IB TUG NIAM TSEV ZOO

Search

Hmoob Catholique Forum

Caw nej txhua tus mus ncig xyuas Hmong Catholique Forum nias hauv daim duab :

Latest topics

» Hmoob Ntuj Tshiab lub tsev PAJ HUAM & kab lis kev cai Hmoob
by Hmong ntuj tshiab Today at 2:29 am

» LIAJ LWG TUS CAG TXUJ " Tshoob Kos"
by xiongchang Yesterday at 11:21 pm

» PAJ HUAM KHO HMOOB LUB NEEJ
by xiongchang Yesterday at 11:05 pm

» Txiv Hlob Paj Kaub Hawj keeb kwm
by xiongchang Yesterday at 9:32 pm

» Saib Duab Hmoob cov ntxhais zoo nkauj thoob ntuj
by xiongchang Yesterday at 8:17 pm

» KEEB KWM HMOOB TSAB
by xiongchang Yesterday at 12:45 pm

» XYUAM SIM KEV UA SI SAB NTUJ QUB QAB
by xiongchang Yesterday at 3:30 am

» Kuv yuav mus 2-3 hnub
by xiongchang Yesterday at 3:08 am

» KEEB KWM CAUB FAB
by xiongchang 20th May 2012, 11:20 pm

» Hmoob Ntawv & Hmoob Lus
by PIJPAUJ 20th May 2012, 2:40 am

» HLUAS NKAUJ INTERNET
by xiongchang 19th May 2012, 3:02 pm

» Hmoob Suav lub neej
by wannabe 19th May 2012, 6:53 am

» Quj Zej Qub Zog Yog Hmoob Tej Chaw Tshua
by xiongchang 19th May 2012, 3:27 am

Tsev seev PajHuam

Hmong beauty nature

~*~*~*~*~*~*~*~*~

KWV TXHIAJ PLEES

Tshav ntuj los nag.

Most Viewed Topics

Lojleeb lub Tsev qhia txuj

Hmoob Ntuj Tshiab lub tsev PAJ HUAM & kab lis kev cai Hmoob

kuv cov duab.

Saib Duab Hmoob cov ntxhais zoo nkauj thoob ntuj

Txaus Luag Thiab Txajmuag

Duab yav qaum teb Ntuj qub qab

Hmoob Toj siab ( Txaus luag heev)

LUB CAIJ PAJ TAWG / HMONG BEAUTY NATURE

Hais Paj Lug

Tshuaj Ntsuab

Ncaim nkaujhmoob fabkis

Mloog Hmoob tshav ntuj zaj nkauj hnub no:

Compteur visitor

hnub 18/09/2010 los mus

Goto page : 1, 2, 3

IB TUG NIAM TSEV ZOO

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°1

IB TUG NIAM TSEV ZOO

koojziagkabzaug on 28th February 2010, 6:53 pm

Cool Slideshows

Ib Tug Niam Tsev Zoo Txawj 10 Yam

Txawj 1 txawj xaws txawj ntxiv

Txawj 2 txawj saib txawj coj

Txawj 3 txawj tu vaj tu tsev

Txawj 4 txawj ncu txawj hau

Txawj 5 txawj hlub kwv hlub tij

Txawj 6 txawj tu cev tu plaub hau

Txawj 7 txawj sua txawj xam phaj

Txawj 8 txawj tu tub tu kiv

Txawj 9 txawj ua lag ua luam

Txawj 10 txawj khwv txawj pauv

Last edited by koojziagkabzaug on 24th June 2010, 1:23 pm; edited 1 time in total

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°2

Re: IB TUG NIAM TSEV ZOO

koojziagkabzaug on 28th February 2010, 6:55 pm

Txawj 1 txawj xaws txawj ntxiv

Ib tug niam tsev zoo txawj ntxiv txawj xaws, yuav pab tau lub neej.
Yuav txuag tau nyiaj los siv rau lub vaj lub tsev. Vim nws yuav xaws tsoos tsho rau nws thiab tej me tub me nyuam. Yuav txog ib lub Tsiab Peb Caug los yuav tsis tau thau nyiaj qab nas txiaj qab hub mus pauv.

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°3

Re: IB TUG NIAM TSEV ZOO

koojziagkabzaug on 28th February 2010, 7:02 pm

By: Nkauj Nag le Dim 7 Fév - 21:55

Nyob zoo os Koojziagkabzaug, Koj ua dab tsi lawm os , Kzkz as !!! tsis tau ntsib koj lawm es ua dab tsi lawm os , Kuv nco koj kawg thiab os , Xav tuaj nrog koj tham pem xwb os ,
Maivtooj , Hnub no kuv yuav nqa ib daim me nyuam tiab tuaj rau koj saib os , Yog kuv xaws rau kuv 2 tug xeeb ntxwv hnav coj mus ua Carnaval tom tsev kawm ntawv na , es kuv lam xaws phem phem xwb os ,

Ntawm no yog daim patron , Muaj xub ntiag , nrab qaum , Sab tes , Lub ntsej coj dab ,

Thaum txiav tau daim ntaub lawm ces muab coj los xaws ua lub tsho

Ntawm no muab ib txoj ntaub dawb coj los xaws rau ib sab ntsej caj dab

Thaum xaws tau lawm ,Muab 2 sab coj los xaws ua ke , Thiab muab ntxeev los rau sab zoo nkauj
ces coj los dhos rau lub tsho caj dab ,Ces muab xaws rau lub caj dab tshos ,

Nov yog daim ntaub yuav coj los ua daim tiab ,
Nov twb yog nws ntev ntev es kuv muab quav ua 2ya lawm xwb ,
nws yog 1 daim ntev ntev xwb .

Thaum uas muab daim ntaub coj los xaws tau ua daim tiab lawm

2 daim ntaub rose no 1 khub yog Lub paj nyob ntawm xub ntiag 1 khub yog lub paj ntawd nrab qaum duav ,
Xam los yog 4 daim 2 daim loj , 2 daim me .

Thaum muab xaws ua tau lub paj lawm ces ,
muab coj los lo rau lub tsho raws li nram no

Tsam no ces xaws tau lub tso lawm lau !!
Ntawm no ib sab yog ntawm xub ntiag ( Devant )

daim duab no yog nrab qaum ( Dos )

Ntawm no yog ib xim Xiav thiab liab .

Thaum xaws tiav lawm ces zoo li no lawm os .

Thaum hnav lawm zoo nkauj npaum li no tiag ,
Tus me ntxhais no yog kuv tus me xeeb ntxwv
Hu ua OCEAN TCHA Nws Yuav muaj 7 xyoo rau lub 12 -2 -2010 no

Tus me ntxhais no nws nyiam heev li ces nws thiaj xub hnav ua ntej nws tua niam hluas lawm ,

NkaujNag

NkaujNag: Member; Messages: 73
Date d'inscription: 2010-03-11

Post n°4

IB TUG NIAM TSEV ZOO

NkaujNag on 7th April 2010, 10:28 pm

Nyob zoo os , Lub me Tsev Ibtugniam tsev zoo .

Ua li cas kuv mus ntev ntev lawm es kuv tsis khoom tuaj Xyuas Lub me tsev no li es Ua li cas nws yuav nphob ua luaj li os , Cov me niam tsev zoo es nej mus dua twg tag lawm na lod , Kuv tuaj ib leeg xwb es kuv nim cig tej me qab vag tsib taug mus txog qhov twg los ua li cas nim nphob xuav xwb os , Tuaj ma cov me niam tsev zoo es ,

Nkaujnag .

