google-site-verification: googlefbfddf59e706b96b.html

Latest topics

» Yaj Cib Lub Zeemmuag Xav kom Muab Hnub Tim 22 Lub 7 Hli Los Ua Ib Hnub Nco Txog Hmoob Nyob U.S.A.
by Liajntsuab Today at 6:24 pm

» Hmoob Lub Neej Sib Tsis Haumxeeb Thiab Kev Covnyom Los Ntawm Kev Ntshaw Hwjchim
by Liajntsuab Today at 6:08 pm

» Paj ntaub paj ntawv raug txwv.
by shung Today at 5:24 pm

» Tswv Xyas mus ua tsov
by xiongchang 21st November 2014, 9:35 pm

» Tshuaj Ntsuab
by koobpovtxuj 19th November 2014, 6:05 pm

» Zaj Dabneeg Hmoob Tej Tub Txawj Ntxeev Siab Rau Tej Nom Thiab Thaum Kawg Lawv Lub Neej Xaus Li Cas
by xiongchang 15th November 2014, 8:35 am

» zaub mov hmoob.
by koobpovtxuj 11th November 2014, 7:21 pm

» Vaj Pov Qhov Tso Plig
by koobpovtxuj 10th November 2014, 5:51 pm

» ***UA NEEB***
by shung 10th November 2014, 10:13 am

» Qeej Hmoob
by xiongchang 9th November 2014, 7:34 pm

» Leej muam Maiv Paj dua twg lawm ?
by xiongchang 8th November 2014, 7:18 pm

» Yeej Thoj Nam Vib Nais
by koojziagkabzaug 6th November 2014, 3:11 pm

» Tim li cas lawm.
by koojziagkabzaug 6th November 2014, 1:50 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    Hmoob Ntuj Tshiab lub tsev PAJ HUAM & kab lis kev cai Hmoob

    Share

    Admin
    Admin
    Admin

    Messages: 61
    Date d'inscription: 2010-02-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Admin on 19th June 2011, 3:53 pm



    Nyob zoo Hmoob Ntuj Tshiab,

    Kuv kho nws cov title zoo li nov thiab kuv tso nws tus Avatar rau, seb nws xav li cas, yog tssi nyiam los hais kuv mam rov kho dua rau.

    Ua tsaug.

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 5:41 pm

    [quote="koojziagkabzaug"]
    [color=blue]
    TUB HLUAS YUAM LUAG NTXHAIS.
    koojziagkabzaug wrote:[center]
    TUB HLUAS YUAM LUAG NTXHAIS.

    SOB ME NO -----------------------------CES YOG PAJ HUAM

    HAIS CUAM TSHUAM -------------------TXOG COV ME TUB

    UAS NIAJ HNUB ----------------YAUM LUAG TEJ NTXHAIS

    MLOOG KUV HAIS --------------------LUB KEEB UA HLUAS

    TSAM HO PUAS ------------------LUB KEEB HLUAS NRAUG

    MUAJ KEV TAUG ---------------------HO PAUB XYUAM XIM

    MUAJ QEE CHIM -----------------------------KOM NEJ TAU SIV

    LUB KEEB CHIV -----------------------YUAV MUS UA HLUAS

    YUAV TAU XYUAS ---------------KOM PAUB TSEEB TSEEB

    NTXHAIS LOJ LEEB ----------------TXHOB LAM MUS THAM

    TSAV YEE YAM ------------------------------KOM NYOB TU TU

    TXHOB LAM MUS ---------------------TSHUM UB TSHUM NO

    THAUM YUS NCO ------------------------TSIS TXOG TXIJ TWG

    THAUM KHIS NTSWG--------------------- NEJ XAV TXOG LIG

    NEJ MAM TIG -----------------------LOS MLOOG KUV QHUAB

    MOB TXAUS NPUAB ------------------NEJ MLOOG TSIS TAU

    LUB NTUJ VAU -------------------------LOS TUAJ YEEM NRES

    THAUM NTAWD CES------------------------ LEES TEB WS, WS

    MUAB LUAG THWS ------------------------UA PUAS TSAYAM

    TUAJ YEEM KAM ---------------------HAIS TIAS YUAV YUAV

    THAM HMO PUAV -------------------------CES MUS TSIS TUAJ

    NKAUJ CES MUAJ ----------------------NYOB MUS XEEB TUB
    TXIV MIS DUB ----------------------------------LOJ MUS ZUJ ZUS

    NKAUJ MAM MUS --------------------TSHAJ KOOB RAU XOV

    THAUM YAWG HNOV ----------NTSEJ MUAG NPHOB TSUS

    YAWG THIAJ MUS ------------------------NTAUS KEV SABLAJ

    NKAUJ XYUAM PHAJ -------------------NQI PEEV TXAIS YIM

    SAIB TSIS DIM -----------------------------------YUAV UA LICAS

    NYIAJ QAB NAS ----------------------------YUAV TAU RHO SIV

    NIAM THIAB TXIV -------------------------NOJ MOV TSIS QAB

    TSAM TAU NYAB -------------------------TUB HO TSIS NYIAM

    NKAUJ CEV PIAM ----------------------CES NKAUJ YUAV LOS

    TSIS TAS TOS ---------------------------------LEEJ TUB MUS COJ

    MUAB XAV ZOJ ----------------------------NOJ MOV TSIS NQIS

    LEEJ TUB CHIM ---------------------------TAS HNUB TAS HMO

    CIA MAM KHO -----------------------NYIAJ TXIAG TAS NTAU

    LEEJ TXIV NPAU-------------------------- CEM YWS LUJ LOOS

    LEEJ TUB NROO ----------------------------TSIS XAV NOJ MOV

    VIM RAU QHOV -----------------------TXHIA NUM PHEEJ YIG

    NEJ YUAV TIG ---------------------LOS MLOOG KUV QHUAB

    KUV THIAJ MUAB ------------------------HAIS QHIA RAU NEJ

    YAV TOM NTEJ -----------------------KOM PAUB SOJ XYUAS

    KEV UA HLUAS ----------------------------TSIS YOG YOOJYIM

    LUB NTUJ TSIM --------------------------UA CHAW DEES SIAB

    QHOV TSEEM NTSIAB --------------YUAV TAU MAM THAM

    TXHOB MUAB YAM ---------------------------RAU UB RAU NO

    NKAUJ TSIS TSO---------------------- CES YUAV PUAS KOOB

    KEV NCE ROOB ---------------------YUAV TAU XYUAM XIM

    TSAM TXHAUM TXIM ------------------TSIS MUAJ TWG PAB

    KEV YUAV NYAB ------------------YUAV XAIV TUS NQUAG

    THIAJ YUAV PUAG -------------------------KWV TIJ NEEJ TSA

    PAB TXHAWB NRA --------------------------YUS LUB ME NEEJ

    THIAJ YUAV TSHEEJ -----------------NYOB MUS NTO KOOB

    TUB HLUAS HMOOB ------------------UAS TSIS THOOB TSIB

    HO MUS NTSIB --------------------------NROG KUV SIB THAM

    MUAJ TEJ TSAM --------------------------ZOO MUAJ SIJHAWM

    MAM NTHUAV TAWM------------------- HAIS QHIA RAU NEJ

    YAV TOM NTEJ --------------------MOG TUB HLUAS HMOOB.

