google-site-verification: googlefbfddf59e706b96b.html

Latest topics

» Kuv 1 Vuagdua
by ibvuagdua 4th December 2016, 3:38 pm

» Keeb Kwm Hmoob mus nyob Guyane
by cvang71 28th November 2016, 7:34 pm

» cwjmemdub lub tsev pajhuam
by koojziagkabzaug 23rd November 2016, 10:53 am

» PAWG HMOOB TRUSTEES UAS TUAV LUB KOOMHAUM LAO FAMILY CENTER YAV DHAU LOS ROV LOS TXEEB TAU LUB KOOMHAUM THIAB LOS TUAV LUB TSIAB30 THIAB LUB KOOBTSHEEB JUL 4TH
by Liajntsuab 20th November 2016, 5:06 am

» Xov Xwm hmoob Nyab Laj sawv tsam mus hais vim Nyab Laj tsi hlub peb haib hmoob
by Liajntsuab 18th November 2016, 8:25 am

» NPE ME NYUAM TUB thiab NPE LAUS
by koojziagkabzaug 15th November 2016, 12:12 pm

» NPE ME NYUAM NTXHAIS
by koojziagkabzaug 15th November 2016, 12:10 pm

» QHIA TSO DUAB thiab Video HAUV VAS SAB
by Tub kev deb 8th November 2016, 3:37 am

» Pojniam Qaug Qav thaum xeeb tub
by PIJPAUJ 6th November 2016, 12:46 am

» Los qhia koj zaj dab neeg
by Khosiab 3rd November 2016, 1:27 am

» TSIS TAU LOS TSIS CHIM
by Khosiab 2nd November 2016, 1:24 am

» Leej twg puas txawj sau nkauj ( suab paj nruag)
by Khosiab 2nd November 2016, 1:11 am

» Lub Neej Lwj Siab
by Khosiab 2nd November 2016, 1:00 am

Tsev seev PajHuam

Hmong beauty nature

Compteur visitor

hnub 18/09/2010 los mus

    Npuag Txhim(Leej Vwj) Li Keeb Kwm

    Share

    Nraug Liab Toj Siab
    Sponsor
    Sponsor

    Messages : 772
    Date d'inscription : 2011-05-31
    Age : 30
    Localisation : Nyob ntawm koj ib sab.

    Npuag Txhim(Leej Vwj) Li Keeb Kwm

    Post  Nraug Liab Toj Siab on 24th September 2011, 6:53 am

    By: Tubzoonraug on December 16th 2010, 1:12 pm

    Npuagtxhim (Leej Vwj) Keebpuam


    Leej tub nxhais hluas twg muaj lajlim tswvyim xav khaws peb Hmoob dabneeg hais txog kev ua tubrog, kev phem thiab kev piamsij qeeyam tshwmsim nyob rau phaum kev ua rog uas yog Tub Npis Lisfoom thiab Pov Vaj ua ob tug los coj Hmoob txij late 1940's los txog rau 1975 hauv lub tebchaws Lostsuas, nej yeejmeem taug qab nyeem qhov keebpuam no kom kawg. Nej yuav tsis paub tagnrho txhua yam hauv Hmoob lub neej phaum kev uarog no, tabsis nej yuav muaj kev totaub txog qeeyam, qee lub ntsiab tseeb hauv Hmoob kev coj fab kev ua tub rog.

    NTU 1:

    Kuv yog nkawm niamtxiv Txawjxwm Vwj tus menyuam thij 5. Muaj kwvtij nkaujmuam tagnrho 12 leeg. Niamtxiv yug kuv xyoo 1937 nyob lub zos Phableeb, xeev Xeevkhuam, Lostsuas teb. Tomqab yug tau kuv muaj 5 lhis, raws li niamtxiv tham, niam thiab txiv coj tsev neeg khiav mus nyob zos Najtoos xyoo 1937 txog thaum kuv muaj 12-13 xyoo.

    Xyoo 1949, kuv tau mus kawm ntawv rau lub tsev qhia ntawv hauv lub zos Nabnpaum (Ban Lan) nyob sab qabteb ntawm zos Najtoos. Kuv pib kawm cov ntawv thiab lus Lostsuas qib 1 ncezus rau qib siab.

    Xyoo 1952 uas yog xyoo 3, kuv tau mus sib tw nce qib kawm ntawv rau qib 4 nyob rau lub nroog Phonesavan. Kuv tau yeej kev sib tw nce qib thiab yuav tau mus kawm qib 4 nyob rau tsev kawm ntawv lub xeev Xeevkhuam.

    Kuv txiv coj kuv mus sau npe kawm ntawv nyob Xeevkhuam. Ib hnub kuv thiab kuv txiv wb mus hais tsis tau chaw kawm nyob hauv Xeevkhuam. Tus xibfwb loj hais tias tsev kawm ntawv puv tas lawm.
    Kev soj ntsuam tej nomtswv tus xeebceem coj thiab hais lus, yus paub tias lawv muaj tsos saib tej pejxeem nyob yajsab qis. Ua li no ces cov nomtswv pheej rau tswvyim kom cov xibfwb dag li ub li no kom tsis txhob txais cov menyuam nyob tojsiab tuaj kawm. Lawv xav aws tej chaw kawm ntawv rau lawv tej neeg nruabze thiab lawv neeg zej zos. Lawv tsis xav kom tej tubnxhais tuaj yajsab tuaj muaj chaw kawm. Tej no yog kev lim hiam, tsis muab kev ncajncee rau tej pejxeem huabhwm txog kev sib tw, tsis hais kev kawm ntawv lossis ua hauj lwm qib qis rau qib siab.

    Nhub tomqab, kuv thiab kuv txiv wb rov mus rau ntawm Tub Npis Lisfoom tsev thiab thov kom Tub Npis pab hais saib puas tau chaw rau kuv kawm ntawv hauv Xeevkhuam. Xav tias Tub Npis yog ib tug nom Hmoob nyob hauv Xeevkhuam thiab nrog tej nomtswv Nplog sib paub zoo. Nxim nws yuav muaj peevxwm pab tau.