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°5

Re: IB TUG NIAM TSEV ZOO

koojziagkabzaug on 28th May 2010, 7:12 pm

Niam tsev li xeeb ceem

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°6

Re: IB TUG NIAM TSEV ZOO

koojziagkabzaug on 28th May 2010, 7:16 pm

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°7

Re: IB TUG NIAM TSEV ZOO

koojziagkabzaug on 6th June 2010, 5:29 pm

10 Yam Ntawm Tsev Tib neeg Zoo

1. Lawv yeej muaj txoj kev cob qhia zoo dua
2. Lawv yog cov es paub ntxub qhov phem
3. Lawv nyiam cov tib neeg zoo ua lawv tej phoojywg xwb
4. Lawv ua cov homphiaj uas yuav tau noj xwb
5. Lawv yeej xub xub pab kom tau lawv tus kheej uantej tso
6. Lawv yeej cuab pob ntseg thiab khaws tau cov lus zoo zoo mus ua neej
7. Lawv ua dab tsi los xav kom tau ntsej tau muag
8. Lawv yeej tsis nyiam hais tej lus dev lus npua ib zaug li
9. Lawv yog cov ntaus thawj thiab tsis yog cov nyiam lawv kua
10. Lawv hais dab tsi yeej yog dab tsi thiab yeej tshwm nyiaj txiag

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°8

Re: IB TUG NIAM TSEV ZOO

koojziagkabzaug on 6th June 2010, 5:35 pm

IB TUG NIAM TSEV ZOO YUAV TAU KAWM TAB DAB TAB QHUA

"Nej tuaj lov. Zaum ma," peb Hmoob mas peb yeej ibtxwm hais li ntawv. Tej menyuam los peb yeej qhia kom lawv paub txais tos qhua; tsev tib neeg twg yog qhua tuaj txog es tsis paub hu ib los li tsev neeg ntawv tsis paub kev cai. Li tej laus hais, "..tibneeg coob los tsev tsis ti thiab siab tsis nqaim." Hais txog kev tam qhua, feem ntau peb cov laus, cov tib neeg muaj meej mom siab, cov paub kev cai, thiab cov muaj muaj phoojywg lawv yeej paub tam qhua dua. cov laus mas nyiam nyiam mus zeem tib neeg, caw tej qhua, thiab tej kwv tij los saib tsev. Thaum cov qhua txog ntua hauv tsev xwb mas peb yeej nyiam mus nqa dej los tam qhua, nrog lawv nyob tham, thiab nrhiav zaub nrhiav mov rau lawv noj li lawm. Qhov kev "tam qhua" no tseem ceeb heev li vim…

* Vim peb xav hnov lawv tias peb yog tib neeg paub kev cai
* Vim peb xav nrog peb cov ntsuab ze thiab tej phoojywg tham tiag tiag
* Vim peb xav kom lawv nrog peb pw thiab so ib hmos
* Vim peb xav kom lawv pom peb tsev thiab tsev tibneeg
* Vim peb xav kom lawv tau chaw so thiab tsis hais peb plig
* Vim peb xav kom lawv paub tias peb siab loj thiab tsis qiadub
* Vim peb xav kom lawv paub tias peb nyiam qhua thiab nyiam phoojywg
* Vim peb xav kom lwm zaug lawv rov tuaj saib peb dua

Hais txog qhua mas nws muaj ob peb yam qhua. Ib co yog nruab ze xws li tej kwv tij neej tsa, ib co yog phoojywg, thiab ib co yog Hmoob qus qus es zeem tau xwb. Yog cov peb paub ces peb yeej nyiam tham txog kev noj qab nyob zoo, kev ua neej, laj kam, thiab tej me tub me nyuam ua ntej. Hos yog cov qhuas tshiab tshiab thiab qus qus no mas peb ho nyiam tham txog cajces, lawv yog pawg Hmoob twg, nyob teb chaws Nplog lawv nyob thaj tsam twg, ua li puas tau muaj tib neeg sib paub dua los, thiab yav tag los lawv ua dab tsi. Ces peb ho mus tham txog lawv tsev neeg, tej me tub me nyuam, thiab lwm yam.

Kev tam qhua kom zoo zoo no mas nws kuj tsis yog ib qho yooj yim ua. Peb yeej tsis paub tias thaum twg qhua yuav tuaj li. Tej thaum yog yus caw lawv los saib yus; tej thaum tos nwm xwb qhua yeej tuaj txog ntawm qhov rooj li lawm. Vim li no, yus yuav tau npaj txhua lub sij hawm es thiaj tsis txaj muag. Yus yuav tau npaj kom muaj nyiaj txiag siv, zaub mov noj, dej haus, txiv noj, txaj chaw pw, phuam da dej, ntaub pua chaw, tog rau ncoo, qee sij hawm nrog lawv nyob, thiab nco ntsoov muab tej pam thiab tej ntaub pua chaw ntxhua kom tsw qab ntxiag. Peb tsis xav kom cov qhua mus txog tsev mus hais hais peb plig rau ub rau no. Peb txhua tug yeej xav kom tau lub koob npe zoo es lwm zaug cov qhua thiaj rov qab tuaj saib peb dua.

Thaum kawg no, tsim nyog peb txhua tug yuav tsum paub txais tos thiab tam qhua; nws tsis yog ib qho koj kawm tau tom tsev kawm ntawv los. Nws yog ib qho yus kawm nyob hauv lub vaj lub tsev, kawm ntawm niam txiv los, thiab xyaum ua xwb. Feem ntau cov laus, cov nom tswv, cov paub kev cai, thiab cov muaj muaj phoojywg lawv yeej paub tam qhua dua. Ib qho koj lub neej yuav tsaug qhuas thiab thuam ces yog seb koj puas paub tam qhua xwb. Yuav tau npaj tos txhua lub sij hawm, vim thaum qhua tuaj txog ces lig lig lawm. Thaum qhua tuaj txog tsis zoo sib ceg, vim koj yuav txaj muag mus txog ntua hnub koj tso lub ntiaj teb no tseg. Ua siab zoo, thiaj muaj tib neeg poo. Paub tam qhua, lawv thiaj tuaj dua. Smile

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°9

Re: IB TUG NIAM TSEV ZOO

koojziagkabzaug on 6th June 2010, 5:39 pm

Tub Ntxhais Hluas Txoj Kev Ua Nkauj Ua ,Niam Txiv Yuav Tsum Paub Txog

Nyob Los Tsuas Teb, cov hluas nkauj hluas nraug sib tham thaum niam thiab txiv pw tag lawm xwb. Cov tub hluas mus yos cov hluas nkauj uas lawv nyiam rau tom hluas nkauj tsev. Cov tub hluas nrog cov ntxhais hluas sib ntxhi ntawm qhov tsev. Qee zaum cov tub hluas tshuab raj tshuab ncas kom cov hluas nkauj hnov tias muaj hluas nraug tuaj lawm. Yog sib nyiam, hluas nraug mam li hais kom hluas nkauj tawm tuaj sib pom los muaj. Thaum muaj cov niam cov txiv nyob ntawd mas cov hluas yuav tsis lam sib tham ua ntxhwb ntxhiag li, tsuas yog tej lub caij xws li Tsiab Peb Caug. Thaum noj Peb Caug, cov tub ntxhais hluas pov pob thiab hais kwv txhiaj sib daj dee. Cov niam thiab txiv saib thiab pab lawv tej ntxhais xaiv vauv.

Nyob ntawm teb chaws Asmesliskas teb chaws fabkis thiab cov teb chaws vam meej, kev ua nkauj ua nraug hloov lawm thiab ntxhais Hmoob yeej tham tau hluas nraug tau ntau tshaj qub, txawm niam thiab txiv thiab cov hlob nyob ntawd los xij. Kuj muaj ntau txoj kev ua nkauj ua nraug nyob teb chaws no. Thaum ib tug me nyuam muaj 12 xyoo, nws yuav tham xov tooj nrog lwm tus ntev ntev. Ib tug me nyuam twg mas yuav nrog phooj ywg sib tham heev rau hauv "computer." Lawv kuj yuav nrog phooj ywg ua ke ntau dua thiab. Li ntawd, qhov yus yuav tsum nrog nws tham thiab tsom kwm nws tej kev ua ub ua no.

