Mem yuav li cas thiaj paub tau? Lub tseem chaw qhov twg thiaj yog? Yuav tau soj saib tus dej ntws mus li cas! Kuj muaj ib lo lus tau hais tseg tias, yuav tau xav tswv yim thiab nrhiav kom meej pem mas thiaj li yuav pom qhov chaw zoo, qhov tseeb yuav xub soj ntsuam tus dej, zaj tswv yim saib dej yog muaj ob tug dej sib puav los tshuam mas hauv nruab nrab yuav tsum muaj roob, ob tug dej los mus sib tshuam qhov twg ces looj mem txawm los xaus rau qhov ntawd, yog dej ntws ceev dhau lawm looj mem nyob tsis taus.

    Muaj ib lo lus hais tias (Roob kav Neeg Dej kav Nyiaj Txiag) dej muaj loj muaj yau deb los ze, dej tob los ntiav, txhob xav hais tias tsuav muaj dej xwb txawm yuav zoo, tseem ceeb mas yuav tsum ua twb zoo tshuaj kom paub meej txog tus yam ntxwv ntawm qhov, ntaus nqi nws qhov zoo thiab yam phem ntawd los saib puas tsim nyog yuav nyob, tej dej feem ntau mas nws ntws nkhaus mus nkhaus los, raws li kev cai mem toj mas dej yuav tsum sib puag tau zoo, lub qab deg yuav tsum maj mam ntws nkhaus tawm mus, yog dej teev mas yuav tsum yog tus yees, yog yus mus txog hauv ib lub chaw zoo mas yuav tsum tsis txhob pom tus dej ntws tawm ncaj qha los puas lem pes loo lawm, dej tsaws tsag tsis zoo, qhov zoo mas yog tus dej pheej ntws mus xws li yus pheej xav saib lub chaw tseg tsis taus, nws muaj ib lo lus hais tias, (tus dej ntws qas laim xws li nplooj siab nplooj ntsws tsis xav ncaim, saib tsis pom chaw sawv mus tsis pom chaw ntws, qhov tseeb nws ntws ua tib yuj ywm lawm ''lo lus yog txhais tias'' kev ntsia tus dej yog ntsia nws qhov nkhaus mus nkhaus los puag roob zov hav thiaj yog chaw zoo, tus dej yuav tsum tsis txhob ntws ncaj nraim los thiab ntws ncaj nraim mus, qhov zoo tshaj mas yog maj mam ntws los tsis nres tsis so, tsis coog tsis kawg, ntws tas niaj tas xyoo tsis tu, tus dej ntws mus ntawm qab zog yuav tsum txhob muaj dej tsaws tsag, yuav tsum yog ua pas teev thiaj yog qhov zoo, tus dej yuav tsum ntws maj mam tsem mus tsem los xws li tseg tsis taus lub zos mas thiaj zoo).

    Lo lus hais tias, saib toj roob hauv pes, yog saib cov roob ncig lub zos sab tom ntej tom qab, sab laug sab xis, tom ntej yog roob tiag taw, tom qab yog roob looj mem, sab laug yog roob zaj, sab xis yog roob tsov, roob looj mem yuav tsum laug los mus deb, laug los mus tus tus, sawv tau ntseg ntsos, puag tau zoo, yog lub zos muaj tej mem toj li no yuav tshwm tau tej tus neeg tseem ceeb los cov neeg hauv lub zos yuav ua neej zoo, tej roob tiag taw yuav tsum ua ib txheej tuaj cug, tus dej yuav tsum nkhaus puag, nram qab ha yuav tsum tsis to lub neej thiaj nplua nuj, tsoom neeg thiaj huaj vam, sab xis ua roob cwj mem, sab laug tais kua mem thiaj yuav tshwm neeg txawj ntse, sab laug roob sawv siab tej xeeb ntxwv thiaj yuav zoo nraug, sab xis cov roob tsis yuav siab, yog siab dhau yuav ua rau cov poj niam yuam cov txiv neej, txiv neej yuav poob hwj chim, lub roob tsov sab xis yuav tsum xwm yeem thiaj yug tau ntxhais zoo nkauj, tej roob thaiv zos yog to dawm yuav raug cua tshuab lub zos hwj chim thim, lub roob tiag taw thiab lub roob qaum tsev yuav tsum muaj ib tug yam ntxwv txawv, yog lub roob qaum tsev zoo li tus tsov ces lub zos yog chaw tsov, yog zoo li tus ntxhw ces lub zos yog chaw ntxhw, yog zoo li tus zaj ces lub zos ntawd yog chaw zaj li no mus, lub roob sawv taw mas yog li no:

    Raws li tej laus piav mas Ob Tug Zaj Txhav Pov, Yaj Yuam Hawm Hnub, Nab Tawm Qhov, Tsib Tug Nees Nco Dab Zaub, Peb Lub Hnub Qub Caum Hli, tseem yuav tsom raws li lub xeem Hmoob coj los xaiv saib lub xeem puas yuav nyob tau los tsis tau, lub chaw ntawd puas yuam raug lub xeem los tsis raug, raws li tej laus tau piav tseg tias, xeem Tswb thiab xeem Muas nyob tsis tau Tsov Chaw, tej laus txhais lub ntsiab lus mas yog hais tias tsov txawj tom Nees thiab tom Npua, vim xeem Tswb yog Npua hos xeem Muas yog Nees. hos xeem Vaj nyob tau Tsov Chaw, vim Tsov mloog Vaj ntxwv lus, Zaj chaw xeem Looj nyob tau vim xeem Looj yog Zaj, li no tej laus thaud tau muab lawv tej txuj ci saib looj mem los tsim ua tej zaj lus tom huam, tas huv si muaj 9 zag hais sib txawv, ib zag muaj 10 txwm, cov tseem ceeb xws li:

    10 txoj kev nplua nuj.

    10 txoj kev hmoov zoo.

    10 txoj kev txom nyem.

    10 txoj kev hmoov phem.

    28 txoj kev nyab xeeb.

    30 yog txoj kev ntshai.

    22 txoj kev zoo.

    Hmoob cov lus taum huam tseem ceeb muaj npaum no zaj, tiam sis tsis tau muab los sau rau hauv no. Tas nrho tej piav los yog Hmoob tej txuj ci xaiv looj mem, lub hauv paus txog lub hauv ntsis.

    Qib 03:
    Piv txwv raws qhov tseeb, Hmoob txoj kev xaiv mem toj los rhawv zej tsa zos, lub zos Hmoob Huab Yeej Cuj lus Hmoob txhais tias Zos Kaum Vaj Paj, raws li kwv huam piav tseg tias yog ib lub qub zog uas zoo tshaj, cov kws txuj kuj puav leej hais tias yog ib qho chaw zoo tiag tiag, tej laus thaud yeej hais tseg tias, ntoj nteg thaum ntxov ub Hmoob yeej nyob txawm qhov chaw ntawd, lub zos no peb sab puag dej, ib sab puag roob, lub zos “Kaum Vaj Paj” no nws li looj mem yog pib ntawm 5 lub roob qawb tes sib law pes daws mus cuag rau lub roob eeb nees laug pes lias ua ib lub hnub qub Kub poob rau tus ntug dej Vws yog (Dej Neeb). toob fab thiab xib fab dav kwv yees 2 km. sab pej thiab naj dav kwv yees 1200 m, tus dej Vws yog ntws ntawm lub Xyeem Hmoob Tsheej Pum los phua lub kwj tsua Tshaa Thaaj ntawm lub roob Naj Sab ces lem fias mus toob fab puag nkaus Pej Fab, tawm plaws Xib Fab ntawm lub roob Naj Sab, lub kwj tsua Mej Khawv, ntws tawm plaws rau lub tiaj Sij Cab. tus dej no zoo xws li ib txog hlab npuag uas ua laj kab xov lub zos Huab Yeej Cuj, tuaj deb ntsia mas pom lub zos zoo puav tam li ib lub ''Ceeb Tsheej'' uas ntuj tsim teb raug yeej muaj txawm yog ib qho zoo chaw.