    Hais rau seem kev sib paub, Tub Npis thiab kuv txiv yog neeg sib paub zoo. Tsis paub tias nkawv puas sib nug txog kev sib txheeb. Kuv txiv thiab Tub Npis nkawv yog kwvtij kwv npawg, vimtias kuv txiv yawg tus kwvtij ib plab hu ua Zampov Vwj yuav Tub Npis yawg Pajtxhim Lis tus muam ua niamyau.

    Tub Npis txib rau Tub Nxawg(Tub Npis tus kwv), kom mus pab hais tsev kawm ntawv rau kuv. Tub Nxawg zaum ntawm lub rooj ib ntawm phab ntsa hauv nrab tsev, sab xis nkag nraum zoov no mus. Tamsim ntawd, niam Tub Npis nyob ntawm qhovrooj sab hauv tsev txawm tebntua hais tias, “Nxawg, txhob pab, Pab luag lwmnhub luag tau zoo, luag tsis hlub yus.” Niam Tub Npis hais lintawd ces Tub Nxawg txawm tsis teb. Niam Tub Npis hais cov lus ntawd kuj yog ib qho rhuav ntsej muag.
    Ib pliag tsis ntev tomqab ntawd, pom Npis tsu Lauj (Lauj Tsu) tuaj txog ntawm Tub Npis tsev thiab. Tub Npis thiaj rov hais Lauj Tsu tias kom mus nrog hais saib puas tau chaw rau kuv kawm ntawv.
    Hnub tshiab tuaj, tagkis ntawd kuv txiv thiab kuv nrog Lauj Tsu mus rau tom tsev kawm ntawv. Npistsu nkag mus hauv tsev lawm ntev tsis hnov hais dabtsi. Sijhawm kuv txiv wb nyob sab nraum zoov tos ntawd, pom tus thawj xibfwb tawm tuaj ncig nraum zoov. Kuv txiv thiaj hais rau tus thawj xibfwb tias, “Thov cia kuv tus tub kawm ntawv ntawm no thiab. Yog nws mus kawm lwm qhov los nws tsis muaj chaw nyob. Ib qho los kuj tsis muaj phoojywg nrog mus thiab.”
    Tus thawj xibfwb ntawd txawm cem tias, “Tsev kawm ntawv puv tag lawm. Kuj mus kawm lwmqhov thiab. Tsis muaj phoojywg no ho yuav kom kuv ua phoojywg nrog mus no los cas?” Hais li ntawd ces kuv txiv tsis hais dabtsi ntxiv lawm. Paub tias luag saib tsis taus yus lawm.
    Tos ntev twb lig sijhawm lawm mam pom Npistsu tawm los hais tias tsev kawm ntawv puv tas lawm ces yuav ua tsis tau li cas ces tso tseg li ntawd.

    NTU 1, Part 2.

    Tshem Mus Kawm Ntawv Rau Phonesavan

    Kuv thiab kuv txiv taug kev ntawm nroog Xeevkhuam mus rau nroog Phonesavan. Siv sijhawm mus kotaw ib hnub thiaj txog.
    Kuv tau kawm ntawv hauv Phonesavan, tabsis tsis muaj chaw nyob. Tsis muaj ib tug txheebze nyob Phonesavan li. Kuv tau mus nrog tus xibfwb nyob thiab nrog luag noj mov. Vim lino, kuv thiaj yuav tau muab lub zog mus pab tus xibfwb tam li tus tubtxib luag thiaj xav cia kuv nrog luag nyob thiab noj. Ib kis nyiaj los tsis muaj. Vim lino kuv thiaj yuav tau niajnhub mus txiav taws, xov vaj, khawb vaj cog zaub pab tus xibfwb.
    Sijhawm ntawd tomthawj rau kev ua Rog Qabntuj Zaum II (World War II) xaus tsis ntev. Tseem tshuav Fabkis thiab Nyab-laj qaumteb tseem sib tua loj heev. Neeg Lostsuas thiab Hmoob tseem raug kee mus ua tubrog rau Fabkis tsis tu ncua. Vim pom tias kuv txoj kev kawm ntawv yuav tsis muaj chaw mus, kuv thiaj txiav txim siab tso kev kawm ntawv tseg tso cia mus ua tubrog rau Fabkis.

    Kuv Txoj Kev Ntshaw.

    Qee yam kuv ibtxhis ntshaw kom nrog luag muaj:
    A. Lus txawj ntse
    B. Muaj nyiaj
    C. Muaj tsoostsho nrog luag hnav
    D. Muaj noj qab hnav zoo
    E. Muaj vajtse zoo nrog luag nyob
    F. Nrog luag ua nom ua tswv
    G. Muaj tsheb nrog luag caij
    H. Kev tiaj tus nrog luag tau mus

    Yog lino, tsis hais kev kawm txuj kawm ci, kev ua haujlwm yam dabtsi los kuv tau txiav txim siab ua lawm, kuv muab siab rau thiab kawm tiag, ua tiag saib puas yuav raws cuag lub homphiaj tej yam yus ntshaw ntawd. Txawm tsis tau loj, tsis tau ntau npaum licas los kuj tsis poob qis heev.

    NTU 2:

    Tomqab txoj kev kawm ntawv poob tas txhua yam, kuv rov npaj siab ntaus dua tswvyim taug txoj kev tshiab. Qhov yuav pib taug txoj kev tshiab, kuv yuav tau tos kom txog rau qee yam tshwmsim tuaj tom hauvntej.
    Thaum muaj kev sau neeg mus ua tubrog tomqab tiam Rog Qabntuj Zaum 2 xaus, kuv thiaj txiav txim siab nkag ua tubrog zov zos, tiv tua tog Koomsas (communist). Sijhawm ntawd yuav yog xyoo 1953. Sim kuv lub peevxwm saib yuav mus tau siab npaum licas. Ib fab kuj yog kev nrhiav nyiaj los daws teebmeem thiab txhawb nqa yus lub neej txoj kev txomnyem. Ristsho ntuagrhe ntawm yus cev los tsis muaj cev tshiab hnav.

    Tsis hais tus xav ua tubrog los tsis xav, yeej tau ua tubrog yuavluag txhua tus Hmoob, vimtias tej thawj coj kom sawvdaws yuavtsum mus sib pab tivthaiv tua koomsas.

