google-site-verification: googlefbfddf59e706b96b.html

Latest topics

» Kuv 1 Vuagdua
by ibvuagdua 4th December 2016, 3:38 pm

» Keeb Kwm Hmoob mus nyob Guyane
by cvang71 28th November 2016, 7:34 pm

» cwjmemdub lub tsev pajhuam
by koojziagkabzaug 23rd November 2016, 10:53 am

» PAWG HMOOB TRUSTEES UAS TUAV LUB KOOMHAUM LAO FAMILY CENTER YAV DHAU LOS ROV LOS TXEEB TAU LUB KOOMHAUM THIAB LOS TUAV LUB TSIAB30 THIAB LUB KOOBTSHEEB JUL 4TH
by Liajntsuab 20th November 2016, 5:06 am

» Xov Xwm hmoob Nyab Laj sawv tsam mus hais vim Nyab Laj tsi hlub peb haib hmoob
by Liajntsuab 18th November 2016, 8:25 am

» NPE ME NYUAM TUB thiab NPE LAUS
by koojziagkabzaug 15th November 2016, 12:12 pm

» NPE ME NYUAM NTXHAIS
by koojziagkabzaug 15th November 2016, 12:10 pm

» QHIA TSO DUAB thiab Video HAUV VAS SAB
by Tub kev deb 8th November 2016, 3:37 am

» Pojniam Qaug Qav thaum xeeb tub
by PIJPAUJ 6th November 2016, 12:46 am

» Los qhia koj zaj dab neeg
by Khosiab 3rd November 2016, 1:27 am

» TSIS TAU LOS TSIS CHIM
by Khosiab 2nd November 2016, 1:24 am

» Leej twg puas txawj sau nkauj ( suab paj nruag)
by Khosiab 2nd November 2016, 1:11 am

» Lub Neej Lwj Siab
by Khosiab 2nd November 2016, 1:00 am

Tsev seev PajHuam

Hmong beauty nature

Compteur visitor

hnub 18/09/2010 los mus

    Hmoob Ntuj Tshiab lub tsev PAJ HUAM & kab lis kev cai Hmoob

    Share

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:01 am

    54. Nqe lus ob tug txum meej muab rau niam txiv nyab neej nus

    Nej cov niam cov txiv, nqi me lus nej muab rau wb coj mus hais rau niam txiv tom ub, niam txiv tom ub kuj hais li no thiab kom wb rov coj lus los hais rau nej cov niam cov txiv,

    Hnub no niam txiv tom ub tuaj suab tau niam txiv tom no ib tug ncej neeg coj mus cheb qab plag tse qawj ntxuav qab yiag du ua neej yaj los kib txoob nqaj nto ntuj ploog nto ntsis,

    yuav poj yuav sev, ces yuav xaiv neej xaiv tsav, yog li niam txiv tom ub rooj tag los yeej qhib, rooj txuas los yeej qhib,

    Kom nej cov ua niam ua txiv, yeej meem mees lub xeeb es ho tig ntsej tig muag los nrog nraug vauv txum tshoob txum kos,

    Hnub no niam txiv tom ub tuaj lawm ces dub los yuav tuaj ntxhua, ntuag los yuav tuaj ntxiv, yuav tuaj chawj tuaj thov, no laus mog!!.

    Thaum muab lus meej rau niam rau txiv lawm yus ob tug txum meej nco ntsoov ( sawv tsees ) txaum yim lias rau niam txiv, niam txiv thiaj pom tias yus cov lus muaj kuab. Niam txiv sawv txais yim thiab teb hais tias “

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:03 am

    54. Nqe lus ob tug txum meej muab rau niam txiv nyab neej nus

    Nej cov niam cov txiv, nqi me lus nej muab rau wb coj mus hais rau niam txiv tom ub, niam txiv tom ub kuj hais li no thiab kom wb rov coj lus los hais rau nej cov niam cov txiv,

    Hnub no niam txiv tom ub tuaj suab tau niam txiv tom no ib tug ncej neeg coj mus cheb qab plag tse qawj ntxuav qab yiag du ua neej yaj los kib txoob nqaj nto ntuj ploog nto ntsis,

    Niam txiv tom ub hais tias, niam txiv noj nceb ces yuav taug cav yuav poj yuav sev, ces yuav xaiv neej xaiv tsav, yog li niam txiv tom ub rooj tag los yeej qhib, rooj txuas los yeej qhib,

    Kom nej cov ua niam ua txiv, yeej meem mees lub xeeb es ho tig ntsej tig muag los nrog nraug vauv txum tshoob txum kos,

    Hnub no niam txiv tom ub tuaj lawm ces dub los yuav tuaj ntxhua, ntuag los yuav tuaj ntxiv, yuav tuaj chawj tuaj thov, no laus mog!!.

    Thaum muab lus meej rau niam rau txiv lawm yus ob tug txum meej nco ntsoov ( sawv tsees ) txaum yim lias rau niam txiv, niam txiv thiaj pom tias yus cov lus muaj kuab. Niam txiv sawv txais yim thiab teb hais tias “

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:05 am

    55. Nqe lus niam txiv nyab neej nus teb ob tug txum meej

    Zoo lus kawg laus, ob tug mej koob neb ua siab ntev tos peb saj laj me ntsis tso muaj dab tsi no los mam ho rov hais rau neb nawb mog.

    Dhau li no lawm niam txiv lawv mam sab laj seb lawv yuav muab nqe lus li cas rau yus ob tug mej koob coj rov mus hais rau ob tug plhov meej.

    Txuas ntawm no yog Niam txiv rov muab lus rau niam txiv ob tug mej koob li hauv qab no,

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:08 am

    56. Nqe lus niam txiv nyab neej nus muab rau ob tug txum meej

    Neb ob tug mej koob, Vam vam neb lub zog tsheej tsa tsi!! tuaj nrog peb yawb tshoob yawb kos, ntuj teb ntuj tag hmo nqis tav no, xab theeb lwm hnub peb tsoom kwv tij txiv tub noj txiv nyuj nphoo roj, txiv twm nphoo ntsev, los tej zaum peb twb hu tsis txog neb los kuj muaj nawb.