    Niaj hnub Hmoob tawm mus ua ib nkog rov los ua ib phuaj, ntoo pej ntoo thuv ntsuab li xiab doog lis nkawv saum roob eeb nees hav zoov ntoo Foom Swm nqha qas nrig ncig ntug zej ntug zos, tej lwg zaj ntug dej dauv lis niab, me loj kov nim ntsuab tawg paj nra lis iab, Huab Yeej Cuj lub npe tsis tau tis ua cuav, txij thaum nyob lub zos no los tub ki puv tsev, qoob loo puv txhab, tsiaj txhu puv nkuaj, nyiaj txiag puv nas, noj tsis tas haus tsis kawg, txheej txheej muaj tub txawg, tiam tiam muaj ntxhais ntse, Hmoob tom peg tom taug qhuas lub zos tias zoo heev tsis hais qhov twg twb xav tuaj ncoo!

    Thuam lub xyoo 1966 tseem fwv Suav tuaj ua ib daim teb cog txiv hmab txiv ntoo rau hauv lub zos Hauj Yeej Cuj mas txhua xyoo twb de tau txiv kab ntxwv txog li 5000 tas (1 tas yog 50 kg), tseem fwv tsim tau ib txog kev nrhiav nyiaj txiag rau Hmoob, xws li pab txhawb Hmoob lub neej mus cuag tau qib uas Hmoob txhua yim twb nplua nuj, cia li ua rau Hmoob yim huab ntseeg tob txog looj mem ntawm lub zos Huab Yeej Cuj tais yog muaj tseeb tiag ! dua no tseem muaj ob lub zos Hmoob xeem Looj thiab xeem Yij, mas lawv ob lub zos no looj meem zoo heev, cov Hmoob xeem Yij lub zos yog ib lub Nkoj, hos cov Hmoob xeem Looj lub zos yog ib tug Tsov, Hmoob xeem Looj lub zos mas thaum tuaj deb ntsia mus mas pom lub roob ua zos zoo nkaus ib tug Tsov, lub hau roog kheej ntseg ntsos, nraub qaum khoov nkoos, txhais taw sab laug nqa siab zog me ntsis, txhais taw sab xis ho qis zog me ntsis, muaj ib lub chaw vaub taub nyob hauv tus Tsov qhov ncauj, qhov ntawd twb yog lub zos xeem Looj, tiam sis thaum nyuam qhuav pib nyob tsoom Hmoob xeem Looj tej tub ki tsis tau vam heev.

    Tom qab no lawv thiaj ntiav tau ib tug kws mem toj tuaj pab soj ntsuam, tus kws mem toj pom tias ntawm lub zos nram taug muaj ib tug choj tab tom taw nkaus rau lub zos xeem Looj zoo nkaus li nrab hneev yuav tua tus Tsov, li no ua rau tus Tsov tsis nti, vim li ntawd cov tib neeg nyob lub zos no thiaj tsis txawj huaj vam, thaum cov Hmoob xeem Looj tau txais xov li no, lawv cia li muab tus choj rhuav pov tseg tas, rov tho dua kev mus lwm qhov, ces lawv ua ib lub tsev Laj Phooj rau qhov chaw tuam choj, yog tuaj deb saib mas zoo nkaus ib tug Tsov yuav dhia tsua, txij thaum ntawd los cov Hmoob xeem Looj lub zos cia li vam meej tuaj, qhov no ua rau cov Hmoob xeem Looj cia li ntseeg yam tas siab kawg ntsws.

    Cov Hmoob xeem Yij pom tias cov xeem Looj siv txuj ci mem toj thiaj tau txais kev vam meej ces lawv cia li nrhiav ib tug kws mem toj tuaj muab lub zej zos soj ntsuam saib txhab txhua, kws mem toj hais tias lub zos xeem Yij yog ib lub chaw nkoj deg pej xeem, yog xav kom tshwm muaj tej tub txawg tub ntse mas yuav tsum tau tsa ib lub tsev Laj Phooj Nom rau hauv plawv zos, yog lub cim hais tias muab lub nkoj pej xeem hloov los ua lub nkoj Nom, cov Hmoob xeem Yij tau ua raws nraim kws txuj lo lus qhia, txij ntawd los tsis ntev lub zos xeem Yij txawm tshwm tej tus neeg txawj ntse nrog luag ua Nom, ces niaj hnub no sawv daws hu lub zos ntawd ua ''ib nkog Nom tuaj, ib zog pej xeem tos''.