    Lub tsamthawj ntawd, Fabkis ya cov dav hlau dub puag Nyab laj qabteb tuaj pov foobpob rau ib cheebtsam Xeevkhuam mus rau ciam teb Nyab-laj qabteb ntau heev, vimtias muaj Fabkis lub yeej tsovrog loj nyob Phonesavan thiab Loojhej. Fabkis yuavtsum tivthaiv tuagnthi. Kev Fabkis tuaj tso foobpob ua rau muaj qhov foobpob raug av tawg liabvog txhia chaw thoobplaws cheebtsam lub xeev Xeevkhuam, Phonesavan ua ntuzus rau Loojhej.

    Fakis lub yeej zov rog nyob Loojhej yog ib qho chaw nyob tiv tsovrog rau Fabkis thiab yog Fabkis ua tus tsim tsa muaj los ntev lawm. Vim lino, cov tubrog nyob rau Xeevkhuam thiaj tau mus nyob rau lub yeej Loojhej ua ntuzus tsis tuncua. Txij kuv nkag ua tubrog, kuv tau mus nyob rau lub yeej Loojhej ntawd thiab. Cov tubrog Hmoob feem ntau kuj raug mus nyob rau lub yeej ntawd tibyam.

    Hmoob ua tubrog rau ntawm Fabkis coob thiab. Cov tubrog Hmoob tseemceeb tiam ntawd muaj: Vaj Pov, Lis Fwm, Neejtswb Thoj. Lawv 3 tug no ua tubrog rau ntawm Fabkis xubntiag. Fabkis thiaj tso Vaj Pov mus kawm kevcai tubrog. Thaum Vaj Pov rov los, nws tau hnub qub 1. Fabkis ho tso Lis Fwm thiab Neejtswb nkawv mus kawm. Thaum nkawv kawm tiav, nkawv tau hnubqub 1 tibyam.

    Lub tsamthawj ntawd, Fabkis thiab Nyab-laj qaum teb sib tua mus mus los los ces Fabkis thiab Nyab-laj qaumteb thiaj sib tham haum tias cia npav mus sib tua nyob Dien Bien Fu. Yog tog twg yuav swb los kom mus swb rau Dien Bien Fu. Thaum kawg, Fabkis swb rog rau Nyab-laj qaum teb nyob Dien Bien Fu.

    NTU 3: Fabkis Muab Cov Tubrog Neeg Lostsuas Tso Rau Nomtswv Lostsuas

    Tawmplaws rau xyoo 1954, Fabkis swb rog sab Indochine. Fabkis muab cov tubrog neeg tawv daj tso rau nomtswv Lostsuas saib xyuas. Ntawm cov Hmoob yog Tub npis Lisfoom ua tus saib xyuas.

    Vaj Pov, Lis Fwm thiab Neejtswb Thoj lawv rov los nyob ua haujlwm rau lub xeev Xeevkhuam. Vaj Pov yog tus xub kawm tau los uantej Lis Fwm thiab Neejtswb nkawv. Vaj Pov thiaj tau nce mus rau hnubqub 2 xyoo 1954 lawm. Lis Fwm thiab Neejtswb tseem tau nhubqub 1 li qub xwb.

    Tiam Fabkis swb rog no yog tiam tsa nom tsa tswv tshiab. Lub sijhawm ntawd, Tub npis yog tus Fabkis ntseeg siab. Lub neej yuav mus licas tomntej, Fabkis yeej qhia rau nws paub tas, tabsis Tub Npis uatxuj tsis pom tsis hnov vimtias nws yog ib tug nom tsis tshua hlub Hmoob. Vaj Pov, Lis Fwm, Neejtswb Thoj thiab kuv los rau coob tus uas tsimnyog yuav tau nce qib ua nom theem siab thiaj tsis tau nce qib.

    Tub Npis yog ib tug nom qiadub. Tsis xav kom yus cov Hmoob tau ua nom, tau nai loj. Nws tsis mob siab nrog xyuas cov tubrog thiab tsis muab cov qib nom nce kom siab rau cov Hmoob. Qhov nws tsis mob siab no, ua rau tej mabsua muab lawv cov neeg mus ntsaws rau cov qib nom tagnrho los yog, thiaj ua rau cov mabsua tau nom qib siab coob. Tshuav cov Hmoob poob qis heev. Pivxam li Vaj Pov, Neejtswb thiab Lis Fwm lawv cov no tsimnyog yuav nrog cov neeg Lostsuas nce qib mus rau hnubqub 4-5 los lawv tsis tau li.

    Cov neeg Lostsuas tau nhubqub 1 tshem tawm ntawm pawg tubrog Fabkis los rau Koosthav Lao los kuj muaj coob. Cov Lostsuas mob siab saibxyuas luag cov neeg. Luag ciali muab cov neeg Lao nce kiag mus ua nom hnubqub 4 thiab 5 hla dhau uantej cov Hmoob tus puav hais saum toj no.

    Qhov tej mabsua tau nom qib siab los vim luag ciali muab luag cov neeg sau npe tsuag tsuag(Tsis txawv tiam thaum Vaj Pov nyob Loojceeb). Thaum tsoomfwv muab nom tuaj ces mabsua tau feem ntau raws lawv kev xaiv muab lawv neeg sau rau daim ntawv nce qib nom. Ntawm cov Hmoob ces ua “npua tshom rau dev noj!” vim Tub Npis tsis mob siab pab cov Hmoob. Vim lino, cov Hmoob ciali poob qab caum tsis cuag cov Lostsuas.

    Ntawm kuv tus kheej los tsimnyog tau nhubqub 1 rau xyoo 1954 lawm thiab, rauqhov Fabkis twb muab kuv ua tus saib pab tubrog guerrilla coob txog 30 leej lawm. Lub luag haujlwm no yog ib tug nai hnubqub 1 saib thiaj raug txoj cai.

    Tus Naiphone saib tubrog “Koosthav Lao” yog ib tug Caobmoos neeg Lostsuas. Nws lub npe hu ua Sounthone Pathammavong. Thaum Lostsuas teeb tau pawg tubrog lawm, lawv mam sib tw rho ntawv. Leejtwg hmoov txog thiab coj tau zoo, rho tau leejtwg npe ces cia tus ntawd ua tus tuav pawg tugrog Koosthav Lao. Ua lino ces Sounthone Pathammavong thiaj tau los ua tus thawj tug tuav tubrog Koosthav Lao.