    Tab sis neb txhob tso peb pov tseg, neb yeej meem pab peb puav leej tib kom peb tau ntxhais tau vauv tau kev ntoj, tau neej tau tsav, tau kev thuv, neb tus txiaj ntsig peb yuav ris, tus txiaj ntsha yuav nqa, no lau mog

    Nqi me lus no neb coj lus nraim rau niam txiv tom ub ob tug mej koob, kom nkawv ho coj lus nraim rau niam txiv tom ub, ua li niam txiv tom ub tus coj noj coj ua, coj plaub tsaws ntug, coj tshoob coj kos, ho yog leej twg?

    Hnub no qab niam txiv puas noj?. Qaub niam txiv puas nqos?. Sib niam txiv puas ua tsuag nqa?. Hnyav niam txiv puas ua tsuag ris?.

    Yog li no es peb niam txiv neej nus xav paub qhov tseeb es thiaj yuav paub pom qab tig ntsej, tig muag, los nrog niam txiv tom ub txum tshoob txum kos, no lau mog Ob tug mej koob

    Sawv txaum yim rau ob tug mej koob, ces ob tug mej koob txais yim thiab teb hais tias yog li nej cov ua niam ua txiv ua siab ntev tos nawb mog.

    Ob tug txum meej rov sawv coj lus rov los hais rau ob tug plhov meej, thaum los txog muag lub cawv kab kiag thiab, yus ob tug txum meej ho ce ob khub cawv cev rau ob tug plhov meej, ob tug plhov meej rov ib leeg ib lub cawv rau ob tug txum meej, ces ob tug txum meej coj cub ib pas cawv thiab pib muab lus li hauv qab no..

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:10 am

    57. Nqe lus ob tug txum meej muab lus rau ob tug tshaj meej

    Lus tshoob lus kos mas yuav hais li no rau neb, ob tug kwv luag!! Neb vam vam wb mus nrog laj niam laj txi los cuag li tsis tau niam txiv ib lo zoo lus nawb mog!!

    Niam txiv kuj hais li no, niam txiv hais tias hnub no nraug vauv yuav tuaj nrog niam txiv ntsuas dej ntsuas txhuv no, ua li niam txiv tom ub tus coj noj coj ua?. Coj tshoob coj kos?. Coj plaub coj ntug?. Yog leej twg?.

    Ua li qaub niam txiv tom ub puas noj?. Iab niam txiv tom ub puas nqos?. Sib puas ua tsuag nqa?. Hnyav puas ua tsuag ris?. Niam txiv neej nus xav paub?. no lau mog ob tug kwv luag!!!.

    Ob tug plhov meej txais yim thiab teb li hauv qab no. ob tug txum meej hais tias
    Ob tug kwv luag peb muab lub cawv no kab kiag seb yuam!!!

    Kab cawv meej ces rov ce dua cawv thiab coj sawv daws cub ib pas cawv raws li tus txheej txheem thiab hais tias.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:12 am

    58. Nqe lus ob tug tshaj meej teb ob tug txum meej

    Zoo lus kawg os ob tug kwv luag, 100 las nyiaj muas tsis tau niam txiv lo lus nyiaj lus kub!!

    Hnub no niam txiv txooj xeem ( ________ ) tuaj suab tau niam txiv txooj xeem ( _________ ) ib tug ncej neeg, coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

    Yog li niam txiv tsev vuas tsis yog chaw sim zeb, tsev nqeeb tsis yog chaw sis taws, hnub no niam txiv tom ub tsis yog tuaj ua suav sim niam txiv tom no!! no laug mog!!

    Hnub no niam txiv qhua vauv yuav tuaj tis neej tis tsav, tis ntsuab tis ze, tuaj chawj tuaj thov, tuaj ntxiv tuaj ntxhua, yog li neb xyuam tsis nyog pes tsawg lub laj khwv, khwv tsis nyog pes tsawg lub lim, no lau mog!!

    Yuav vam neb coj lus nraim rau niam txiv neej nus, hais txog ntawm niam txiv qhua vauv tom ub tus coj noj coj ua, coj tshoob coj kos, ces yog yawg ( ___________ ) kom niam txiv yeej meem mees lub xeeb,

    Hnub no niam txiv tom ub tuaj lawm ces qab los yeej yuav noj, qaub los yeej yuav nqos, sib los yeej yuav ua tsuag nqa, hnyav los yeej yuav ua tsuag ris, no lau mog!!

    Niam txiv tus coj tshoob coj kos los puav leej tuaj hauv no tib si yog niam txiv ho xav kom rauj cuag thaiv, thaiv cuag zeb ntsuab, poj cuag, yawg cuas los sib fim los niam txiv tuaj yeem tib si, no lau mog, ob tug kwv luag.

    Txaum yim rau ob tug txum meej, ob tug txum meej txais yim thiab teb li haus qab no.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:13 am

    59. Nqe lub ob tug txum meej teb rau ob tug tshaj meej

    Ob tug kwv luag!!! Raws xwb xav ces tsuav yog muaj tseeb li neb hais ces niam txiv yeej mees lub xeeb xwb, no lau mog!!!!

    Ces ob tug txum meej ce kiag lawv 4 tug mej koob ib leeg ib khub cawv thiab hais li hauv qab no kiag lawm nag nawb.

    Ob tug kwv luag, lub me cawv wb ce rau neb no mas luag tej laus hais tias haus cawv khawm pib, hais lus khawm yim, nyias nco nyias me lus nawb, ib pliag yog neb ho tsis nco neb me lus lawm, no los yog neb ho tso tes plau lawm ces wb yuav tsis txaus siab rau neb no laiv mog!!

