google-site-verification: googlefbfddf59e706b96b.html

Latest topics

» tus Tswv Cheem Rog yog leeg twg ?
by koobpovtxuj 13th August 2017, 9:03 pm

» Nco txog Phas Nyas Tub Npis Lis Foom Txiaj Ntsim.
by Admin 1st August 2017, 5:12 pm

» Kiab toom lauj npliaj yob lub qub tsev.
by Admin 1st August 2017, 5:04 pm

» Kawm LUS ROV
by koobpovtxuj 10th July 2017, 1:54 pm

» KHAWV KOOB
by koobpovtxuj 19th June 2017, 12:44 pm

» Hmong dance hiphop 2017 [ dance zoo siav heev li]
by zabyaj 15th June 2017, 12:05 pm

» Ua zaub tsib
by koobpovtxuj 3rd June 2017, 10:33 pm

» Keeb Kwm Hmoob mus nyob Guyane
by koobpovtxuj 25th May 2017, 4:13 pm

» kuv cov duab.
by koobpovtxuj 23rd May 2017, 3:47 am

» pajhuam nrhiav mekabnoog tuaj ploj dua twg lawm
by PajYeebLaim 19th May 2017, 2:52 pm

» Xiong Chang
by koobpovtxuj 1st May 2017, 5:12 am

» 22 LEEJ NEEG HMOOB FOOB XEEB XYOOJ & HMONG TEBCHAWS
by Liajntsuab 30th April 2017, 7:00 pm

» Tswv Xyas mus ua tsov
by koojziagkabzaug 21st April 2017, 1:36 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    Zaj hu Qhua

    Share
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Zaj hu Qhua

    Post  Hmoob ntuj qub qab on 11th April 2010, 7:57 pm


    Zaj hu qhua (Muam Phauj)



    Yaj Nom Vaj, Los Tsuas teb.





    1. Hais zoo li txog siav tuaj lias koj muam phauj
    laug,zoo li tav no nws laus tsis ploj los ploj los lawm
    tsis tuag los tuag los mus, plooj ntug los coos hnub
    sau laus los hmo no,nws nplua taw npleev tuaj saum zeb
    cev qaug yeev los lawm yeeb tim teb .

    Hais zoo li txog siav tuaj lias koj muam phauj
    laug,zoo li tav no nws laus tsis ploj los ploj los lawm
    tsis tuag los tuag los mus, plooj ntug los coos hnub
    sau laus los hmo no,nws nplua taw npleev tuaj saum tsag, cev qaug yeev los lawm yeeb tim nrag.

    2. Ob xyoo nram ntej ub zoo li koj muam phauj laug koj
    hnav tsis tau lub ris mus yaj ntshuas ,koj li
    mus ua koj lawm ib cuab .

    Ob xyoo nram ntej ub zoo li koj muam phauj laug koj
    hnav tsis tau lub ris mus yaj ntshi,koj li mus ua koj lawm ib yig.

    3. Xyoo no nws laus qaij qaug lis yeev los lawm,zoo li tub tsev xyom cuab tsis pom qab sab laj sab laj lis zus rau nyuj suab kub twg xib li nqiab , es kev zej kev zos ntauj lis khiab .

    Xyoo no nws laus qaij qaug lis yeev los lawm,zoo li tub tsev xyom cuab tsis pom qab sab laj sab laj lis zus rau nyuj suab kub twg xib li nqawv, es kev zej kev zos ntauj lis tawv.

    4. kev zej ntauj tuaj poob kev zos ntauj tuaj txog, zoo li tsev xyom cuab li sab laj lis zus khob cawv dej txiag rov tom taj ,zoo li yuav rub kev neej kev tsav los mus haus tsham .
    kev zej ntauj tuaj poob kev zos ntauj tuaj txog, zoo li tsev xyom cuab li sab laj lis zus khob cawv dej txiag rov tom txuas,zoo li yuav rub kev neej kev tsav los mus haus kom txhua.

    5. Zoo li yuav txib tau nkawm nuj kab, nuj kab ces yuav coj xo li nraim rau koj yawm txiv dab. Yuav txib tau nuj kaug nuj kaug ces li coj xov nraim rau koj muam phauj laug. Zoo li nuj kab tias coj xov coj li cas xa xov xa tus tsi zoo li luag tsev xyom cuab tias: nuj kab neb coj xov ces coj xov rau tim toj ne, coj xov nraws nws laus lub moo ploj .

    Zoo li yuav txib tau nkawm nuj kab, nuj kab ces yuav coj xo li nraim rau koj yawm txiv dab. Yuav txib tau nuj kaug nuj kaug ces li coj xov nraim rau koj muam phauj laug. Zoo li nuj kab tias coj xov coj li cas xa xov xa tus tsi zoo li luag tsev xyom cuab tias: nuj kab neb coj xov ces coj xov rau tim tsuag ne, coj xov nraws nws laus lub moo tuag.

    6. Nuj kab tias nuj kab tuaj tsis taus ,li muab lawm mos nkawj mos muv ntsaws ntso nuj kab tej hauv kaus,nuj kabli tuaj taus.

    Nuj kaug tias nuj kaug tuaj tsis nyog, li muab lawm mos nkawj mos muv ntsaws ntso nuj kaug tej nqaws tsho, nuj kaug li tuaj nyog.

    7.Nuj kab tuaj txog tim toj ne pom tus dev txaij dev kuas tom sis zaj hos . Zoo li koj yuav hais rau koj poj lag tub yau hais tias: zoo li nej nrug rooj seb leej twg tuaj yuas, dev txaij tom tsis nrauj hos dev kuas tom tsis tseg, koj nrug rooj tib zoo saib os,ua cas leej tuaj txog tim toj ces tuaj kub tuaj kaus sis zoj . Koj yuav hais rau koj poj lag tub yau tias leej tuaj txog tim toj ,ces yuav tsis yog leej xa lub moo zoo yuav yog leej xa lub moo ploj ne.

    Nuj kaug tuaj txog tim tsuag ne pom tus dev txaij dev kuas tom tsis tseg. Zoo li koj yuav hais rau koj poj lag tub yau hais tias: zoo li nej nrug rooj seb leej twg tuaj yua dev txaij tom tsis nrauj hos dev kuas tom tsis tseg, koj nrug rooj tib zoo saib os,ua cas leej tuaj txog tim tsuag,ces tuaj kub tuaj kaus sis zuag. Koj yuav hais rau koj poj lag tub yau tias leej tuaj txog tim tsuag, ces yuav tsis yog leej xa lub moo zoo yuav yog leej xa lub moo tuag ne.


    8. Cia twb ywm os koj xav twb ywm tias: nej nrug rooj tib ywm saib seb yog nws txheeb leej twg caj ne nws yuav laum zog leej twg taw vaj hos.

    Cia twb ywm os koj xav twb ywm tias: nej nrug rooj tib ywm saib seb yog nws txheeb leej twg ces ne nws yuav laum zog leej twg tej tog tsev hos.

    9.Ua cas koj ua tib zoo saib nuj kab thiab nuj kaug tuaj es yuav txheeb lawm koj caj hos, nws yuav nkag laum zog koj tej tog vaj yua.

    Ua cas koj ua tib zoo saib nuj kab thiab nuj kaug tuaj es yuav txheeb lawm koj ces hos, nws yuav nkag laum zog koj tej tog tsev yua.


    10.Zoo li nuj kab tuaj txog koj lub qhov rooj tag zoo li kim caug li nroov koj lub qhov rooj tag, koj tsis mus rho lawm nuj kab tej hauv kaus ,nuj kab sawv tsis taus . Koj mus rho hlo nuj kab tej hauv kaus , nuj kab li sawv taus .

    Zoo li nuj kaug tuaj txog koj lub qhov rooj tag zoo li kim caug li nroov koj lub qhov rooj tag, koj tsis mus rho lawm nuj kaug tej hauv lo, nuj kaug sawv tsis nyog. Koj mus rho hlo nuj kaus tej hauv lo, nuj kaus li sawv nyog.

    11.koj mus coj nuj kab los txog koj mus rub rooj pub nuj kab nyob tsab yeeb pub lawm huj kab xob .

    koj mus coj nuj kaug los txog koj mus rub rooj pub nuj kaug zaum tsab yeeb pub lawm nuj kaug haus.

    12.Zoo li koj mam ua lus rov lus rais nug nuj kab nuj kaus tias: Nuj kab thiab nuj kaug neb tuaj txog nram toj es kuv neej kuv tsav kuv kwv kuv tij puas nyob txhij los tsis txhij, kuv neej kuv tsav puas nyob txhua los tsis txhua. Nuj kab nuj kaug tias, zoo yuav hais tsis zoo hais ua lus rov lus rais hais tias: koj kwv koj tij los nyob txhij hos koj neej koj tsav los nyob txhua. Yeeb vim wb tuaj txog nram toj es cua mom li kawv nroo ntws ib tog tuaj tias, koj neej koj tsav ploj .

    Zoo li koj mam ua lus rov lus rais nug nuj kab nuj kaus tias: Nuj kab thiab nuj kaug neb tuaj txog nram toj es kuv neej kuv tsav kuv kwv kuv tij puas nyob txhij los tsis txhij, kuv neej kuv tsav puas nyob txhua los tsis txhua. Nuj kab nuj kaug tias, zoo yuav hais tsis zoo hais ua lus rov lus rais hais tias: koj kwv koj tij los nyob txhij hos koj neej koj tsav los nyob txhua. Yeeb vim wb tuaj txog nram tsuag es cua mom li kawv nroo ntws ib tog tuaj tias, koj neej koj tsav tuag.

    13.Zoo li ces koj muam phauj laug koj xav zoj yog koj neej koj tsav tuag koj txiaj ntsim kua muag si zim tuaj nraum tsuag ne.

    Zoo li ces koj muam phauj laug koj xav zoj yog koj neej koj tsav ploj, koj txiaj ntsim kua muag si zim tuaj nraum toj ne.

    14.Koj mam tua qaib los pub nuj kab noj, txo cawv los pub nuj kaug haus. Zoo li koj tsis pauj nuj kab noj los nuj kab tsis noj ne, koj pauj nuj kab noj tas lawm niaj peb dia koj xav yog koj neej koj tsav tuag ncia lis qiv koj tus suab mus dab nyia .

    Koj mam tua qaib los pub nuj kab noj, txo cawv los pub nuj kaug haus. Zoo li koj tsis pauj nuj kab noj los nuj kab tsis noj ne, koj pauj nuj kab noj tas lawm niaj peb rawg ntxuag ) koj xav yog koj neej koj tsav tuag ncia lis qiv koj tus suab mus dab quag.

    15.Zoo li nuj kab noj tas nuj kab sawv txaum yim ncab nuj kab yuav rais lees rov fib qab .
    Nuj kab nuj kaug hais rau koj tias, muam phauj laug
    koj nyob koj tsis txhob quaj mog koj maj mam
    yaum kwv yaum tij yaum neej yaum tsav es koj maj mam
    lawv qab tuaj .

    Zoo li nuj kaug noj tas nuj kaug sawv txaum yim ntev nuj kaug yuav rais lees rov fib tsev.
    Nuj kab nuj kaug hais rau koj tias, muam phauj laug
    koj nyob koj tsis txhob nyiav mog koj maj mam
    yaum kwv yaum tij yaum neej yaum tsav es koj maj mam
    lawv qab khiav. Nob lias koj muam phauj laug.

    16. zoo li nuj kab rais lees rov los txog tim toj ces nuj
    kab los tsaws lis ntua luag lub tsev ploj ne.
    zoo li nuj kaug rais lees rov los txog tim tsuag ces nuj
    kaug los tsaws lis ntua luag lub tsev tuag ne.

    17.Hais zoo li txog siav tuaj lias koj muam phauj laug, koj maj mam mus sab laj ne, koj maj mam mus yaum kwv yaum tij yua yaum neej yaum tsav ces koj maj mam cab lawm yaj mis 3 ntxees kub ,koj maj mam ris dej ris cawv ntog los luaj zeb cub .

    Hais zoo li txog siav tuaj lias koj muam phauj laug, koj maj mam mus sab laj ne, koj maj mam mus yaum kwv yaum tij yua yaum neej yaum tsav ces koj maj mam cab lawm yaj mis 3 ntxees kaus ,koj maj mam ris dej ris cawv ntog los luaj zeb daus.

    18. koj muam phauj laug koj mam cab yaj kus cab nco tuaj ntawm
    npab , koj maj mam ris dej ris cawv luaj zeb cag .

    koj muam phauj laug koj mam cab yaj kus cab nco tuaj ntawm tes, koj maj mam ris dej ris cawv luaj zeb ceg.

    19. Zoo li koj tuaj txog lawm tej yas kab ,koj tuaj kev nkhaus nkoo xws kev mab .

    Zoo li koj tuaj txog lawm tej yas ntsua ,koj tuaj kev nkhaus nkoo xws kev suav.

    20. Zoo li koj thuv luj mus tiag txiav nce toj mus ntiag nroj ne nqes hav mus ntiag tsuag , koj xav zoj yog koj neej koj tsav tuag koj txiaj ntsim kua muag sib qi tsuag koj noj hno mus ntxuag kua muag yua.

    Zoo li koj thuv luj mus tiag txiav nce toj mus ntiag nroj ne nqes hav mus ntiag tauj , koj xav zoj yog koj neej koj tsav ploj koj txiaj ntsim kua muag sib qi laub koj noj hno mus ntxuag kua ncauj yua.


    21. Zoo li koj muam phauj laug koj tuaj txog lis ntua nram roob , koj hnov nruas tawv nyuj dub sib qi qhoob .

    Zoo li koj muam phauj laug koj tuaj txog lis ntua nram toj, koj hnov nruas tawv nyuj dub sib qi qoj.


    22. koj tuaj txog lis ntua nws laus lub qhov rooj tag ,koj pom nws laus caij nees ntws mus pauj dab .
    koj tuaj txog lis ntua nws laus lub qhov rooj txuas ,koj pom nws laus caij nees ntws mus pauj qhua .nob lias koj muam phauj laug.

    23. Hais zoo li txog siav tuaj lias koj muam phauj laug, zoo li ob xyoo nram ntej ub koj nyaj cawm txiv dab laug ua lawm lub neej nyob koj tuaj txog lis ntua,koj nyaj cawm txiv dab laug tes lauj los tuav nees eeb tes nag los tsab lawm koj ib kab paj luam yeeb .

    Hais zoo li txog siav tuaj lias koj muam phauj laug, zoo li ob xyoo nram ntej ub koj nyaj cawm txiv dab laug ua lawm lub neej nyob koj tuaj txog lis ntua,koj nyaj cawm txiv dab laug tes lauj los tuav nees hlua tes nag los tsab lawm koj ib kab paj luam yeeb kom haus kom txhua.