    Thaum Fabkis muab cov tubrog guerrilla (Commando) Hmoob nkag ua tubrog Lostsuas (thab ham liab), tag cov tubrog Hmoob thiab Lostsuas yeej nkag tib lub sijhawm, tiamsis thaum muab cov qib nai tubrog yog Tub Npis Lisfoom thiab Neejthoob Lis nkawv tso cai rau Pajxyeem Lis ua tus rau npe. Pab Hmoob Lis ntawd coj cai tsis ncaj. Nws muab nws cov neeg nce rau qib siab tasnrho tsis txawv li tiam thaum Vaj Pov sawv los ua nom xyoo 1960 mus rau 1975 thiab.

    Lawv ua luajzus muab lawv tej neeg nyob hauv liaj hauv tsev nkag tuaj txeeb cov tubrog tej qib nom tas. Pivxam li pawg Hmoob Lis Nongkheo, Loojhej thiab lwm qhov chaw tau coj hnubqub dajvog. Ua lintawd ces cov neeg ua tubrog thiab ua haujlwm tseemceeb tsimnyog nce qib nom rau los nce tsis tau, rauqhov cov qib nom ntau dhau kevcai tsoomfwv teeb muaj tseg lawm.

    Cov Hmoob Lis ntawd muaj kev ntshai thiab khib tsam luag lwm pab lwm pawg tau zoo tshaj. Vim tej siab xav lim-hiam lintawd los txuas rau kev ua tsovrog, Hmoob thiaj muaj kev tsis xav sib pab tivthaiv tsovrog, thiab thiaj muaj kev ntxheb ntxhov los txog rau hnub Hmoob khiav tawm tebchaws Lostsuas xyoo 1975.

    Nyob rau Xeevkhuam tiam ntawd muaj ib pawg tubrog Battalion Guerrilla No. 2 uas Fabkis yog cov tsim tsa. Muaj ib tug neeg Lostsuas ua nom hnubqub 3 ua tus saib pawg tubrog Battalion Guerrilla No. 2 no. Nws lub be hu ua Xabkoun. Thaum Fabkis swb rog Indochine, Fabkis muab cov tubrog guerrilla uas yog neeg Hmoob nkag rau hauv Battalion Guerrilla No. 2. Tub Npis Lisfoom ua tus nrog saib yuas. Tomqab Vaj Pov tau hnubqub 3 xyoo 1955, cov nom qib siab thiaj muab Vaj Pov los hloov tus Xabkoun. Txij ntawd, Vaj Pov thiaj muaj cai siab ntxiv. Tiamsis Lis Fwm yog tus muaj kev txawj ntse siab dua Vaj Pov thiab Neejtswb Thoj.

    Ntawm kuv tuskheej, kuv tseem taug txoj kev ua tubrog mus ntxiv. Lub luag haujlwm kuv ua nyob hauv tubrog yog ua tus sau ntawv hauv (Konghoi(Company)) thawj zaug. Zaum ob yog raug xaiv mus ua tub sau ntawv hauv (Koosphas( Battalion)). Zaum peb, nce mus ua tus sau ntawv hauv (Koosthav Lao (Lao Army Force)). Kuv tau mus kawm dhiakaus rau Nyab-laj qabteb xyoo 1954. Mus kawm kevcai tubrog rau Thaibteb xyoo 1963. Mus kawm kevcai tubrog nyob Khangkhai, Lostsuas teb. Qhov kuv raug xaiv mus ua tus sau ntawv (Secretary) hauv Koosthav tubrog ua ntuzus vimtias kuv yog ib tug txawj ntawv Nplog thiab lus Nplog zoo tshaj.

    Neejtswb Thoj yog Vaj Pov tus yawmyij nyob hauv konghoi tubrog guerrilla No. 3 nyob Loojhej uas Vaj Pov ibtxhis yog tus saib uantej nws yuav los hloov tus Xabkoun. Vaj Pov ua-zaj ua-ntxeev kom Neejtswb ciali tau saib pab tubrog guerrilla No. 3 no yam tsis muaj kev hloov. Neejtswb thiaj tau los saib pab tubrog guerrilla No. 3 nyob Loojhej raws li Vaj Pov lub tswvyim.

    Tib lub sijhawm 1954-55 ntawd, tau muab tagnrho cov tubrog guerrilla nyob Xeevkhuam sau los uake rau hauv Koosphas (Battalion) guerrilla No. 2. Muaj ntau konghoi, xwsli kooshuaib No.3 nyob Loojhej, Neejtswb yog tus saib. Kooshuaib No. 4 nyob Thajthoos Thajvees yog neeg Lostsuas saib. Kooshuaib No. 16 nyob Loojhej yog Lis Fwm ua tus saib. Kooshuaib No. 17 nyob Moosnyaj yog Ntsuabvaj Lis ua tus saib. Kooshuaib No. 43 nyob Mooshiab, neeg Lostsuas ua tus saib.

    NTU 4: Vaj Pov thiab Lis Fwm

    Vaj Pov yog tus tau nom qib siab dua Lis Fwm los zoo li Lis Fwm lub hwjchim pheej siab dua Vaj Pov rauqhov Lis fwm muaj kev txawj ntse dua Vaj Pov raws li hais uantej no, thiab muaj Tub Npis Lisfoom yog Lis Fwm kwvtij. Cov Hmoob Lis thiaj Vaj Pov hwjchim pestsawg los ua rau Vaj Pov ceev faj ntsoov txog cov neeg muaj kev txawj ntse nyob ntawm Vaj Pov ib puag ncig npaum ntawd.

    Tomqab Lis Fwm tau ua tus saib pab tubrog guerrilla No. 16 nyob Loojhej tsis ntev, Lis Fwm ciali raug tshem tawm mus nyob rau Phamthi, Xeev Xasniam. Muab Camthaus Lauj Xeeb los saib pawg tubrog guerrilla No. 16 hloov Lis Fwm.

    Xyoo 1955, Koosphas guerrilla No. 2 raug hloov npe ua Koosphas No. 21. Koosphas 21 raug xa mus zov lub yeej rog nyob Phou Pham Luab. Kuv yog ib tug nyob hauv Koosphas 21 uas yog tus sau ntawv txhua yam.