    Ob tug plhov meej los yog tshaj meej teb nkawv hais tias.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:15 am

    60. Nqe lus ob tug tshaj meej teb ob tug txum meej

    Zoo lus kawg ob tug kwv luag, wb cog lus rau neb hais tias yog ib pliag wb ho tsis nco qab wb cov lus lawm no los neb yeej meem tsawv wb npab ntug ntag, no lau mog!!

    Sawv daws muab kab kiag kom meej kiag ces nkawv thiaj paub coj lus rov mus rau niam txiv dua Thaum 4 tug mej koob sib cog lus meej lawm ces ob tug tshaj meej rov sab khob cawv dua rau ob tug txum meej ib leeg ib khub cawv ces ob tug txum meej ib leeg ho rov ib khob cawv rau ob tug plhov meej, ces ob tug plhov meej ho yuav hais li hauv qab tias,

    Thov caw peb cub ib pas cawv seb ob tug kwv luag!!!

    Cub cawv meej kiag ces hais zeeg lus hauv qab no kiag lawm nag nawb, vim hais tias koj yuav tsum maj thiaj coj lus kom tus thiab thiaj yuav tsis muaj tej yam ua rau koj muaj kev nyuab siab os nawb, Vim mej koob yog lub lag cam ua txhua leej txhua tus zoo tsuav nqaij nawb es thiaj hais li no rau nej xwb os nawb mog.

    Zeeg lus hauv no ces yog zeeg lus uas yuav los nug txog ntawm ob tug tub thoob xo seb puas muaj dab tsi lawm thiab puas tuaj raws li liaj lwg txoj kab tshoob thiab rhwv mwg txoj kev kos no xwb. Yus ob tug tshaj meej rov coj ob tug txum meej kab lub cawv kiag thiab rov ce kom puv nkwb nkaus rau thiab rov yaum ob tug txum meej cub ib pas cawv tas ces yuav hais zeeg lub hauv qab no kiag nag.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:17 am

    61. Nqe lus # 4. ob tug tshaj meej nug txog lub xo

    Lus tshoob lus kos mas yuav hais li no rau neb ob tug kwv luag thiab, hnub no!!! niam txiv txooj xeem ( ________ ) tuaj suab tau niam txiv txooj xeem ( _______ ) ib tug ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

    Yog li nqe me lus no yuav vam neb mus ntxig nug rau niam txiv neej nus ua li hnub I ob tug tub thoob xo coj lub xo tuaj rau niam rau txiv, ua li puas tsib meej tsib xws thiab puas tuaj ua txhij ua txhua, yog hais tias ho tshuav tej yam tsis txhij tsis ntxaws, no los

    Hnub no nraug vauv tuaj lawm ces yuav tuaj chawj tuaj thov, tuaj ntxiv tuaj ntxhua, kom niam txiv txhob ua tshws zais nas, kauv zais hneev, no lau mog Ob tug kwv luag no lau mog.

    Thaum ob tug txum meej yuav mus nug niam nug txiv neej nus ces ob tug txum meej hais tias

    “ neb laj tos laus mog ob tug kwv luag

    ces ob tug plhov meej ( tshaj meej ) ho teb hais tias.

    Neb laj khiav lau mog, ob tug kwv luag”

    Thaum ob tug txum meej los txog rau ntawm niam txiv lawm ces ob tug txum meej yuav los hais li hauv qab no.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:19 am

    62. Nqe lus ob tug txum meej coj lus los rau niam txiv nyab neej nus

    Nej cov niam cov txiv, nqe me lus nej muab rau wb coj mus nug niam txiv tom ub seb tus coj noj coj ua coj tshoob coj kos yog leej twg thiab ua li hnub no niam txiv pom xeeb tuaj suab tau niam txiv neej nus ib tug ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj, nploog nto ntsis,

    Ua li iab niam txiv puas noj, qaub niam txiv puas nqos, sib niam txiv puas ua tsuag nqa, hnyav niam txiv puas ua tsuag ris, yog li ob tug mej koob tom ub kuj hais li no

    Kom wb coj lus nraim rov los rau nej tsoom niam tsoom txiv hais tias nyob li ntawm niam txiv tom ub ob tug coj noj coj ua, coj tshoob coj kos, ces yog yawg ( _______,) nkawv no nawb mog!!

    Kom nej cov niam cov txiv ho mees lub xeeb thiab hnub no niam txiv tom ub tuaj lawm ces qab los yeej yuav noj, qaub los yeej yuav nqos, hnub no yuav tuaj nrog niam txiv tom no cog paj, tsis yog yuav tuaj nrog niam txiv neej nus cog pos, tsis yog tuaj ua suav sim rau nej tsoom niam tsoom txiv, no luas mog,

    Tsis tas li ntawd xwb wb ob tug mej koob los puav leej nrog ob tug mej koob tom ub haus cawv khawm pib, hais lus khawm yim lawm,

    yog nej cov niam cov txiv ho xav tias kom rauj cuag thaiv, thaiv cuag zeb ntsuab, poj cuag yawg cuas, sib fim los yeej tau tib si no nawb mog!!

    ( txaum yim rau niam rau txiv ). Niam txiv ho ( txais yim thiab teb hais tias )

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:25 am

    63. Nqe lus niam txiv nyab neej nus teb ob tug txum meej

    Zoo lus kawg ob tug mej koob, tsuav yog niam txiv tom ub qhia meej li lawm ces peb sawv daws los puav leej mees lub xeeb lawm,

    Tsis tas li los neb kuj tau nrog ob tug plhov mej ( Tshaj meej ) sib cog lus lawm ces yuav li ntawd xwb nawb mog.

    Ob tug txum meej rov pib dua ib nqe lus rau niam rau txiv rau neej rau nus hais li hauv qab no.