Ntxiv no yog tej tswv yim pab rau koj saib xyuas los yog tsom kwm koj tus me nyuam hluas txoj kev nkauj kev nraug:

* Qhia tsev neeg txoj cai kom meej txog kev nkauj kev nraug.
* Yuav muaj pes tsawg xyoo koj tus me nyuam hluas thiaj li zoo mus nrog hluas nkauj hluas nraug yos? Muaj tus tshawb pom tias cov ntxhais uas tham cov hluas laus zog lawm, yuav siv yeeb siv tshuaj thiab haus dej haus cawv thiab nyiam ua plees ua yi ntxov zog.
* Txhob maj liam tias tsuav mus yos lawm xwb ces yog ua plees ua yi lawm xwb ntag; kev ua nkauj ua nraug kuj tsis yog ua plees ua yi xwb.
* Paub tus tham koj tus me nyuam.
* Paub qhov nkawv yuav mus thiab tias nkawv yuav mus ua dab tsi. Puas yog nkawv nrog ib pab ua ke mus los yog nkawv ob leeg xwb?
* Txwv kom nkawv paub tias qhov twg, thaum twg thiab nkawv yuav mus ua ke tau npaum li cas xwb.

Cov me nyuam hluas yeej xav paub kev ua nkauj ua nraug thiab kev sib hlub. Pab kom lawv to taub tias txoj kev sib hlub yog los ntawm kev sib ntseeg siab thiab sib txhawj. Mloog lawv thiab tsis txhob xav tias yus xav li cas ces yog li ntawd xwb. Kev ua nkauj ua nraug muaj cuab kav ua kom tus neeg ntawd lub siab loj, muaj cuab kav pab kom lawv xam pom tias lawv yog leej twg, thiab muaj cuab kav qhia kom lawv txawj nrog lwm tus sib haum xeeb tau.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°10

Re: IB TUG NIAM TSEV ZOO

koojziagkabzaug on 6th June 2010, 5:46 pm

KEV TSIM TXIAJ NYOB NTAWM TUS NIAM

Luag tau ua thawj coj los vim luag poj niam siab loj
Luag tau ua txoov kav los vim luag poj niam siab dav
Luag tus txiv muaj hwj chim los vim luag tus poj niam muaj tswv yim
Luag tus txiv tau ua txwj laus los vim luag poj niam yeej ntse txaus
Luag tus txiv tsim txiaj los vim luag poj niam txawj thiaj
Luag tus txiv raug luag nyiam los vim luag tus poj niam txawj tiam
Luag mloog tus txiv lus los vim luag tus poj niam coj lus tus
Luag mloog tus txiv hais vim luag poj niam tsis ua de v raws nkais
Tus txiv hais luag yuav los vim luag poj niam tssi ua de v raws quav
Tus txiv hais luag hwm los vim luag poj niam yeej ua twj ywm
Tus txiv hais luag yuav los vim luag tus poj niam yeej tsis rhuav
Luag tus txiv tau ua nom loj los vim luag tus poj niam txawj coj
Vim luag nquaj luag thiaj tau noj los luag poj zoo luag thiaj tau kev txwj laus coj
Vim luag nquag luag thiaj tau hnav los yog luag poj zoo luag thiaj tau kev txwj los tsav.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°11

Re: IB TUG NIAM TSEV ZOO

koojziagkabzaug on 6th June 2010, 5:48 pm

10 Yam Rau Cov Pojniam Hmoob Xav

1. Nyob yav ntuj qub qab puag thaum ub, yog thaum muaj ib pluag qab noj, cov txiv neej yog cov xub xub noj ua ntej pojniam. Lawv muab cov phuas thiab cov nqaij zoo zoo noj tag es mamli tseg cov nqaij rog rog thiab cov kua rau tej pojniam haus ntse zaub ntse mov noj dog dig xwb. Qhov no nej cov pojniam xav li cas?

2. Nyob rau yav ntuj qub qab puag thaum ub, thaum muaj qhua tuaj saib yus tsev neeg mas cov pojniam yog cov ua zaub ua mov khwv khwv tom lub qhov cub npaj pluag zaub pluag mov los tam qhua, tab sis lawv tsis tau noj koom tsum nrog cov txiv neej. Qhov no nej cov pojniam xav li cas?

3. Nyob rau yav ntuj qub qab thiab nim no, cov pojniam mas yeej ua ob txoj hauj lwm tag mus li. Ib txoj yog ua cov hauj lwm sab nraud khwv nyiaj khwv txiaj, ib txoj yog ua hauv tsev ua zaub ua mov rau pab txiv tub noj. Cov txiv neej feem coob ces tsua yog nyob tos noj xwb. Qhov no nej cov poj niam ho xav li cas?

4. Pojniam li ces yog thaum lub ncauj heev heev es tug txiv cam tsis yeej ces feem ntau yeej yog mag qws xwb xwb li. Lawv ua no kom pojniam paub hwm thiab paub ntshai tias lawv yog ib tug txiv neej tiag tiag. Qhov no nej cov pojniam ho xav li cas?

5. Cov niam txiv yav thaum ub muaj cai muab peb cov ntxhais qhaib rau tug ub tug no txawm tug ntxhais tsis kam los qhuab yuam tuag nthi xwb vim lawv yog nej yug. Qhov no nej cov pojniam ho xav li cas?

6. Peb tsis tag yuav txhawb cov ntxhais kom mus kawm ntawv qib siab li vim lawv yeej tsis nrog peb nyob ces nkim peb tej dag zog thiab nyiaj txiag xwb. Qhov no nej cov pojniam ho xav li cas?

7. Peb cov pojnaim Hmoob ruam ruam li ces kav tsij muab yuav ua niam hlob niam yau kom tag. Muab menyuam coob coob rau lawv xwb ces lawv yeej khiav tsis taus thiab nrauj tsis taus peb li. Qhov no nej cov poj niam ho xav li cas?

8. Niam txiv muab peb muag tuag thi rau tsev tib neeg Hmoob tov lawm ces txawm peb tug txiv tsis hlub peb, muab peb ntaus, thiab muab peb tsim txom npaum cas los peb yuav tsum ua siab ntev nyob thiab uv tiag uv tiag kom txog hnub tuag xwb. Qhov no nej cov pojniam ho xav li cas?

9. Cov txiv neej mas tub tub nkeeg heev li. Tej thaum mas me nyuam los tsis nrog yus tu; zaub mov tsis nrog yus ua; vaj tse tsis nrog yus cheb; ib lo lus zoo yus tsis hnov; ib lub paj los yus tsis pom; ib pluag mov los yus tsis tau noj. Qhov no nej cov pojniam ho xav li cas?

10. Cov pojniam mas tsis zoo mus saib niam tais, yawm txiv thiab cov dab laug ntsuj ntshis. Tsis zoo mus kom lawv pab yus ntau ntau; txawm mus lawm los lawv yuav yus ntuas kom rov qab los hlub tug txiv es twb yuav muab koj tua pov tseg xwb. Qhov no nej cov pojniam ho xav li cas?

Zoo li peb cov pojniam Hmoob tseem khwv tshaj luag lwm haiv tib neeg cov pojniam sub. Yog peb cov pojniam Hmoob tsis paub sawv tiv thaiv peb tug kheej, peb tseem yuav raug cov txiv neej Hmoob tsim txom ntxiv. Peb yuav tau ua lub siab tawv, tsis txhob ntshai ntshai, thiab tsis txhob ruam ruam. Ntuj pub peb los muaj lub paj hlwb txawj xav, muaj lub peev xwm, yus yuav tau hlub yus tus kheej thiab mog. Tsis txhob nyob tos cov txiv neej muab nej quab yuam mus nkhib mus nkhaus xwb. Ua li nej yuav txom nyem pes tsawg tiam ntxiv? Nyob teb chaws Vam Meej ntawm nej tam sim no twb muaj kev vaj huam sib luag lawm, yuav tau siv txoj kev cai no los pab nej tus kheej. Tab sis thov tsis txhob siv txoj cai no ua phem rau cov txiv neej thiab mog.