    Kuv kuj tsis paub qhov tseeb tias vim licas tiag, tabsis yuav piav tus xwmtxheej rau tus nyeem cov ntawv no nrog xav. Nyias mam ntsuam xyuas thiab txiav txim rau nyias txoj kev ntseeg.

    Txij li kuv mus nkag ua tubrog, kuv ciali tau mus ua Vaj Pov, Lis Fwm thiab Neejtswb Thoj lawv 3 tug no tus neeg sau ntawv (Secretary) ncig mus ncig los. Kuv paub thiab pom tagnrho tej ntawv thiab lwmyam xov tseemceeb los txog rau ntawm kuv thiab tau hnov.

    Tomqab Koosphas 21 mus nyob tshavrog Phou Pham Luab, kwvyees qab xyoo 1956, losyog hauvxyoo 1957 txawm pom Lis Fwm tawm ntawm lub yeej Phamthi los nrog pawg tubrog guerrilla No. 16 nyob rau ntawm lub yeej zov rog Phou Pham Luab. Pawg tubrog No. 16 ntawd yog pab tubrog Lis Fwm tau saib uantej yuav muab Lauj Xeeb los hloov Lis Fwm raws li hais uantej lawm.

    Tsis paub tias muaj teebmeem dabtsi. Lis Fwm los nyob rau ntawm lub yeej Phou Pham Luab tau tsis ntev ces txawm hnov lus hais tawm tias muaj kev teevhawm saub "Caubbfab" nyob hauv lub yeej tubrog No.16 uas yog Lis Fwm ua tus teevhawm.

    Dua lintawd kuj muaj qee lo lus hais tsis tshua raug cai, dhau cai, dhau qhov tseeb. Xwsli tias pom ib tug tsiaj qus xwsli qaib, os, nas noog nws mus dua nws kab, nws kev los kuj hais tias yog niamtxiv Caubfab yuav nqis los. Tej yeebncuab uas yeej zov yuav nrog yus sib tua los hais tias yog niamtxiv Caubfab neeg xwb. Kom tsis txhob tua lawv. Hais lintawd mas nws cuamtshuam rau kev ua haujlwm tsovrog tivthaiv yus lub tebchaws lawm thiab.

    Tomqab ua lintawd tsis ntev, pab tubrog guerrilla No. 16 txawm khiav tawm ntawm lub yeej zov rog rov los rau Xeevkhuam. Tsis ntev tomqab qhov hloov ntawd, Lis Fwm ris ib rab phom tasxoos nrog rau tshamtiam raj muastxwv puagncig duav tuaj ntawm Lis Fwm chaw nyob deb kwvyees muaj 1km ntawm lub yeej loj Vaj Pov nyob. Lis Fwm nkag los txog hauv kuv chaw ua haujlwm. Nws los zaum ntawm rooj. Kuv tseem tabtom ntaus ntawv ntawm rooj nyob ib sab ze ze ntawd thiab.

    Kwvyees li 5 nathis tomqab, pom Vaj Pov tuaj ntawm Vaj Pov chaw nyob deb kwvyees 50m, tuaj txog ntawm kuv chaw ua hauj lwm thiab. Thaum Vaj Pov tabtom nkag los hauv kuv chaw ua haujlwm, Vaj Pov tsa ncauj hais rau Lis Fwm tias, “Leejtwg nim yuav tua nej na!” Vaj Pov mus zaum ntawm lub rooj sab tim ceskaum tsev. Vaj Pov thiab Lis Fwm pheej sib tham lujloos ntev li 10 nathis. Kuv tsis nco mloog xyov nkawv cov lus yog hais licas. Tas ntawd, nkawv sawv tawm mus nraum zoov. Nyias rov mus nyias tsev lawm ntsiag to.

    Dhau ntawd los tsis ntau hli, Lis Fwm tawm khiav ntawm lub yeej tubrog guerrilla No. 16 los rau Xeevkhuam. Lis Fwm ris ib rab phom Mat 49, ntim 30 lub muastxwv. Muab txoj hlua phom khuam ntawm cajdab. Rab phom dai ntawm xubntiag. Muaj ib tug tubrog ua Lis Fwm luag los mus thiab, tabsis tus tubrog ua Lis Fwm ntej. Lis Fwm caij nees tawm hauv yeej zovrog taug kev los deb kwvyees 5km ces Lis Fwm txawm raug neeg phem tua. Tus tubrog ua Lis Fwm luag ua Lis Fwm ntej lawm. Thawj phom raug Lis Fwm hauvsiab, tabsis hmoov zoo thiab. Lub muastxwv mus ntsia rau rab phom ntawm yav kavphom txuas rau lub raj ntim rau thooj hlau tus koob nkaug plavtooj, ua rau lub muastxwv tshabkiag rau hauv nrog phom thiaj tsis raug cev nqaij.

    Thaum hnov phom nrov, Lis Fwm tsa qhovmuag hlo saib ntawm qhov suab phom nrov tuaj. Nws pom ob tug neeg tua nws. Ib tug yog Thoj Yob (Npliajyob) Vaj Pov tus yawmyij. Ib tug yog Lwm Vaj (Nyiajlwm Vaj) Vaj Pov kwvtij Hmoob Vaj. (Cov neeg no Lis Fwm ua tus piav rau kuv tomqab no, ntxiv rau cov ntawv kuv tau nyeem hnub Lis Fwm raug tua).

    Thaum Lis Fwm pom tseeb lintawd, Lwm Vaj tig hlo khiav lawm. Tus khiav lawvqab yog Thoj Yob. Thoj Yob tsa hlo phom rov tua Lis Fwm ib phom loos ntxiv. Tamsim ntawd, Lis Fwm tso cev vau hlo saum nees nraubqaum rau hauv av. Lis Fwm txhais ceg tsa hlo ces muastxwv thiaj raug kiag ntawm txhais caj hlaub thiab raug ib tug pobtxha. Lis Fwm twb nta kiag phom tua ob tug neeg ntawd tabsis Lis Fwm rab phom daig lawm. Tua tsis tau.