    24. Xyoo no koj tuaj txog ces nws laus qaij qaug lis yeev los lawm, nws laus rub rooj tsis nyog pub lawm koj nyob , tsab tsis tau kab yeeb pub lawm koj xob .koj muam phauj laug koj yuav dauv tes mus nyiaj tshaib dauv tes mus nyiaj nqig.

    Xyoo no koj tuaj txog ces nws laus qaij qaug lis yeev los lawm, nws laus rub rooj tsis nyog pub lawm koj zaum, tsab tsis tau kab yeeb pub lawm koj haus .koj muam phauj laug koj yuav dauv tes mus nyiaj tshaib dauv tes mus nyiaj nqig.nob lias koj muam phauj laug.

    25. Zoo li txog siav tas los txog siav tuaj lias koj muam phauj laug, zoo li wb laj lig tub hais xaiv wb khom vam mus xov vam ne,koj tuaj txog ces zoo li kev tiaj ces tso rau koj rag nyuj hos kev tav ces tso rau koj rag nees, rag nyuj ces koj rag kom nto toj hos rag nees rag kom nto tsuag, rag nyuj tsis kom npub nyuj kub, rag nees tsis kom dawm nees hlua.
    Koj muam phauj laug wb laj lig tub mus txiv xaiv wb khom vam kus xov vam koj tuaj txog 9 nploog tsis sib nte los wb vam kom koj tuaj rub, 8 nplooj tsis sib luag los wb vam kom koj tuaj ntsuas.

    26.Zoo li koj tuaj txheeb nws nyiaj qab nas txheeb lawm tsiaj mus ua luag tuag, txheeb luag tsoos mus ua luag lwj ne, zoo li koj muam phauj laug muaj nqaij wb tso lawm koj ntxus muaj lus ces cia koj nug muaj txiag cia koj ntaim muaj lus cia koj hais. Nob lias koj muam phauj laug.

    ** Hais li no tas yog nws tsis tau nug thiab no ces yus hais ib nqe hais tias.

    27.Zoo li txog siav tas los txog siav tuaj lias koj muam phauj laug, zoo li wb vam kom koj tuaj txheeb koj tsis txheeb . Zoo li muaj ib hnub koj rov qab mus txog tej yas kab nws tsev xyom cuab plaub xaiv ncej ntug yuav ntxhov hnyo tuaj tom qab yua.

    Zoo li txog siav tas los txog siav tuaj lias koj muam phauj laug, zoo li wb vam kom koj tuaj txhim koj tsis txhim . Zoo li muaj ib hnub koj rov qab mus txog tej yas kev nws tsev xyom cuab plaub xaiv ncej ntug yuav ntxhov hnyo tuaj tom tsev yua.

    28. Zoo li muaj lus ua koj tsaug koj tuaj txheeb nws laus nyiaj qab nas seb puas siv tas txheeb tsiaj ua luag tuag seb puas tua txhua, txheeb tsoos ua luag lwj seb puas hnav txhij yua, koj muam phauj laug muaj lus ua koj tsaug, muaj nqaij cia koj ntxus,muaj lus cia koj nug, muaj txiag cia koj ntaim muaj lus cia koj hais muaj lus ua koj tsaug koj muam phauj laug.

    Hais li no tas yog nws tsis txheeb thiab no yus rov hais ib nqes tias:

    29. Zoo li koj muam phauj laug zoo li tsis muaj leej thoob tsib kus hnov xaiv los tseg yog muaj leej thoob tsib kus hnov xaiv ib khob los dej ob khob los cawv ib tsos los plaub qaib ob tsos los plaub npua , li mam ua koj tsaug nkag nuag tuaj tom txuas yua koj muam phauj laug, muaj nqaij cia koj ntxus muaj lus cia koj nug muaj txiag cia koj ntaim muaj lus cia koj hais.

    Zoo li koj muam phauj laug zoo li tsis muaj leej thoob tsib kus hnov xaiv los tseg yog muaj leej thoob tsib kus hnov xaiv ib khob los dej ob khob los cawv ib tsos los plaub qaib ob tsos los plaub yag , li mam ua koj tsaug nkag nuag tuaj tom tag yua, koj muam phauj laug, muaj nqaij cia koj ntxus muaj lus cia koj nug muaj txiag cia koj ntaim muaj lus cia koj hais.nob lias koj muam phauj laug.

    Hais li no tas ces nws yeej yuav txheeb xwb li.
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Zaj hu Qhua

    Post  koojziagkabzaug on 12th April 2010, 8:04 am


    Nyob zoo Hmoob Ntujqubqab,

    Ua tsaug rau koj cov zaj kab mob kev ploj, zoo kawg li. Tab sis kuv tsis paub dab tsi kiag li, kuv xav kom nws pab piav cov txheej txheem kom ntxaws, tus tsis tau pom thiab ua dua thiaj yuav paub muab coj los siv.
    Yam li yuav mus thov muam phauj, yuav ua li cas, yuav nqa dab tsi mus thiab mus txog yuav cia li pib hais zaj kiag los hais li cas ua ntej?

    Dua li xav kom nws pab piav kev ua hauv qhua, yuav npaj dab tsi rau dab tsi, yuav ua li cas thiab yuav thov pes tsawg leej nrog yus mus ua hauv qhua?

    Ua tsaug.
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Zaj hu qhua

    Post  Hmoob ntuj qub qab on 12th April 2010, 7:21 pm

    Nyob zoo Hmoob Ntujqubqab,

    Ua tsaug rau koj cov zaj kab mob kev ploj, zoo kawg li. Tab sis kuv tsis paub dab tsi kiag li, kuv xav kom nws pab piav cov txheej txheem kom ntxaws, tus tsis tau pom thiab ua dua thiaj yuav paub muab coj los siv.
    Yam li yuav mus thov muam phauj, yuav ua li cas, yuav nqa dab tsi mus thiab mus txog yuav cia li pib hais zaj kiag los hais li cas ua ntej?

    Dua li xav kom nws pab piav kev ua hauv qhua, yuav npaj dab tsi rau dab tsi, yuav ua li cas thiab yuav thov pes tsawg leej nrog yus mus ua hauv qhua?

    Ua tsaug.


    Nyob zoo Koojziagkabzaug

    Ua li los mas, zaj hu qhua kuv sau saud yog zaj uas hmo twb hais xim ( Sawv qab ntees ) lawm es ob tug txiv xaiv hais zaj hu qhua rau Muam phauj xwb.
    Hos zaj mus hu Muam phauj tom tsev nws muaj nws ob tus mus hu thiab ntawm yuav npaj dab tsi rau dab tsi, yuav ua li cas thiab yuav thov pes tsawg leej nrog yus mus ua hauv qhua muaj caij mam tuaj sau ntxiv os.
    Tsis nkag siab qhov twg nug mam qhia ntxiv.
    Ua tsaug nws me dej nyiag dej kub los ntxuav huv lis si tshiab lis kais.
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Zaj hu Qhua

    Post  koojziagkabzaug on 12th April 2010, 10:12 pm



    Hmoob Ntujqubqab,

    Ua li os nawb, nws xyeej thaum twg no ces sau kom ntxaws rau, tus tsis tau paub kiag li thiaj coj mus siv tau.

    Ua tsaug, ntshe yuav ua nws kev khwv heev, tab sis kuv xav tias txhua lub caij peb siv tuaj mus hauv nov, xav kom muaj nqes rau peb Haiv Hmoob lawm yav tom ntej.
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Kev cai ntawm ob tug mus hu qhua (Hu Txiv Dab Laug)

    Post  Hmoob ntuj qub qab on 21st April 2010, 10:16 pm

    Kev hu Hauv Qhua: kwv Xub yog hu Cuab Tsav
    Kwv nplooj yog hu Muam Phauj
    Mus hu Txiv Dab laug:

    Yus ob tug tub txib yeej kwv nplooj mus ntag .Mus txog tom Txiv Dab laug tsev ces nug hais tias nej puas caiv los tsis caiv? Lawv teb hais tias peb tsis caiv os, los tsev, ces yus txhos caug kiag ntawm lawv tus taw rooj sab nraum zoov ces yus hais zaj hu qhua tuaj ntag.
    Ob tug Tub Txib hais:

    1.Hais zoo li e, koj mi nyaj cawm txiv Dab laug nis nyaj cawm txiv dab laug. Zoo li ntshe looj kab sawv los cab sab, looj kwm sawv los taug lw, taug luj tsis taug luas taug luj luas los lawm lub rooj Nkuag yag nas, luag tej ces luag txawj txib es luag txib tau wb nkawm tub mus khiav kev es wb tuaj txog lis ntua ces wb yuav tuaj kim caug lis ntsoov rau koj lub mus qhov rooj tag nas .

    Hais zoo li e, koj mi nyaj cawm txiv Dab laug nis nyaj cawm txiv dab laug. Zoo li ntshe looj kab sawv los cab sab, looj kwm sawv los taug lw, taug luj tsis taug luas taug luj luas los lawm lub rooj Nkuag npuag nas, luag tej ces luag txawj txib es luag txib tau wb nkawm tub mus khiav kev es wb tuaj txog lis ntua ces wb yuav tuaj kim caug lis ntsoov rau koj lub mus qhov rooj txuas nas nyaj cawm txiv dab laug.

    2.Zoo li wb nkawm laj lig tub khiav kev wb tuaj ces wb tsuas nce lis hlo lub roob toj lug lis taim toj roob mus huab xyw es wb tsis pom niaj dab tus tsav tsi es wb yuav pom tau nthwv cua muj yig nplawm suj sis rov nraum toj nas , tsev txoog npoj xyom cuab muab lus lis nraim tuaj twb lis ntsees rau koj hais tias yog lawm koj neej koj tsav ploj nas .

    Zoo li wb nkawm laj lig tub khiav kev wb tuaj ces wb tsuas nce lis hlo lub roob toj lug lis taim toj roob mus huab xyw es wb tsis pom niaj dab tus tsav tsi es wb yuav pom tau nthwv cua muj yig nplawm suj sis rov nraum tsuag nas , tsev txoog npoj xyom cuab muab lus lis nraim tuaj twb lis ntsees rau koj hais tias yog lawm koj neej koj tsav tuag nas nyaj cawm txiv dab laug .

    Txaum yim rau txiv dab laug ...

    3.Zoo li koj mi nyaj cawm txiv dab laug e, Koj lub qhov rooj tag muaj tus mus meem fab nas , koj ua lub me neej ces vam nroo lis ntws xws li xub ntab nas , Koj mi nkauj muam qaij qaug lis yeev los mus ces tsev txoog npoj xyom cuab txib tau wb nkawm laj lig tub txib wb coj xo lis nraim twb lis ntsees rau koj mi nyaj cawm txiv dab laug kom koj mus tu koj mi nkauj muam qab nas .

    Zoo li koj mi nyaj cawm txiv dab laug e, Koj lub qhov rooj tag muaj tus mus meem fab nas , koj ua lub me neej ces vam nroo lis ntws xws li xub muv nas , Koj mi nkauj muam qaij qaug lis yeev los mus ces tsev txoog npoj xyom cuab txib tau wb nkawm laj lig tub txib wb coj xo lis nraim twb lis ntsees rau koj mi nyaj cawm txiv dab laug kom koj mus tu koj mi nkauj muam lub mus qab xov tu nas koj mi nyaj cawm txiv dab laug e .

    4.Zoo li huab los ces huab ntsauv toj nas ntsauv lis zus toj lug lis taim toj mus roob xyoob nas . Koj mi nkauj muam ces yuav mus rau lawm yeeb tim nroog ces nws tsis vam lawm leej twg nas nws yuav tos lis ntsoov koj mi nyaj cawm txiv nraug nus mus tu lawm koj mi nkauj muam moo nas.

    Zoo li huab los ces huab ntsauv toj nas ntsauv lis zus toj lug lis taim toj mus roob xyoob nas . Koj mi nkauj muam ces yuav mus rau lawm yeeb tim nrag ces nws tsis vam lawm leej twg nas nws yuav tos lis ntsoov koj mi nyaj cawm txiv nraug nus mus tu lawm koj mi nkauj muam qab nas nyaj cawm txiv dab laug yuas nyaj cawm txiv dab laug e.

    Txiv dab laug hais:

    1.Hais zoo lus tuaj lawm lias neb nkawm mi tub mus khiav kev yuas, zoo li xyoo no ces kuj nyaj cawm txiv dab laug tseem nkaus lis hlo rab ko pluaj voom mus ntoj qoob qas lias rov nraum toj es kuv tseem yuav tuaj tos kuv mi muam phauj laug tuaj tsham nrog kuv lawm niaj mus ib hmos nas .
    Hais zoo lus tuaj lawm lias neb nkawm mi tub mus khiav kev yuas, zoo li xyoo no ces kuj nyaj cawm txiv dab laug tseem nkaus lis hlo rab ko pluaj voom mus ntoj qoob qas lias rov tim ub es kuv tseem yuav tuaj tos kuv mi muam phauj laug tuaj tsham nrog kuv lawm niaj mus ib hnub nas .

    2.Zoo li ua li cas neb nim hais ceeb zawj zog tias neb tuaj txog tim toj es pom tau nthwv cua muj yig nplawm suj sis lawv neb qab tuaj txog nraum toj es hais tias kuv mi muam phauj laug ploj nas .

    Zoo li ua li cas neb nim hais ceeb zawj zog tias neb tuaj txog rau nraum tsuag es pom tau nthwv cua muj yig nplawm suj sis lawv neb qab tuaj txog nraum tsuag es hais tias kuv mi muam phauj laug tuag nas .

    3.Zoo li kuv nyaj cawm txiv dab laug ces twb tsis yog tus caj txheeb los ceg ncau nas, caj txheeb ces tseem tshuav coob nyob rau tej mus hauv dej nas, neb muaj zoo txuj ces neb ho rhais roj lis zus mus nrhiav kev neej rau tej mus hau ntuj nas.

    Zoo li kuv nyaj cawm txiv dab laug ces twb tsis yog tus caj txheeb los ceg ncau nas, caj txheeb ces tseem tshuav coob nyob rau tej mus hauv hav nas, neb muaj zoo ci ces neb ho rhais roj lis zus mus nrhiav kev tsav rau yav ntuj tim i no lias neb nkawm laj lig tub mus khiav kev yuas.

    Tub Hu hais :

    1.Hais zoo li e, zoo li koj mi nyaj cawm txiv dab laug nis nyaj cawm txiv dab laug e , zoo li cag txheeb ces yog lawm koj txheeb nas , ceg ncau ces yog lawm koj ncau nas , koj twb nrog koj mi nkauj muam thooj nyaj los mus kum hiav thooj hlab los mus txiav siav nas.

    Hais zoo li e, zoo li koj mi nyaj cawm txiv dab laug nis nyaj cawm txiv dab laug e , zoo li cag txheeb ces yog lawm koj txheeb nas , ceg ncau ces yog lawm koj ncau nas , koj twb nrog koj mi nkauj muam thooj nyaj los mus kum haws thooj hlab los mus txiav ntaws nas.