Thaum kawg no, peb cov txiv neej Hmoob nco ntsoov tias pojniam ces tsuas yog cov 'los pab thiab los txhawb' nej lub neej kom ciaj ncaig xwb. Tsis txhob muab lawv quab yuam li cov qhev.Tsis txhob hais tias nej hlub hlub nej tus pojniam es yuav lawv los ua qhev ua zaub ua mov noj thiab los yug menyuam xwb . Yog nej saib lawv tsis raug nqi, nej yuav tsis tau noj nqaij txhiab nqaij ci. Yog nej saib lawv tsis khuab qhov muag, nej yuav tsis tau lawv los puag. Yog nej tsis txhawb lawv kom lawv txawj lawv ntse, thaum kawg nej yog tug yuav puas koob puas npe.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°12

Re: IB TUG NIAM TSEV ZOO

koojziagkabzaug on 6th June 2010, 5:51 pm

HNUB NO KUV TUAJ PIAV TXOJ KEV "SIB SAU UA NEEJ" RAU NEJ

KEV SIB YUAV

Sib yuav: Txhais tau tias ob leeg zoo siab los sib koom ua lub neej nyob ua ke. Tsis yog tus txiv yuav tus niam xwb, tsis yog tus niam yuav tus txiv xwb. Nkawv ob leeg zoo siab los nyob ua ke. Coj nkawv ob lub siab los koom ua ib lub neej, koom ib lub cev hais ib lo lus, noj ib taig mov, pw ib lub txaj. Los tab cuab vij zeej.

YUAV TXIV

Yuav txiv: Txhais tau tias tus poj niam mus nrog ib tug txiv neej nyob lawm. Nws muaj tug, muaj txiv lawm, nws muaj tus saib xyuas nws lawm. Tus txiv mus them nqe tshoob rau tus poj niam niam thiab txiv lawm, muaj mej koob txhiaj com pom tias ua tshoob ua ko tag lawm. Tus poj niam nws zoo siab tso nws tsev neeg, neej tsav, nws niam nws txiv, neej nus, viv ncaus tseg nws los nrog tus txiv ua neej, los nrog koj nyob ua rau koj noj, los hlub koj tsev neeg, los ua koj xeem hmoob. Yog li kj thiaj yuav tau hlub nws tshaj qhov koj xav vim nws los ua koj tsev neeg lawm. Nws yog ib tug qhua koj mus xaiv los koj coj los nrog koj tsev neeg nyob. Nws tsis muaj leej twg hlub nws, yog tias koj tsis hlub nws. Nws tej neej tej tsav, tej niam tej txiv, tej neej nus yog qhua lawm xwb. Thaum nws rov mus txog tom lawv lub tsev, lawv tsis tau hu tias koj los lod. Lawv hu nws tias koj tuaj lod…….zoo nkaus li nws tsis yog lawv tsev neeg lawm txij hnub koj coj nws los nrog koj nyob lawm, nws pauv nws lub xeem los ua koj lub. Niam txiv nyiam yuav hlub npaum li cas, nco npaum li cas los lawv ua ib siab cia koj coj mus nrog koj nyob. Qhov ntawm no yog noob neej kev lis kev cai. Hmoob piv txoj lug tias tub yug rau hauv tsev, ntxhais yug rau saum qhua. Muab xav los txogo cov ntxhais tu siab heev. Yog vim txoj kev cai koj yug rau kuv, kuv yug rau koj xwb tsis li ces yeej tsis lam pub tus ntxhais mus nrog lwm tus nyob. Leej twg yug yeej mob leej twg siab, xav txog thaum me los txog rau hnub loj tiav nkauj, yeej tsis xav pub nws ncaim yus tsev neeg. Ib tug yug rau ib sab roob ib lub hav koj tsis paub kuv, kuv tsis paub koj, tabsi vim sib nyiam lawm.….piv tau tias koj yog nws tus tav. Muaj ntau zaus niam txiv yeej tsis tau paub tus tub li, koj tseem yog hmoob xwb tsis tau txheeb ze lawv qhov twg. Niam txiv yeej tsis tso siab rau koj coj lawv tus ntxhai ncaim ntawd lawv mus………Tabsi yog vim txoj kev cai thiaj ua ib siab lawm xwb.

YUAV POJ NIAM

Yuav poj niam: txhais tau tias tus txiv neej mus coj ib tug ntxhais lwm xeem los nrog nws nyob lawm. Hnub ntawd mus thiaj hu tau tias nws yuav poj niam los si muaj poj niam lawm. Nws coj ib tug ntxhais lwm xeem los nrog nws nyob. Nws yuav tau xyaum kom tus neeg ntawd kom ncawg nws tsev neeg, ncawg noj ncawg haus thiab cuab kwv tij. Tus txiv yuav tau qhia kom tus niam txawj ua yam lawv tsev neeg ua thiab lawv tsev neeg nyiam. Tus txiv lub hluas hauj lwm yog coj tus niam mus rau txoj kev zoo thiab hlub kom txaus li thaum nws mus ntxia. Yuav tsum txhob pub tus niam ntshaw luag tug. Qhov ntawd no yog tus txiv li dej num. Hnub nws muaj poj niam lawm nws yuav tau hloov nws tus cuj pwm hluas mus ua neeg laus.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°13

Re: IB TUG NIAM TSEV ZOO

koojziagkabzaug on 6th June 2010, 5:52 pm

by: LUBPAJZOO

Nyobzoo os, tus me Ntxhais Siabzoo.

Tau ntev heev lawm kuv tsis tau tuaj ntsib koj, vam tias koj yuav ntsib kev noj qab haus huv thiab no mog. Kuv tau hais tseg lawm tias kuv mam nrhiav sijhawm tuaj teb koj cov lus nug. Yog li hnub no kuv tuaj teb koj cov lus nug es txawm tias kuv hais tau tej lolus tsiv mloog thiab tsis haum koj siab los thov zamtxim rau Lubpajzoo mog.

10 Yam Rau Cov Pojniam Hmoob Xav

1. Nyob yav ntuj qub qab puag thaum ub, yog thaum muaj ib pluag qab noj, cov txiv neej yog cov xub xub noj ua ntej pojniam. Lawv muab cov phuas thiab cov nqaij zoo zoo noj tag es mamli tseg cov nqaij puv puv thiab cov kua rau tej pojniam haus ntse zaub ntse mov noj dog dig xwb. Qhov no nej cov pojniam xav li cas?

Lus teb #1:
Kuv xav tias yog yuav muab hais yav thaum ub los piv rau lub neej tiam no ces kuj yog vim lub neej thaum ub cov txiv tsa hwjchim dhau lawm xwb. Qhov zoo mas lawv yuavtsum faib sibnpaug vim tias cov niamtsev los lawv yeej sibzog nrog lawv tus txiv khwv. Ob leeg puavleej sibzog khwv thiaj tau txaus noj txaus haus. Yog li kuv xav tias cov pojniam thaum ub mas siab ntev thiab hlub lawv cov txiv dhau lawm os. Vim lawv muab lawv cov txiv tso rau qhov chaw siab. Lawv tsis tau noj los tsuav lawv cov txiv tau noj xwb ces yeej zoo lawv siab tshaj lawm. Yog cov txiv txawj xav ces twb tsimnyog lawv ua cov pojniam tsaug.
Lub neej nim no mas vajhuam sibluag lawm. Cov niam muaj peevxwm los koom nrog cov txiv thiab faib sibnpaug lawm os.
Lub neej nim no los ib txhia tseem coj tus cwjpwm thaum ub thiab. Feem coob yog cov tseem coj kevcai dabqhuas. Muaj ib rooj mov noj mas cov pojniam yeej rau mov rau cov txiv noj ua ntej tag pojniam mam los noj qub xwb. Peb sab Hmoob tseem coj li no yeej tsis tau hloov li. Cov hloov ces yog cov hluas hos cov laus tseem tsis tau hloov.
Qhov zoo ces yus yog tus niam tsev lawm ces kev noj haus hauv lub vaj lub tsev yog yus ua tus tswj ntag. Npaj zaub mov kom ntau ntau ces thaum rau yuavtsum rau ib rooj rau cov txivneej hos rau ib rooj rau cov pojniam, hos rau ib rooj rau cov menyuam. Txog caij noj ces nyias noj nyias li mas thiaj tau sib npaug nawv.