    Tomqab phom nrov tas, tus tubrog nrog Lis Fwm mus mam lug kev rov los xyuas, rauqhov tus tubrog mus uantej dhau debzog lawm. Nws pom Lis Fwm twb raug mob lawm. Tus tubrog mam khiav rov qab los hais rau cov tubrog nyob ntawm yeej zovrog paub. Cov tubrog tom qab mam txhij neeg mus xyuas thiab muab Lis Fwm xa mus kho mob lawm.

    Hnubntawd, hnubqaij, pom Camthaus Lauj Xeeb, tus thawj coj pab tubrog guerrilla No. 16, nyob ntawm lub yeej me tuaj txog hauv kuv chaw ua haujlwm. Nws muab tau ib daim ntawv sau muaj 4-5 kab cev rau kuv. Kuv txais los nyeem. Cov lus sau hais tias “Lis Fwm raug tua tim kev mus rau zos Nasmoos, ncaujkev yuav los lawm Xeevkhuam. Thoj yob thiab Lwm Vaj yog ob tug tua.”

    Lauj Xeeb luag luag thiab hais tias “Uacas thiaj ua lintawd?” Camthaus Lauj Xeeb muab daim ntawv rau kuv khaws cia ib hmos. Hnub tomqab, nws rov tuaj nqa mus lawm ces tas lintawd.

    Raws li lus hais, Vaj Pov yuav kom cov tubrog kwv Lis Fwm rov mus rau ntawm lub yeej loj Phou Pham Luab Vaj Pov nyob es coj Lis Fwm rov mus kho ntawd, tiamsis cov tubrog uas yog Lis Fwm kwvtij tis pom zoo.

    Dhau ntawd los tomqab no, Vaj Pov thiab Lis Fwm nyias mus daws nyias plaubntug tas, nkawv kuj rov los ua haujlwm nyob rau Xeevkhuam li qub. Vaj Pov raug hloov tawm hauv Koosphas 21. Lis Fwm rov los ua haujlwm hauv Koosphas 21.

    Vaj Pov yog hom neeg muaj pluaj siab khuvhiv nrognraim. Nws tsis nyiam nyob hauv rooj ntaub ntawv. Nws nyiam khiav fab taws ntsos rau-ub rau-no. Ua yam twg nyiam ua ywj siab. Muaj lub xeebceem nyiam tus-ub tus-no.

    Vaj Pov tawm ntawm Hmoob mus nyob qhovtwg los kuj tsis yoojyim, rauqhov nws yog ib tug tau nom nyob qib loj lawm. Yuav tau tuav lub luag haujlwm loj thiaj phim, tiamsis nws tsis muaj lus txawj ntse txaus yuav los ua tau tej haujlwm ntawd. Txog kawg, hauv koos npas xas kas loj thiaj tso Vaj Pov ua tus saib cov tubrog kawm nyob rau lub tsev kawm ntawv Khaabkhaim.

    NTU 5: Lis Fwm Khiav Tawm Ntawm Hmoob

    Vaj Pov thiab Lis Fwm zoo ib yam li roj thiab hluavtaws. Yog muab roj los ces yuav tau tshem hluavtaws tawm. hluavtaws thiab roj nyob uake yuavtsum kubnyhiab xwb.

    Vimtias Vaj Pov thiab Lis Fwm yog ob tug neeg sib muaj teebmeem lawm, Lis Fwm yuav tau tawm mus nyob lwm pab pawg tubrog los yog lwm lub xeev. Vim lintawd, Lis Fwm thiaj tau yaum coj qee tus phoojywg tubrog xwsli kuv, Xoom Tsab thiab Lis Txhim kom nrog Lis Fwm mus nyob rau Savannakhet, yav qabteb hauv tebchaws Lostsuas.

    Peb 3 leeg mus nrog Lis Fwm nyob tau 4 hlis xwb ho tshem mus nyob rau Luangprabang tau 3 hlis. Dhau ntawd, peb raug los nyob rau Veescas. Lis Fwm kuj tsis qhia qhov tseeb tias yog vim licas peb thiaj mus nyob tsis muaj chaw lintawd. Txog thaum kawg, kuv, Xoom Tsab thiab Lis Txhim thiaj txiav txim siab tshem rov mus nyob rau pawg tubrog Koosphas 21 nyob Xeevkhuam li qub. Thaum ntawd yuav yog xyoo 1958-59 lawm.

    Kev rov los nyob rau Xeevkhuam. Lub sijhawm ntawd tebchaws raug tubrog Koosles nce Veescas tuaj tua tawg khiav tas. Vaj Pov coj tubrog khiav mus nkaum pem tej hauv roob siab tas. Mus nyob rau Pajdoos, Phakhao thiab Loojceeb. Tej tubrog Hmoob thiab Lostsuas nyob rau Loojhej los rau Xeevkhuam tawg khiav tag rau havzoo. Nyias khiav nyias kom dim txoj sia. Muaj tej pab khiav 4-5 leeg ua ke los muaj. Cov tuag los tuag lawm coob.

    Thaum tebchaws thiab tej tubrog tawg ri rws rau-ub rau-no ntawd, cov tuav ntawv tseemceeb hauv Koosphas 21 uas yog neeg Lostsuas tau ya davlhau mus nkaum rau Paksan tag. Lawv ntshai tuag. Lawv tsis kam nce tuaj rau pem tshavrog Xeevkhuam. Thaum ntawd kuv yog tus los tuav tej ntawv txhua yam nyob hauv Koosphas 21.

    Luag lo lus hais tias, “Thooj siab koom plawv ces sau tau ua pab ua pawg, tsis thooj siab koom plawv ces yuav sib tawg ploj plag tsis muaj tag.”

    Nomtswv Rhuav Hmoob

    Thaum luag pom Hmoob sib tawg lintawd ces luag ciali kavxyeem tshum lub qhov ntawd kom tawg loj ntxiv. Vim licas paub tau lintawd? Kuv yog tus tuav tej ntawv txhua yam nyob hauv Koomphas 21. Hauv qhov chaw loj sau ntawv tuaj hais tias cov nom hnubqub 1 coob tshaj lawm. Muab cov Hmoob tshem 1-2 tug tawm, nom ho xa cov neeg Lostsuas hnubqub 1 thiab 2 tuaj hloov rau. Qhov no yog qhov luag yuav muab cov Hmoob tshem tawm kom sau tsis tau ua pab pawg. Luag muab cov nai tubrog loj me ntsis ncaws tawm uantej. Xwsli Vaj Pov yog thawj tug raug ncaws tawm vim teebmeem Vaj Pov thiab Lis Fwm.