    64. Nqe lus ob tug txum meej rov muab lus rau niam txiv nyab neej nus

    Ntxiv lus li no rau Nej cov niam cov txiv tias, niam txiv tom ub ob tug mej koob kuj muab lus rau wb los ntxig nug nej cov niam cov txiv li no thiab,

    Ua li hnub I ob tug tub thoob xo coj lub xo tuaj rau niam rau txiv puas tsib meej tsib xws?. puas tuaj ua txhua kab txhua kev raws li poj ua tseg yawm ua cia thiab?. yog tias ho tshuav tej yam tsis txhij tsis txhua no los

    Hnub no niam txiv qhua vauv tuaj lawm ces dub los lawv yuav thov tuaj ntxhua, ntuag los lawv yuav thov tuaj ntxiv, yuav tuaj chawj tuaj thov no lau mog, es hais li no rau nej cov niam cov txiv paub,

    Txaum yim rau cov niam txiv, cov niam txiv txais yim thiab teb hais tias.

    65. Nqe lus niam txiv nyab neej nus teb ob tug txum meej

    Zoo lus kawg!! Ob tug mej koob, neb ua siab ntev tos muaj lus dab tsi los peb mam rov hais rau neb nawb mog.

    Thaum hais li no lawm ces cov niam txiv lawvm mam sib nug txog ntawm lub xo thiab muaj lus dab tsi los mam los teb rau ob tug txum meej mus rau qhov tseeb xwb.

    “ Niam txiv nyab neej nus ho rov muab lus rau ob tug txum meej coj cov lus rov mus rau niam txiv qhua vauv xws li hauv qab no.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:31 am

    66. Nqe lus niam txiv nyab neej nus ho muab lus rau ob tug txum meej

    Ob tug mej koob!! lus mas yuav tham li no rau neb, peb vam vam neb lub dag lub zog tsheej tsa tsi, khiav nce toj nqis taug, los xab theeb lwm hnub peb noj txiv nyuj nphoo roj, txiv twm nphoo ntsev, los tej zaum peb twb hu tsis txog neb los kuj muaj nawb,

    Tab sis neb txhob tso peb pov tseg, neb yeej meem pab peb yawb tshoob yawb kos, laj niam laj txi, puav leej tib kom peb tau ntxhais tau vauv, tau kev ntoj kev thuv, neb tus txiaj ntsig peb yuav ris, txiaj ntsha peb yuav nqa, no lau mog!!

    Nqe me lus no yuav vam neb ob tug coj lus nraim rau niam txiv tom ub, hais txog ntawm lub me xo, niam txiv tom ub ob tug tub thoob xo kuj tau tuaj ua txhua kab txhua kev raws li poj ua tseg

    yawm ua cia lawm kom niam txiv tom ub txhob ntaus siab yau yeej meem mees lub xeeb.

    Tab sis hais rau niam txiv tom ub xab theeb lwm hnub kaj ntug tag kis yog niam txiv txooj xeem ( _________ ) ho muaj ib tug zoo nkauj ntsuab, niam txiv txooj xeem ( ______ ) ho muaj ib tug zoo nraug nab, yog peb rab hneev yaj kub txeeg ho tua ntsia ntsees niam txiv txooj xeem ( _______ ) lub qab mus taw rooj, yog niam txiv txooj xeem ( ______ ) ho tsis muaj tus tsib meej tsib xws .

    Ho tuaj ua tsis raws li txoj kev txoj cai, los kom niam txiv txooj xeem ( _______ ) txhob muab rub ua lub kev lub cai, no laus mog
    Peb tsis tau hais txog ntawm lub xo, yog hais tias ho tsis txhua kab txhua kev ho tshuav yam twg no los mam ho hais raws li qhov tshuav ntawd nawb.

    Thaum niam txiv maub lus meej li ntawd lawm ces yus ob tug txum meej ho rov los lawm thiab yus hais li no rau niam txiv.

    nej cov niam cov txiv ua siab ntev tos wb nawb mog

    ( niam txiv teb hais tias )

    Laj khiav os laus mog, ob tug mej koob

    Thaum yus rov los txog ntawm lub rooj tshoob lawm, nco ntsoob txaum yim thiab hais rau ob tug plhov meej hais tias.

    neb laj tos wb laus mog “ ob tug kwv luag

    ( ob tug plhov meej ho teb hais tias)

    laj khiav xwb os ob tug kwv luag

    Thaum yus los zaum tus zog lawm, yus ob tug txum meej, ho yaum hais tias.

    “Ob tug kwv luag!! Peb muab lub cawv no kab kiag seb yuad”

    Thaum kab meej lawm ob tug txum meej sab khob cawv rau ob tug plhov meej thiab muab lus hais li hauv qab no

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:34 am

    67. Nqe lus ob tug txum meej muab rau ob tug tshaj meej

    Ob tug kwv luag, lus tshoob lus kos mas yuav hais li no rau neb thiab neb vam vam wb mus nrog ntxig nug niam txiv los cuag li tsis tau niam txiv ib los zoo lus nawb mog.

    Niam txiv hais li no, hais txog ntawm lub me xo niam txiv kuj hais tias kom wb coj lus nraim los rau neb, neb ho coj lus nraim rau niam txiv qhua vauv yawg, hnub I ob tug tub thoob xo coj lub me xo tuaj rau niam rau txiv los puav leej txog niam txog txiv lawm.

    Tsis li ntawd los ob tug tub thoob xo kuj tsib meej tsib xws tuaj ua txhij ua txhua raws li niam txiv lub siab xav lawm ntag, yog li kom niam txiv qhua vauv yawg txhob ntaus lub siab yau yeej meem mees lus xeeb,

    Tab sis hais rau niam txiv tom ub xab theeb lwm hnub kaj ntug tag kis yog niam txiv txooj xeem ( _______ ) ho muaj ib tug zoo nkauj ntsuab, niam txiv txooj xeem ( ___________ ) ho muaj ib tug zoo nraug nab,

    Yog niam txiv txooj xeem ( _____ ) rab hneev yaj kub txeeg ho tua ntsia ntsees niam txiv txooj xeem ( _______ ) lub qab mus taw rooj , yog niam txiv txooj xeem ( ________ ) ho tsis muaj tus tsib meej tsib xws .