Hos cov ntseeg kevcai Church lawm lawv faib haum rau ob tog lawm os.

Yog hais siab nej leejtwg lawm no thov zamtxim rau kuv nawv. Vim kuv tsuas hais raws li qhov kuv nyiam thiab xav xwb.

2. Nyob rau yav ntuj qub qab puag thaum ub, thaum muaj qhua tuaj saib yus tsev neeg mas cov pojniam yog cov ua zaub ua mov khwv khwv tom lub qhov cub npaj pluag zaub pluag mov los tam qhua, tab sis lawv tsis tau noj koom tsum nrog cov txiv neej. Qhov no nej cov pojniam xav li cas?

Lus teb #2:
Lub neej thaum ub txhua tug yeej coj li ntawd ces txawm tias cov pojniam khwv khwv npaj pluas noj npaum licas los lawv yeej txaus siab hlo npaj thiab tsis xam khib tsis suav nqe zog li. Txawm lawv yuav yoo es cia lawv npaj qab qab rau cov txiv noj xwb los yeej zoo lawv lub siab lawm. Yog lawv yim txawj npaj qab thiab cov txiv yim nyiam noj ces yim zoo lawv siab xwb. Yog ibtug pojniam tsis coj li feem coob no coj ces nws twb raug luag thuam kiag lawm. Yog li cov pojniam thaum ub thiaj ua ib siab nyoo cov txiv.
Qhov lawv tsis koom tsum nrog cov txivneej kuj yog vim lawv muab lawv cov txiv saib hlob thiab tseemceeb dua lawv. Cov txiv ntaud yog cov coj thiab cov ntaws thawj ces pojniam txhua tus yeej yuavtsum nyoo lawv tus txiv thiab coj raws feem coob coj.

3. Nyob rau yav ntuj qub qab thiab nim no, cov pojniam mas yeej ua ob txoj hauj lwm tag mus li. Ib txoj yog ua cov hauj lwm sab nraud khwv nyiaj khwv txiaj, ib txoj yog ua hauv tsev ua zaub ua mov rau pab txiv tub noj. Cov txiv neej feem coob ces tsua yog nyob tos noj xwb. Qhov no nej cov poj niam ho xav li cas?

Lus teb #3:
Tsis hais yav thaum ub lossis nim no li, cov neeg uas khwv khwv nruab hnub thiab hmo ntuj ntawd ces yeej yog nws tus kheej yeej coj tau li ntawd xwb. Kuv li mas kuv hais tias tsis hais txivneej lossis pojniam li, haujlwm nruab hnub thiab hmo ntuj puavleej yog ob leeg li haujlwm. Tus txiv nws muaj nws haujlwm nruab hnub, nws muaj nws haujlwm hmo ntuj. Tus niam nws muaj nws haujlwm nruab hnub nws muaj nws haujlwm hmo ntuj. Yog koj paub tias yam haujlwm twg yog koj yam lawm ces koj yeej muaj haujlwm ua tsis hais nruab hnub lossis hmo ntuj li.
Cov uas cia tus pojniam ua haujlwm nruab hnub thiab hmo ntuj huvsi es nws pw nyob tos noj xwb ces txawm nws yuav pes tsawg tus pojniam thiab muaj pes tsawg tus menyuam los nws yeej coj li ntawd. Nws lub neej ces yeej tsis txawj xav thiab tsis txawj hlub nws tus pojniam li. Cov coj li no es tsis pab nws tus pojniam ces ib kuj yog tim tus txiv siab phem. Ob ces kuj yog tus txiv tubnkeeg. Peb ces yog tus txiv tsis nyiam nws tus pojniam tiag es nws thiaj tsis xav pab. Yog nws coj li no ces zoo nws siab tabsis nws pojniam nyob kho siab khuav, tu siab nrho thiab ua lub neej ntshaw luag tej txiv nquag twj ywm rau nruab siab.
Tej tug pojniam ces ntshaw ntshaw luag tej txiv nquag ces thaum kawg thiaj deev lausnraug es muab lub neej tsoo povtseg. Ib txhia pojniam uas tau txiv tubnkeeg lossis siab phem ces nws ua siab ntev uv thiab uv es thiaj muaj lolus hais tias, “Lam ua cav lwj sis ib kom txog hnub tuag,” no los mas cov vivncaus e….e…

4. Pojniam li ces yog thaum lub ncauj heev heev es tug txiv cam tsis yeej ces feem ntau yeej yog mag qws xwb xwb li. Lawv ua no kom pojniam paub hwm thiab paub ntshai tias lawv yog ib tug txiv neej tiag tiag. Qhov no nej cov pojniam ho xav li cas?

Lus teb #4:
Kuv xav tias cov txiv coj li koj hais no ces yog cov txiv ua tsis ntse tsab ntse xwb os. Cov txiv phem thiab khav theeb xwb thiaj li tsim pojniam. Yog tus pojniam siab mos ces ua siab ntev nyoo kom txog hnub laus thiab txog hnub nws ib tsev menyuam lawm nws mam paub ces thaum no lub neej laus tag khiav los khiav tsis taus ces ua ib siab nyob hlub tej menyuam.
Cov pojniam siab luv uv tsis taus ces yog tus txiv phem ces nws yeej kawg khiav xwb. Vim nws xav tias xum cia nws khiav es tsis xum cia tus txiv tua.
Kuv kuj pom cov txiv tsim pojniam lawm thiab. Ib txhia ces tsim kom tuag, ib txhia ces tsim kom nyoo xwb no tabsis thaum kawg ces yog pojniam uv tsis taus ces pojniam khiav ces thiaj muaj sib nrauj. Ib txhia pojnim ces uv nyob vim tsis muaj neejtsa pab.
Ib qhov teebmeem kuj yog vim tej laus muab tej menyuam sib yuam sib yuav xwb tsis muaj txojkev sibhlub. Thaum tus tub tsis nyiam tus nyab ces nws lam yuav vim tsis xav rhuav lub neej tabsis yeej tsis hlub tus pojniam kiag li. Tu siab kawg, yog leejtwg tau lub neej phem li no.

Tej laus ib txwm siv lolus haistias, “Tub txawj ntxhais ntse” no ned. Tej no ces yog tub txawj ces nws tsuas kawm txawj xwb nws twb tsis ntse. Yog tus txiv twg ntse ces nws twb txawj pab nws pojniam menyuam es nws pojniam menyuam twb tsis muaj kev tu siab. Hos cov tub uas kawm txawj xwb tsis ntse ces thiaj yog cov yuav pojniam los tsim xwb. Yog pojniam ua txhuayam ces zoo, pojniam nroo thaum twg ces mag ncaws thiab muab nrauj kiag xwb los mas, cov vivncaus aw.

5. Cov niam txiv yav thaum ub muaj cai muab peb cov ntxhais qhaib rau tug ub tug no txawm tug ntxhais tsis kam los qhuab yuam tuag nthi xwb vim lawv yog nej yug. Qhov no nej cov pojniam ho xav li cas?