    Cawm Neejtswb Thoj Nyob Koosphas 21

    Neejtswb Thoj hnubqub 2 raug ncaws tawm hauv koosphas 21. Thaum Neejtswb pom lino lawd, nws ntshai tias yog nws tawm ntawm cov Hmoob lawm ces yuav txomnyem. Neejtswb tsis xav khiav tawm Koosphas 21. Neejtswb thiaj tau thov tus nai nhubqub 4 hu ua Khamsouk uas yog neeg Lostsuas thiab yog tus los saib Koosphas 21 hloov Vaj Pov, kom Khamsouk pab tawm tswvyim sau ntawv thov cov tub tuav haujlwm ntaubntawv xee npe sawvcev hais tias cov tubrog hauv Koosphas 21 tseem nyiam Neejtswb. Thov kom hauv chaw loj hloov Neejtswb rov los nyob Koosphas 21 li qub. Sijhawm ntawd, muaj kuv (Leej Vwj), Muas Pos, Lis Tsas, Ntxhais Xyooj thiab 2 tug Lostsuas yog cov tub sau ntawv thiab tuav cov npe tubrog kooshuaib thiaj xee npe thov Neejtswb rov los nyob rau Koosphas 21 hauv Xeevkhuam li qub. Neejtswb Thoj thiaj los nyob hauv Koosphas 21 txuas nxiv los rau thaum nws tau hnubqub 4.

    Kev Coj Tsis Ncaj Qee Yam Ntawm Neejtswb Thoj

    Thaum Neejtswb Thoj los coj los yeej coj tsis ncaj. Cov npe tubrog tshiab nyob rau cim rog Vaj Pov coj ntawd, cov nom tubrog coj nhubqub ib tug muaj 2-3 lub npe. Tus tswv npe yuav ib lub lawm, tseem tshuav 1-2 lub npe. Nai Cam los muaj, nhubqub 1 los seem coob tus. Muaj npe tsis muaj tus neeg. Lino los Neejtswb tsis kam muab cov npe seem ntawd hloov rau cov tubrog uas siv siav siv zog tiv thaiv lub tebchaws tabsis tseem poob qab deb tsis tau nce qib. Pivxam li kuv tus kheej twb tsimnyog tau nhubqub 1 puagthaum Fabkis muab cov tubrug Fabkis uas yog neeg Hmoob thiab Lostsuas cob rau tsoomfwm Lostsuas thaum Fabkis swb rog rau Nyab-laj qaumteb los kuv tsis tau nce qib nom. Txawm tsis tau thaum ntawd los, tsimnyog Neejtswb thiab Vaj Pov nkawv muab nhubqub 1 lossis 2 (qhov qis kawg) rau kuv thaum nyob Phakhao lawm, vim kuv twb nrog Vaj Pov, Neejtswb thiab Lis Fwm lawv ua tubrog Fabkis, kuv tseem yog tus txawj ntawv tshaj lawv, thiab yog tus tuav tagnrho cov tubrog cov ntaubntawv.

    Thaum Neejtswb Thoj los coj, kuv yog tus tseemceeb tuav tagnrho cov tubrog cov npe thiab ua haujlwm txhua yam nyob hauv Koosphas 21 nyob rau Phakhao raws lis hais los. Neejtswb lawv muab nyuag Castri rau kuv xwb. Tshaj ntawd, tseem nhov kuv cov kwvtij uas niaj nhub niaj mho ntaus yeeb rau Neejtswb Thoj haus ntxhi qhia rau kuv tias yog Neejtswb lawv muaj nom qib siab rau kuv mas lub tebchaws Moospham ntawd yuav yog kuv ua tus saib tagnrho. Vim lino, Neejtswb Thoj thiaj txiav kuv kev tsis pub kuv tau nce nom qib siab. Cov Hmoob Lis uas yog neeg liaj neeg teb sab Nongkheo, Loojhej thiab ib thamtsam ze coob tus tau coj nhubqub dajvog vimtias Tubpos Lis lawv pab no coj tsis ncaj thiab raws li hais tas los saum toj no.

    Hais txog ntawm feem nyiaj xa tuaj rau cov tubrog nyob hauv Vaj Pov kev tswjfwm, Neejtswb yuav ib tug neeg Puabyib npe hu ua Kham Uan ua tus tuav nyiaj. Neejtswb thiab tus puabyib muab cov npe tubrog ntawd zais (tuag lawm los lub npe tseem nyob hauv ntawv yuav nyiaj) ua nyiaj sib faib yuav, cia yus cov Hmoob txomnyem, poob qab thiab ua qhev rau lawv noj nyiaj. Tus puabyib nyiag tau nyiaj ntau. Nws coj mus ua tsev rau nram Savannakhet kom tsis muaj cov tubrog Koosphas 21 paub pom txog li.

    Qhov tseeb tiag twb yog Neejtswb ua tus koom tawm tswvyim zais cov npe tubrog cuav lintawd, nws thiaj tsis kam cia Hmoob ua tus tuav cov nyiaj. Tej no yog lub tswvyim “Ua liaj rau yus cov neeg Hmoob nraubqaum” ib yam li los lus hais tias “Tus noj mas noj tsau. Tus tau mas tau tshaj. Tus noj mas tau noj qab nhav zoo. Tus yoo mas yoo yoo tuagkus!”

    NTU 6: Khamhou Raug Tua

    Vaj Pov tau rov los ua tus tuav cov tubrog nyob Xeevkhuam. Lub tsamthawj no Lostsuas teb muaj kev sib tua ntxhovniab. Cov nomtswv los raug hloov tsis tseg. Tabtom raug rau yawg nhubqub 5 Khamhou zeeg los ua tus saib cov tubrog thiab lub tebchaws Xeevkhuam.

    Xyoo 1958-59. Muaj ib nhub, nhubqub 5 Khamhou tawm hauv nroog Xeevkhuam mus ua haujlwm rau sab qaumteb ntawm nroog Xeevkhuam. Thaum nws rov los txog ntawm tus choj hla dej ntawm ntug zos Lathuang rov sab qaumteb, deb kwvyees li 1 mile. Khamhou raug neeg phem tos kev tua, tabsis muastxwv mus raug lub tshuab (engine) lub tsheb Khamhou tabtom tsav khiav taug kev tokiag, ua dej tshau lug. Khamhou khiav dhau los txog Lathuang. Nws los nkaum hauv Tub Npis Lisfoom tsev ib hmos mam rov nkag hauv yeej tubrog hauv nroog Xeevkhuam.