    Ho tsis tsib meej tsib xws, es ho tuaj ua tsis raws li txoj kev txoj cai, los kom niam txiv txooj xeem ( _______ ) txhob muab rub ua lub kev lub cai, no laus mog, ob tug kwv luag.

    Ob tug ( plhov mej ) los yog ( tshaj meej ) ho teb li no xwb.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:35 am

    68. Nqe lus ob tug tshaj meej ho teb ob tug txum meej

    Zoo lus kawg!! Ob tug kwv luag, 100 las nyiaj muas tsis tau niam txiv lo lus nyiaj lus kub, yog hais tias ho tsib meej tsib xws lawm, ho tuaj ua txhij ua txhua lub me xo ho tuaj txog rau niam rau txiv lawm no los haj yam zoo, nqa tes ua niam txiv tsaug no lau mog!!

    Hais txog ntawm niam txiv nqe me lus ntawd wb yuav coj lus nraim rau niam txiv qhua vauv yawg, xab theeb lwm hnub kaj ntug tag kis yog niam txiv txooj xeem ( _______ ) ho muaj ib tug zoo nkauj ntsuab, niam txiv txooj xeem ( _________ ) ho muaj ib tug zoo nraug nab.

    Yog niam txiv txooj xeem ( _________ ) rab hneev yaj kub txeeg ho tua ntsia ntsees rau niam txiv txooj xeem ( ________ ) lub qab mus taw rooj, yog niam txiv txooj xeem ( _______ ) ho tsis muaj tus tsib meej tsib xws ho tuaj ua tsis raws li txoj kev, txoj cai, los kom niam txiv txooj xeem ( _____ ) txhob muab rub ua lub kev lub cai,
    No los wb mam coj lus nraim mus rau niam qhua vauv yawg li ntawd, no laus mog!! ob tug kwv luag.

    Hais meej li no ces ob tug plhov meej ho yaum ob tug txum meej hais tias.

    “Ob tug kwv luag!! Muab lub cawv no kab kiag seb yuad”

    Kab kiag cawv meej ces ob tug plhov meej rov sab kiag ib leeg ob khob cawv rau ob tug txum meej ces coj ob tug txum meej cub ib pas cawv thiab hais zeeg lus li hauv qab no kiag lawm nag.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:37 am

    69. Nqe lus 5 / 6. ob tug tshaj meej muab lus rau ob tug txum meej

    Lus tshoob lus kos mas yuav hais li no rau neb thiab ob tug kwv luag!! Hnub no niam txiv txooj xeem ( ___________ ) tuaj suab tau niam txiv txooj xeem ( _____ ) ib tug ncej neeg coj mus cheb qab plag tse qawj, ntxuav qab yiag du, ua neej yaj los kib txoob, nqaj nto ntuj ploog to ntsis, niam txiv tsev vuas tsis yog chaw sim zeb, tsev nqeeb tsis yog chaw sim taws, hnub no tsis yog tuaj ua suav sim niam txiv, no laus mog!! ob tug kwv luag.

    Yuav vam neb rov coj nqe me lus no mus ntxig nug niam txiv neej nus ua li nyob li ntawm niam txiv tus tub tus ntxhais puas muaj muam phauj yawg laus cuam tshuam?.

    Yog ho muaj no los kom niam txiv txhob ua tshws zais nas, kauv zais hneev, yeej meem phua plhawv los, hnub no nraug vauv pom xeeb tuaj suab tau niam txiv ib tug ncej neeg lawm, yog li dub los yuav tuaj ntxhua, ntuag los yuav tuaj ntxiv, yuav tuaj chawj tuaj thov, kom tau neej tau tsav, no lau mog!! ob tug kwv luag.

    Nqi ib hais li no, nqi ob tuaj mus, ob tug kwv luag neb xyuam tsis nyog pes tsawg lub laj, khwv tsis nyog pes tsawg lub lim no lau mog!!

    yuav vam neb mus ntxig nug niam txiv seb ua li nram ntej nram qab, nram ntxov nram ntsis, tej niam tej txiv puas tau ntswj dua khob lov dua xaws, noj nqaij diag dab, haus cawv daig nru, puas muaj lus txheej lus xuam, lus xaiv lus ncua, li cas los kom niam txiv txhob ua tshws zais nas, kauv zais hneev, kom niam txiv yeej meem phua plhawv los, no laus mog

    Hnub no niam txiv qhua vauv yawg yuav tuaj chawj tuaj thov, tuaj ntxiv tuaj ntxhua, no lau mog ob tug kwv luag!!!
    Txaum yim rau ob tug txum meej. Ob tug txum meej txais yim thiab teb li hauv qab no xwb.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:41 am

    70. Nqe lus niam txiv nyab neej nus teb ob tug txum meej

    Ob tug kwv luag, yog li neb ua siab ntwb ntev tos wb mus ntxig nug niam txiv seb niam txiv ho hais li cas no los wb mam ho rov los hais rau neb paub, no laus mog.

    Ob tug txum meej hais tias.

    “Neb Laj Tos No Lau Mog Ob Tug Kwv Luag”

    Ob tug ( plhov meej ) teb hais tias.

    “Neb Laj Khiav No Lau Mog”

    “ ob tug txum meej mus ntxig nug niam txiv li hauv qab no lawm nag nawb.

    71. Nqe lus ob tug txum meej muab lus rau niam txiv nyab neej nus

    Nej cov niam cov txiv, ob tug mej koob tom ub kuj rov muab lus li no rau wb rov coj los rau nej cov niam cov txiv li no.

    Xws li niam txiv qhua vauv yawg ntxig nug hais tias ua li ntawm niam txiv tus tub tus ntxhais puas muaj muam phauj yawg laus cuam tshuam?.