    Qib 04:

    Kev cog xyoob cog ntoo thaiv zej zog, raws li Hmoob txoj kev saib mem toj los rhawv zej tsa zos mas ceeb laj nrhiav tau ib lub chaw zoo tas siab tas ntsws, kev cog xyoob ntoo los thaiv zej zsog yog siv neeg lub dag zog los tsim kho tej av tej dej, los cog xyoob cog ntoo thaiv qhov qias, tiam sis kev kho zej kho zos kuj muaj ntau txoj kev xws li:

    Txoj kev A:

    Cog xyoob cog ntoo los pab lub siab, txoj kev cog xyoob ntoo yog siv neeg lub dag zog los tsim kho tej yam uas Hmoob ntseeg tias yuav pab tau qhov zoo los rau Hmoob lub neej xwb, li no Hmoob thiaj cog xyoob ntoo los txhaws thaiv tej qhov uas sawv daws tsis nyiam, feem ntau Hmoob cog ntoo tub mis, ntoo txiv thooj ntxig, ntoo paj kim huab, ntoo paj ntaub, cog xyoob. tej xyoob ntoo uas cog no nyias kuj muaj nyias ib lub ntsiab lus hais, xws li ntoo foom swm npe Hmoob hu ua 'ntoo tub mis' tus ntoo tub mis no tej laus thaud hais phwv huam tseg tias, Ntoo Tub Mis yog Hmoob Niam, vim thaum ub nws tau pub mis rau Hmoob noj Hmoob thiaj hlob tiav txuj, Hmoob tseem hais tias tus ntoo tub mis no yog Hmoob tus Huab Tais Txiv Yawg los txia, Hmoob thiaj li cog nws los ua ib lub cim nco txog thiab teev hawm kom nws pov hwm nws tej me nyuam xeeb ntxwv, qhov no tsuas yog xav tau nyob hauv Hmoob lub siab ces kuj lam muab tej yam toob xib coj los zeem raws xwb.

    Qhov ib;

    Vim cov ntoo tub mis no siab thiab yiag heev, thaum lub caij dej dag nyab ntiaj teb, Hmoob tau siv cov ntoo no los ua ntaiv nce mus saum ntuj Hmoob thiaj tshuav noob neej, tej laus tseem ntseeg tias cog ntoo tub mis los thaiv zej zos, mas ua rau lub zos tshwm tej tus neeg tseem ceeb, vim nws siab los siab, loj los loj, tsw qab los tsw qab, tas nrho tej xyoob ntoo mas tus ntoo tub mis yog tus Hmoob hwm thiab nyiam tshaj plaws, lub txiv ntoo tub mis Hmoob hu ua "Luj Luj Thoob", Hmoob tseem ntseeg tias tus ntoo tub mis no muaj peev xwm thaiv tau khawv koob, thaiv tau tej dab ntxoog, yog lub zos twg cog ntoo tub mis ncig zos mas txawm muaj dab tuaj los yeej nkag tsis tau los hauv zos.

    Li ntawd, Hmoob thiaj hwm tus ntoo tub mis no ua Hmoob tus ntoo dab, tej zej zog feem ntau thiaj muab ntoo tub mis Feng Shu tis ua lawv tej npe zos los yog tis npe lawv tej teb chaws, ib yam li lub roob Feng Zi Shan roob ko ntoo tub mis nrog rau lub Xyab Hmoob Foo Xyiam Feng Xiang Miao Zhou Xiang, lub Xyaab Hmoob Foom Muj Thuaj Feng Mu Tuan Miao Zu Xiang, txhua xyoo thaum Hmoob noj tsiab noj txhu, Hmoob yuav tsum mus de ib co txiv tub mis los do xyaw xyooj fab thiab txha sum ces muab hlawv nrog tej yaj khaum ceeb khaum los pe hawm lub ntuj lub teb, pe hawm poj yawm txwv koob, thov koob hmoov rau lub xyoo tshiab.