    2.Zoo li koj mi nkauj muam neb twb sib faib su luj lias tuaj rau saum lub mus rooj tshoob nas. Koj mi nkauj muam tau cog lawm niaj ib rev paj tawg lis zees rau koj npab hais tias yog koj mi nkauj muam los mus ua lub mi neej puv ib txhiab niaj puas nees nkaum xyoo ces koj nco lis ntsoob mus tu koj nkauj muam qab no nas.

    Zoo li koj mi nkauj muam neb twb sib faib su luj lias tuaj rau saum lub mus rooj tshoob nas. Koj mi nkauj muam tau cog lawm niaj ib rev paj tawg lis zees rau koj tes hais tias yog koj mi nkauj muam los mus ua lub mi neej puv ib txhiab niaj puas nees nkaum xyoo ces koj nco lis ntsoob mus tu koj nkauj muam kev no nas.

    Txiv dab laug hais:

    1.Hais zoo li e, neb nkawm mi tub mus khiav kev e, zoo li kuv hais tias kuv mi muam phauj laug tsis ploj los neb hais tias ploj nas, kuv hais tias tsis tuag los neb hais tias tuag lawm nas, kuv hais tias kuv nyaj cawm txiv dab laug tsis yog tus caj txheeb ceg ncau es tsis tau thooj nyaj los kum hiav los neb hais tias kuv nyaj cawm txiv dab laug thiaj li yog tus caj txheeb ceg ncau thooj nyaj los mus kum hiav , yog tus thooj hlab los mus txiav siav nas .

    Hais zoo li e, neb nkawm mi tub mus khiav kev e, zoo li kuv hais tias kuv mi muam phauj laug tsis ploj los neb hais tias ploj nas, kuv hais tias tsis tuag los neb hais tias tuag lawm nas, kuv hais tias kuv nyaj cawm txiv dab laug tsis yog tus caj txheeb ceg ncau es tsis tau thooj nyaj los kum hiav los neb hais tias kuv nyaj cawm txiv dab laug thiaj li yog tus caj txheeb ceg ncau thooj nyaj los mus kum haws , yog tus thooj hlab los mus txiav ntaws nas.

    2.Zoo li zaum no ces kuv mi muam phauj laug qaij qaug lis yeev rov tas nrho ces yuav tam lis ntua tus dej txeeg qhuav lis qhawv rau saum luaj ces ntshe yuav tu lis nrho kuv nyaj cawm txiv dab laug txoj kev tuaj es neb yuav kom kuv mus ntoj lawm leej twg , neb hais rau kuv hnov mog.

    Zoo li zaum no ces kuv mi muam phauj laug qaij qaug lis yeev rov tas nrho ces yuav tam lis ntua tus dej txeeg qhuav lis qhawv rau saum ciav ces ntshe yuav tu lis nrho kuv nyaj cawm txiv dab laug txoj kev khiav es neb yuav kom kuv mus khiav lawm leej twg , neb hais rau kuv paub mog , neb nkawm laj lig tub mus khiav kev yuas neb nkawm laj lig tub mus khiav kev e.

    Tub Hu hais:

    1.Hais zoo li e, Koj mi nyaj cawm txiv dab laug nis nyaj cawm txiv dab laug e, zoo li koj tsis tim los mus tu siab nas thaum koj mi nkauj muam ua lub neej nyob ces nws twb ua tau lub tsev txooj taug qas lias rau tim toj es koj mi nyaj cawm txiv dab laug tau txoj kev ntoj nas.

    Hais zoo li e, Koj mi nyaj cawm txiv dab laug nis nyaj cawm txiv dab laug e, zoo li koj tsis tim los mus tu siab nas thaum koj mi nkauj muam ua lub neej nyob ces nws twb ua tau lub tsev txooj taug qas lias rau tim ub es koj mi nyaj cawm txiv dab laug tau txoj kev thuv nas.

    2.Zoo li koj tsuas hais seev yees hais tias zaum no ces koj mi nkauj muam qaij qaug lis yeev rov tas nrho ces ntshe choj lov lawm kev yuav tu es ntshe koj yuav tsis tau txoj kev mus thuv nas .

    Zoo li koj tsuas hais seev yees hais tias zaum no ces koj mi nkauj muam qaij qaug lis yeev rov tas nrho tam lis ntua tus dej txeeg qhuav lis qhawv rau saum luaj ces ntshe choj lov lawm kev yuav tu ces ntshe koj yuav tsis tau txoj kev tuaj lawm nas .

    3.Zoo li koj tsis tim los must u siab mog, koj mi nyaj cawm txiv dab laug e, koj mi muam phauj laug ces mus ua lub neej zoo xws luag neej nas, nplooj txawj zeeg ces nplooj zeeg rov tas nrho los tseem tshuav ceg nas . Zaum no koj mi nkauj muam qaij qaug lis yeev rov tas nrho los haj tseem tshuav nws tej mi tub lag kus tub lig ne.

    Zoo li koj tsis tim los must u siab mog, koj mi nyaj cawm txiv dab laug e, koj mi muam phauj laug ces mus ua lub neej zoo xws luag neej nas, nplooj txawj zeeg ces nplooj zeeg rov tas nrho los tseem tshuav cag nas . Zaum no koj mi nkauj muam qaij qaug lis yeev rov tas nrho los haj tseem tshuav nws tej mi tub lag nas mi nyaj cawm txiv dab laug e.

    4.Zoo li koj mi muam phauj laug tej tub lag tub lig tseem yuav tuam tus mi choj toog choj hlau tus lis yees rau tim ub es qhib rooj lis lug tos koj mi nyaj cawm txiv dab laug rov tuaj mus thuv nas.

    Zoo li koj mi muam phauj laug tej tub lag tub lig tseem yuav tuam tus mi choj toog choj hlau tus lis yees rau tim toj es qhib rooj lis lug tos koj mi nyaj cawm txiv dab laug rov tuaj mus ntoj no mog nyaj cawm txiv dab laug nis nyaj cawm txiv dab laug e!

    Txiv dab laug hais:

    1.Hias zoo li e! Neb nkawm laj lig tub mus khiav kev os, neb nim hais ceeb zawj zog hais tias kuv mi muam phauj laug qaij qaug lis yeev rov tas nrho ces yuav tam lis ntua nplooj zeeg nas, nplooj txawj zeeg ces nplooj zeeg rov tas nrho los tseem tshuav ceg, zaum no kuv mi muam phauj laug qaij qaug lis yeev rov tas nrho los tseem tshuav nws tej tub tej ki ne.

    Hias zoo li e! Neb nkawm laj lig tub mus khiav kev os, neb nim hais ceeb zawj zog hais tias kuv mi muam phauj laug qaij qaug lis yeev rov tas nrho ces yuav tam lis ntua nplooj zeeg nas, nplooj txawj zeeg ces nplooj zeeg rov tas nrho los tseem tshuav cag, zaum no kuv mi muam phauj laug qaij qaug lis yeev rov tas nrho los tseem tshuav nws tej tub lig kus tub lag nas.

    2.Zoo li kuv mi muam phauj laug ua lub neej nyob ces nws mi yub xyoob tuaj pes tsawg caj nas, nrhau tau yub ntoo lawm pes tsawg ceg , nkauj yub xyoob puas nrhau tau cag tseeb , nraug yub ntoo puas nrhau tau ceg ruaj nas, neb hais zaj twg los ua tib zoo hais kom kuv paub , hais tsav twg los kom kuv hnov mog neb nkawm laj lig tub mus khiav kev yuas.

    Tub Hu hais:

    1.Hais zoo li e! Koj mi nyaj cawm txiv dab laug e! Zoo li cia toj siab txawm ntoo ciab , chaw qis txawm ntoo ntseej nas wb nkawm laj lig tub mus khiav kev yuav los qhia kom meej nas .

    Zoo li cia toj siab txawm ntoo ntseej , chaw qis txawm ntoo taub nas wb nkawm laj lig tub mus khiav kev yuav los qhia koj paub no yuas .
    2.Zoo li thaum koj mi muam phauj laug ua lub neej nyob ces nws twb ua lub neej xws luag neej nas, nkauj yub xyoob raug tau lawm niaj mus ib tug , nraug yub ntoo ces raug muaj lawm niaj mus ob leeg . Nkauj yub xyoob ces tsis tau mus tsheej cuab , nraug yub ntoo ces muaj lawm ib cag hlav los mus ruaj nreb , los muaj vag muaj tsev es tshuav lawm ib cag nrhau los tsis tau muaj cuab nas . Koj mi nyaj cawm txiv dab laug e! Wb tuaj ces wb yuav nce lis hlo lub roob toj lug lis taim toj roob mus zeb ntsuab es nws ntaus xov lis nraim rau wb nkawm laj lig tub mus khiav kev coj tuaj twb lis nkaus rau koj nyaj cawm txiv dab laug , koj nyob es koj ua lub siab ntuj ntev ho mus nrog tsa cuab nas .

    Zoo li thaum koj mi muam phauj laug ua lub neej nyob ces nws twb ua lub neej xws luag neej nas, nkauj yub xyoob raug tau lawm niaj mus ib tug , nraug yub ntoo ces raug muaj lawm niaj mus ob leeg . Nkauj yub xyoob ces tsis tau mus tsheej cuab , nraug yub ntoo ces muaj lawm ib cag hlav los mus ruaj nreb , los muaj vag muaj tsev es tshuav lawm ib cag nrhau los tsis tau muaj cuab nas . Koj mi nyaj cawm txiv dab laug e! Wb tuaj ces wb yuav nce lis hlo lub roob toj lug lis taim toj roob mus zeb ntsig es nws ntaus xov lis nraim rau wb nkawm laj lig tub mus khiav kev coj tuaj twb lis nkaus rau koj nyaj cawm txiv dab laug , koj nyob es koj ua lub siab ntuj ntev ho mus nrog tsa yim nas mi nyaj cawm txiv dab laug e!

    Txiv dab laug hais kom maim tsheej tab

    1.Hais zoo li e ! kuv mi nyaj cawm txiv dab laug tsis txais kuv muam phauj laug lub mi kaus dub los ntshe yuav tsaus lawm neb ntuj lawm tej tag hnub nas.

    kuv mi nyaj cawm txiv dab laug tsis txais kuv muam phauj laug lub mi kaus ci los ntshe yuav tsaus lawm neb ntuj lawm tej sib lis nrig nas.

    2.Zoo li neb puas meej nyog lawm tsheej tab, tab nyog lub tswv nas nyob tsam kuv nyaj cawm txiv dab laug txais lis nkaus kuv muam phauj laug lub kaus dub ces kev neej kev tsav yuav tu siab nrug lis zog luaj li lub hnub nas.

    Zoo li neb puas meej nyog lawm tsheej tab, tab nyog lub tswv nas nyob tsam kuv nyaj cawm txiv dab laug txais lis nkaus kuv muam phauj laug lub kaus dub ces kev neej kev tsav yuav tu siab nrug lis zog luaj li lub hnub nas.

    Zoo li neb puas meej nyog lawm tsheej tab, tab nyog lub tswv nas, nyob tsam kuv nyaj cawm txiv dab laug txais lis nkaus kuv muam phauj laug lub kaus ci ces kev neej kev tsav yuav tu siab nrug lis zog luaj li lub hli nas neb nkawm mi tub mus khiav kev yuas.

    Tub hu maim tsheej tab

    1.Hais zoo li e !koj mi nyaj cawm txiv dab laug e ! zoo li wb nkawm laj lig tub khiav kev yuav los mus meej nyog lawm tsheej tab, tab nyog lub tswv rau koj nas , caj txheeb ces yog lawm koj txheeb ceg ncau ces yog lawm koj ncau nas , koj thiaj li yog tus ua neej sib hlub tuaj ntawm txoj mush lab siab es neb noj zaub los qab tsheej nqaij nas koj txais lis nkaus koj mi muam phauj laug lub kaus dub los yuav tsis tu kev neej kev tsav siab nrug lis nrhib luaj li lub hnub nas

    Hais zoo li e !koj mi nyaj cawm txiv dab laug e ! zoo li wb nkawm laj lig tub khiav kev yuav los mus meej nyog lawm tsheej tab, tab nyog lub tswv rau koj nas , caj txheeb ces yog lawm koj txheeb ceg ncau ces yog lawm koj ncau nas , koj thiaj li yog tus ua neej sib hlub tuaj ntawm txoj mush lab siab es neb noj zaub los qab tsheej nqaij nas koj txais lis nkaus koj mi muam phauj laug lub kaus ci los yuav tsis tu kev neej kev tsav siab nrug lis nrhib luaj li lub hli nas nyaj cawm txiv dab laug e!

    2.Zoo li tav no ces wb nkawm laj lig tub khiav kev yuav los muab koj mi muam phauj laug lub kaus dub cob lis nkaus rau koj npab , muab lub kaus ci cob lis nkaus rau koj tes , es koj yuav ua qab tseeb qab xo tu lis nrho nthuav vuj vus lub mi kaus tsuj rau koj mi muam phauj laug kwv nce lis hlo mus rau lawm ntxwj nyoog yeeb tim ub es kom tus tshav tuaj los tshav tsis kub , nag los nag tsis ntub nas .

    Zoo li tav no ces wb nkawm laj lig tub khiav kev yuav los muab koj mi muam phauj laug lub kaus dub cob lis nkaus rau koj npab , muab lub kaus ci cob lis nkaus rau koj tes , es koj yuav ua qab tseeb qab xo tu lis nrho nthuav vuj vus lub mi kaus tsuj rau koj mi muam phauj laug kwv nce lis hlo mus rau lawm ntxwj nyoog yeeb tim kiab es kom tus tshav tuaj los tshav tsis ziab , nag los los nag tsis ntub koj mi muam phauj laug tej mus tw tiab mog koj mi nyaj cawm txiv dab laug e!

    3.Zoo li wb taw nkawj ces yog nkawj nas , taw daiv ces yog daiv , taw nkawj ces tsis pub kom nkawj plev, taw daiv tsis tseev kom daiv xo nas nyaj cawm txiv dab laug , tub tsheej mus luj vim luj vim ua lawm koj tsaug , koj los rho mos nkawj mos daiv tej hauv yob es mos nkawj mos daiv li sawv nyog nas , tub tsheej mus luj vim luj vim ua lawm koj tsaug nas nyaj cawm txiv dab laug e!

    Cob kaus rau txiv dab laug

    1.Hais zoo li e! Koj mi nyaj cawm txiv dab laug e! Koj mi muam phauj laug ua lub neej nyob ces nws twb khwv puab los khwv peem khwv nyiaj xab mus nyws xeem es khwv tau lawm ib lub kaus dub dai lis ncuv rau tej mus ntav ntuj nas.Nws tsis vam lawm leej twg , vam txog wb nkawm laj lig tub khiav kev coj koj mi nkauj muam lub kaus dub tuaj cob lis nkaus rau koj mi nyaj cawm txiv nraug nus tuaj mus qaij lawm koj mi muam phauj laug lub kaus tsuj nas.