    By: Hmoob Ntuj Tshiab


    Posted 17 July 2010 - 02:09 AM

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 6:02 pm

    Zaj 2 : Paj Huam Kev Txom Nyem
    ntawm no mus-----------------------yog lus paj huam
    yuav hais tshuam------------Hmoob kev txom nyem
    Raug luag lem-------------------thaum xya caum tsib
    Kooj sam pib----------------------sawv tsuj teb chaws
    Nrhiav kev raws---------------neeg tawv dawb tawm
    Nplog liab txawm---------------pib nrhiav kev phem
    Los rhuav tshem------------------------kev cai lij choj
    Nyab laj zoj-----------------------tog nplog ywj pheej
    Nom txhua leej--------------------raug ntes lawm tag
    Cob tsib dag----------------------coj lawv mus kawm
    Thiaj raug zawm-----------------------pob qa tuag tas
    Tsis txawv nas--------------------mag yej mag ntxiab
    Qib nom siab-------------------------los txog nom me
    Tuag ua ke-------------------------nyob rau moos xais
    Nrog huab tais-------------------lawv tsev neeg kheej
    Cov txiv neej-------------------------tsis hais leej twg
    Siab yau rwg--------------------ntshai tsam raug ntes
    Muaj npe ces---------------------yeej raug txhom tag
    Hmoob thiaj mag--------------nplog liab quab yuam
    Txawm neeg ruam--------------yeej raug tsim txom
    Hmoob tej nom-----------------khiav dhau thaib sab
    Cov tom qab--------------------raug kev txom nyem
    raug luag lem----------------------pauj kev xam khib
    peb hmoob ntsib --------------txhua pab txhua pawg
    thaum hmoob tawg ------------nyob rau phuv npiab
    nyab laj liab ----------------------thiab cov pub thawj
    tuaj sawb lawj---------------------tua peb cov hmoob
    caum qab roob ------------------------ncig rau qab ha
    suab phom ncha ---------------------cuag li xob nroo
    yog thaum xyoo -----------------------ib cuaj xya rau
    nom hmoob tau ---------------khiav tawm teb chaws
    hmoob sawv daws--------------nkaum hav xub tsuag
    txoj kev tuag -----------------------muaj xeeb zuj zus
    nom hmoob pus -----------------cov ntse tawm dhau
    cov ruam tau-----------------------raug zawm pob qa
    tuag pob txha --------------------------puv toj pus pes
    dej naj ces --------------------------thiaj hav naj phuv
    Hmoob tuag puv -----------------pob txha dawb vog
    Tub rog nplog---------------------koom nrog nyab laj
    Tua phuv laj---------------------thiab sab pham phais
    Ntes Hmoob hlais---------------------nyob rau xas las
    Muab txawj vas------------------nkawv tus me nyuam
    Muab pov cuam---------------------rau hauv qhov cos
    Raug tuav mos-------------------cuag tuav qos ncoom
    Pub thawj koom--------------ntxeev siab rau Hmoob
    Coj nplog coob------------------caum Hmoob naj kas
    Raug ntes tas--------------------------coj mus moos oo
    Thaum lub xyoo------------------------ib cuaj xya yim
    Cov khiav dim------------------tseem tuav riam phom
    Sawv kwv nyom--------------------txoj kev siab phem
    Tuaj rhuav tshem------------------peb Hmoob zej zog
    Sib koom nrog----------------------yawg vaj tswv cim
    Sawv txheeb txhim------------------nyob rau phuv laj
    Coj kev ncaj------------------------teeb tsev teej kawm
    Nrhiav kev cawm-------------pab Hmoob txom nyem
    Raug luag lem---------------------tsuj caij quab yuam
    Lub neej khuam-----------------siab kua muag ntshav
    Ntws xyaw av-------------------xyaw nroj xyaw tsuag
    Txoj kev tuag--------------------------cov tiv tsis nyog
    Tawm mus nrog -----------------cov nplog liab nyob
    txog kev txob --------------------------mas muaj tas li
    tsaus ntuj nti ----------------------nyob sib qawg quaj
    xya caum cuaj ---------------Hmoob nyob phuv npiab
    cov koom siab --------------------tuav lub npe Hmoob
    noj nplooj xyoob---------------nplooj ntoos yug siav
    Sib pug khiav---------------------mus nkaum txoj sia
    muaj ib txhia ---------------------poj niam tuag lawm
    tso txij nkawm --------------------nyob ua ntsuag nos
    neeg noj qos --------------------------tsis muaj tus pab
    Ua cob fab-------------------------sawv tuav lub koob
    Thaiv peb Hmoob------------------nyob ntuj qub qab
    siv nplooj hmab ---------------nplooj ntoos ua tshuaj
    Tsis khiav tuaj---------------------tseem tuav daim av
    vim tseem xav -----------------kom hmoob muaj tug
    Daim av yug-------------------Hmoob ib txwm nyob
    Yuav thaj tsob------------------------daws kev tso tau
    Hmoob feem ntau------------------tham siab kub lug
    Nrhiav kev pug ---------------khiav tawm teb chaws