    Hmoob cov tshuaj uas muab los hlawv nrog no kuj yog ib yam tshuaj hlawv caum dab quas ntxoog. Tsob ntoo txiv thooj ntxig mas tej laus thaud hais tseg tias, Thooj Ntxig thaum ub nws yog Noog Yaj Yuam qhov chaw tsaws, hom ntoo no yog lub zos twg muaj mas yuav tshwm muaj tej tus neeg tseem ceeb hauv lub zos ntawd, hos tus ntoo Paj Ntaub mas lig mos tawv xws hlau, tsis hais ntuj tsaug los ntuj tsiab tej me nplooj ntsuab doog lis xiab, tej cag loj ntug luaj ciab. Luag tej laus niaj txhis piv txoj lus hais tseg tias: (ua siab ntev nrhiav lub zoo qauv laug, maj mam thiaj tau tub zoo nraug, ua siab ntev nrhiav lub zoo hnub qub, maj mam tej ntxhais thiaj zoo nkauj xws nkauj hnub).


    Txoj kev B: Zaj qhuas txog xyoob


    Xyoob nis Xyoob ! koj nim yog Hmoob txoj kev qhoob.

    Koj tej cag sib lig pes nkoov, thov koj ua kom Hmoob sib poo.

    Koj tej yag ib thooj piv ib thooj ntev, thov ua kom Hmoob koom tes.

    Koj tej nplooj sib chab, tej ceg sib chaws, thov koj tsa kom Hmoob muaj tub txawg.

    Koj tawv tuab khoob dav, thov koj ua kom Hmoob muaj noj nrog muaj hnav.


    Hmoob txoj kev cog xyoob ntoo los thaiv zej kho zos, tab txawm yog tias cog los kho sawv toj, tsis kav tej xyoob ntoo uas cog rau hauv lub zej lub zos thaum caij ntuj no tuaj los nws yeej ntsuab lis xiab, caij ntuj kub laj lis ntxiag, nws muaj peev xwm txuag tas txhua txhia yam tsis hais lub caij twg kom zoo li qub, nws yuav ua rau tej zej zos zoo nkauj, nws tseem muaj ib lub peev xwm hloov tau tej huab cua, ua rau neeg lub siab kom kaj sis lug, siav ntev nyob laus nkoos.

    Txoj kev C:

    Kev kaw cua yug mem toj, txheej laus thaud, kuj muaj ib zag txuj ci hu ua (Kev Kaw Cua Yug Mem Toj) nws yog ib zag txuj ci ua kom cov sawv toj sib luag, Hmoob txoj kev rhawv zej tsa zos yog nrhiav lub chaws uas looj mem zoo, looj mem txawm yog tej lub roob uas laug mus, looj mem yog tus sauv toj. Yog muaj pas sauv toj ces txawm ua lub neej zoo, lo lus hais tias "kaw cua kaw dej" ces yog kaw pa sauv toj, ib puas tsav yam muaj sia ciaj taus twb yuav tsum yog khom pa yeeb pa yaj.

    Lo lus hais tias: Lub chaw leej heev txawm yog Pa Sauv Toj zoo.

    Lo lus hais tias: Neeg txawj neeg ntse txawm yog sauv toj Cub tawm.

    Tiam sis zoo sauv toj los yuav muaj zoo yeej vub tej neeg thiaj yuav txawj ntse ib tiam dhau ib tiam. lo lus hais tias "kaw cua yug mem toj" yog Hmoob ib txog kev kaw cua nyob hauv tej txuj ci saib mem toj, yog tej roob uas thaiv lub zej zos muaj qhov tsis zoo los yog muaj dawm to, tej laus hais tseg tias yuav tau cog xyoob cog ntoo los thaiv, ua tej lub vaj loog ncig kaw lub zos. lub ntsiab lus no tej laus hais tias yog 'kaw los yug mem toj.