    Hais zoo li e! Koj mi nyaj cawm txiv dab laug e! Koj mi muam phauj laug ua lub neej nyob ces nws twb khwv puab los khwv peem khwv nyiaj xab mus nyws xeem es khwv tau lawm ib lub kaus dub dai lis ncuv rau tej mus ntav tsua nas.Nws tsis vam lawm leej twg , vam txog wb nkawm laj lig tub khiav kev coj koj mi nkauj muam lub kaus dub tuaj cob lis nkaus rau koj mi nyaj cawm txiv nraug nus tuaj mus qaij lawm koj mi muam phauj laug lub kaus vuam nas.

    2.Zoo li muab rau koj mi nkauj muam coj mus kwv ncig lis yeev rau lawm yeeb tim ub es kom nag los los nag tsis ntub tshav tuaj los tshav tsis kub nas .

    Zoo li muab rau koj mi nkauj muam coj mus kwv ncig lis yeev rau lawm yeeb tim kiab es kom tshav tuaj los tshav tsis kub los nag los nag tsis ntub koj mi nkauj muam tej taw tiab nas .

    3.Zoo li koj mi nyaj cawm txiv dab laug e! Zoo li wb taw nkawj ces yog nkawj nas , taw daiv ces yog daiv , taw nkawj ces tsis pub kom nkawj plev, taw daiv tsis tseev kom daiv xo nas nyaj cawm txiv dab laug , koj tsis rho mos nkawj mos daiv tej hauv yob ces mos nkawj mos daiv sawv tsis nyog nas .

    koj tsis rho mos nkawj mos daiv tej hauv plaub ces mos nkawj mos daiv sawv tsis taus yuas .

    4.Koj mi nyaj cawm txiv dab laug e! Koj los txais lis nkaus koj mi nkauj muam lub kaus dub es li tshav wb nkawm laj lig tub khiav kev thiab tsev txoog npoj xyom cuab ntuj lawm tej tag hnub.

    Koj mi nyaj cawm txiv dab laug e! Koj los txais lis nkaus koj mi nkauj muam lub kaus ci es li tshav wb nkawm laj lig tub khiav kev thiab tsev txoog npoj xyom cuab ntuj lawm tej sib lis nrig no yuas nyaj cawm txiv dab laug e!Tub tsheej mus luj vim luj vim ua lawm koj tsaug nas nyaj cawm txiv dab laug e!

    Txiv Dab laug txhiaj txhais txog cov tsiaj

    Txiv dab laug:

    Pem ntuj cia qas tsi pem teb cia li cas ? Neb ua tib zoo qhia kuv paub es kuv thiaj li zoo txhib kuv xov pab maj tim xyoob .
    ( Yog neb hu kuv mus tua tus tsiaj dab tsi)

    Tub hu teb:

    * Pem ntuj ces cia lub pob pem teb ces cia lub caus , pem teb ces cia qab tseeb qab xo tej chaw nyob , pem ntuj ces cia pam thawj tej chaw khob ( Yog tua Nyuj).

    *Pem ntuj ces cia lub pob pem teb ces cia lub caus , pem teb ces
    cia qab tseeb qab xo tej chaw nyob , pem ntuj ces cia Txheej xeeb
    tej chaw noj. ( Yog tua Twm).

    Ib txhia txhiaj hais tias: ua li neb tuaj ne yog neb tuaj nruab
    nqhuab tuaj los neb tuaj nruab deg tuaj .
    Nruab nqhuab= Nyuj
    Nruab deg=Twm

    Ib txhia txhiaj hais tias: ua li neb yuav tuaj kom kuv nyaj cawm txiv dab laug qhwv pob mi su mus rau kuv muam phauj laug noj no es ua li kuv yuav dej nplooj tsawb los kuv yuav de nplooj ntse qhwv tuaj nas?

    Nplooj tsawb= Twm
    Nplooj ntse =Nyuj

    Rho Xub los rho nplooj:

    Kuv rho no kuv tsis rho neb plig niam plig txiv , plig tub plig kiv, plig tsiaj plig txuv,plig qoob plig loo,plig nyiaj plig kub nawb. Kuv rho no kuv tsuas nrho neb kev ploj kev tuag , kaum ob haiv mob kaum ob haiv ntsaj , khawv yeej khawv yws, khawv txiv khawv kum huv tib si must sis pub kom los aiv neb no nawj! Ces coj xib xub los rev nplooj mus rhais rau pem hauv plag ib sab ntawm tus xwm kab puab rau lub qhov rooj tag. Txog hnub sawv kev mus ces tus Kis mam li mus rho coj los mus cheb lub tsev ntawv tag ces nws mam li muab coj mus rhais rau Txiv Qeej rab qeej ces mam li tuaj lawm.

    Tub hu mus txog hauv tsev:

    Tseb ib leeg ib tug luam yeeb rau ces hais tias: Hais rau koj txiv dab laug paub lau! Hnub no tsev xyom cuab tom ub txib wb nkawm tub txib coj lub moo tuaj rau koj es yuav khom vam koj mus ua txiv dab laug mus nias nws laus lub tsuam txwv , mus ua qab tu, mus qaij nws laus lub kaus dub rau nws laus coj mus roos hnub, mus qaij nws laus lub kaus vuam rau nws laus coj mus roos hli es wb muab cob rau koj nawj mog, ces txaum yim kiag rau ntag .
    Zaum zoj mi ntsis xwb sawv tsees rov qab los, ces luag tuav nkaus yus tes cheem kom yus nyob ces luag mam li mus ntes qaib los tua . Tua ob tug qaib , luag mam li los chob nqaij rau yus noj thiab luag mam li muab mi ntsis nyiaj rau yus yog cov nyiaj tub hu ib leeg mi ntsis.

    Txiv Dab Laug muab nyiaj rau ob tug tub txib:
    Hais li no rau neb nkawm mi Tub txib, luag tias neb coj lub mi moo tshoob moo kos tuaj txog kuv vaj kuv tsev los kuv ua lub neej nyob txooj saub kev sis pluag es yam puas tsheej yam es twb tsis muaj ib tug nyuag ntxuag rau neb khaws neb laj tis khiav ntuj deb kev ncua ntev qhov nyuag no ces tsuas yog ib pluag nyuag mov zaub tsuag rau neb noj sus xwb hos qhov no ces ib lub mi qe rau neb es txhob tu siab laj laj khiav mog.

    Tub hu ua tsaug:

    Ua tsaug mog txiv dab laug luag hais tias: yog neej yog tsav txawm coj lub moo tuaj txog koj vaj koj tsev los tuaj pom ntsej pom muag xwb twb zoo lawm , tsis cia li koj tseem siv tsiaj siv txhuv siv nyiaj siv txiaj tiam wb ob tug tub hu thiab txob xeeb koj ,nyob tsam koj muaj chaw siv tsis pom qab muab laiv mog!

    Txiv dab laug cov pab maj tim xyoob:

    1.Tus Kis 1 leeg
    2.Txiv Qeej 1 leeg
    3.Tuib Tooj xo 2 leeg
    4.Tub Tsa rauj 2 leeg.
    5.Tub nquam sib 2 leeg
    6.Tub Ncaws xeev 2 leeg

    Cov khoom npaj ua Hauv qhua mus qaij kaus

    1.Ib tug Npua
    2.Ib tug Qaib
    3.Ib ntshua ntawv
    4.Ib txoj hlua
    5.Ib rab taus
    6.Nyiaj kab tsem
    7.Nyiaj tshav ntuj
    8.Ib pob dej (Cawv)

    Cov khoom npaj ua Hauv qhua mus hlub:

    1.Ob tug Qaib
    2.Ib ntshua ntawv
    3.Ob fwj cawv
    4.Nyiaj kab tsem
    5.Nyiaj tshav ntuj
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Zaj hu Qhua

    Post  koojziagkabzaug on 22nd April 2010, 10:39 am



    Hmoob Ntujqubqab,

    Ua tsaug rau nws tes dej num.

    Cia kuv khoom, kuv mam tuaj dhos duab thiab tu vaj me ntsis nawb.




    Ua tsaug
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Re: Zaj hu Qhua

    Post  Hmoob ntuj qub qab on 22nd April 2010, 7:16 pm

    Koojziagkabzaug

    Ua li mas muaj caij nws mam li muab dej nyiag deb kub los ntxhuav kom huv si, tso me paj hmab paj ntoos rau ...
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Zaj hu Qhua

    Post  koojziagkabzaug on 24th April 2010, 1:04 pm



    Hmoob Ntujqubqab,

    Ntshe yuav ntev hnub saum no me ntsis, kuv mam khoom tuaj kho nawb mog. Nws muaj dab tsi, yeej meem coj tuaj tso, thaum twg xyeej ces mam tib npaj kho xwb. Nws saib nws cov tom qub tse, qhov twg zoo nqa los tso los nws pab saib xyuas nawb mog. Tam sim nov kuv hauj lwm ntau me ntsis lawm, ntshe yuav tsis tau tuaj kho li siab xav.


    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Re: Zaj hu Qhua

    Post  Hmoob ntuj qub qab on 8th June 2010, 7:53 pm

    Nyob zoo Koojziagkabzaug

    Nws nim tes txawj tes nrhia leej twg tsis txawj los nws nim qhia
    Phim zam kom zam zoo leej twg saib los thiaj tsis nroo

    Ua tsaug nws kho txhua yam zoo nkauj...


    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Zaj hu Qhua

    Post  koojziagkabzaug on 8th June 2010, 9:56 pm



    Hmoob Ntujqubqab,

    Nws me kooj ces yog me kooj nplias txawj dhia
    Siab nkiag tes tsis yiag,
    Lam khaws txuj kom Peb Hmoob muaj ntiag tug.
    Los twb muaj zoo lawm txoj Hmoo tuaj ntsib tau me leej tub tus coj ntug nim ua rau me kooj siab kaj lug.

    Yog thaum kuv los plooj los plia lawm, tseem tshua ntau yam yuav nug rau nws tuaj pab txhab txhais , qhia kom meej rau cov neeg tsis pom kev thiab nawb me Hmoob Ntujqubqab.




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    Hmoob ntuj qub qab
    Sponsor
    Sponsor

    Messages : 687
    Date d'inscription : 2010-03-30

    Re: Zaj hu Qhua

    Post  Hmoob ntuj qub qab on 14th June 2010, 3:48 am

    Nyob zoo Koojziagkabzaug

    Ib xyoo nim laus zus cev nqaij daim tawv nim plhws tsis du
    zoo li lub hnub qaij nroos ib ce nim tsis zooj nyoos
    laus lawm tsis phim zam ua hauj lwm hnyav los yuav xam
    Laus lawm tsis noob taub ua tom ntej tom qab zoo li tsis paub
    xav kom tseem zoo li tub hluas los ntshe yuav rov tsis cuag
    lub hnub yuav poob tim npoo ntuj laus lawm ua yam twg los tsis tsim nuj

    Nas Xib hwb xav kom lwm tiam los tseem nco tiam no rau lub hlwb...Hehehe.



    Liajntsu
    Guest

    Re: Zaj hu Qhua

    Post  Liajntsu on 21st July 2010, 11:15 am

    Hmoob Ntuj Qub Qab,

    Zoo siab koj ua tij yog ib tug paub Hmoob kablis kev cai thiab koj tseem muaj lub siab dawb paug tuaj tso tej kev cai Hmoob no rau peb cov tsis paub tau kawm. Kuv ces paub me me xwb thiab tej niag lus uas tsis yog pajlug es ciali hais yoojyim xwb. KUv twb raug mus ua Tub Hu ib zaug lawm thiab os.

    Thov ua koj tsaug nawb phoojywg.
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 21st July 2010, 9:32 pm

    Hmoob ntuj qub qab wrote:Kev hu Hauv Qhua: kwv Xub yog hu Cuab Tsav
    Kwv nplooj yog hu Muam Phauj
    Mus hu Txiv Dab laug:

    Yus ob tug tub txib yeej kwv nplooj mus ntag .Mus txog tom Txiv Dab laug tsev ces nug hais tias nej puas caiv los tsis caiv? Lawv teb hais tias peb tsis caiv os, los tsev, ces yus txhos caug kiag ntawm lawv tus taw rooj sab nraum zoov ces yus hais zaj hu qhua tuaj ntag.
    Ob tug Tub Txib hais:

    1.Hais zoo li e, koj mi nyaj cawm txiv Dab laug nis nyaj cawm txiv dab laug. Zoo li ntshe looj kab sawv los cab sab, looj kwm sawv los taug lw, taug luj tsis taug luas taug luj luas los lawm lub rooj Nkuag yag nas, luag tej ces luag txawj txib es luag txib tau wb nkawm tub mus khiav kev es wb tuaj txog lis ntua ces wb yuav tuaj kim caug lis ntsoov rau koj lub mus qhov rooj tag nas .

    Hais zoo li e, koj mi nyaj cawm txiv Dab laug nis nyaj cawm txiv dab laug. Zoo li ntshe looj kab sawv los cab sab, looj kwm sawv los taug lw, taug luj tsis taug luas taug luj luas los lawm lub rooj Nkuag npuag nas, luag tej ces luag txawj txib es luag txib tau wb nkawm tub mus khiav kev es wb tuaj txog lis ntua ces wb yuav tuaj kim caug lis ntsoov rau koj lub mus qhov rooj txuas nas nyaj cawm txiv dab laug.

    2.Zoo li wb nkawm laj lig tub khiav kev wb tuaj ces wb tsuas nce lis hlo lub roob toj lug lis taim toj roob mus huab xyw es wb tsis pom niaj dab tus tsav tsi es wb yuav pom tau nthwv cua muj yig nplawm suj sis rov nraum toj nas , tsev txoog npoj xyom cuab muab lus lis nraim tuaj twb lis ntsees rau koj hais tias yog lawm koj neej koj tsav ploj nas .

    Zoo li wb nkawm laj lig tub khiav kev wb tuaj ces wb tsuas nce lis hlo lub roob toj lug lis taim toj roob mus huab xyw es wb tsis pom niaj dab tus tsav tsi es wb yuav pom tau nthwv cua muj yig nplawm suj sis rov nraum tsuag nas , tsev txoog npoj xyom cuab muab lus lis nraim tuaj twb lis ntsees rau koj hais tias yog lawm koj neej koj tsav tuag nas nyaj cawm txiv dab laug .

    Txaum yim rau txiv dab laug ...