    Hmoob sawv daws--------------tuag taug kev tshuav
    Raug luag kuav------------------ mag cuab luag ntaus
    Tej neeg laus------------------- tuag tshaib feem ntau
    Hmoob tseem tau----------txaug ntawv hlawv xyab
    Fiv ntuj pab--------------------------kom hla dhau dej
    Cov ua ntej----------------------kuv dhau lawm coob
    Ib feem poob-----------------------nkaum rau hav fab
    yuav rov qab ---------------------------los rov tsis tau
    Vim ntshai dhau---------------thiaj tau khiav nkaum
    Roob phuv haum---------------thiab roob phaj tsum
    Muab yeej cum---------------------khiav tuaj nce toj
    Nplog liab soj-------------------tsam khiav tsis dhau
    Me nyuam yau---------------------tuag siav tsis pom
    Muab yeeb lom ----------------cheem lub suab quaj
    Sib yaum tuaj -----------------------mus hla dhau dej
    Cov ua ntej--------------------------luag ho tuaj txais
    Nyob vib nais-------------------------tuaj nyob ua ke
    tag loj me ---------------------------luag hlub ib yam
    Ho yuav tham----------------------cov tsis ntab ntws
    Xyov tem nws----------------------ciaj los nws tuag
    Muaj ib kuag--------------------ces nplog muab lob
    Nrog nplog nyob-----------------mus zov luag tsev
    Ua lawv qhev------------------nyob nrog kua muag
    Tus raug tuag --------------------hav zoov hav tsuag
    Tsev neeg pluag ----------------------tso tsis tau plig
    Tau thov ncig ---------------------sawv daws sib pab
    Daws kauj vab--------------------thiab daws kauj le
    Ntsuj plig nce-------------------txoj kev thawj thiab
    Mus ntuj tshiab--------------------kom kaj siab nrig
    Tej ntsuj plig----------------------mus lawm du dais
    Ho yuav hais---------------------txog peb cov nyob
    Neej pov plob-------------------tam tsiaj kaw nkuaj
    Sib phoom tuaj----------------nyob thaib teb chaws
    Raug luag ncaws----------------thiab raug luag cem
    Txoj kev phem------------------muaj ntau yam heev
    Luag tsis kheev------------------------mus ua dab tsi
    Hnub thawm hli-------------------tsuas tos luag faib
    Me nqaij qaib----------------nqaij npuas nqaij ntses
    Faib tsis nres---------------------txhua lub lim piam
    Tej txiv niam---------------------nyob tam npua rog
    Yawg thiab pog--------------------seev rov ua hluas
    Neej tseem puas-------------------tsis txawj sib hais
    Nyob vib nais ---------------------tsis tau ntau hnub
    Txawm siv rub --------------------koj pawg kuv cov
    Los puag sov ------------------------nyob noj pw rog
    Nco tsis txog -------------------txoj kev txom nyem
    Lub neej pem----------------------toj roob hauv pes
    Luag caum ntes-------------------------tua li tej tsiaj
    Muab cuab phiaj----------------sim muv sim phom
    Lub meej mom--------------------tib neeg thoj nam
    Vaj huam plam----------------poob nab qhoom tag
    Tseem los dag--------------nrhiav kev rhuav tshem
    Pib ua phem ----------------------rub pab rub pawg
    Kom sib tawg ---------------------tsis thooj ntiaj teb
    Txav kom deb-----------------tsis txhob koom siab
    Lub neej tshiab------------Hmoob ncav txhob laib
    raws kuv saib -------------------mas tsis tsim nyog
    Peb sib tog -----------------------cuag dev cua txha
    Lub koob ncha----------------thoob luag lwm haiv
    Thov peb xaiv------------------txoj kev haum xeeb
    Los nrog teeb---------------------vaj huam sib luag
    Peb sib puag------------------------koom ua ib tsob
    Los pov plob--------------------nrhiav kev sib thuv
    Ua siab huv ---------------------los tuav npe hmoob
    Nyob yeej koob------------------raws neeg ntiaj teb
    Thiaj muab ntxheb--------------ntos ua kwv huam
    Qhia cov ruam----------------kom nrog paub meej
    Nyob peem tsheej----------------lub neej thaj yeeb
    Kom paub tseeb------------------raws tus lw kawm
    Nrhiav kev tawm------------------txoj kev tsuj caij
    Neeg siab txaij-----------------thov muab pov tseg
    Kom neej ntseg-------------------rau yav pem suab
    Hmoob kuj cuab----------------tsis nrog luag muaj
    Dim kev quaj-------------------------lub me xib teg
    Muab pov tseg----------------txhob nco txog lawm
    Vim peb tawm----------------mus txawv teb chaws
    Peb sawv daws-------------------thov tsis txhob tos
    Kuv lus ntos----------------------------ces xaus li no
    Thov nej nco-------------------lub neej txom nyem
    Rau luag lem-----------------------lub neej qub qab
    Nyob hav fab----------------------noj nroj noj tsuag
    Neej quaj ntsuag------------nawb mog nej hmoob.