    Yog ho muaj no los kom niam txiv txhob ua tshws zais nas, kauv zais hneev, kom niam txiv yeej meem phua plhawv los rau niam txiv qhua vauv yawg es hnub no niam txiv qhua vauv yawg tuaj suab tau niam txiv ib tug ncej neeg.

    Coj mus cheb plag tse qawj, ntxuav qab yiag du, ua neej yaj los kib txoob, nqaj nto ntuj, ploog nto ntsis, yog li hnub no dub twg los niam txiv qhua vauv yawg yuav tuaj ntxhua, ntuag twg los yuav tuaj ntxiv qhua vaug yawg yuav tuaj ntxiv, no nawb

    Nqi ib li no, nqi ob tuaj mus niam txiv qhua vauv yawg kuj ntxiv li no thiab ua li nram ntej nram qab, nram qab, nram ntxov, nram ntsis, tej niam tej txiv tom ub tom no puas tau ntswj dua khob lov dua xaws?.

    Noj nqaij daig dab, haus cawv daig nru, puas muaj lus nkhib lus nkhuas, lus txheej lus xuam, lus xaiv lus ncua?.

    Li cas no los thov kom nej cov niam cov txiv txhob ua tshws zais nas, kauv zais hneev, yeej meem phua plhawv los, hnub no niam txiv qhua vauv yawg tuaj lawm ces yuav tuaj chawj tuaj thov, tuaj ntxiv tuaj ntxhua, no lau mog.

    Txaum yim ntshis rau niam txiv, niam txiv txais yim thiab yuav hais li no”

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:43 am


    72. Nqe lus niam txiv nyab neej nus teb ob tug txum meej

    zoo lus kawg ob tug mej koob, neb ua siab ntwb ntev tos peb sab laj me ntsis tso muaj lus li cas no los peb mam rov muab rau neb nawb mog”

    ces thaum no niam txiv mam sab laj muaj li cas los niam txiv mam

    ho hais rau ob tug txum meej, Niam txiv cov lus muab rau txum meej es yuav hais li hauv qab no.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:50 am

    73. Nqe lus niam txiv nyab neej nus muab lus rau ob tug txum meej

    Ob tug mej koob, Lus tshoob lus kos mas yuav muab li no rau neb coj mus rau niam txiv qhua vauv yawg ob tug mej koob kom coj lus nraim mus rau niam txiv tom ub,

    nyob li ntawm niam txiv tus tub tus ntxhais, niam txiv tsis txawj yug ces yug tau tsis zoo nkauj yog li tsis muaj muam phauj yawg laus leej twg Cuam tshuam li tsuas yog nraug vauv ib leeg thiaj nyiam xwb kom niam txiv tom ub yeej meem mees lus xeeb ua siab loj no nawb mog.

    Nqi ib li ntawd, nqi ob tuaj mus neb coj lus nraim rau niam txiv qhua vauv yawg ob tug mej koob kom coj lus nraim rau niam txiv tom ub nyob li nram ntej nrab qab, nram qab nram dawm, niam txiv tej laus ho ntswj dua khob lov dua xaws, noj nqaij daig dab, haus caw daig nru, muaj lus txheej lus xuam, lus dim lus dua, los yeej muaj ntau nawb,
    tab sis niam txiv yuav tsis hais dab tsi li, niam txiv yuav ua dawb paug thiab ua ncaj ncees rau niam txiv qhua vauv yawg xwb,

    Nyob li hnub qab nram lub ntsis, kaj ntug tag kis, xab theeb lwm hnub, yog niam txiv txooj xeem ( _______ ) ho muaj ib tug zoo nkauj ntsuab, niam txiv txooj xeem ( ________ ) ho muaj ib tug

    zoo nraug nab, yog niam txiv txooj xeem ( ______ ) rab hneev yaj kub txeeg ho tua ntsia ntsees rau niam txiv txooj xeem ( ______ ) lubqab mus taw rooj los kom niam txiv txooj xeem ( ______ ) ho coj ncaj, coj ncees, txhob muab rub ua kev ua cai no xwb nawb mog!!.

    Txaum yim rau ob tug mej koob, thiab hais tias”

    neb ob tug mej koob neb ua siab ntev coj ob nqi me lus no mus rau niam txiv tom ub nawb mog”
    ob tug mej koob txais yim thiab teb hais tias “

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:51 am

    74. Nqe lus ob tug txum meej teb niam txiv nyab neej nus

    yog li ces nej cov niam cov txiv ho ua siab ntwb ntev tos wb es wb ho coj lus mus rau ob tug mej koob es kom ob tug mej koob coj lus rau niam txiv tom ub thiab seb niam txiv tom ub ho hais li cas no los wb mam ho coj los rau nej nawb mog

    Ces ob tug txum meej rov coj lus los hais rau ob tug tshaj meej xwb

    Neb laj tos wb no lau mog!! ob tug me kwv luag laus

    Ob tug tshaj meej ho hais tias.

    Neb laj khiav lau mog!! ob tug me kwv luag”
    Thaum los zaum tus zog lawm ces ob tug txum meej ho sab khob cawv rau ob tug tshaj meej thiab coj hais tias.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:53 am

    75. Nqe lus ob tug txum meej caw ob tug tshaj meej haus cawv

    “ Ob tug kwv luag, thov caw peb sawv daws cub ib pas cawv seb yuad”

    Thaum cub cawv meej lawm ces ob tug txum meej tsa ncauj hais li no rau ob tug tshaj meej.

    76. Nqe lus ob tug txum meej muab lus rau ob tug tshaj meej

    Lus tshoob lus kos mas yuav hais li no rau neb ob tug kwv luag thiab, neb vam vam wb mus laj niam laj txi, los cuag li tsis tau niam txiv ib los zoo lus nawb mog,

    niam txiv kuj hais li no rau wb coj los rau neb ob tug kwv luag kom neb coj lus nraim mus kom txog rau niam txiv tom ub, nyob li ntawm niam txiv tus tub tus ntxhais ces niam txiv tsis txawj yug , yug tau tsis zoo nkauj ces tsis muaj muam phauj yawg laus leej twg cuam tshuam, tsuas yog nraug vauv tib leeg thiaj li nyiam xwb, kom niam txiv tom ub yeej meem mees lub xeeb no lau mog!!! ob tug kwv luag.