    3.Zoo li koj mi nyaj cawm txiv dab laug e, Koj lub qhov rooj tag muaj tus mus meem fab nas , koj ua lub me neej ces vam nroo lis ntws xws li xub ntab nas , Koj mi nkauj muam qaij qaug lis yeev los mus ces tsev txoog npoj xyom cuab txib tau wb nkawm laj lig tub txib wb coj xo lis nraim twb lis ntsees rau koj mi nyaj cawm txiv dab laug kom koj mus tu koj mi nkauj muam qab nas .

    Zoo li koj mi nyaj cawm txiv dab laug e, Koj lub qhov rooj tag muaj tus mus meem fab nas , koj ua lub me neej ces vam nroo lis ntws xws li xub muv nas , Koj mi nkauj muam qaij qaug lis yeev los mus ces tsev txoog npoj xyom cuab txib tau wb nkawm laj lig tub txib wb coj xo lis nraim twb lis ntsees rau koj mi nyaj cawm txiv dab laug kom koj mus tu koj mi nkauj muam lub mus qab xov tu nas koj mi nyaj cawm txiv dab laug e .

    4.Zoo li huab los ces huab ntsauv toj nas ntsauv lis zus toj lug lis taim toj mus roob xyoob nas . Koj mi nkauj muam ces yuav mus rau lawm yeeb tim nroog ces nws tsis vam lawm leej twg nas nws yuav tos lis ntsoov koj mi nyaj cawm txiv nraug nus mus tu lawm koj mi nkauj muam moo nas.

    Zoo li huab los ces huab ntsauv toj nas ntsauv lis zus toj lug lis taim toj mus roob xyoob nas . Koj mi nkauj muam ces yuav mus rau lawm yeeb tim nrag ces nws tsis vam lawm leej twg nas nws yuav tos lis ntsoov koj mi nyaj cawm txiv nraug nus mus tu lawm koj mi nkauj muam qab nas nyaj cawm txiv dab laug yuas nyaj cawm txiv dab laug e.

    Txiv dab laug hais:

    1.Hais zoo lus tuaj lawm lias neb nkawm mi tub mus khiav kev yuas, zoo li xyoo no ces kuj nyaj cawm txiv dab laug tseem nkaus lis hlo rab ko pluaj voom mus ntoj qoob qas lias rov nraum toj es kuv tseem yuav tuaj tos kuv mi muam phauj laug tuaj tsham nrog kuv lawm niaj mus ib hmos nas .
    Hais zoo lus tuaj lawm lias neb nkawm mi tub mus khiav kev yuas, zoo li xyoo no ces kuj nyaj cawm txiv dab laug tseem nkaus lis hlo rab ko pluaj voom mus ntoj qoob qas lias rov tim ub es kuv tseem yuav tuaj tos kuv mi muam phauj laug tuaj tsham nrog kuv lawm niaj mus ib hnub nas .

    2.Zoo li ua li cas neb nim hais ceeb zawj zog tias neb tuaj txog tim toj es pom tau nthwv cua muj yig nplawm suj sis lawv neb qab tuaj txog nraum toj es hais tias kuv mi muam phauj laug ploj nas .

    Zoo li ua li cas neb nim hais ceeb zawj zog tias neb tuaj txog rau nraum tsuag es pom tau nthwv cua muj yig nplawm suj sis lawv neb qab tuaj txog nraum tsuag es hais tias kuv mi muam phauj laug tuag nas .

    3.Zoo li kuv nyaj cawm txiv dab laug ces twb tsis yog tus caj txheeb los ceg ncau nas, caj txheeb ces tseem tshuav coob nyob rau tej mus hauv dej nas, neb muaj zoo txuj ces neb ho rhais roj lis zus mus nrhiav kev neej rau tej mus hau ntuj nas.

    Zoo li kuv nyaj cawm txiv dab laug ces twb tsis yog tus caj txheeb los ceg ncau nas, caj txheeb ces tseem tshuav coob nyob rau tej mus hauv hav nas, neb muaj zoo ci ces neb ho rhais roj lis zus mus nrhiav kev tsav rau yav ntuj tim i no lias neb nkawm laj lig tub mus khiav kev yuas.

    Tub Hu hais :

    1.Hais zoo li e, zoo li koj mi nyaj cawm txiv dab laug nis nyaj cawm txiv dab laug e , zoo li cag txheeb ces yog lawm koj txheeb nas , ceg ncau ces yog lawm koj ncau nas , koj twb nrog koj mi nkauj muam thooj nyaj los mus kum hiav thooj hlab los mus txiav siav nas.

    Hais zoo li e, zoo li koj mi nyaj cawm txiv dab laug nis nyaj cawm txiv dab laug e , zoo li cag txheeb ces yog lawm koj txheeb nas , ceg ncau ces yog lawm koj ncau nas , koj twb nrog koj mi nkauj muam thooj nyaj los mus kum haws thooj hlab los mus txiav ntaws nas.

    2.Zoo li koj mi nkauj muam neb twb sib faib su luj lias tuaj rau saum lub mus rooj tshoob nas. Koj mi nkauj muam tau cog lawm niaj ib rev paj tawg lis zees rau koj npab hais tias yog koj mi nkauj muam los mus ua lub mi neej puv ib txhiab niaj puas nees nkaum xyoo ces koj nco lis ntsoob mus tu koj nkauj muam qab no nas.

    Zoo li koj mi nkauj muam neb twb sib faib su luj lias tuaj rau saum lub mus rooj tshoob nas. Koj mi nkauj muam tau cog lawm niaj ib rev paj tawg lis zees rau koj tes hais tias yog koj mi nkauj muam los mus ua lub mi neej puv ib txhiab niaj puas nees nkaum xyoo ces koj nco lis ntsoob mus tu koj nkauj muam kev no nas.

    Txiv dab laug hais:

    1.Hais zoo li e, neb nkawm mi tub mus khiav kev e, zoo li kuv hais tias kuv mi muam phauj laug tsis ploj los neb hais tias ploj nas, kuv hais tias tsis tuag los neb hais tias tuag lawm nas, kuv hais tias kuv nyaj cawm txiv dab laug tsis yog tus caj txheeb ceg ncau es tsis tau thooj nyaj los kum hiav los neb hais tias kuv nyaj cawm txiv dab laug thiaj li yog tus caj txheeb ceg ncau thooj nyaj los mus kum hiav , yog tus thooj hlab los mus txiav siav nas .

    Hais zoo li e, neb nkawm mi tub mus khiav kev e, zoo li kuv hais tias kuv mi muam phauj laug tsis ploj los neb hais tias ploj nas, kuv hais tias tsis tuag los neb hais tias tuag lawm nas, kuv hais tias kuv nyaj cawm txiv dab laug tsis yog tus caj txheeb ceg ncau es tsis tau thooj nyaj los kum hiav los neb hais tias kuv nyaj cawm txiv dab laug thiaj li yog tus caj txheeb ceg ncau thooj nyaj los mus kum haws , yog tus thooj hlab los mus txiav ntaws nas.

    2.Zoo li zaum no ces kuv mi muam phauj laug qaij qaug lis yeev rov tas nrho ces yuav tam lis ntua tus dej txeeg qhuav lis qhawv rau saum luaj ces ntshe yuav tu lis nrho kuv nyaj cawm txiv dab laug txoj kev tuaj es neb yuav kom kuv mus ntoj lawm leej twg , neb hais rau kuv hnov mog.

    Zoo li zaum no ces kuv mi muam phauj laug qaij qaug lis yeev rov tas nrho ces yuav tam lis ntua tus dej txeeg qhuav lis qhawv rau saum ciav ces ntshe yuav tu lis nrho kuv nyaj cawm txiv dab laug txoj kev khiav es neb yuav kom kuv mus khiav lawm leej twg , neb hais rau kuv paub mog , neb nkawm laj lig tub mus khiav kev yuas neb nkawm laj lig tub mus khiav kev e.

    Tub Hu hais:

    1.Hais zoo li e, Koj mi nyaj cawm txiv dab laug nis nyaj cawm txiv dab laug e, zoo li koj tsis tim los mus tu siab nas thaum koj mi nkauj muam ua lub neej nyob ces nws twb ua tau lub tsev txooj taug qas lias rau tim toj es koj mi nyaj cawm txiv dab laug tau txoj kev ntoj nas.

    Hais zoo li e, Koj mi nyaj cawm txiv dab laug nis nyaj cawm txiv dab laug e, zoo li koj tsis tim los mus tu siab nas thaum koj mi nkauj muam ua lub neej nyob ces nws twb ua tau lub tsev txooj taug qas lias rau tim ub es koj mi nyaj cawm txiv dab laug tau txoj kev thuv nas.

    2.Zoo li koj tsuas hais seev yees hais tias zaum no ces koj mi nkauj muam qaij qaug lis yeev rov tas nrho ces ntshe choj lov lawm kev yuav tu es ntshe koj yuav tsis tau txoj kev mus thuv nas .

    Zoo li koj tsuas hais seev yees hais tias zaum no ces koj mi nkauj muam qaij qaug lis yeev rov tas nrho tam lis ntua tus dej txeeg qhuav lis qhawv rau saum luaj ces ntshe choj lov lawm kev yuav tu ces ntshe koj yuav tsis tau txoj kev tuaj lawm nas .

    3.Zoo li koj tsis tim los must u siab mog, koj mi nyaj cawm txiv dab laug e, koj mi muam phauj laug ces mus ua lub neej zoo xws luag neej nas, nplooj txawj zeeg ces nplooj zeeg rov tas nrho los tseem tshuav ceg nas . Zaum no koj mi nkauj muam qaij qaug lis yeev rov tas nrho los haj tseem tshuav nws tej mi tub lag kus tub lig ne.

    Zoo li koj tsis tim los must u siab mog, koj mi nyaj cawm txiv dab laug e, koj mi muam phauj laug ces mus ua lub neej zoo xws luag neej nas, nplooj txawj zeeg ces nplooj zeeg rov tas nrho los tseem tshuav cag nas . Zaum no koj mi nkauj muam qaij qaug lis yeev rov tas nrho los haj tseem tshuav nws tej mi tub lag nas mi nyaj cawm txiv dab laug e.

    4.Zoo li koj mi muam phauj laug tej tub lag tub lig tseem yuav tuam tus mi choj toog choj hlau tus lis yees rau tim ub es qhib rooj lis lug tos koj mi nyaj cawm txiv dab laug rov tuaj mus thuv nas.

    Zoo li koj mi muam phauj laug tej tub lag tub lig tseem yuav tuam tus mi choj toog choj hlau tus lis yees rau tim toj es qhib rooj lis lug tos koj mi nyaj cawm txiv dab laug rov tuaj mus ntoj no mog nyaj cawm txiv dab laug nis nyaj cawm txiv dab laug e!

    Txiv dab laug hais:

    1.Hias zoo li e! Neb nkawm laj lig tub mus khiav kev os, neb nim hais ceeb zawj zog hais tias kuv mi muam phauj laug qaij qaug lis yeev rov tas nrho ces yuav tam lis ntua nplooj zeeg nas, nplooj txawj zeeg ces nplooj zeeg rov tas nrho los tseem tshuav ceg, zaum no kuv mi muam phauj laug qaij qaug lis yeev rov tas nrho los tseem tshuav nws tej tub tej ki ne.

    Hias zoo li e! Neb nkawm laj lig tub mus khiav kev os, neb nim hais ceeb zawj zog hais tias kuv mi muam phauj laug qaij qaug lis yeev rov tas nrho ces yuav tam lis ntua nplooj zeeg nas, nplooj txawj zeeg ces nplooj zeeg rov tas nrho los tseem tshuav cag, zaum no kuv mi muam phauj laug qaij qaug lis yeev rov tas nrho los tseem tshuav nws tej tub lig kus tub lag nas.

    2.Zoo li kuv mi muam phauj laug ua lub neej nyob ces nws mi yub xyoob tuaj pes tsawg caj nas, nrhau tau yub ntoo lawm pes tsawg ceg , nkauj yub xyoob puas nrhau tau cag tseeb , nraug yub ntoo puas nrhau tau ceg ruaj nas, neb hais zaj twg los ua tib zoo hais kom kuv paub , hais tsav twg los kom kuv hnov mog neb nkawm laj lig tub mus khiav kev yuas.

    Tub Hu hais:

    1.Hais zoo li e! Koj mi nyaj cawm txiv dab laug e! Zoo li cia toj siab txawm ntoo ciab , chaw qis txawm ntoo ntseej nas wb nkawm laj lig tub mus khiav kev yuav los qhia kom meej nas .

    Zoo li cia toj siab txawm ntoo ntseej , chaw qis txawm ntoo taub nas wb nkawm laj lig tub mus khiav kev yuav los qhia koj paub no yuas .
    2.Zoo li thaum koj mi muam phauj laug ua lub neej nyob ces nws twb ua lub neej xws luag neej nas, nkauj yub xyoob raug tau lawm niaj mus ib tug , nraug yub ntoo ces raug muaj lawm niaj mus ob leeg . Nkauj yub xyoob ces tsis tau mus tsheej cuab , nraug yub ntoo ces muaj lawm ib cag hlav los mus ruaj nreb , los muaj vag muaj tsev es tshuav lawm ib cag nrhau los tsis tau muaj cuab nas . Koj mi nyaj cawm txiv dab laug e! Wb tuaj ces wb yuav nce lis hlo lub roob toj lug lis taim toj roob mus zeb ntsuab es nws ntaus xov lis nraim rau wb nkawm laj lig tub mus khiav kev coj tuaj twb lis nkaus rau koj nyaj cawm txiv dab laug , koj nyob es koj ua lub siab ntuj ntev ho mus nrog tsa cuab nas .

    Zoo li thaum koj mi muam phauj laug ua lub neej nyob ces nws twb ua lub neej xws luag neej nas, nkauj yub xyoob raug tau lawm niaj mus ib tug , nraug yub ntoo ces raug muaj lawm niaj mus ob leeg . Nkauj yub xyoob ces tsis tau mus tsheej cuab , nraug yub ntoo ces muaj lawm ib cag hlav los mus ruaj nreb , los muaj vag muaj tsev es tshuav lawm ib cag nrhau los tsis tau muaj cuab nas . Koj mi nyaj cawm txiv dab laug e! Wb tuaj ces wb yuav nce lis hlo lub roob toj lug lis taim toj roob mus zeb ntsig es nws ntaus xov lis nraim rau wb nkawm laj lig tub mus khiav kev coj tuaj twb lis nkaus rau koj nyaj cawm txiv dab laug , koj nyob es koj ua lub siab ntuj ntev ho mus nrog tsa yim nas mi nyaj cawm txiv dab laug e!

    Txiv dab laug hais kom maim tsheej tab

    1.Hais zoo li e ! kuv mi nyaj cawm txiv dab laug tsis txais kuv muam phauj laug lub mi kaus dub los ntshe yuav tsaus lawm neb ntuj lawm tej tag hnub nas.

    kuv mi nyaj cawm txiv dab laug tsis txais kuv muam phauj laug lub mi kaus ci los ntshe yuav tsaus lawm neb ntuj lawm tej sib lis nrig nas.