Lus teb #5:
Yav thaum ub ces vim tej laus ntshaw nyiaj thiab ntshaw luag tus tes nquag los pab khwv. Yog pom leejtwg tus mentxhais tau zoo niam tau zoo txiv qhuabqhia es tus ntxhais nquag ces luag tuaj yeem muab nyiaj kuv phem muas luag tus ntxhais mus khwv rau luag. Thaum luag rho nyiaj tuaj muas lawm ces tej laus cia li muab tus ntxhais rau. Ib txhia ces vim yog phauj ntxhais thiab dablaug tub. Luag muab sib qhaib thaum yau yau tsis tau paub tab lawm. Hlob tuaj ces mus yuav luag los luag tus tub tsis hlub vim nws twb muaj hluasnkauj lawm thiab. Yog cov laus thaum ua tibzoo xav ces tej no yeej tsis tsim nyog ua li.

Thaum ub kuv niam tus nus twb tuaj thov qhaib kuv rau nws tus tub tabsis vim kuv niam tsis kam ces nim no kuv thiaj tsis tau ua dablaug nyab, hehhee.

6. Peb tsis tag yuav txhawb cov ntxhais kom mus kawm ntawv qib siab li vim lawv yeej tsis nrog peb nyob ces nkim peb tej dag zog thiab nyiaj kuv phem xwb. Qhov no nej cov pojniam ho xav li cas?

Lus teb #6:
Yog xav li tej laus hais mas txaus tu siab tshajplaws. Tsis xav yug los ua ib leej ntxhais rau yus niam yus txiv kiag li. Yog yam uas rov tau qab mus saum ntuj ces yuav rovqab mus es tsis thov los yug ua neeg ntiajteb li.
Kuv xav mas vim tej laus thaum ub lawv tsis muaj kev kawm txawj ntse txaus. Lawv thiaj muab kev xam khib los coj rau tej ntxhais vim tus ntxhais yog tus mus ua neej rau saum luag. Yog li lawv thiaj tau txwv cov ntxhais li kev kawm es khwv nyiaj los xa tej tub mus kawm txujci vim cov tub yog cov yuav nrog niam nrog txiv nyob tuav lawv tej kevcai dabqhuas lawm tom ntej. Lawv coj raws kev xamkhib lawm lawv thiaj coj li ntawd. Tabsis tus puav uas lawv paub tias lawv yog ntuj neeg, lawv hais ntuj lus, lawv yug ntuj li menyuam, lawv yuavtsum hlub tej menyuam sibnpaug ces lawv yeej xa tej tub tej ntxhais huvsi mus kawm txawj kawm ntse kom txhua tus tau lub neej zoo nrog luag ua thiab.

7. Peb cov pojnaim Hmoob tsis ntse tsis ntse li ces kav tsij muab yuav ua niam hlob niam yau kom tag. Muab menyuam coob coob rau lawv xwb ces lawv yeej khiav tsis taus thiab nrauj tsis taus peb li. Qhov no nej cov poj niam ho xav li cas?

Lus teb #7:
Kuv xav tias cov txiv tsev uas xav li no ces lawv yog cov tsis ntse lawm ntag. Peb pojniam Hmoob yeej tsis tsis ntse tabsis vim ntuj tso pojniam los tsim noob neej nrog txivneej ces txivneej thiaj saib tsis taus cov pojniam xwb. Txivneej yog cov tsis ntse es ntuj thiaj tso pojniam los pab tsa txivneej ua nej tabsis lawv tsis xav zoo lawv thiaj cem pojniam tsis ntse xwb.

8. Niam txiv muab peb muag tuag thi rau tsev tib neeg Hmoob tov lawm ces txawm peb tug txiv tsis hlub peb, muab peb ntaus, thiab muab peb tsim txom npaum cas los peb yuav tsum ua siab ntev nyob thiab uv tiag uv tiag kom txog hnub tuag xwb. Qhov no nej cov pojniam ho xav li cas?

Lus teb #8:
Qhov no mas yog ib lolus phem muab pov rau cov ntxhais thaum nws mus yuav txiv nyob ntawm nws rooj tshoob cov lus ntuas. Vim tej laus tau ntuas thiab foom tej lus phem lus zoo ces yog tus txawj cais ces coj lus zoo mus ua neej, tus tsis txawj cais ces coj lus phem mus ua neej.
Piv txwv li: “Koj ces zoo li yav cav taws uas tsuas muaj yuav muab tsij lawm hauv lub qhov cub xwb tsis muaj thau rovqab”
Lawv yuavtsum muab tej lus ntawd los xauv kom yus mus ua neej thiaj rau siab ua yus lub neej tabsis yog thaum yus tau kev ti lawm, yus yuav tau nrhiav kev pab thiab luag thiaj pom qab pab yus.

9. Cov txiv neej mas tub tub nkeeg heev li. Tej thaum mas me nyuam los tsis nrog yus tu; zaub mov tsis nrog yus ua; vaj tse tsis nrog yus cheb; ib lo lus zoo yus tsis hnov; ib lub paj los yus tsis pom; ib pluag mov los yus tsis tau noj. Qhov no nej cov pojniam ho xav li cas?

Lus teb #9:
Kuv ntseeg thiab pom lawm tias ib feem txivneej yeej coj li no tiag. Lawv yeej tubnkeeg thiab tsis pab nws tus pojniam li Nws nyob zoo li tus neeg tsaugzog tsim tsis nto. Thaum nws tsaugzog txaus thiab tsim nto ces nws pojniam twb muab lub cuabyig tsoo tawg tag ces thiaj poob rau lolus haistias, “Tsis pom dej dag siab tsis nqeg.”
Peb cov ntxhais yog leejtwg tau lub neej zoo li no ces yog tus rub lub siab ntev nyob ces nws yuav uv tag nws sim neej. Yog nws tsis nyoo thiab nws tsis uv nyob ces thaum kawg lub neej kawg tawg xwb.
Kuv xam pom tias tsis yog txivneej thiaj tubnkeeg xwb. Ib cov ntxhais los tubnkeeg kawg li. Tus txiv tsis hais ces zoo yog tus txiv nroo ces nrog sib ceg thiab twv ub twv no kom tus txiv swb. Tus txiv tsis xav muab nrauj povtseg ces ua ib siab uv thiab ua nws tus pojniam qhev ua zaub mov, tu menyuam, tu vajtse, ntxhua khaubncaws, thiab ua txhua yam haujlwm pojniam rau nws tus pojniam huvsi li. Muaj ib pluag noj haus los nws tus pojniam tsis los tab qhua li tseem cia qhua tuaj ua zaub mov thiab tu vajtse xwb.
Yog li txojkev tubnkeeg no tsis yog tim cov txiv xwb tabsis tim tus neeg ntawd nws yeej xeeb tim tsis ras tsis xeev los ua neeg nquag xwb.
Yog leejtwg nyob lub neej zoo li nqe lus nug #9 no ces nyuaj nyuaj ua lub neej laus li os.

10. Cov pojniam mas tsis zoo mus saib niam tais, yawm txiv thiab cov dab laug ntsuj ntshis. Tsis zoo mus kom lawv pab yus ntau ntau; txawm mus lawm los lawv yuav yus ntuas kom rov qab los hlub tug txiv es twb yuav muab koj tua pov tseg xwb. Qhov no nej cov pojniam ho xav li cas?

Lus teb #10:
Yog tau ibtug txiv phem txhua yam thaum pib rau thaum xaus li uas nqe lus #1 txog #9 los saum no lawm ces tus siab ntev ces uv kom txog hnub ncaim lub ntiajteb no mus. Tus siab luv thiab uv tsis taus lawm ces nws thiaj khiav mus cuag neejtsa. Tabsis thaum mus ti rau neejtsa lawm yog lawv coj li koj nqe lus #10 no xwb ces tu siab hlo sim neej no ntshe yog yus tiam ntawv los rau neeg tsim xwb os, Me Ntxhais Siabzoo.
Yog cov neejtsa zoo ces luag yuav tag qab taug ntsis. Luag yuav nug ib qhov zujzus tuaj seb tus ntxhais puas yog tus phem. Yog thaum lawv nug tag, yog lawv tus ntxhais yog tus muaj feem phem nyob hauv thiab ces lawv muab nws yuam rovqab. Yog lawv nug hos lawv tus ntxhais yeej ua zoo txhua yam ces tsimnyog lawv pab lawv tus ntxhais kom nws dim txojkev tsaus ntuj.
Kuv paub tias ib txhia luag tsis nug paus ntsis ces muab tus ntxhais yuam rovqab mus rau luag tsim tuag kus li. Vim li no es peb ib txhia ntxhais thiaj ua lub neej kho siab zim losmas lawv aw…. Tu siab ua luaj….