    ( xaus li no )


    Last edited by Hmong ntuj tshiab on 20th June 2011, 8:28 pm; edited 1 time in total

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 6:23 pm

    Zaj 4. Paj huam , sib ntsib hauv kev npau suav

    Tus ntawm no-----------yog nraug Hmoob vaj
    yuav los tshaj--------------muab xa xov tawm
    Lub keej khawm -----------Txoj uas kev hlub
    Ntuj thaum ub-----------------tsis tau sib yuav
    Lub ntuj nchuav-----------------ntiaj no teb tig
    Av thiaj nkig------------------dej thiaj li nphau
    Sib ncaim tau-------------peb caug tawm xyoo
    koj lub moo--------------------twb ploj zuj zus
    wb tej lus------------------------uas tau cog cia
    twb mob ntxhia--------------yuav rov qab zoo
    tseg tsis nroo-------------------ua siab tsis nco
    cas nag hmo------------------ho rov npau suav
    pom koj tuav-------------------kuv ib sab npab
    zaum ib sab-----------------tham txog kev nco
    Sim neej no----------------------cas nco ua luaj
    pom koj quaj----------------kua muag ntws sis
    kuv khoov ntshis------------muab kuv tes tsho
    Coj los so---------------------koj cov kua muag
    Kuv khawm puag ------------koj rau xub ntiag
    ib me pliag----------------------koj kua muag tu
    hnov koj hu------------------kuv npe hluas tshaj
    nraug xeem vaj------------------yog tiag los dag
    zaum no ntag-----------------xav kom yog tiag
    kuv tig kiag--------------------los tuav koj plhu
    tsa ncauj hu-------------------hais tias sim xeeb
    yeej yog tseeb---------------tsis yog npau suav
    wb tham dhuav----------------ces wb mus tsev
    taug tej kev-----------------------nce toj qis hav
    pom liaj dav-------------------ya dawb pes vog
    neeg zej zog------------------qw zom pes zaws
    liaj dav tsaws----------------------rau ub rau no
    Wb tig hlo--------------------saib rov pem roob
    Pom hav xyoob---------------hav ntoo kaj nrig
    Noog nraj yig----------------quaj hav ntas ntua
    Hnov cuab npua -------puag nram Hmoob zos
    Suab kab nqos---------------quaj kho siab tshaj
    Txiv pos daj--------------------siav kawg kiag li
    Wb luag ntxhi--------------------mus de los noj
    Kuv saib koj----------------------yeej zoo li qub
    Tseem ntxim hlub--------------li ntuj yav dhau
    Kuv tseem yau--------nyuam qhuav tiav hluas
    Wb tham txuas---------------tsis muaj tsawg lo
    Ces wb ho-------------------nqis mus looj ceeb
    Txiv nkhawb nqeeb----------siav raws tug kev
    Txi tsheej rev-------------------ua ceg rawv tag
    Wb tso dag-----------------tham luag mob plab
    Tau sib thab-----------------------sib zeg tau kev
    Pom Hmoob tsev----------nyob dai toj dhuam
    Me noog ntxuam---------------ya taug kwj deg
    Hnub tuaj ntseg----------------tshav kub sov so
    Tham kev nco-----------------yav ntuj nram qab
    Taug kev ntxhab-----------------tsis tiaj tsis tus
    wb tham lus------------------ncig mus yuj yeev
    Koj txawm seev-------------suab hais lus taum
    Wb mus zaum------------nram roob xyuam yaj
    Ib ce laj---------------------cua tuaj ntxuj ntxiag
    Wb tig ntiag------------------saib rov phab kheb
    Hmoob ua teb---------------ntuag toj ntuag pes
    Wb sawv nres-------------ntsia nram choj hlau
    Pom tsheb ntau--------------khiav cuag dab tsi
    Wb thiaj li--------------------rov mus nuam yaj
    Kho siab tshaj--------------tsis xav ncaim mus
    Koj tej lus-------------------tham seev yuj yees
    Txog kev plees-------------yav puag thaum ub
    Kev sib hlub--------------------nyob zos naj vej
    Wb kwv dej------------------puag tom dej dawb
    Dawm sib tawb--------------mus phuv xam me
    Tim ncauj ke------------------kev ncaim nce toj
    Kuv thiab koj-----------------mus dob teb zaub
    Noog puj daub-----------quaj nrov ntsho nrooj
    Hmoob tshuab nplooj-------nrov kho siab zim
    Sab puag tim------------------lawv zos tiaj qhib
    Teb kab tsib--------------------nrog koj mus lov
    Caij sawv ntxov----------------wb kuj sib ntsib
    Wb tau pib-----------------tham lus tseem tseeb
    Lus meej xeeb-------------wb tham khee kawv
    Wb mus sawv--------------puag nram chaw so
    kuv rov hlo------------------tuav rawv koj npab
    tig rov qab --------------------los txog ntug zos
    Hmoob tuav cos -----------suab nrov doog diaj
    Hnov suab tsiaj---------------sib tog zom zaws
    Wb tshwm plaws-----------ntawm nej tog tsev
    Sib tham ntev-----------------tsis xav sib ncaim
    Koj nyob nraim-----------hauv kuv nruab siab
    Cia xyoo tshiab---------------wb mam sib yuav
    Kuv quaj zuav------------------tsis xav rov qab
    Koj siab fab--------------------tsis xav sib nrug
    Siab kub lug------------------txoj kev sib tshua
    Ob leeg ua ------------------kua muag ntws nto
    Sim neej no---------------------cas nco luaj tiag
    Quaj kawg kiag---------------vim sib nco dhau
    Lawv thiaj tau--------------sawv phov txaj nrov
    Kuv thiaj hnov---------------tsim dheev los no
    Ua cas ho-------------------yog npau suab xwb
    Kua muag twb----------ntxaum hauv ncoo tag
    Hais cuag dag--------------ntub tog hauv ncoo
    Nws ntub loo------------npaum xuas dej tsuag
    Rov qi muag----------------kom npau suav dua
    Lawv sawv ua--------------tshais ntxov los noj
    Dab ntub ploj--------------mas chim siab dhau
    Zaum tsaws npau---------kho siab tshaj plaws
    Tim teb chaws--------------------ua tsov ua rog
    Kuv thiaj nrog------------cov laus khiav lawm
    Koj kuv txawm---------plam thaum ntawd los
    Kuv tsis ntos--------------------tham txog koj li
    Zais tuag nthi---------------rau hauv nruab siab
    Koj tus ntxhiab--------------kuv tseem cim cia
    ntsib mam qhia--------------rau koj lawm xwb
    Thov kom wb------------txhob npau suav ntxiv
    Thiaj tsis chiv-----------------kev mob siab dua
    Kuv twb ua---------------------tau ib siab lawm
    Hmoov tsis sawm--------------wb thiaj sib cais
    Yog yuav hais--------------yeej tham tsis txhua
    Thiaj li ua--------------------npau suav pom koj
    Siab ntsws ntoj---------------nco koj heev dhau
    Thiaj li tau-----------------muab los tham tawm
    Koj plawv nqawm-----------siab ntsws ho nqig
    Tej tsuj plig---------------------rov los puab cev
    Siab ho ntev--------------------ua neej mus ntxiv
    Yog yuav chiv-------------------npau suav li qub
    puas muaj hnub---------------rov tau lawm mog
    Tseem xav txog----------------lub neej yav dhau
    wb tseem yau-------------nco npaum nkauj hnub
    Ntsib dab ntub-------------tseem tham luag ntxhi
    Txiv nraug hli-----------------nco koj tshaj plaws
    Yog tham ntxaws-------------ces kua muag poob
    Me nkauj Hmoob--------------tus me ntxim hlub
    Nkauj dab ntub--------------txiv nraug npau suav
    Tham tsis dhuav-------------------ua ke tsis txaus
    Hais tsis xaus----------------------tej lus sib hlub
    Nkauj dab ntub-----------thiab nraug npau suav
    Nws puas tshuav-------------ib zaug lawm thiab

    ( xaus li no )


    Last edited by Hmong ntuj tshiab on 20th June 2011, 8:26 pm; edited 1 time in total