    2.Zoo li neb puas meej nyog lawm tsheej tab, tab nyog lub tswv nas nyob tsam kuv nyaj cawm txiv dab laug txais lis nkaus kuv muam phauj laug lub kaus dub ces kev neej kev tsav yuav tu siab nrug lis zog luaj li lub hnub nas.

    Zoo li neb puas meej nyog lawm tsheej tab, tab nyog lub tswv nas nyob tsam kuv nyaj cawm txiv dab laug txais lis nkaus kuv muam phauj laug lub kaus dub ces kev neej kev tsav yuav tu siab nrug lis zog luaj li lub hnub nas.

    Zoo li neb puas meej nyog lawm tsheej tab, tab nyog lub tswv nas, nyob tsam kuv nyaj cawm txiv dab laug txais lis nkaus kuv muam phauj laug lub kaus ci ces kev neej kev tsav yuav tu siab nrug lis zog luaj li lub hli nas neb nkawm mi tub mus khiav kev yuas.

    Tub hu maim tsheej tab

    1.Hais zoo li e !koj mi nyaj cawm txiv dab laug e ! zoo li wb nkawm laj lig tub khiav kev yuav los mus meej nyog lawm tsheej tab, tab nyog lub tswv rau koj nas , caj txheeb ces yog lawm koj txheeb ceg ncau ces yog lawm koj ncau nas , koj thiaj li yog tus ua neej sib hlub tuaj ntawm txoj mush lab siab es neb noj zaub los qab tsheej nqaij nas koj txais lis nkaus koj mi muam phauj laug lub kaus dub los yuav tsis tu kev neej kev tsav siab nrug lis nrhib luaj li lub hnub nas

    Hais zoo li e !koj mi nyaj cawm txiv dab laug e ! zoo li wb nkawm laj lig tub khiav kev yuav los mus meej nyog lawm tsheej tab, tab nyog lub tswv rau koj nas , caj txheeb ces yog lawm koj txheeb ceg ncau ces yog lawm koj ncau nas , koj thiaj li yog tus ua neej sib hlub tuaj ntawm txoj mush lab siab es neb noj zaub los qab tsheej nqaij nas koj txais lis nkaus koj mi muam phauj laug lub kaus ci los yuav tsis tu kev neej kev tsav siab nrug lis nrhib luaj li lub hli nas nyaj cawm txiv dab laug e!

    2.Zoo li tav no ces wb nkawm laj lig tub khiav kev yuav los muab koj mi muam phauj laug lub kaus dub cob lis nkaus rau koj npab , muab lub kaus ci cob lis nkaus rau koj tes , es koj yuav ua qab tseeb qab xo tu lis nrho nthuav vuj vus lub mi kaus tsuj rau koj mi muam phauj laug kwv nce lis hlo mus rau lawm ntxwj nyoog yeeb tim ub es kom tus tshav tuaj los tshav tsis kub , nag los nag tsis ntub nas .

    Zoo li tav no ces wb nkawm laj lig tub khiav kev yuav los muab koj mi muam phauj laug lub kaus dub cob lis nkaus rau koj npab , muab lub kaus ci cob lis nkaus rau koj tes , es koj yuav ua qab tseeb qab xo tu lis nrho nthuav vuj vus lub mi kaus tsuj rau koj mi muam phauj laug kwv nce lis hlo mus rau lawm ntxwj nyoog yeeb tim kiab es kom tus tshav tuaj los tshav tsis ziab , nag los los nag tsis ntub koj mi muam phauj laug tej mus tw tiab mog koj mi nyaj cawm txiv dab laug e!

    3.Zoo li wb taw nkawj ces yog nkawj nas , taw daiv ces yog daiv , taw nkawj ces tsis pub kom nkawj plev, taw daiv tsis tseev kom daiv xo nas nyaj cawm txiv dab laug , tub tsheej mus luj vim luj vim ua lawm koj tsaug , koj los rho mos nkawj mos daiv tej hauv yob es mos nkawj mos daiv li sawv nyog nas , tub tsheej mus luj vim luj vim ua lawm koj tsaug nas nyaj cawm txiv dab laug e!

    Cob kaus rau txiv dab laug

    1.Hais zoo li e! Koj mi nyaj cawm txiv dab laug e! Koj mi muam phauj laug ua lub neej nyob ces nws twb khwv puab los khwv peem khwv nyiaj xab mus nyws xeem es khwv tau lawm ib lub kaus dub dai lis ncuv rau tej mus ntav ntuj nas.Nws tsis vam lawm leej twg , vam txog wb nkawm laj lig tub khiav kev coj koj mi nkauj muam lub kaus dub tuaj cob lis nkaus rau koj mi nyaj cawm txiv nraug nus tuaj mus qaij lawm koj mi muam phauj laug lub kaus tsuj nas.

    Hais zoo li e! Koj mi nyaj cawm txiv dab laug e! Koj mi muam phauj laug ua lub neej nyob ces nws twb khwv puab los khwv peem khwv nyiaj xab mus nyws xeem es khwv tau lawm ib lub kaus dub dai lis ncuv rau tej mus ntav tsua nas.Nws tsis vam lawm leej twg , vam txog wb nkawm laj lig tub khiav kev coj koj mi nkauj muam lub kaus dub tuaj cob lis nkaus rau koj mi nyaj cawm txiv nraug nus tuaj mus qaij lawm koj mi muam phauj laug lub kaus vuam nas.

    2.Zoo li muab rau koj mi nkauj muam coj mus kwv ncig lis yeev rau lawm yeeb tim ub es kom nag los los nag tsis ntub tshav tuaj los tshav tsis kub nas .

    Zoo li muab rau koj mi nkauj muam coj mus kwv ncig lis yeev rau lawm yeeb tim kiab es kom tshav tuaj los tshav tsis kub los nag los nag tsis ntub koj mi nkauj muam tej taw tiab nas .

    3.Zoo li koj mi nyaj cawm txiv dab laug e! Zoo li wb taw nkawj ces yog nkawj nas , taw daiv ces yog daiv , taw nkawj ces tsis pub kom nkawj plev, taw daiv tsis tseev kom daiv xo nas nyaj cawm txiv dab laug , koj tsis rho mos nkawj mos daiv tej hauv yob ces mos nkawj mos daiv sawv tsis nyog nas .

    koj tsis rho mos nkawj mos daiv tej hauv plaub ces mos nkawj mos daiv sawv tsis taus yuas .

    4.Koj mi nyaj cawm txiv dab laug e! Koj los txais lis nkaus koj mi nkauj muam lub kaus dub es li tshav wb nkawm laj lig tub khiav kev thiab tsev txoog npoj xyom cuab ntuj lawm tej tag hnub.

    Koj mi nyaj cawm txiv dab laug e! Koj los txais lis nkaus koj mi nkauj muam lub kaus ci es li tshav wb nkawm laj lig tub khiav kev thiab tsev txoog npoj xyom cuab ntuj lawm tej sib lis nrig no yuas nyaj cawm txiv dab laug e!Tub tsheej mus luj vim luj vim ua lawm koj tsaug nas nyaj cawm txiv dab laug e!

    Txiv Dab laug txhiaj txhais txog cov tsiaj

    Txiv dab laug:

    Pem ntuj cia qas tsi pem teb cia li cas ? Neb ua tib zoo qhia kuv paub es kuv thiaj li zoo txhib kuv xov pab maj tim xyoob .
    ( Yog neb hu kuv mus tua tus tsiaj dab tsi)

    Tub hu teb:

    * Pem ntuj ces cia lub pob pem teb ces cia lub caus , pem teb ces cia qab tseeb qab xo tej chaw nyob , pem ntuj ces cia pam thawj tej chaw khob ( Yog tua Nyuj).

    *Pem ntuj ces cia lub pob pem teb ces cia lub caus , pem teb ces
    cia qab tseeb qab xo tej chaw nyob , pem ntuj ces cia Txheej xeeb
    tej chaw noj. ( Yog tua Twm).

    Ib txhia txhiaj hais tias: ua li neb tuaj ne yog neb tuaj nruab
    nqhuab tuaj los neb tuaj nruab deg tuaj .
    Nruab nqhuab= Nyuj
    Nruab deg=Twm

    Ib txhia txhiaj hais tias: ua li neb yuav tuaj kom kuv nyaj cawm txiv dab laug qhwv pob mi su mus rau kuv muam phauj laug noj no es ua li kuv yuav dej nplooj tsawb los kuv yuav de nplooj ntse qhwv tuaj nas?

    Nplooj tsawb= Twm
    Nplooj ntse =Nyuj

    Rho Xub los rho nplooj:

    Kuv rho no kuv tsis rho neb plig niam plig txiv , plig tub plig kiv, plig tsiaj plig txuv,plig qoob plig loo,plig nyiaj plig kub nawb. Kuv rho no kuv tsuas nrho neb kev ploj kev tuag , kaum ob haiv mob kaum ob haiv ntsaj , khawv yeej khawv yws, khawv txiv khawv kum huv tib si must sis pub kom los aiv neb no nawj! Ces coj xib xub los rev nplooj mus rhais rau pem hauv plag ib sab ntawm tus xwm kab puab rau lub qhov rooj tag. Txog hnub sawv kev mus ces tus Kis mam li mus rho coj los mus cheb lub tsev ntawv tag ces nws mam li muab coj mus rhais rau Txiv Qeej rab qeej ces mam li tuaj lawm.

    Tub hu mus txog hauv tsev:

    Tseb ib leeg ib tug luam yeeb rau ces hais tias: Hais rau koj txiv dab laug paub lau! Hnub no tsev xyom cuab tom ub txib wb nkawm tub txib coj lub moo tuaj rau koj es yuav khom vam koj mus ua txiv dab laug mus nias nws laus lub tsuam txwv , mus ua qab tu, mus qaij nws laus lub kaus dub rau nws laus coj mus roos hnub, mus qaij nws laus lub kaus vuam rau nws laus coj mus roos hli es wb muab cob rau koj nawj mog, ces txaum yim kiag rau ntag .
    Zaum zoj mi ntsis xwb sawv tsees rov qab los, ces luag tuav nkaus yus tes cheem kom yus nyob ces luag mam li mus ntes qaib los tua . Tua ob tug qaib , luag mam li los chob nqaij rau yus noj thiab luag mam li muab mi ntsis nyiaj rau yus yog cov nyiaj tub hu ib leeg mi ntsis.

    Txiv Dab Laug muab nyiaj rau ob tug tub txib:
    Hais li no rau neb nkawm mi Tub txib, luag tias neb coj lub mi moo tshoob moo kos tuaj txog kuv vaj kuv tsev los kuv ua lub neej nyob txooj saub kev sis pluag es yam puas tsheej yam es twb tsis muaj ib tug nyuag ntxuag rau neb khaws neb laj tis khiav ntuj deb kev ncua ntev qhov nyuag no ces tsuas yog ib pluag nyuag mov zaub tsuag rau neb noj sus xwb hos qhov no ces ib lub mi qe rau neb es txhob tu siab laj laj khiav mog.

    Tub hu ua tsaug:

    Ua tsaug mog txiv dab laug luag hais tias: yog neej yog tsav txawm coj lub moo tuaj txog koj vaj koj tsev los tuaj pom ntsej pom muag xwb twb zoo lawm , tsis cia li koj tseem siv tsiaj siv txhuv siv nyiaj siv txiaj tiam wb ob tug tub hu thiab txob xeeb koj ,nyob tsam koj muaj chaw siv tsis pom qab muab laiv mog!

    Txiv dab laug cov pab maj tim xyoob:

    1.Tus Kis 1 leeg
    2.Txiv Qeej 1 leeg
    3.Tuib Tooj xo 2 leeg
    4.Tub Tsa rauj 2 leeg.
    5.Tub nquam sib 2 leeg
    6.Tub Ncaws xeev 2 leeg

    Cov khoom npaj ua Hauv qhua mus qaij kaus

    1.Ib tug Npua
    2.Ib tug Qaib
    3.Ib ntshua ntawv
    4.Ib txoj hlua
    5.Ib rab taus
    6.Nyiaj kab tsem
    7.Nyiaj tshav ntuj
    8.Ib pob dej (Cawv)

    Cov khoom npaj ua Hauv qhua mus hlub:

    1.Ob tug Qaib
    2.Ib ntshua ntawv
    3.Ob fwj cawv
    4.Nyiaj kab tsem
    5.Nyiaj tshav ntuj

    Nyob zoo hmoob ntuj qub qab,

    Zoo siab tau pom koj sau txog peb hmoob tej kab li kev cai tej txuj, zoo heev peb yuav tau muab khaws tseg ceev thiaj li yuav nco.
    Kuv lam nug ib nqes txog ntawm qhov ( Ua hauv qhua mus hlub xwb) ua cas hmoob mev kuj lawv tsis muaj nyiaj kab tsem lawm es yog tim li cas koj puas paub txog thiab ne ? Hos ua hauv qhua mus qaij kaus los kuj tsis muaj 1 tug qaib, 1 txoj hlua, 1 pob dej thiab, koj puas paub txog tej no thiab ne ? Ntshai ntev mus hmoob mevkuj thiab hmoob ntuj qub qab yuav tsis yog ib pab lawm lau....
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 26th July 2010, 5:30 pm


    ZAJ HU QHUA

    Cov zaj no, txawm hais tias mus hu tswm hauv qhua twg los tsuas hais raws li cov no xwb, tab sis thaum hais mas yuav tsum muab tig cov lus kom phim raws li tus tuag thiab tus mus hu ntawd nkawd kev sib txheeb ze.

    Zaj no, muab ua piv txwv li yog: Dab laug tuag es mus hu muam phauj tuaj ntaus nyuj.

    Thaum 2 tug tub hu mus txog ntawm qhov rooj tag mas yuav xub hais zaj fi moo ua ntej, ces mam li hais cov zaj hu thiab lwv luag. Raws li kab ke pam tuag cov zaj tus txheej txheem
    .


    Photobucket
    ZAJ FI MOO:
    1. Hais,,! koj muam phauj qas laus, txhia niaj mus txhia xyoo, koj tsuas yuav rau hau li ntsoov mus ua daim teb tuaj rau tim npoo, koj tsuas hnov tau lawm koj neej kus koj tsav noj qab mus nyob zoo.
    - Txhia niaj mus txhia xyoo, koj tsuas yuav tau hau lis ntsoov mus ua koj daim teb tuaj rau tim tsuag, koj tsuas hnov tau lawm koj neej kus koj tsav noj qab mus nyob nquag.