Thaum kawg no kuv thov hais rau peb cov ua niam lawm, yog leejtwg tus ntxhais poob rau qheb no lawm, thov mloog nws tej lus thiab thov nug nws moo es txhob cia nws nyob tsaus ntuj nti mog.

Zoo li peb cov pojniam Hmoob tseem khwv tshaj luag lwm haiv tib neeg cov pojniam sub. Yog peb cov pojniam Hmoob tsis paub sawv tiv thaiv peb tug kheej, peb tseem yuav raug cov txiv neej Hmoob tsim txom ntxiv. Peb yuav tau ua lub siab tawv, tsis txhob ntshai ntshai, thiab tsis txhob tsis ntse tsis ntse. Ntuj pub peb los muaj lub paj hlwb txawj xav, muaj lub peev xwm, yus yuav tau hlub yus tus kheej thiab mog. Tsis txhob nyob tos cov txiv neej muab nej quab yuam mus nkhib mus nkhaus xwb. Ua li nej yuav txom nyem pes tsawg tiam ntxiv? Nyob teb chaws Vam Meej ntawm nej tam sim no twb muaj kev vaj huam sib luag lawm, yuav tau siv txoj kev cai no los pab nej tus kheej. Tab sis thov tsis txhob siv txoj cai no ua phem rau cov txiv neej thiab mog.

Lus teb:
Yeej muaj tseeb li koj hais tias ntuj twb pub peb los muaj lub paj hlwb txawj xav, muaj lub peevxwm zoo los hlub niam hlub txiv, hlub kwv hlub tij, hlub me tub me ntxhais thiab qhov tseemceeb tshaj yog kom txawj hlub nws tus txiv. Txawm yog li ntawd es peb cov pojniam thiaj nyoo nws tus txiv tshaj vim txojkev hwm thiab txojkev hlub xwb. Qhov peb khwv tshaj peb tsis suav peb tej nqe zog es peb yeej txaus siab hlo ua txhuayam ces twb yog vim peb ntshaw txojkev hlub los ntawm peb tus txiv loj tshaj. Thiab qhov peb uv taus tshaj ces tsis yog peb tsis ntse tshaj peb tus txiv tabsis twb yog peb ntse tshaj lawm peb thiaj uv taus. Yog tias peb tus txiv muab nws lub pajhlwb txawj xav ntawd tig los kom nyob yog chaw ces nws twb yog tus yuav tsum ua tus niam tsev tsaug vim tus niam tsev yog tus los txhawb nws lub neej thiaj zoo.
Kuv xav hais ntau tabsis txawm hais ntau npaum licas los yeej tsuas xaus rau lolus “HLUB” xwb ces cia kuv muab xaus li no; Thov Hlub Tus Neeg Nws Hlub Koj thiab mog.
Lolus zoo txhawb zog yog tawm hauv nruab nrog nruab siab los..., yog koj ua tibzoo mloog koj yuav paub txog lub tseem ntsiab..., cov lus txhawb zog yuav kho tau koj nploojsiab.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°14

Re: IB TUG NIAM TSEV ZOO

koojziagkabzaug on 6th June 2010, 5:58 pm

BY: HMOOB NTUJ QUBQAB

Luag tau ua thawj coj los vim luag poj niam siab loj
Luag tau ua txoov kav los vim luag poj niam siab dav
Luag tus txiv muaj hwj chim los vim luag tus poj niam muaj tswv yim
Luag tus txiv tau ua txwj laus los vim luag poj niam yeej ntse txaus
Luag tus txiv tsim txiaj los vim luag poj niam txawj thiaj
Luag tus txiv raug luag nyiam los vim luag tus poj niam txawj tiam
Luag mloog tus txiv lus los vim luag tus poj niam coj lus tus
Luag mloog tus txiv hais vim luag poj niam tsis ua de v raws nkais
Tus txiv hais luag yuav los vim luag poj niam tssi ua de v raws quav
Tus txiv hais luag hwm los vim luag poj niam yeej ua twj ywm
Tus txiv hais luag yuav los vim luag tus poj niam yeej tsis rhuav
Luag tus txiv tau ua nom loj los vim luag tus poj niam txawj coj
Vim luag nquaj luag thiaj tau noj los luag poj zoo luag thiaj tau kev txwj laus coj
Vim luag nquag luag thiaj tau hnav los yog luag poj zoo luag thiaj tau kev txwj los tsav

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

koojziagkabzaug

koojziagkabzaug: Moderator; Messages: 2496
Date d'inscription: 2010-02-28

Post n°15

Re: IB TUG NIAM TSEV ZOO

koojziagkabzaug on 6th June 2010, 6:14 pm

By: Lubpajzoo

Posted 03 November 2008 - 04:23 PM

Nyobzoo os, niamlaus Koojziagkabzaug, me ntxhais siabzoo, thiab me Hmoob Ntuj Qub Qab,

Tos tias tus niam tsev zoo ho ua tau ibtug zoo niamtsev los twb vim yog nws lub siab quab yuam nws ua zoo. Nws lub siab yeej tsis pub nws so ib chim los ib tsam li yeej ua haujlwm tavyeev rau tom ub tom no yeej tsis tau so. Nws lub me dag zog nws yeej tsis khuvxim tsuas yog tias nws ua tag li qhov nws teev tseg mas nws mam hnov nws lub me qab xib taws mob ncus nco los nws tseem twb tsis nrhiav chaw so. Nws nim siv siv zog khwv twb noj tsis tag haus tsis nqeg los nws lub me siab twb tsis tso nws tseg es nws twb tsis pom nws yog ibtug zoo niam tsev. Nws khwv khwv nruab hnub hmo ntuj rau nws tus me naib txiv, tej me nyuam, tej kwvtij, tej txheebze, thiab tej phoojywg es nws twb tsis muab ib feeb los txhawj txog nws txojsia kiag los nws twb tsis pom nws zoo es nws tseem pom luag txojkev nroo.

Vim nws lub siab, nws tus yeebyam thiab tus yamntxwv zoo ces nws dhau mus ua ibtug me ntxhais siab zoo. Thaum tswv ntuj pom tias nws yog ibtug mentxhais siabzoo heev thiab nws mloog lus heev lawm ces tswv ntuj yuavtsum tso lub hwjchim ntawd rau nws tuav. Txhuayam zoo hauv nws lub neej ces nws yeej muaj pib thiab muaj xaus. Nws xav tau yam twg los yam ntawd yeej los nrog xav, nws lub me lajlim tswvyim ces yim ua zoo ces yim tawm qhov zoo rau nws ua, yim khwv los nws yim zoosiab, nws yeej tsis khuvxim nws lub zog kiag. Luag yim pom nws zoo ces nws yim siv zog pab luag thiab yim zoosiab ua qhov zoo xwb yeej tsis suav nws tej nqe zog rau luag mloog.

Yog nws ua tsis txaus tej me myuam noj los nws lub siab twb xub mob, yog tagkis twg nws sawv tau lig vim nws tsis xis neej los nws lub siab twb tsis kheev. Tej menyuam tsis pub khaub hlab, Zaub mov ua pluas twg los twb xav kom yog pluas qab,
Saib ntshis tus me txiv tej ris tsho tsis pub ntuag, liv nraim tej me ris tsho rau tus txiv hnav tsis pub luag lwm leej lwm tus thuam,
Hlub tej menyuam hnia ntshis ntawm lub me plhu tsis hnov dhuav, tej menyuam tsis pub kom ib tus twg tshw txhiab thiab tsw quav,

Abya..., neb twb hais txhij hais txhua lawm ces kuv mam piav kwvhuam rau neb mloog xwb os.