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 6:42 pm

    zaj 9. Ncaim ntau xyoo lawm
    ab ntuj yuas……….…..…...hmoob tej me tub
    suav txij hnub…….…..….kuv ncaim koj mus
    ntev zuj zus………….……ntshe koj hnov qab
    twb yuav nyab…….…….….muaj tub muaj ki
    luag ntxhawv ntxhi………..koj tej nqaws tsho
    thiaj tsis nco………………..li kuv lawm paub
    xya caum plaub…………..….los txog tav nov
    yeej tsis hnov……………..…..koj ib tsab moo
    puas nyob zoo.……………..lawm os tus hlub
    tej lus qhub…………….……yav tas dhau los
    niaj hnub tos……………..seb puas muaj ntsib
    ho tau pib…………………..tham kev sib nco
    tsheej tag hmo…………ntshe tham tsis dhuav
    kev npau suav…………...…..los tham tsis tag
    lus tso dag…………………….los yeej ib yam
    txoj kev tham…..………...yeej tsis pov khawv
    ntuj yuas lawv…………....…..tus me kuv hlub
    hmoob tej tub……………...tus kuv nco ntsoov
    tsis tau hloov…………………..lub me siab li
    quaj dhawv dhi…………….txog koj xwb tiag
    ib me pliag………….…..yuav ncaim mus deb
    ib rooj teb…………………..rau ib ntxeev ntuj
    lub siab yuj……………..……vim yog nco koj
    mov tsis noj………………..los tsis nco tshaib
    seev me naib……..……....neeg zoo nraug xwb
    koj kuv wb……………….….puas xav ib yam
    ho tsis tham…………………..xa xov nug moo
    kev nyob zoo………………..……li yav tas los
    qub zej zos…………………nyob tim phab kheb
    nej thiab peb………………..sib yaum pauv zog
    tseem xav txog………………….ua ke cog nplej
    peb thiab nej……………………....mus ua ib ke
    wb mus de………………..…txiv pos tshauv noj
    paj ncaim toj………..…..…...nyob tawg ntsa iab
    kab noog diab…………………sib tw ntxais paj
    rooj xyuam yaj…………….….wb chaw sib tos
    qub zej zos………………ntshe ciaj hav ntxhov
    yog kuv rov……..……..…..puas yuav ntsib koj
    hos wb txoj……..………….….me kev sib hlub
    tham tag hnub……………...thiab nyob tag hmo
    yeej tseem nco…………...……….koj li yav qub
    yav thaum ub…...………..nyob ntawm peb tsev
    nej dua kev……..…………koj suab luag ntxhi
    ntuj tsau hli………………..sawv ntawm ib sab
    tuav kuv npab…………….thiab hnia kuv plhu
    kuv mam hu…………………....tias koj tuaj los
    cov lus ntos……………...tseem nco ntsoov cia
    zais tsis qhia……………..….rau leej twg paub
    niaj hnub saub………………txog koj xwb tiag
    koj xub ntiag…………….…tseem dai kuv siab
    mus ib txhiab….…………..tsis muaj hnub ploj
    kev nco koj………………..mas see txhua hnub
    li nkauj hnub……...…….……..nco txiv nraug hli
    kua muag si……….....……….…rau koj tag hnub
    hmoob tej tub…….……………tus me nraug xwb
    koj lub hlwb……….…..…..puas tseem muaj kuv
    wb chaw thuj………..……….…ntshe ciaj hav roj
    hais txog koj………………….puas nco kuv thiab
    me nplooj siab………….……nyob puag tom qab
    rau ib sab……………………….los ib ntxeev ntuj
    lub siab yuj……………..……nrog huab nrog cua
    txoj kev tshua………………..mus txog hnub tuag
    lub kua muag……………..….ntws cuag nag poob
    leej nus hmoob……...…………....tus me neeg zoo
    tau puag loo….….…….……….mus yeeb yaj kiab
    thiaj zoo siab…………….…………os me leej nus
    kuv tej lus……..………….….thov tsis txhob chim
    vim koj dim…..……………….…mus ua luag txiv
    thiaj lam tiv………………….nyob lwj siab ntsuav
    li noog puav…….………………….ua neej dai taw
    tsis muaj chaw…………………..…li no lawm tiag
    lub xub ntiag………………..…….thiaj pw txias to
    seev tag hmo………………...……rau tej npoo txaj
    lub ntuj kaj………………….……los tsis xav sawv
    ntuj yuas lawv…………………...tus me ntxim hlub
    kua muag ntub…….…………..….tej me hauv ncoo
    tsis muaj hmoo…………………….thiaj tsis tau koj
    yog tuag ploj………….……..….puas yuav sib ntsib
    nywj vag ib……………………..nyob rau nruab dab
    tuav koj npab…………….…..….haus paj zaub quag
    rov tau puag………………….…nyob kuv xub ntiag
    paj zaub qiag……………….……li kab npauj npaim
    ya nrog nraim…………………...nyob mus ywj siab
    mus thawj thiab……………………xeeb rov los dua
    tsis txhob tshua………………….lawm os tus hlub./.
    xaus li no

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 6:46 pm

    [
    size=18]Zaj 11. Happy Valentine day
    Hnub ntawm no…….………..yog valentine
    Kuv yuas hais…….………txog kev nco koj
    Mov tsis noj……….…….los tsis nco tshaib
    Nco me naib……….………zoo nraug li koj
    Xav tuaj ntoj…….……..nrog tham tag hmo
    Vim kev nco…….………….tus me hav nim
    Muaj qee chim…….……pom koj zem zuag
    Rub los puag…….……..nws yog npau suav
    Kuv thiaj yuav……….……….paj valentine
    Thov koj txais…………….tias kuv hlub koj
    nyob tsis ploj ….……….hauv kuv lub siab
    yam mos liab….………...nco me leej niam
    fab lwm tiam….………..tseem yog koj tus
    yuav tsis mus…..……nrhiav dua tus tshiab
    muab nplooj siab….….…npuab koj ib leeg
    yuav tsis tseeg…….………leej twg li nawb
    me ntxim tawb…………hais lus luag ntxhi
    siab quaj dhi……………xav nrog koj nyob
    siab tsis txob……………yuav nco leej twg
    tej phooj ywg…………..tsis xav nrog tham
    muaj qee tsam………..saib duab luag ntxhi
    zoo xws li………………twb nyob nrog koj
    siab xav zoj……………...xyov yuav ua cas
    thiaj tau tas…………….koj me nplooj siab
    Coj los xiab………………kuv txoj kev nco
    Kom dhau hmo…………….li pw tsaug zog
    thiaj tsim nyog……………tshua koj luaj no
    tus kuv nco……………...nyob ncua kev deb
    li muab ntxheb…………hais qhia qhov tseeb
    puas fav feeb……………qhov nco txog kuv
    yam noog luv……………ya ua nkawm xwb
    kuv yeej twb……………….hais qhia koj tag
    yeej tsis dag……………….koj nawb os mog
    wb lus cog…………...…yeej hais muaj tseeb
    nyob yaj ceeb…….………….yuav tsis dag li
    thiaj muab ntxhi….………..hais rau koj hnov
    li xa xov……………..………..nrog valentine
    yuav muab hais……..……..kuv txoj kev hlub
    ntuj tim ub………….………ua kev sib tshua
    thov txhob ncua……..……lub sij hawm ntev
    puas nrhiav kev………….tuaj kom ntsib kuv
    tsis tuaj luv………….…….los thov qhia ncaj
    kuv mam npaj……….……daim pib dav hlau
    tuaj kom tau…………………saib koj ib zaug
    kev nkauj nraug…….……nyob ncua kev dav
    kuv muab xav………..…mas nyuaj siab tshaj
    thiaj qhia ncaj ….….………..kom koj to taub
    txoj kev haub………………yeej tsis yooj yim
    muaj qee chim……...………..xav dai caj dab
    txoj kev npab………..…yeej vwm lawm tiag
    koj xub ntiag….…….…….chaw dai kuv siab
    qhov tseem ntsiab…..……..nyob deb koj heev
    lub ncauj seev…….………ua kua muag poob
    me nraug hmoob…….……koj puas nrog paub
    kev sib haub……….…….mas nco dhuj dheev
    thiaj muab seev…….……..nrog huab cua tuaj
    lub suab quaj………………mas seev yuj yees
    txoj kev plees………………..yav tas dhau los
    thiaj muab ntos……………hais qhia koj hnov
    kev xa xov…………………..yeej nco koj tiag
    ib me pliag……….………tsis xav ncaim deb
    nyob ntiaj teb………………xav kom muaj wb
    kuv nkauj xwb……..……..tseem nyob ib leeg
    thov ho ntseeg………..……kuv thiab os mog
    ho xav txog…………………...tus uas koj hlub
    nws niaj hnub…………………nco koj cov lus
    thaum uas mus…………………ua si taug kev
    ncaim lawm ntev……….tseem nco ntsoov cia
    zais tsis qhia………...……..rau leej twg paub
    niaj hnub saub……...….…txog me nraug xwb
    koj lub hlwb……….....……..yog nco ib yam
    thov txhob tham…..……….mus qhia leej twg
    kev phooj ywg ……..……cia qhia kuv xwb./.
    ( xaus li no )

    [/size]

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:00 pm

    Niag Lus Xyuam Phaj Hais Plaub

    Zaj no yog hauv paus lus hais txog kev yus yuav mus xyuam phaj foob plaub uas yus cab nws mus hais rau hauv nom tswv xam hais plaub los yog nom tswv loj

    Yus nqa ib lub phaj tswm ciab paj ntoos mus cev rau nom tswv ces yus yuav tau thais cov lus no ua ntej rau nom tswv los yog cov tub txiav txim plaub hauv tsev hais plaub.