    Nqi ib hais li ntawd, nqi ob tuaj mus hais txog nram tej nram qab, niam txiv tom ub, tom no kev noj nqaij daig dua dab, haus dawv daig dua nru, ntswj dua khob, lov dua xaws, txawm muaj los niam txiv yuav tsis hais, tsis muaj los niam txiv yuav tsis hais, niam txiv

    neej nus yuav ua dawb ua huv, ua ncaj ua ncees rau niam txiv tom ub xwb,

    Nyob li xab theeb lwm hnub kaj ntug tag kis plaj tshoob ntsig kos foob koob ncig yeej ho hlav sib sua los kom niam txiv tom ub ho nco niam txiv neej nus tus txiaj tus ntsig no xwb laus mog, ob tug kwv luag!!

    Niam txiv kuj hais tias, yog neb ho muaj lus dab tsi los ho tham tuaj yog tias tsis muaj lawm no los peb nrhiav chaw so no lau mog !! ob tug kwv luag.

    Txaum yim rau ob tug tshaj meej, ces ob tug tshaj meej txais yim thiab teb hais tias

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:54 am

    77. Nqe lus ob tug tshaj meej txais yim ntawm ob tug txum meej

    Zoo lus kawg os ob tug kwv luag luag tej laus tias ib puas las nyiaj muas tsis tau os ob tug kwv luag.
    78. Nqe lus ob tug txum meej ho rov ntxiv lus rau ob tug tshaj meej

    Peb tsis hais txog kev txhaum txheej, yog tias ho muaj kev txhaum txheej los yog tej niam tej txiv sawv daws ho muaj kev tu siab lwm yam lawm es yuav muab coj los hais no los mam ho muab los hais nawb, yog tsis muaj dab tsi txhaum txheej ces tsuas hais li saum no lawm xwb.

    Thaum hnov cov lus no ob tug txum meej hais lawm ces yus ob tug tshaj meej rov sab khob cawv rau ob tug txum meej thiab rov nug dua ib lwm li hauv qab no.

    79. Nqe lus ob tug tshaj meej rov muab lus rau ob tug txum meej

    Lus tshoob lus kos mas yuav hais li no rau neb ob tug kwv luag thiab, 100 las nyiaj muas tsis tau niam txiv lo lus nyiaj lus kub, ob tug kwv luag!! Neb xyuam tsis nyog pes tsawg lub laj khwv lau mog,

    Hnub no!! niam txiv txooj xeem ( ______ ) tuaj suab tau niam txiv txooj xeem ( _______ ) ib tug ncej neeg coj mus cheb plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

    Yog li yuav vam neb rov mus ntxig nug niam nug txiv kom niam txiv txhob ua tshws zais nas kauv zais hneev, yog niam txiv ho muaj lus txiaj lus ntsig lus dua lus dim, los kom niam txiv yeej meem phua plhawv los

    Hnub no niam txiv qhua vauv yawg tuaj lawm ces yuav tuaj chawj tuaj thov, tuaj ntxiv tuaj ntxhua, no lau mog!! ob tug kwv luag!.

    Hais lus li no rau tas ces Txaum yim rau ob tug txum meej, ces ob tug txum meej txais yim thiab hais rau ob tug tshaj meej hais tias.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:56 am

    80. Nqe lus ob tug txum meej txais yim ntawm ob tug tshaj meej

    Zoo lus kawg os ob tug kwv luag es yog li no ces wb mam ho rov coj lus mus rau niam nyab neej nus seb niam txiv ho hais li cas no wb mam rov coj los rau neb nawb mog. Es thov caw peb muab lus cawv kab kiag yuad ob tug kwv luag.

    Thaum kab cawv meej lawm ob tug txum meej ho sab khob cawv, rau ob tug tshaj meej thiab coj nkawv cub ib pas cawv, thiab hais li hauv qab no.

    81. Nqe lus ob tug txum meej rov muab lus rau ob tug tshaj meej dua

    Ob tug lwv Luag!! Yuav tham li no ntxiv rau neb thiab, hais txog nqi me lus ntawm ces niam txiv neej nus yeej hais meej meej lawm nawb, txawm rov mus nug los nyaj niam txiv tsuas rov hais li qub xwb,

    Neb ob tug kwv luag yeej meem coj mus rau niam txiv qhua vauv yawg kom niam txiv los ho mees lub xeeb, txhob ntaus siab yau, yog niam txiv ho muaj dab tsi no los ho pib, yog tsis muaj no los, peb nrhiav chaw so no xwb lau mog!!!.

    Thaum ob tug txum meej hais tseeb li ntawd lawm ces ob tug tshaj meej rov sab khob cawv rau ob tug txum meej thiab hais li hauv qab no.

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 2:58 am

    82. Nqe lus ob tug tshaj meej rov muab lus rau ob tug txum meej dua

    Lus tshoob lus kos mas yuav ntxiv li no rau neb thiab ob tug kwv luag!! Zoo lus kawg, 100 las nyiaj muas tsis tau niam txiv lo lus nyiaj lus kub, yog li neb ho hais meej pem li ntawd lawm no los cia yuav li neb hais nawb.

    Tab sis thov saum neb ho zam lus txheej rau wb thiab yuam, wb xav kom peb plaub tug mej koob los haus ib lub cawv khawm pib hais lus khawm yim, luag tej laus, ib txwm piv txoj lug hais tias.

    Hlau txias thiaj ntaus tsis tau xwb, lus txias ces hais tau, ib pliag yog niam txiv ho muaj lus li cas no los niam txiv ho rov los hais los yeej tau no nawb mog ob tug kwv luag!!.