    2. Zoo li, nuj coob thiab nuj nkaug wb nyob wb tsis puab, tsev txoos npoj xyom cuab yuav muab tau tus yaj kum tsuab rau wb ntoo lawm tej sis daub, kom wb ntoj taw lis yeev mus ywj kab, wb li tuaj sawv lis nraim rau koj muam phauj qas laus tus qab mus meej fab.
    - Nuj coob thiab nuj nkaug wb nyob wb txhooj tsis hnov, tsev txoos npoj xyom cuab yuav muab tau tus yaj kum tsuab rau wb ntoo lawm tej sis nrho, kom wb ntoj taw lis yeev tuaj mus ywj ke. wb li yuav tuaj sawv lis nraim rau koj muam phauj qas laus tus qab mus meej tse..

    3. Koj muam phauj qas laus., koj yuav pom tau wb ntoj lis ntsaws tuaj txog tim tsuag, koj yuav xav tias yog nkawd tub mus hu qhua, ua ciav wb yuav tsis yog nkawd tub mus hu qhua, ntshai wb yuav yog tau nkawd tub txib tub hu tuaj xa lawm koj muam phauj qas laus leej txiv dab laug lub moo tuag.
    - koj yuav pom tau wb ntoj li lis ntsaws tuaj txog tim toj, koj yuav xav hais tias wb yog nkawd tub mus nrhiav noj, ua ciav wb yuav tsis yog nkawd tub mus nrhiav noj, ntshai wb yua yog tau nkawd tub txib tub hu tuaj xa lawm koj muam phauj qas laus leej txiv dab laug lub moo ploj no yuas koj muam phauj qas laus.

    HAIS NQI NO TAS CES OB TUG TUB HU TXHOS CAUG NTUA NTAWM QAB QHOV ROOJ TAG CES HAIS ZAJ HU HAUV QAB NO NTXIV

    1. Hais.! txog siav tuaj lawm os koj muam phauj qas laus, zoo li koj leej txiv dab laug ces nws cev qaij qaug li yeev los mus, tsev txoos npoj xyom cuab tsis pom qab muab zog, yuav txib tau nuj coob thiab nuj nkaug wbmuab tau tus yaj kum tsuab rau wb ntoo, ntshai wb yuav ntoj taws lis yeev tuaj txog tim tsuag, wb yuav coj tua lawmm koj muam phauj qas luas leej txiv dab laug lub moo tuag
    - Zoo li koj leej txiv dab laug ces nws cev qaj qaug li yeev los mus, tsev txoos npoj xyom cuab tsis pom qab muab zog, yuav txib tau nuj coob thiab nuj nkausg wb, muab tau tus yaj kum tsuab rau wb ntoo, ntshai wb yuab ntoj taws lis yeev tuaj txog tim toj, kom wb coj tau lawm koj muam phauj qas laug leej txiv dab laug lub moo ploj.

    2. Zoo li, koj leej txiv dab laug cev qaij qaug lis yeev los mus ces yuav tam ntua li tus plaj tshuab kus ceg ntos tu li nrho tuaj rau saum ciav, xyoo no nws laug pluj ceeb kus tuag tas, ntshai yuav tu li nrho koj muam phauj qas laus kev neej kev tsav txoj mus kev khiav.
    - Zoo li, koj leej txiv dab laug cev qaij qaug lis yeev los mus ces yuav tam ntua lawm tus plaj tshuab kus ceg ntos yuav tu li nrho lawm txoj mus qab xo, xyoo no nws laus pluj ceeb nqes tuag tas, ntshai yuav tu li nrho lawm koj muam phauj qas laus kev neej kev tsav txoj mus kev ntoj.

    3. Zoo li, nws laus pluj ceeb mus tuag tas, tub tij mus tub kwv yuav muab nws laus coj mus xyab li nciav rau lawm tus qab mus ncej dab, thaum nws laus ua neej nyob ces nws laus yuav hais li ntsees tias, txheeb ces yog lawm koj muam phauj qas laus txheeb, txhim ces yog koj muam phauj qas laus txhim, hnub no nws laus qaj qaug lis yeev los mus ces, tuam vam kus xov vam yuav vam tau lawm koj muam phauj qas laus mus tu nws laus qab.
    - Nws laus pluj ceeb mus tuag tas, tub tij kus tub kwv yuav muab tau nws laus mus xyab lis nciav rau lawm tus qab mus ncej ru, thaum nws laus ua neej nyob ces, nws laus yuav hais li ntsoov tias txheeb ces yog lawm koj muam phauj qas laus txheeb, txhim ces yog lawm koj muam phauj qas laus txhim, hnub no nws laus qaj qaug lis yeev los mus ces, tuam vam kuj xov vam yuav vam tau koj muam phauj qas laus mus ua lawm nws laus qab tu.

    4. zoo li, thaum nws laus neb ua neej nyob, neb yuav thooj keeb mus koom haiv, neb yuav thooj hlab yuav lawm niaj ib rab riam hlais.
    - Zoo li, thaum nws laus neb ua neej nyob, neb yuav thooj yaj mus koom hiav, neb yuav thooj hlab yuav lawm niaj ib rab txiab txiav.

    5. Zoo li, nws laus neb ua neej kus ua tsav khiav los txog ntuj hnub nqes tasv no, xyoo no ces txog tau nws laus tus hlab tsuj hlab npuag poob, tuam vam kuj xov vam, xov vam kuj yim vam, yuav vam tau koj muam phauj qas laus tes lauj mus kho lawm nws laus ib txhais nrhoob.
    - Nws laus neb yua ua neej ua tsav khiav los txog txog ntuj hnub nqes tav no, xyoo no ces yuav txog tau lawm nws laus tus hlab tsuj hlab npuag nthaug, tuaj vam kuj xov vam xov vam kuj yim vam, yuav vam tau lawm koj muam phauj qas laus tes lauj mus kho lawm nws laus ib txhais khau.

    6. Zoo li, nws laus neb yuav yog nkauj muam nraug nus tuaj thaum ntxov, neb yuav ua lub neej sib hlub mus sib hmov, nws laus qaij qaug lis yeev los txog hnub no, yuav vam tau lawm koj muam phauj qas laus tej lauj mus qaim lawm rab ntxuaj txaij, lauj nas mus qaim lawm rab ntxuaj nraug, yuav ntxuam fawv tsis ntxuam fo ntxuaj fawv fo nws laus lub kaus ci rau nws laus coj mus roos hli nyob lawm yeeb ntuj tom i...
    - Zoo li, nws laus neb yuav yog lawm nkauj muam nraug nus tuaj thaum ub, neb li yuav ua lub neej sib hmov mus sib hlub, nws laus qaij qaug li yeev los txog hnub no, yuav vam tau lawm koj muam phauj qas laus tes lauj mus qaij lawm rab ntxuam txaij, lauj nas mus qaim lawm rab ntxuam nraug, yuav mus ntxuaj fawv tsis ntxuaj fo, ntxuaj fawv fo lawm nws laus lub kaus dub rau lawm nws laus coj mus roos hnub, nyob lawm yeeb ceeb ntuj tom ub no yuas.
    Npuj tswg tsis tshais tswg, pov hneev tsis tshais xib, yuav ntsia li nrawv tuaj nram taug, yuav taw li ntseev au koj muam phauj qas laus, taw nkawj ces yog nkawj tawv daiv ces yog daiv no yuas koj muam phauj qas laus.

    Fim seeb lauj koj muam pauj laug e.......!

    THAUM OB TUG TUB HU HAIS ZAJ NO TAS, YOG MUAM PHAUJ TSIS XAV LWV CES NWS CIA LI RHO XUB LOS PUAS RHO NPLOOJ THIAB TSA OB TUG TUB HU SAWV, COJ OB TUG TUB HU MUS HAUV TSEV.

    Admin thov txim tsis tau thov kev tso cai ntawm koj li cia li sau zaj HU QHUA no rau kem no lawm yog koj tsi nyiam no muaj delete tau txhua lub sij hawm os nawv.


    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 27th July 2010, 9:30 am


    ZAJ TSIS KAM LEES.

    Yog tus txheeb txheeb mas yuav hais zaj zoo li no:

    1. Hais.., neb nkawd tub txib tub hu, tub mus coj ntug, Kuv muam phauj qas laus ua neej nyob kuv tsuas ntshai lawm tib ruj nwg tsam tsis tau hnav, Kuv tsua niaj hnub zaum lis tsaws nyob mus ntos ntaub, ua ciav neb tuaj es neb yuav hais tias kuv txiv dab laug ploj tuag los lawm, ua cas kuv nyob kuv ho tsis paub.?
    - Kuv muam phauj qas laus ua neej qas lias nyob, kuv tsuas ntshai tib ruj rwg tsam tsis tau hnav, kuv tsuas niaj hnub zaum lis tsaws nyob mus ntos xov, ua ciav neb tuaj es neb yuav hais tias kuv txiv dab laug ploj tuag los lawm, ua cas kuv nyob kuv ho tsis hno.?




    Photobucket
    2. zoo li, kuv muam phauj qas laus ua neej qas lias nyob, kuv tsuas ntshai lawm ruj rwg tsam tsis tau noj, kuv tsuas niaj hnub mus ua daim teb tuaj rau tim toj, ua ciav neb yuav tuaj xa moo lis ntsoov hais tias kuv leej txiv dab laug ploj.
    - Zoo li, kuv muam phauj qas laus tsuas ntshai lawm ruj rwg tsam tsis tau hnav, kuv li niaj hnub mus ua daim teb tuaj rau tim tsuag, ua ciav neb yuav tuaj xa moo li ntsoov hais tias kuv leej txiv dab laug tuag.

    3. Ua ciav neb tuaj txog li ntua, neb yuav tuaj kim caug lis ntsoov rau kuv tej qab mus meej fab, nej hais tias neb yuav vam lis ntsoov lawm kuv muam phauj qas laus mus tu lawm nws laus qab.
    - Ua ciav neb tuaj txog li ntua, neb yuav tuaj kim caug lis ntsoov rau kuv tej qab mus meej thu, neb hais tias neb yuav vam lis ntsoov kuv muam phauj qas laus mus ua lawm nws laus qab tu.

    4. Zoo li., kuv tsuas hnov lawm kuv txiv dab laug nyuam qhuav xa xov lis nraws kom kuv mus nrog nws noj kos, uas ciav hnub no neb yuav yuav xa xov lis nraws kuv txiv dab laug lub moo ploj moo tuag nqes tuaj txog.
    - Ua ciav kuv tsuas hnov tau lawm kuv txiv dab laug nyuam qhuav xa xov lis nraws kom kuv mus nrog nws noj tshoob, Ua ciav neb yuav coj xov li nraws kuv txiv dab laug lub moo ploj moo tuag nqes tuaj poob.

    5. Zoo li., kuv txiv dab laug puas yuav tuag daj los tuag tseeb ? yog tuag daj ces neb nrov neb lis ntsheeb, yog tuag tseeb no ces neb yuav hais lawm kuv txiv dab laug lub moo ploj moo tuag kom txheeb.
    - Kuv txiv dab laug puas yuav tuag tseeb los tuag cuav ? yog tuag cuav ces neb rov neb lis nquas, yog tuag tiag ces neb yuav hais kuv txiv dab laug lub moo ploj moo tuag kom txhua no yuas neb nkawd tub txib tub hu, tub ncig ntuj tub mus coj ntug..

    Xaus li no xwb.
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 28th July 2010, 9:25 am



    ZAJ TSIS KAM LEES

    YUS TSIS YOG TUS TXHEEB TIAG MAS YUAV HAIS ZOO LI ZAJ NO:

    1. Hais.., neb nkawm tub txib mus tub hu tub mus coj ntug, kuv ua lawm lub neej nyob kuv tsuas ntshai lawm tib ruj rwg tsam tsis tau noj, kuv li niaj hnub tuav lawm rab hlau pluaj toog mus nkaws nroj. Ntshai kuv yuav tsis paub tias kuv muaj lawm txheeb neej txheeb tsav ploj.
    - Kuv ua lawm lub neej qas lias nyob kuv tsuas ntshai lawm tib ruj rwg tsam tsis tau hnav, kuv li niaj hnub tuav lawm rab hlau pluaj toog mus ncaws tsuag. Ntshai kuv yuav tsis paub tias kuv muaj lawm txheeb neej mus txheeb tsav tuag.


    Photobucket
    2. Ua ciav neb yuav ntoo lawm tus yaj kum tsuab tuaj txog li ntua kuv tej qab mus tsev peg, kuv tus dev yaj kum yuav tom tsis tseg. Kuv xav tias neb yuav dhau, ua ciav neb yuav tuaj nrog lawm kuv tus meej fab ua ib txig ntseg.
    - Neb yuav ntoo tus yaj kum tsuab tuaj txog li ntua kuv tej qab mus tsev peg, kuv tus dev yaj kum yuav tom dhuas lis dhawv kuv xav tias ntshai neb yuav mus dhau, ua ciav neb yuav tuaj nrog kuv lawm kuv tus meej fab ua ib txig sawv.

    3.Neb yuav tuaj kim caug lis ntsoos rau kuv tej qab mus meej fab neb yuav hais tias, kuv txiv dab laug ploj tuag los lawm kom kuv mus tu lawm nws laus qab.
    - neb yuav tuaj kim caug lis ntsoov rau kuv tej qab mus meej thu, neb yuav hais tias kuv txiv dab laug ploj tuag los lawm kom kuv mus ua lawm nws laus qab tu.

    4. Zoo li nws laus wb ces wb yuav tsis tau noj lawm ib lub mis ncau yag npab, ntshai wb yuav tsis thooj keeb lawm niam ib txoj hlab.
    - Nws laus wb ces wb yuav tsis tau noj lawm niam ib lub mis ncau yas tes, ntshai wb yuav tsis thooj keeb lawm niam ib ceg.

    5. Zoo li., thaum nws laus wb ua neej nyob lawm yav neej nram ntej ub, wb yuav tsis tau ua lub neej noj sib hu mus sib pab ntshai kuv yuav tsis muaj lub ntsej lub muag mus tu lawm nws laus qab.
    - Thaum nws laus wb ua neej nyob lawm yav neej nram ub, wb yuav tsis tau noj sib pab mus sib hu ntshai zaum no kuv yuav tsis muaj lawm lub ntsej lub muag mus ua lawm nws laus qab tu.

    6. Kuv tsuas yuav ntshai lawm tib ruj rwg tsam nws laus tshuav zoo lawm niaj ib tug nrog nws laus ua neej noj sib hlub haus sib ce muaj tus mus txheeb ze nyob lawm ntuj txhaim peg.
    _ Kuv tsuas yuav ntshai lawm tib ruj rwg tsam nws laus tshuav zoo lawm niaj ib tug nrog nws laus noj sib cev haus sib hlub, muaj tus mus txheeb kub nyob lawm ntuj txhaim ub.