    Hnub no peb tuaj ntawm no mas tsis muaj dab tsi thiab tsuas yog muaj me ntsis lus tsis txaus siab mas peb xav tuaj xyuam phaj foob tus yawg hu li no nws npe hu-------------------- rau hauv koj kev nom kev tswv, luag hais tias, lub zoov muaj tug ntoo siab, lub zos muaj tug neeg laus, luag hais tias ntev luv los koj yog tug tog pas, hlob yau los koj yog tug neeg laus,

    Luag hais tias nyob li peb txawj ua plaub ua ntug ua xaiv ua lus ces nyaj peb yuav ua tag rau peb vaj peb tsev lawm au, yeeb vim tias peb tsis txawj ua plaub ua ntug ua xaiv ua lus,

    peb thiaj li thaij kab pom lis, thaij cib pom cawv, tuaj nce koj kev nom tswv lub rooj loog,

    yeeb vim luag saib tsis tau peb zeej lum kwb tab, siv lum pheej yaj, luag thiaj kheej kaw tso twm tswb, sab kaw tso twm yaj, tuam muas ceeb tob ua nyuj nias vaj, suav nias luam, lam iab lam liam rau peb tias peb tau--------------,

    xws li peb nqaij dawb lam xeeb kas, neeg dawb lam xeeb plaub, mas peb thiaj li peev meej tsis zoo siab, peb thiaj li ceeb phaj nqes ntim ntaus nug tso nplua, xyuam phaj lis zees tuaj nce koj kev nom kev tswv li yaj meeb lub rooj loog,

    luag tias zeej xee puj pheej ces cias lim tee txhee, tim fa puj pheej ces nyas thawj zeej au, luag tias zeej xee puj pheej ces cia lim tee ntxw, tim fa puj pheej ces nyas meej hw au, yij kum sa nyas kum po, kum tsaim nyas kum lo, yij kum sa mas kum seej, kum tsaim mas kum los zeej,

    peb thiaj tsab yeeb li ntsos tuaj tom taj, thov nej kev txwj nyob kev laus , kev nom kev twv, nrhiav xab laus xwm som sib cog xaj, peb thiaj tsab yeeb li ntsos tuaj tom lav thov nej kev txwj nyob kev laus , kev nom kev tswv, nrhiav xab laus xwm som sib cog xav,

    txawm tias nej kev txwv nyob kev laus, xaj hais rau txoj koob mus yoj xov los nyog, ntab tsis tu ntug tsis ntais, siv rau pej vaim qhua tauj yas ob cag peb txhais, los siv tau, siv rau mab rau suav los siv tau , ab peb yuav ntag, thov nej niam zej txiv zos, niam teb txiv chaw,

    nrog peb teeb peb thi, yeeb vim peb yog nej laj mej pej xeem, rog yog nej npuas, yuag yog nej dev, peb yeej nrog nej thooj plab koom plawv, thooj hlab hlais ntaws, thooj siab koom ntsws, thooj hlab hlais tw, yog nej xyoob ib txoog ntoo ib tsob, nqaij ib daig tawv ib plhob,

    nyaj peb kuj tsis yuav ntshaw plaub ntshaw ntug, ntshaw xaiv ntshaw lus, thov nej kev nom kev tswv pab peb kho kom nkauj hnub mus nrab ntug, txawm tias nej ntsia hlob los nyaj peb yuav hlob, hos nej ntsia yau los nyaj peb yuav yau,

    kom peb tau neej tau tsav, tau kwv tau tij, yog loj los thov nej muab kho kom yau, yog yau los thov nej muab kho kom ib tag ob tag, kom peb kev kwv kev tij, kev neej kev tsav ho nyob mees lub xeeb no ntag, es muaj lus nqa tes ua nej tsoom kev nom kev tswv sawv daws tsaug no lau./.

    Ces sawv pe luag xwb.

    1. pe kev nom kev tswv.
    2. pe hau teb hau chaw.
    3. pe peev nom peev tswv, saum ntuj 4 tug txoov xob, hauv av 4 tug txoov zaj.


    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:05 pm

    Kaj seej luab, luab lim txog rau ib tsoom zeej, seej sim huab hwm seev nraug txawg, tau xauv xeeb tshwm sim los muaj lub roj ntsha tsheej los ua zeej keeb,

    Nws yog tiam nyeej keeb, tshab txhais yog peb haiv Hmoob nyob rau tuam yim meem luaj, tau tawg tsij ri si keev mus nyob rau txhua txhua thaj tuam meem nrim thoob plaws rau cej lum qab kha, Hnub no kuj yog ib hnub sij kaj cib pem faj ceeb, zoo cib pem faj ntug,

    Kuv yuav muab teej teg txuj ci keeb ko qauv quag ntawm nceeg lus ua tsaug nco luag tus txiaj ntsig coj los rheeb feeb teeg ua txuj txeeg ua ci nthuav cib lig seev ua zaj lus ua tsaug nco luag tus txiaj, tus ntsig uas luag tau pab yus leg dej num tiav log rau yus yam meej ntseg,

    yog li no yus thiaj yuav tsum tau seev tej zaj lus kom zoo nkauj raws li liaj lwg thiab rhwv mwg nkawv tus lw uas nkawv tau teeb cia rau noob neej seev ua zaj ua luag tsaug, Hnub no kuv thiaj tau muab cej luam ntuav tawm los pub rau peb ib tsoom zeej huab hwm seev nraug txawg tau kawm. Vim peb Hmoob tau plam kuj cuab luaj pua los tau ntau tiam xyoo lawm thiab peb tej txuj ci tau poob, ploj tag lawm zuj zus,

    Es peb txoj kev teeg txuj txeeg ci thiaj nthuav txeej loj hlob tsis tau muaj mus puv rau peb haiv Hmoob txhua txhua yim neej. Uas peb Hmoob tseem txawj tsis tau ntxaws tus txuj ci los ntawm liaj lwg thiab rhwv mwg nkawv tus qauv uas nkawv tau teem teeb cia ua qauv seev suab ua zaj lus tseg rau zeej keeb coj los teeg ua txuj txeeg ua ci pab noob neej nyob rau txhua txhua ntaj tuam meem nrim,

    Uas peb Hmoob tau tawg mus nyob thoob plaws, vim li no kuv thiaj li muab txeeg nthuav qhia rau peb Hmoob kom paub txog ntawm txoj kev seev txuj rag ci raws tus lw keeb ko qauv quag. Uas yog liaj lwg thiab rhwv mwg nkawv tau muab keeb tseg ua zaj lus zoo rau me nyuam Hmoob tau siv los ua kev pab lwm leej lwm tus, nyob rau hauv tuam meem luaj pua.