    Hmoob txoj kev kaw cua yug mem toj mas muaj ntau heev nyob rau teb chaws Xwm Leej. Tiam sis yuav piav tsis tshab tsis txhua raws li txoj kev sau tej mem toj uas nyob ua sab ua sua los loos ua ib pawg, yam ntxwv ua ke mem toj kuj ua pawg, muaj lub noob thiaj tuaj tus kaus, yeej vub yog daim tawv, mem toj yog lub plawv, yeej vub yog yeeb, mem toj yog yaj, sab nraud sab hauv yog tib lub yam ntxwv yog yeeb yaj cub tawm, cov lus hais no yog Hmoob ib zag txuj ci uas siv raws qhov tseeb, txoj kev nrhiav kom tau qhov tseeb no muaj qab hau heev nyob rau hauv Hmoob kev saib mem toj, li no Hmoob yam txuj ci saib mem toj yog ib feem txuj ci uas xub muaj tshaj nyob hauv Hmoob lub neej thiab kuj raug mus raws qhov tseeb uas Hmoob lub siab ntshaw tiag.

    Txoj kev D:

    Txuj ci tsa mem toj, kev tsa mem toj kuj yog tej yam uas leej tib neeg siv lub dag lub zog ua tawm los mus hloov tus yam ntxwv kom mem toj txawj zoo tuaj, raws li Hmoob xeem Yij Ncuab thiab xeem Looj uas tau piav los, tom qab uas muab kho hloov raws kws mem toj ces lawv txawm tshwm muaj tej tub txawg tub ntse thiab tau nrog luag ua nom ua tswv, dua no lawd tseem muaj tej zos Hmoob uas tau tsa tsev Mlom, tsev Laj Phooj, tsev Lawj tsev Choj, tej no puav leej yog tsa raws lub zej lub zos txoj kev pom zoo, tej yam no tsim kev zoo nkauj zoo saib rau lub zej zog muaj lub koob meej ntxiv, yog thaum muaj tej neeg tuaj txog ntawm tej ntug zej ntug zos, lawv yuav pom tej tsev mlom, tsev laj phooj, tsev lawj ua sib pes nrhav ploj pes loog xyaw pes ntxaws tej xyoob nttoo thuv, hos Hmoob tej vaj tse nyob sib ti pes nkaus rau ntawm tej ntu dej doog zoov ntsuab lis xiab, tej roob cua txhuab ntxuaj pes ntxog, dej ntas pes ntua, Hmoob, dej, roob, nyob ua ib pawg, tsev lawj huv si, tsev laj phooj nrov xiv, nyias puav leej muaj nyias yam zoo, yog ib lub zoo zos tiag tiag ! Hmoob thiaj hais ib zaj paj huam tias ''Tsis tau pom nkauj Hmoob lub ntsej muag, lub siab twb xav zoj tias yuav zoo nkauj xws rev me paj nyob saum daim ntaub npuag''.




    Last edited by koojziagkabzaug on 13th August 2013, 7:34 pm; edited 1 time in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages: 3209
    Date d'inscription: 2010-02-28

    Re: SAIB MEM TOJ

    Post  koojziagkabzaug on 29th June 2010, 8:36 pm



    ** SIV MEM TOJ, TXHIAJ MEEJ**






    Saib Mem Toj, Txhiaj Meej, Tswv Feej tsis yog ib txoj kev ntseeg, tsis yog ib txoj kev cai ( Culture) yog Nrhiav cov Sawv Toj ( Energy positif ntawm lub Ntuj ( Astres) lub teb, huab cua, nrog tsuag coj los siv xwb. Ib yam peb ntes hluav taws xob los siv...

    Kev siv Mem Toj, thaum ub yog xub nrhiav qhov zoo chaw, thaj av. Ntsia tej toj roob hauv pes xeeb, sib koos tau zoo. Zaum no peb yuav siv raws lub neej tshiab ( tej yam neeg puab ) yam li kev, cov tsev siab , nroog loj, choj, kev loj ncig nroog.