***************

Ob niam tub txom nyem

Thaum ub muaj ibtug ntxhais siabzoo thiab nquag heev. Nws yog ntxhais Hmoob tojsiab tsis paub ntaub ntawv tsuas yog txawj ua noj ua haus xwb. Nyob nyob muaj ib tug tub hluas tuaj yuav nws mus ua nyab. Thaum lawv tuaj ua tshoob us kos tab los tau peb lub hlis xwb ces tus niam pog twb tseev kom tus nyab lub cev ciali xeeb tub. Leej niam los hais rau nws tus me tub tias kom nws kavtsij tso tus me nyab muaj menyuam sai sai. Nkawv nyob uake tau ib xyoos ces tus nyab tsis muaj menyuam raws siab xav. Nws tsis muaj menyuam ces ua rau leej niam pog me siab. Nws txawm tabmeeg kho thiab nrhiav tshuaj los kho tus nyab. Kho tau ob xyoos los tus nyab tsis muaj menyuam li ces niampog nrhiav kev tsim tus nyab lub siab. Niampog ua txhuayam kev phem ciav tus nyab kom nws nyob tsis taus los nws uv thiab ua siab ntev tsis qhia nws tej kev chim rau leejtwg. Niampog lawv pib nrhiav nyabyau rau lawv tus tub thiab txw kom tus tub ua siab phem rau tus nyab. Lawv ua siab phem npaum licas los tus nyab tsis quav ntsej thiab tsis pub mob rau nws cev nqaij daim tawv rau lawv pom. Txawm hauv nws lub siab yuav mob cuag riam hlais los nws ua tiag uv tsis qhia leejtwg li.
Muaj ib hnub tus nyab mus pw pem teb ces nws quaj quaj. Nws thiaj tsa ncauj thov nws niam yug nws vim nws niam tuag lawm. Nws niam thiaj los ua loojtsim rau nws hais tias nws niam hnov nws tej lus thov thiab pom nws tej kuamuag tag lawm. Nws niam thiaj thov lub ntuj xa ib tug me tub los rau nws. Tsis ntev ces nws txawm muaj menyuam thiab yug tau ibtug me tub. Nws muab nws tus me tub tis npe hu ua "Muaj Hmoo" no. Nws niam pog tsis nyiam ces cem cem tias ua cas npe zoo muaj ntau es nim yuav muab tus tub lub npe hu ua, "Muaj Hmoo" no xwb. Lawv cem thiab tsis nyiam tus nyab thiab nws tus me tub li. Tau ob xyoos tom qab no nws tsis muaj menyuam ntxiv lawm ces lawv cem cem nws tag zog. Lawv nrhiav tau ibtug nyab yau rau lawv tus tub yuav ua niamyau lawm ces lawv muab nkawv cais tsev. Tus nyab no nws coj nws tus me tub nrog nws mus ua neej nyob puag tim ntug zos. Nkawv ua neej nyob kho siab khuav ua lub neej nrog kua muag xwb tsis muaj neeg hlub nkawv li. Nkawv nyob tau kaum xyoo ces zaum no tus me tub hlob tuaj thiab pab tau nws niam lawm. Nkawv thiaj tsiv mus nyob tim ib lub zos tshiab nrog dua ib cov Hmoob tshiab nyob. Hmoov zoo heev rau lub sijhawm nkawv khiav los txog. Tus tswv zos tuaj xyuas nkawv ib niam tub thiab faib tau ib nkawm qaib rau nkawv mus chiv peev ua nkawv lub neej nyob dai luag qhua. Nkawv nyob tau ib xyoos ces nkawv khwv tau me ntsis nyiaj. Leej niam thiaj muab qhov nyiaj mus muas tau ib tug las npua los yug. Nkawv yug tus las npua ntawd tau ib xyoos thiab. Thaum yuav txog pebcaug ces leej niam thiaj los hais rau nws tus tub hais tias nkawv yug tau ib tug las npua xwb es yuav ua licas muab tus las npua ntawd tua noj. Thiab thaum muab tua tuag lawm yuav noj licas thiaj tag thiab yuav cia licas thiaj tsis tsw txhiab. Leej niam yeej paub lawm tabsis nws nug nws tus me tub seb tus me tub puas nrog nws paub. Tus me tub thiaj teb nws niam tias, " Kuv niad, wb twb tsis muaj kwvtij neejtsa li es yog wb tua wb tus las npua ntshe hau noj ib pluag tsis tag. Wb yuav muab hlais nqa los ntshe yuav qhuav tsis zoo thiab yuav tsw lwj vim noj tsis tag. Yuav muab cia licas los ntshe yuav cia tsis kav ntev kiag li os, kuv niad. Yog koj pom zoo thiab no ces cia wb mus hu tswv zos thiab cov kev txwj laus tuaj nrog wb tua wb tus npua es cia lawv tuaj nrog wb tseev ua rau peb txhua tus noj."
Leej niam teb nws tus me tub tias, "Niam tus me tub siab zoo. Cas hnub no niam yuav pom nws lub siab zoo ua luaj. Nws hlob lawm tiag, thiab nws txawj xav ua luaj. Niam yuavtsum yuav li nws hais xwb tiaj tag."
Ces tus tub nug nws niam tias, "Kuv niad, ces koj pom zoo lawm lod?"
Nws niam teb tias, "Me tub, niam yuavtsum pom zoo xwb. Niam yug nws ib leeg xwb, nws xav tau li ntawd los yeej zoo kawg."
Ces nkawv thiaj mus hais rau tus tswv zos thiab niam tswv zos tias nkawv muaj ib tug las npua xwb tabsis nkawv yuav muab tua noj es kom tswv zos pab hais rau cov kev txwjlaus tuaj nrog nkawv tua thiab nrog nkawv noj ib rooj mov ua kev zoo siab xa lub xyoo laus tos txais lub xyoo tshiab. Ces tswv zos thiaj ua li nkawv hais. Nkawv thiaj muab nkawv tus npua los tua ua rau neeg zej zog nrog nkawv noj ib pluag xwb tag du lug. Txij li mus ces nkawv nyob muaj kwv muaj tij, muaj neej muaj tsav muaj phoojywg coob zujzus lawm. Muaj neeg tu liaj tu teb ze ntug zos rau nkawv ua thiab lawv tuaj pab nkawv ua liaj ua teb, (sib pauv zog). Nkawv kev noj kev haus nyob tau kajsiab lug thiab leej niam muab cov qaib muag tau nyiaj heev. Nws thiaj khaws tau nws cov nyiaj ntau txaus mus yuav tswv zos tus ntxhais nkauj ntxawm rau nws tus tub yuav ua pojniam. Tomqab no nws tus me tub yuav pojniam tag ces nws mam nrhiav kev mus nrhiav nws txiv. Thaum nws mus nrhiav tau nws txiv, nws txiv quav quav yeeb thiab lub neej kaub kaub huam. Niamyau muaj ob tug ntxhais xwb tsis muaj ibtug tub li. Leej txiv quaj quaj ces tus me tub thiaj tos nws txiv los nrog nws thiab nws niam lawv nyob lawm.

Hmmm...., kuv twb nrog nws quaj lawm os.

Li no xwb, puas zoo thiab.

_________________

Tes yiag tes txawj nrhia
Siab nkiag nrhiav kev nyiam
Ncauj npliag lus dai siab

Goto page : 1, 2, 3

Search

Hmoob Catholique Forum

Latest topics

Top posters

Tsev seev PajHuam

Hmong beauty nature

KWV TXHIAJ PLEES

Tshav ntuj los nag.

Most Viewed Topics

Ncaim nkaujhmoob fabkis

Compteur visitor

IB TUG NIAM TSEV ZOO

IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Re: IB TUG NIAM TSEV ZOO

Similar topics

Similar topics