    Yog li no kuv thiaj li tau muab cej luam sau ua phau ntawv thiab muab teeg ua txuj txeeg ua ci coj los nthuav chab chaws, Cib lig tshab txhais los teem teeb ua keeb ko qauv quag txuj ci cob qhia rau peb ib tsoom zeej huab hwm txhua tus tau kawm

    thiab paub txog txoj kev rag txuj ci raws yam zoo thiab meej raws li peb Hmoob kev hais lus.Yog hais tias koj ho tau kawm tus txuj ci huab txawj kev ua tsaug no lawm los haj yam zoo, yog koj ho tseem tsis tau paub txog tus txuj ci huab txawj kev ua tsaug no los, ho thov kom koj qhib koj lub siab dawb paug los kawm kom koj xeev ras txog tus txuj ci huab txawj kev ua tsaug no.

    Es koj ho sawv los coj koj yim neej mus rau lub neej pem suab mus lawm yav tom ntej no kom koj ho muaj lub neej kaj siab lug.Txuas ntxiv ntawm no mus ces kuv yuav muab tus txuj ci keeb ko qauv quag, kev ua tsaug coj los

    rheeb feeb nthuav tawm los qhia rau ib tsoom zeej huab hwm seev nraug txawg txhua leej txhua tus kawm kom paub, thiab to taub txog txoj kev teeg txuj txeeg ci ua tsaug raws li txiaj keeb qauv cim ntawm liaj lwg thiab rhwv mwg nkawv tau rheeb feeb txog kev nco luag tus txiaj tus ntsig los nthuav qhia pub rau peb ib tsoom zeej seej sim seev nraug txawg kawm,

    kom ho paub seev nceeg lus ua tsaug uas yuav nco luag tus txiaj ntsig kom to taub meej tseeb es thiaj, hais rau peb ib tsoom zeej huab hwm seev nraug txawg txhua txhua leej yuav tau kawm thiab coj mus pab nej lub luag dej num lawm yav tom ntej no

    thiab coj mus siv thaum nej tau nres lub luag dej num uas yuav tau los coj ib teg dej num tseem ceeb nyob rau ib lub sij hawm twg, es thiaj qhia rau nej txhua tus tseem yuav sawv los coj nej lub neej lawm yav tom ntej no, vim koj suav hnub suav hmo txav ze zuj zus mus rau yav neej uas

    koj yuav tau ntsib kev nyuab siab lawm nag, yog li no koj tus kheej thiaj tsis txhob ua siab deb, ib tsam koj ho tau kev tsaus ntuj thiab ho nyuab koj siab xwb os nawb.

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:06 pm

    Ua tsaug tuag - pab nyiaj tshav ntuj ( xyom cuab )

    Kev ua tsaug uas luag coj nyiaj tuaj pab yus tsev neeg uas thaum yus tsev neeg muaj ib tug noj tsis qab nyob tsis zoo lawm es yus yuav tau ua luag tsaug raws li nram no.

    Ua tsaug os, peb xyom cuab tsev mob tsev tuag, tsev puas tsev ntsoog, tu ib sawv ces nchuav ib nkog, nchuav ib nkog ces puav tam dej nam sib laub,


    koj tus ua ( ________________) tseem xav neej xav tsav xav ntsuab xav ze, koj tseem toom txheej toom yig, nyiaj txiag ntos, tshav ntuj ntos, tuaj pab peb tsev xyom cuab nta dab nta qhua ntseg log puav tam ncej txawb,


    Nyob li hnub qab nram lub ntsis, kaj ntug nag kis, xab theeb lwm hnub, peb tsev xyom cuab ua lub neej zoo xws luag ces peb yuav pauj koj tus txiaj tus ntsig,


    yog peb tsev xyom cuab ua lub neej zoo tsis xws luag ces ntshe yuav ua nag tshauv nag tshia yaj, xwb no laus mog.

    Ces pe luag xwb

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:07 pm

    Ua tsaug tuag - pab nyiaj tshav ntuj ( kwv tij neej tsa zaj )

    Kev txais luag yim ntawm koj coj nyiaj mus pab ib tsoom kwv tij neej tsa thaum luag muaj kev txom nyem ces luag yuav ua koj tsaug ces koj yuav tau txais luag yim os nawb.

    Ua tsaug tsi, nej xyom cuab tsev mob tsev tuag, tsev puas tsev ntsoog, tu ib sawv ces nchuav ib nkog, nchuav ib nkog ces puav tam dej nam sib laub,

    nyob li peb ua neej zoo xws luag ces yuav toom txheej toom yig, nyiaj txiag ntos, tshaj ntuj ntos, qaib noog ntos, dej caw ntos, cab yag cab nco luaj phab tog ris dej ris cawv luaj zeb zog,

    tuaj pab nej tsev xyob cuab nta dab nta qhua ntseg log puav tam tus ncej txawb,

    tiam sis yeeb vim peb ua lub neej zoo tsis xws luag, yam tsis tsheej yam tsi tsis tsheej tsi, twb tuaj tauv tsis tau nej xyom cuab lub kua muag, txhob ua tsaug laus mog, nkim los tsaug xwb no laus mog.

    ( Luag pe yus ces yus tsa luag xwb )

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:08 pm

    Ua tsaug tuag – ua tsaug hauv qhua (xyom cuab zaj)

    Kev ua tsaug uas luag coj nyiaj tuaj pab yus tsev neeg uas thaum yus tsev neeg muaj ib tug noj tsis qab nyob tsis zoo lawm es yus yuav tau ua luag tsaug raws li nram no.

    Ua tsaug os, peb xyom cuab tsev mob tsev tuag, tsev puas tsev ntsoog, tu ib sawv ces nchuav ib nkog, nchuav ib nkog ces puav tam dej nag laub lis log,

    kev txom nyem kev ntxhov siab nphau li nphwv los txog, rau peb tsev xyom cuab peb thiaj tau kev quaj kev nyiav los lub kua muag nrog,

    koj tus ua ( ________________ ) tseem xav neej xav tsav, xav ntsuab xav ze, toom txheej toom yig nyiaj txiag ntos tshav ntuj ntos, qaib noog ntos, dej cawv ntos, cab yag cab nco luaj phab tog ris dej ris cawv luaj zeb zog,

    tuaj pab peb tsev xyom cuab nta dab nta qhua ntseg log puav tam ncej tsua, nrog peb nta lub ntees ploj ntxhee lis zoj, lub ntees qhua ntxhee li sua,

    nyob li hnub qab nram lub ntsis, kab ntug nag kis, xab theeb lwm hnub, peb tsev xyom cuab ua lub neej zoo xws luag ces peb yuav pauj koj tus txiaj tus ntsig, pauj txhij los pauj txhua,

    yog peb ua lub neej zoo tsis xws luag ces ntshe yuav ua nag tshauv nag tshia, tshia lij tshi rau tej mus yas ntsua, xwb no laus mog.