    Ua nteg tag nrho, yuav paub tias tus Zaj Ntsuab & Tsos Dawb yog dab tsi. Yog ib qho zoo chaws yog muaj tus Tsov Dawb thiab tus Zaj Ntsuab. 4 tug tsiaj nruab ntug uas pov hwm Mem Toj yog: Vaub Kib Dub, Noog Yaj Yuam Liab, Zaj Ntsuab thiab Tsov Dawb.

    Tus Vaub kib Dub:

    qhov chaw: Sab nraum= txhais tias sab Pej ( North), yog vaub kib dub qhov chaw. Yog kev pab, txhawb nqa, roos koj tsev neeg, ua kom tsev neeg muaj zog, muaj meej mom. Yog tsis muaj roob, pov roob (chaws siab dua) nraum qaum tsev, Mem Toj yuav zoo tsis tas.




    Tus Yaj yuam Liab:

    Qhov chaw: Nyob ntawm qhov rooj, sab Naj ( South), Yog koj lub qhov rooj txuas ( lub qhov rooj nkag los, rau cov tsev txheej tshiab) qheb rau sab Naj mas zoo heev.
    Pab yus xaiv ( tsom) lub caij zoo, txhawb yus tej kev tag kev cia siab, kev poob tsag,





    Tus Zaj Ntsuab:

    Qhov chaw:

    Nyob ntawm koj lub qhov rooj sab laug, thaum koj ntsia hauv tsev tuaj rau nraum zoov. Yuav tsum yog ntawm lub qhov rooj ntsia mus lub roob sab lauj siab zog sab xis me ntsis.
    Pab kev muaj txiag, nplua nuj, twj taig toob xib, meej mom, hwj chim. Zaj Ntsuab yog tus tsiaj loj tshaj.





    Tsov Dawb:

    Qhov chaw:

    Sab xis ntawm qhov rooj ntsia mus raum zoov. Qhoov zoo dua mas tig mus rau Laj Fab ( Hnub poob)
    Pab kev roos, thaiv, luag tsis nyiag yus, swb cai, raug mob.




    Ib qhov chaw zoo yog qhov chaw ntxhab tseem tsawv, muaj pov roob pem qaum tsev, tshav ntuj thiab ntxoov ntxoo tuaj txog tib si, Tsis hliv cua heev. Xyuas qhov chaw uas nroj ntsuab xiab mos nyoos thiab muaj dej nyob ze.




    Qaum tsev= Vaub kib dub
    Sab lauj= Tsov Dawb
    Sab xis= Zaj Ntsuab
    Sab nram qab tsib taug= Yaj Yuam Liab



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages: 3209
    Date d'inscription: 2010-02-28

    Re: SAIB MEM TOJ

    Post  koojziagkabzaug on 29th June 2010, 8:42 pm



    ** MEM TOJ & TXHIAJ MEEJ, qua tsev **




    * Yog koj ua koj lub qhov rooj tig rau sab pem roob, thaum muaj teeb meem, nws yuav tsis muaj chaw daws. Vim teeb meem teem roob lawm.

    * Yog koj lub qhov rooj qheb mus ncaj kis ntawm on lub tsev, tsis zoo.

    * Yog luag tej kaum tsev ntse tig tuaj ncaj koj lub tsev ( lub kaum phab ntsa, teem kaum ), yuav ua rau koj txais luag tej xub tshuaj. Tsis yog ib qho zoo.

    * Yog ntawm koj lub qho rooj ntsia ntsoov ib txoj kev ncaj qha tuaj rau. Tsis zoo, vim koj yuav txais xub.

    * Yog koj lub tsev nyob ntawm ib txoj kev nkaus, koj nyob rau sab haub mas zoo. Yog koj nyob sab nraud, ncaj qhov nkhau kiag ua nta hneev, tsis zoo. Vim koj yuav raug luag tua xub tuaj.

    * Yog koj lub tsev nyob nruab nrab ob lub tsev siab, tsis zoo. Vim luag nias koj lawm.



    Kev nkhaus ua nta hneev,kev ncaj tuaj nkag kiag rau ntawm qhov rooj tsis zoo,
    tsev nyob sab nraus tsis zoo, nyob sab hauv zoo.