    7. Zoo li., kuv tsuas yuav ntshai tib ruj rwg tsam kuv tuaj txog li ntua rau nws laus tej qab mus meej tse, ua ciav nws laus yuav muaj lawm niaj ib tug txheeb ze, yuav tuaj hais tau tus lus puam fab mus tso pem. Ntshai kuv yuav ua lawm lub ntsej lub muag ntshaus lis ntsho ris tsis tau lub txaj lub muag rov mus fib ke.
    - Kuv tsuas yuav ntshai tib ruj rwg tsam kuv tuaj txog li ntua rau nws laus tej qab mus meej fab, ua ciav nws laus yuav muaj zoo lawm tus txheeb neej mus txheeb tsav noj sib hlub haus sib pab, yuav tuaj hais tau tus lus paj huam mus peb fab, ntshai kuv yuav ua lub tsej muag ntshaus lis ntsho ris tsis tau lub txaj lub muag rov fib qab no yuas neb nkawm tub txib tub hu, tub ncig ntuj tub mus coj ntug.



    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 28th July 2010, 2:56 pm


    ZAJ HAIS LWV LOS YOG ZAJ LWG.

    Zaj no yog tus txheeb ze tiag mas hais kom tas nrho li zaj no, hos yog tus tsis txheeb no mas hla nqe 3 thiab 4.

    1. Hais..! txog siav tuaj lawm yuas koj muam phauj qas laaus, zoo li nuj koob thiab nuj nkausg wb yuav ntoj taw lis yeev tuaj txog koj muam phauj qas laus tej qab mus tsev peg. koj tus dev yaj kum yuav tom tsis tseg. Ua ciav wb tuaj ces wb tsis dhau, wb yuav tuaj kim caug lis ntsoos rau koj muam phauj tus qab mus meej tsev.
    - Nuj coob thiab nuj nkaug wb toj taw lis yeev tuaj txog nram tiaj nram lis tus. koj tus dej yaj kum yuav toj lawm tej sis dug, ua ciav wb tuaj wb tsis dhau wb yuav tuaj kim caug lis lis ntsoov rau koj muam phauj qas laus tus qab mus meej thu.


    Photobucket
    2. Zoo li koj yuav hais tias koj tsis paub lawm koj tsis dab laug tuag, ua ciav koj txiv dab laug yuav qaij qaug lis yeev mus pw lis ko tuaj saum cwj. Ntshai nws laus tus nees txaij nees nraug yuav cug qaum li ntsoov los ris tau lawm koj txiv dab laug tus qauv lwj.
    - Koj yuav hais tias koj tsis paub lawm koj txiv dab laug tuag, ua ciav koj txiv dab laug yuav qaij qaug lis yeev mus pw li ko tuaj saum cua. ntshai nws tus nees txaij nees nraug yuav cug qaum lis ntsoov los ris tau nws laus tus qauv tuag.

    3. Zoo li koj muam pahuj qas laus koj yuav hais tias koj tsis txheeb, ua ciav thaum nws laus ua neej nyob ces nws laus yuav hais tias koj thiab nws laus neb thiaj li yog koom cag mus xeeb keeb.
    - koj muam pahuj qas laus koj yuav hais tias koj tsis ze, ua ciav thaum nws laus ua neej nyob ces nws laus yuav hais tiaskoj thiab nws laus neb thiaj li yog thooj keeb mus koom cev.

    4. Zoo li koj muam phauj qas laus koj yuav hais tias koj tsis txheeb tsis ze, koj muam phauj qas laus puas yuav taws nyog lawm niaj ib teg mus tsau kaj ? Ua ua nuj coob nuj nkaug wb ntej lawm tej sib lag.
    - Koj yuav hais tias koj tsis txheeb tsis ze, koj muam phauj qas laus puas yuav taws nyog tau lawm niaj ib teg mus tsau ci, yuav ua lawm nuj coob nuj nkaug wb ntej lawm tej sib lis yi.

    5. Zoo li thaum nws laus neb ua neej nyob ces koj yuav ua lub tsev txooj taug qas lias tuaj lawm toj txhaim ub, nws los ua lub tsev txooj taug qas lias tuaj lawm toj txhaim no, neb thiaj li yog nkauj muam nraug nus tuaj mus sib hmo nyob yav neej puag thaum ntxov.
    - Thaum nws laus neb ua neej nyob ces koj yuav ua lub tsev txooj taug qas lias tuaj lawm toj txhaim no, nws laus ua lub tsevtxooj qas lias tuaj lawm toj txhaim ub, neb thiaj li yog nkauj muam thiab nraug nus sib hlub tuaj rau yav neej puag thaum ub.

    6. Zoo li thaum nws laus ua neej nyob, nws laus yug tau tus txij pwj nyug, yuav muab tus txiv pwj nyug rhais li nkaus tuaj pem huab, tuam vam kuj xov vam yuav vam tau koj muam phauj qas laus mus qaij lawm nws laus tus txiv pwj nyug rau nws laus coj mus roos nws tus ntsuj duab.
    - Thaum nws laus neb ua neej nyob nws laus yuav yug tau tus txiv pwj nyug, yuav muab tus txiv pwj nyug rhais li nkaus tuaj rau nram i, tuaj vam kus xav vam yuav vam tau koj muam pahujqas lausmus qaij lawm nus laus tus txiv pwj nyug rau nws laus coj mus roos nws laus tus ntsuj plig.

    7. Tas no koj muam phauj qas laus, koj tsis tim ua lub tsev txooj qas lias tuaj rau nram tiaj nras lis tus, tsis zoo rau txiv nyuj twm qhov chaw mus tshiav kub, nuj coob thiab nuj nkaug wb ces tsis yog koj lub mus chaw lub.
    - koj muam phauj qas laus, koj tsis tim ua lub tsev txooj qas lias tuaj rau nram tiaj nras lis tus, tsis zoo rau txiv nyuj twm qhov chaw mus tshiav tw, nuj coob thiab nuj nkaug wb ces tsis yog lawm koj lub mus chaw lwv no nes koj muam phauj qas laus.
    Npuj tswg tsis tshais tswg pov hneev tsis tshais xib, yuav ntsia lis nrawv tuaj nram taug yuav taw li ntsees rau koj muam pahuj qas laus, taw nkawj ces yog nkawj taw daiv ces yog daiv no yuav koj muam phauj qas laus..
    Fim seeb lauj koj muam phauj laug e....!
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 29th July 2010, 4:26 pm



    Last edited by Liajlwg on 29th July 2010, 5:07 pm; edited 1 time in total
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 29th July 2010, 4:49 pm





    Last edited by Liajlwg on 29th July 2010, 5:09 pm; edited 1 time in total
    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 29th July 2010, 4:57 pm


    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 29th July 2010, 5:16 pm


    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 31st July 2010, 8:59 am



    Photobucket

    ZAJ UA TSAUG THAUM YUAV NOJ MOV

    1. Ua tsaug os mog koj muam phauj qas laus, ua ciav koj nyob koj tsis paub Nuj coob thiab Nuj nkaus wb ntauj lis ntsawm tuaj lawm sis daub.
    _ Koj nyob koj yuav tsis hnov los Nuj coob thiab Nuj nkaug wb yuav ntauj lis ntsawm tuaj lawm sis dov.

    2. Ua ciav wb tuaj txog li ntua, koj yuav mus ntes lis ntho lawm puj qaib tub coj los tuas os.
    - Ua ciav wb tuaj txog lis nkaus, koj yuav mus ntes lis ntho puj qaib tub coj los ntaus.

    3. Zoo li koj xav tias koj tsis ntes puj qaib tuv coj los tua wb noj los, wb tuaj ces txoj kev fab tis ua fab, wb yuab ntiaj ntsuag mus xyaw nroj wb tuaj txog ces koj li hnov tau lawm koj txiv dab laug lub moo ploj.
    - Koj xav tias koj yuav tsis ntes qaib puj tub coj los tua, ntshai wb tuaj ces txoj kev ntxhov tis ua ntxhov, wb yuav ntiaj nroj mus xyaw ntsuag, wb tuaj ces koj li hnov tau lawm koj txiv dab laug lwb moo tuag.

    4. Zoo li thiaj mob lis ntxiag lawm leej niam siab, leej niam yuav mus tua qaib. Ntshai nuj coob thiab nuj nkaug wb noj tas ces wb rov ntsua, leej niam yuav sab laj mus hu nws viv nws ncaus tuaj mus txws tuag. Txiv yuav sab laj mus hu kwv hu tij tuaj nrog txiv cab yag mus cab npau.
    - Mob lis ntxiag lawm leej niam plawv, leej niam mus txo cawv rau wb noj wb haus tas ces wb yuav rais rov. Leej niam yuav sab laj tuaj mus hu niam viv niam ncaus tuaj mus txws ploj, txiv yuav sab laj mus hu kwv hu tij tuaj mus nrog txiv cab yaj cab nco.

    5. Neb yuav tua tsiaj tua txhuv rau nuj coob thiab nuj nkaug wb noj os, neb yuav xav tias nej tsis coj lawm wb noj los ntshai yuav tsis muaj tus coj lawm wb noj os. neb li yuav los coj lawm wb noj lawm niam ib plua, neb xav tias yog neb txheeb neej kus txheeb tsav tuag ces ntshai neb yuav ncia lis dhev lawm neb lub suab mus dab quaj.
    - Nej yuav tua tsiaj tua txhuv rau wb noj os, neb li yuav los coj wb noj lawm niam ib dia neb xav tias yog lawm neb txheeb neej mus txheeb tsav tuag ces ntshai yuav ncia li dhev lawm neb lub suab mus dab nyiav.

    6. Zoo li wb noj tas mus haus tsau ces wb yuav mus dua ntsua, neb li yuav mus hu neb kwv neb tij tuaj nrog neb cab yag mus cab npau. neb yuav ntauj lis ntsaws tuaj txog tim roob es neb yuav hnov tau nws laus tus qeej nruas mus sib tw qhoob. Neb xav tias yog lawm neb neej kus neb tsav tuag lawm tiag ces neb tus txiaj oob kua muag yuav sis tw poob.
    - Wb noj tas haus ntsau ces wb yuav rais rov os, neb yuav mus hu neb kwv neb tij tuaj nrog neb cab yag mus cab nco. Nej ntauj lis ntsaws tuaj txog tim toj, neb yuav hnov tau lawm nws laus tus qeej nruas nrov tuaj sib tw qog. neb xav tias yog lawm neb neej mus neb tsav tuag lawm tiag ces neb tus txiaj oob kua muag yuav sib tw nrog yuas.

    7. Zoo li koj muam phauj qas laus, txhia niaj kus txhia zaus ces koj tuaj txog li ntua ces koj txiv dab laug yuav ntawm lis plaws tuaj fim koj dab. Ntshai zaum no koj tuaj txog ces koj txiv dab laug yuav tsis tuaj fim koj dab, nws yuav pw li ko nrog lawm tus nees dab nees pes txaij tuaj sib laug xyab.
    - Txhia niaj kus txhia ces koj tuaj txog koj txiv dab laug yuav tawm lis plaws tuaj fim lawm koj qhua, ntshai zaum no ces koj tuaj txog ces koj txiv dab laug yuav tsis tuaj fim lawm koj qhua. Nws yuav nro tau lawm tus nees dab nees txaij sib laug tuag.

    Photobucket
    8. Ntshai zaum no koj tuaj txog ces koj yuav tsis pom lawm niaj dab tsis tsav tsi, koj tsuav hnov tau lawm tus kab npliaj liag kab xiv xi, xi luj laws tuaj rau nruab ia. koj xav tias yog lawm koj neej mus koj tsav tuag lawm tiag ces koj yuav tuaj nrov lawv tsev txoos npoj xyom cuab sib tw pos muag nyiav.
    - Ntshai zaum no koj tuaj txog ces koj yuav tsis hnov lawm niaj dab tus tsav tsi, koj tsuas hnov tau lawm tus kab npliaj liag kab xiv xi es xiv luj laws tua rau nruab luaj, koj xav tias yog lawm koj neej mus koj tsav tuag lawm tiag ces koj yuav tuaj nrog tsev txoos npoj xyom cuab sib tw po muag quaj no yuav koj muam phauj qas laus.



    avatar
    Liajlwg
    Developer
    Developer

    Messages : 186
    Date d'inscription : 2010-07-01

    Re: Zaj hu Qhua

    Post  Liajlwg on 31st July 2010, 3:33 pm



    Photobucket


    ZAJ TEB THAUM YUAV NOJ MOV.

    1. Hais., neb nkawm tub txib tub hu tub mus coj ntug, zoo li neb yuav ua lawm lub siab dawb mus siab zuag neb yuav tuaj xa tau lawm kuv neej mus kuv tsav lub moo tuag.
    - neb yuav ua lawm lub siab dawb mus siab loj, neb yuav xa tau lawm kuv neej mus kuv tsav lub moo ploj.

    2. Zoo li, luag tus txawj ua neej ces neb tsi mus ntoj, kuv muam phauj qas laus ces nyob lawm neej saub kev sis pluag neb tuaj txog lis ntua los kuv yuav rub tsis nyog neb tuaj rau pem toj, ntshai yuav tsis muaj zoo lawm ib phaj ntxuag rau neb noj
    .

    - Cas luag tej txawj ua neej ces neb yuav tsis mus rau,kuv muam phauj qas luas ces nyob lub neej saub kev sis pluag, neb tuaj txog li ntua los kuv yuav rub tsis nyog tau lawm neb tuaj rau nram taug. Ntshai kuv tsis muaj zoo lawm niaj ib koob cawv rau neb haus.

    3. Nej yuav tuaj lawm tus ntuj deb kev ncua ntev, ntshai neb yuav qaug lub zog luj luas puam tam li suav txiv nyuj twm nyob mus laij liag, txiv nyuj twm yuav qaug lub zog luj luas tuaj rau tim toj. kuv mua phauj qas laus ces yuav ua lub neej saub kev sis pluag. Ntshai yuav qhwv tsis tau lawm niam ib lub qe, ces yuav tsis tsim nyog rau lawm neb txoj niag kev ntoj mog.

    - Neb yuav tuaj lawm tus ntuj deb kev ncua ntev, ntshai neb yuav qaug lub zog luj luas puas tam li suav txiv nyuj tim nyob mus laij liag. txiv nyuj twm yuav qaug lub zog luj luas tuaj rau nruab iav. kuv muam phauj qas laus ces ua lub neej saub kev sis pluag, ntshai kuv twb qhwv tsis tau lawn neb ib lub qe ces yuav tsis tsim nyog rau lawm neb txoj mus kev khiav no yuas neb nkawm tub txib tub hu, tub mus coj ntug.



    Admin,
    Yog muaj tej yam tsis phim tso rau hauv no los yog tsis zoo los koj ho qhia thiab os nawv es koj thiaj li tsis laj tu.






    Sponsored content

    Re: Zaj hu Qhua

    Post  Sponsored content


      Current date/time is 23rd August 2017, 1:59 am