    ( Ces pe luag xwb )

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:09 pm

    Ua tsaug tuag – ua tsaug hauv qhua ( yog hauv qhua zaj )

    Kev txais luag yim ntawm koj coj nyiaj mus pab ib tsoom kwv tij neej tsa thaum luag muaj kev txom nyem ces luag yuav ua koj tsaug ces koj yuav tau txais luag yim os nawb.

    Ua tsaug tsi, nej xyom cuab tsev mob tsev tuag, tsev puas tsev ntsoog, tu ib sawv ces nchuav ib nkog, nchuav ib nkog ces puav tam dej nam laub lis log,

    kev txom nyem kev ntxhov siab nphau li nphwv los txog, rau nej tsev xyom cuab, kev quaj kev nyiav los lub kua muag nrog

    Nyob li peb ua lub neej zoo xws luag ces yuav toom txheej toom yig, nyiaj txiag ntos, tshav ntuj ntos, qaib noog ntos, dej caw ntos, tshav ntuj ntos, cab yag cab nco luaj phab tog, ris dej ris cawv luaj zeb zog,

    tuaj pab nej tsev xyom cuab nta dab nta qhua ntseg log puav tam tus ncej tsua, nrog nej nta lub ntees ploj kom ntxhee li zoj, lub ntees qhua kom ntxhee li sua

    tiam sis yeeb vim peb ua lub neej zoo tsis xws luag, yam tsis tsheej yam, tsi tsis tsheej tsi, twb tuaj tauv tsis tau nej xyom cuab lub kua muag, pab tsis tau nej ib rawg ntxuag,

    xyuam tsis nyog nej lub txhooj, txhawb tsis tau nej tus ceg rooj, txhob ua tsaug mog, nkim los taug xwb laus mog.

    ( Luag pe yus ces yus tsa luag xwb )

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:09 pm

    Ua tsaug plig , nyiaj tshav ntuj ( yog tsev yeej ncuab zaj )

    Kev ua tsaug uas luag coj nyiaj tuaj pab yus tsev neeg uas thaum yus tsev neeg muaj ib tug noj tsis qab nyob tsis zoo lawm es yus yuav tau ua luag tsaug raws li nram no.

    Ua tsaug os, nram ntej ub peb tsev yeej ncuab, tsev mob tsev tuag, tsev puas tsev ntsoog, sij hawm tom qab no, peb tsev yeej ncuab ho tos nwj laug los saib vag saib tse, daws nkauj vab nkauj le,

    Koj tseem xav neej xav tsav xav ntsuab xav ze, koj tseem toom txheej toom yig, nyiaj txiag ntos, tshav ntuj ntos, tuaj pab peb tsev yeej ncuab nta dab nta qhua,

    ntseg log puav tam tus ncej txhab, pab daws tau niam nkauj plig lub me nkauj vab, niam nkauj plig tau mus cuag poj cuag yawm rau ntuj sua teb puag tom qab,

    Nyob li hnub qab nram lub ntsis, kaj ntug nag kis, xab theeb lwm hnub, peb ua lub neej zoo xws luag ces peb yuav pauj koj tus txiaj tus ntsig rov qab,

    hos yog peb ua lub neej zoo tsis xws luag ces ntshe peb yuav ua nag tshauv nag tshia, tshia lij tshis rau tej mus yas kab xwb no laus mog,


    ( ces pe luag xwb )

    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:10 pm

    Ua tsaug plig, nyiaj tshav ntuj ( yog kwv tij neej tsa zaj )

    Kev txais luag yim ntawm koj coj nyiaj mus pab ib tsoom kwv tij neej tsa thaum luag muaj kev txom nyem ces luag yuav ua koj tsaug ces koj yuav tau txais luag yim os nawb.

    Ua tsaug tsi, nram ntej ub nej tsev yeej ncuab, tsev mob tsev tuag, tsev puas tsev ntsoog, sij hawm tom qab no, nej ho tos nwj laug los saib vag saib tse, daws nkauj vab nkauj le,

    Nyob li peb ua lub neej zoo xws luag ces peb yuav toom txheej toom yig, nyiaj txiag ntos, tshav ntuj ntos, qaib noog ntos, dej cawv ntos, cab yag cab nco luaj phab tog, ris dej rid cawv luaj zeb zog,

    tuaj pab nej tsev yeej ncuab nta dab nta qhua, ntseg log puav tam tus ncej txhab, pab daws tau niam nkauj plig lub me nkauj vab, niam nkauj plig li tau mus cuag poj cuag yawm rau ntuj sua teb puag tom qab,

    Tiam sis yeeb vim peb los kuj ua lub neej zoo tsis xws luag, yam tsis tsheej yam tsi tsis tsheej tsi, twb tuaj tauv tsis tau txiaj mog sis mim thiab txiaj lag tub yau,

    teev me kua muag ntxaum li ntxiav rau tej mus npoo vaj, peb ces tsua ua niam ntab mos muv sib tw ntsauv paj hmab es txhob ua tsaug mog, nkim los tsaug xwb no laus mog,

    ( ces tsa luag xwb )


    Hmong ntuj tshiab
    Sponsor
    Sponsor

    Messages: 512
    Date d'inscription: 2011-05-25

    Re: Hmoob Ntuj Tshiab lub tsev PAJ HUAM & kab lis kev cai Hmoob

    Post  Hmong ntuj tshiab on 19th June 2011, 7:11 pm

    Ua tsaug plig , Hauv qhua ( yog tsev yeej ncuab zaj )

    Kev ua tsaug plig, uas luag coj nyiaj tuaj pab yus tsev neeg uas thaum yus tsev neeg muaj ib tug noj tsis qab nyob tsis zoo lawm es yus yuav tau ua luag tsaug raws li nram no.

    Ua tsaug os, nram ntej ub peb tsev yeej ncuab, tsev mob tsev tuag, tsev puas tsev ntsoog, sij hawm tom qab no, peb tsev yeej ncuab ho tos niam nkauj plig los saib vag saib tse, daws nkauj vab nkauj le,

    Koj ______________ tseem hmov tseem tshua txog _____________, koj tseem toom txheej toom yig, nyiaj txiag ntos, qaib noog ntos, dej cawv ntos, npoj ntsab ntos, tshav ntuj ntos, cab yag cab nco luaj phab tog, ris dej ris cawv luaj zeb zog tuaj pab peb tsev yeej ncuab nta dab nta qhua,

    ntseg log puav tam tus ncej txhab, pab peb daws tau niam nkauj teej plog, txiv nraug teej plig lub me nkauj vab, niam nkauj teej plog, txiv nraug teej plig tau mus cuag poj cuag yawm rau ntuj sua teb puag tom qab,

    Nyob li hnub qab nram lub ntsis, kaj ntug nag kis, xab theeb lwm hnub, peb tsev yeej ncuab ua lub neej zoo xws luag ces peb yuav pauj koj tus txiaj tus ntsig rov qab,

    Yog peb ho ua lub neej zoo tsis xws luag ces ntshe peb yuav ua nag tshauv nag tshia, tshia lij tshis rau tej mus yas kab xwb no laus mog,


    ( ces pe luag xwb )

      Current date/time is 23rd November 2014, 11:24 pm