    Qhov rooj tig ncaj kev tsis zoo.



    Duab saum toj, qhov rooj tig rau kis tsev, tsis zoo.
    Hauv qab, lub tsev tais nruab nrab ob lub tsev siab tsis zoo.




    *********************

    XAIV HNUB ZOO NCE TSEV TSHIAB



    Yuav mus nyob ib lub tsev tshiab ( tsev tshiab tshiab, los yog luag lub qub tsev, yus mus nyob tshiab), yuav tau xaiv hnub zoo mus nyob. Raws li Suav mas lawv muaj daim phiaj xam hnub nyug puag xyoo ( Tong Shu), uas qhia hnub zoo thiab tsis zoo, rau yus ua tag puas tsav yam. Tab sis ua ntawv Suav xwb ces kuv yuav tsis paub hais rau nej. Li cas los xij, tsis paub lawm ces muaj 2 hnub hauv ib hlis ntawd, paub tseeb lawm tias tsis yog hnub phem yam li: Hnub xiab 1 thiab hnub 15, yog hnub hli xiab thiab hli nra, ob hnub no yog ob hnub uas zoo lawm.

    Hnub uas mus txog lub tsev tshiab ( xam tias yog hnub mus nyob tiag " Official" ), qhov zoo yog mus txog thaum 9h-11h sawv ntxov. Ntsaig khoom tsis tag los tsuas teeb kom tau lub txaj pw los yog ib lub txee tseem ceeb xwb ces txhais hais tias yus los nyob lawm. Los txog, qheb cov qhov rais lam cua li yam tsawg 3h, kom cov xub nyob ua ntej yus tej vij sub vij sw tawm. Taws teeb thoob plaws lub tsev, qheb tej kais dej kom tshoob tej khawv yeej khawv yws, tej vij sub vij sw mus, txais tos Tswv Feej tshiab. Yuav tau cheb thiab txhuam lub tsev kom huv si ua ntej yuab ntsaig khoom los. Qhov zoo tshaj mas hloov cov ntawv los phab ntsa thiab pleev xim tshiab rau, yog nqa Tswv Feej tshiab los tsev. Yog cov Energy tshiab, huv thiab zoo heev. Qheb radio lod yog tso yas suab kom ua suab tshiab rau lub tsev, rhaub ib qho dej kub, ua me ntsis dej ces, ntim me ntsis ncuav qab zib los nthuav mov, noj ib me nyuam plhuas mov me me. Kom hais tau tias noj ib pluag mov ntawm lub tsev tshiab lawm. Txij hmo tom qab ces yuav tsum mus pw hauv lub tsev ntawd lawm.

    Yog hnub yus mus nyob lub tsev tshiab yog hnub zoo ces yus tsev neeg yuav nyob dhia rhees, tsis muaj mob muaj nkeeg, muaj kev thaj yeeb thiab kaj siab lug. Yog tsis ntev tom qab los nyob tsev tshiab, tsev neeg muaj mob ib tug dhau ib tug ces yog nej los nyob tau hnub tsis zoo.


    * Tsa tsev tshiab raws hnub ntawm Lim Piam *



    1. Hnub Sunday Tsis pub tsa thiab kho tsev nws tsis zoo yuav tau txom nyem.

    2. Hnub Monday Tsa thiab kho tsev yuav zoo thiab yuav muaj hmoo heev.

    3. Hnub Tuesday Tsis pub tsa thiab kho tsev yuav muaj hluav taws kub.

    4. Hnub Wednesday tsa thiab kho tsev yuav zoo heev txheej hlob yuav nce qib rau yus.

    5. Hnub Thursday tsa thiab kho tsev yuav zoo thiab muaj hmoo heev 5 lub hlis tom ntej yuav pom .

    6. Hnub Friday Tsis pub tsa thiab kho tsev yuav muaj zoo muaj phem mus ua ke.

    7. hnub Saturday Tsis pub tsa thiab kho tsev li yog cam ua yuav pom tshwm sim ntawm qhov muag kiag.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

      Current date/time is 24th April 2014, 3:13 am