    Sawv daws muab lub cawv kab kiag, thiab ob tug tshaj meej rov sab khob cawv rau ob tug txum meej thiab coj ob tug txum meej haus cawv tas rov ce rau thiab rov coj cub ib pas cawv tas ces muab nqi lus los hais li hauv qab no thias.

    83. Nqe lus ob tug tshaj meej caw ob tug txum meej cub ib pas cawv

    “Thov caw neb ob tug kwv luag!! Es peb rov cub ib pas cawv seb yuad!!

    Thaum cub cawv meej lawm ces rov muab nqe lus hauv no los pib hais mus ntxiv kiag nag nawb.


    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 3:00 am

    84. Nqe lus # 7. ob tug tshaj meej muab lus rau ob tug txum meej

    Lus tshoob lus kos mas yuav hais li no rau neb ob tug kwv luag thiab, niam txiv txooj xeem ( ________ ) tuaj suab tau niam txiv txooj xeem ( _____ ) ib tug ncej neeg coj mus cheb plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

    Yog li niam txiv neej nus tsev vuas tsis yog chaw sim zeb, tsev nqeeb tsis yog chaw sim taws, hnub no niam txiv qhua vauv yawg yuav tuaj nrog niam txiv neej nus txuas ntsuab txuas ze, txuas neej txuas tsav,

    Yog li lo lus tsis hais los yuav tsis meej, nyob li rab qeej tsis tshuab ces yuav tsis nrov, tab sis zoo hais los yuav tsiv mloog tiam sis kom niam txiv ho mees lub xeeb txhob xav li cas no lau mog!! ob tug kwv luag!

    Nyob li ntawm niam txiv tus tub tus ntxhais, niam txiv tu da quav da zis, noj txhais lo nti txhais lo, pub hnub thawm hmo, noj txhais hlub nti txhais ntxhub, pub hmo thawm hnub, niam ncej puab ua tog zaum, niam caj npab ua chaw khaum, txiv caj npab ua chaw zuag, txiv xub ntiag ua chaw puag,

    Yog li niam txiv tub, niam txiv ntxhais, thiaj hlob tiav hlaub tiav cev, hnub no nraug vauv thiaj nyiam tsum ntshaw raug, niam txiv me ntxhais nkauj ntsuab, raug vauv thiaj ntauj li tawv tuaj tooj npab tuav tes muab, suab tau niam txiv tub, niam txiv ntxhais, mus ua poj ua sev, ua niam cuab niam tsev

    Nyob li ntawm tus me nqi mis, nqi hno, nqi paj, nqi txiv ne, niam txiv ho xav sau li cas?. los kom niam txiv txhob ua tshws zais nas, kauv zais hneev, yeej meem phua plhawv los rau nraug vauv no laus mog.

    Hnub no nraug vauv tuaj lawm ces dub los yuav tuaj ntxhua, ntuag los yuav tuaj ntxiv, yuav tuaj chawj, tuaj thov, no laus mog ob tug kwv luag!!! .

    Txaum yim rau ob tug txum meej, ces ob tug txum meej txais yim thiab teb hais tias.

    85. Nqe lus ntawm ob tug txum meej teb ob tug tshaj meej

    Yog li no neb ua siab ntev tos wb es wb ho mus ntxig nug rau niam txiv seb niam txiv ho hais li cas no los wb mam rov los hais qhia rau neb nawb mog, ob tug kwv luag!!

    Ces ob tug txum meej sawv thiab hais rau ob tug tshaj meej hais tias.

    86. Nqe lus ob tug txum meej txaum yim rau ob tug tshaj meej

    Ob tug me kwv luag, yog li ces neb ho ua siab ntwb ntev tos no lau mog”

    Ob tug tshaj meej teb hais tias.


    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 20th June 2011, 3:02 am

    87. Nqe lu ob tug tshaj meej ho txais yim ntawm ob tug txum meej

    Neb ho laj khiav no laus mog!! ob tug me kwv luag”.

    Ces ob tug txum meej rov mus ntsib niam ntsib txiv thiab muab lus li hauv qab no rau niam txiv neej nus li hauv qab no.

    88. lus ob tug txum meej coj lus mus muab rau niam txiv nyab neej nus

    Nej cov niam cov txiv!! Lus mas yuav tham li no rau nej thiab, niam txiv tom ub ob tug mej koob kuj muab lus li no rau wb coj los hais rau nej,

    Hnub no!! niam txiv tom ub tuaj suab tau niam txiv tom no ib ncej neeg coj mus cheb plag tse qawj, ntxuav qab yiag du, ua neej yaj los kib txoob, nqaj nto ntuj ploog nto ntsis,

    Nyob li ntawm niam txiv tus me nqi mis nqi hno, nqi paj nqi txiv, ned nej cov niam cov txiv ho xav sau li cas no los kom nej yeej meem phua plhawv los rau nraug vauv es tsis txhob ua tshws zais nas, kauv zais hneev,

    Hnub no niam txiv tom ub lawv tuaj lawm ces lawv yuav tuaj chawj tuaj thov, tuaj ntxiv tuaj ntxhua, no laus mog!!! nej cov niam cov txiv.

    Txaum yim rau cov niam cov txiv, cov niam txiv txhais yim thiab teb hais tias.

    89. Nqe lus niam txiv nyab neej nus txais yim ntawm ob tug txum meej

    Zoo lus kawg ob tug mej koob, neb ua siab ntev tos peb sab laj me ntsis muaj dab tsi los peb mam ho hais rau neb nawb mog”

    Thaum hais li no meej lawm ces cov niam cov txiv mam sab laj thiab lawv yuav sau l cas lawv mam hais rau yus ob tug mej koob, Thaum cov niam cov txiv sab laj tau lawm ces ho muab lus li hauv qab no rau ob tug txum meej.


    Sponsored content

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Sponsored content Today at 4:33 am


      Current date/time is 9th December 2016, 4:33 am