    Tsis ntev ntawd, Khamhou raug hloov tawm lub luag haujlwm ua tus saib cov tubrog thiab saibxyuas Xeevkhuam. Tsoomfwv tso Vaj Pov rov los hloov Khamhou.

    Rog Koosles (Tog Nruabnrab)

    Txog rau lub 9/8/1960, Koosles ntxeev Veescas. Cov tubrog tog Koomsas tabtom nkag los sib hais haumxeeb rau tog tsoofwm Veescas. Ib pab tubrog Lao Koomsas los nyob rau tiaj rhawv zeb. Kev sib cog lus koom uake hais tsis haum, rauqhov tog tsoomfwv Veescas tsis muab cov qib theem ua nom raws li tau sib cog lus. Tog Lao Koomsas thiaj tawg khiav mus nkag havzoov dua. Vaj Pov thiaj coj cov tubrog tabtom kawm thiab cov tubrog nyob rau Xeevkhuam mus raws cov tubrog Lao Koomsas mus rau sab qabteb Xeevkhuam.


    America thiab Vaj Pov

    Xyoo 1961, America ntiav cov Hmoob ua tubrog pab tivthaiv tua cov Koomsas nyob phab Asia hnubtuaj sab nram hav. Kob rog no Vaj Pov yog tus coj. Lis Tubpos yog tus tuav cov tubrog tshiab npe, ua rau cov Hmoob Lis sab tebchaws Loojhej tawm tom liaj tom teb tuaj chob nhubqub dajvog thaum los nyob Phakhao thiab Loojceeb raws li hais tas los no. Kev nce qib ua nom tsis txawv li tiam neeg Lostsuas ua thaum phaum rog Fabkis thiab tso tebchaws muaj “es kaj laj” rau Nplog.

    Sijhawm no, cov Hmoob nyob lub zos Najtoos, lub zos kuv loj hlob tiav neeg, uas muaj Xaivtuam Vaj ua tus thawj coj kuj tau nqa ib co phom los zov zos tivthaiv tus yeebncuab Koomsas. Cov tubrog zov zos no muaj kuv cov kwvtij koom pog koom yawg thiab muaj nhubnyoog tsuav nqa tau rab phom tau ua haujlwm caum Vaj Pov ua ntuzus mus txog rau Phakhao. Lawv raug mus nyob zov rog rau saum lub roob siab siab saum qaum zos Phakhao sab nhubtuaj qabteb, tabsis Xaivtuam Vaj khiav rov mus nyob puag tim qub zog Najtoos. Txog caij nyiaj tuaj, Xaivtuam mam rov tuaj nqa nyiaj xwb.

    Muaj ib nhub Xaivtuam Vaj tuaj txog Phakhao. Vaj Pov tuaj rau hauv lub tsev kuv ua hauj lwm thiab. Kuv hais rau Vaj Pov tias yuav tau hais kom Xaivtuam tuaj saib nws pab tubrog. Vaj Pov teb tias, “Nws tsis ua los nws tus kwvtij twb ua lawm.” Ntaus nqi tias Xaivtuam tsis ua los Vaj Pov twb ua lawm. Nqe lus kuv hais ntawd ces tso tseg tsis haiv ntxiv lawm.

    Thaum pab tubrog zov zos no pom tias ua haujlwm li ntawd xwb yuav tsis muaj nqi dabtsi rau lawv lub neej yav tomntej. Lawv xav nkag ua tubrog Koosthav. Lawv tau sau ntawv rau Vaj Pov, tiamsis tsis nhov Vaj Pov teb dabtsi li. Txog thaum kawg, pab tubrog zov zos no thiaj tawg ib leeg mus ib qho. Feem coob mus nkag ua tubrog Koosphas 24 nyob Mooscab. Pab tubrog zov zos uas yog Hmoob Najtoos ces xaus rau qhov ntawd.

    Vaj Pov ua haujlwm nyiam ua ywjsiab. Vaj Pov yeej ibtxhis hais tias “Tus neeg twg txawm nyob xwb los Vaj Pov xav muab ua nom, ua nai ces tus ntawd yeej yuav tau. Tus neeg twg txawm ua haujlwm zoo npaum licas los Vaj Pov tsis xav muab nom, muab nai rau ces tus ntawd yeej tsis tau.” Vaj Pov ib txhis hais tias “Tus neeg txawj neeg ntse, tus neeg ua haujlwm zoo mas tus ntawd yog tus yuav ntxeev siab, yuav ntxeev Vaj Pov tus nom.”

    Vaj Pov tus xeebceem ua hauj lwm nyiam siv “Phab dev kas”, nyiam tuav ntawm tes ntxo ntawm ncauj. Lauj tau los noj. Noj tas povtseg ntawm taw. Mus tom ntej tsis nug xub tw. Tsis xav pom tsis xav ntsib cov neeg twg ua paub zoo txog nws lub lajlim tswvyim.

    NTU 7 Vim Licas Kuv Thiaj Khiav Rau Tog Nruabnrab? (Tog Koosles)

    Tomqab Koosphas 24 mus ntaus rog tau ib xyoos rovlos txog thiab los so tau ib ntus, Koosphas 24 raug muab nres tseg thiab muab cov tubrog tshem mus nyob rau Koosphas 23 hauv Moos Oo, Thajvees Xeeskhoo. Cov tubrog muaj feem tsis kam mus rau Koosphas 23 rauqhov muaj tsovrog loj heev. Sijhawm ntawd cov Nyab-laj qaumteb hla thajtsam ntawd Moos Oo tuaj mus ntaus rog rau Nyab-laj qabteb. Ib qhov yog lawv nyuamqhuav mus nyob hav tsovrog los. Lawv tsis xav rov mus nyob chaw tsovrog loj. Cov tubrog khiav mus nyob rau lwm pab pawg lawm. Tshuav Lwm thiab Npliajtsab nkawv tseem nyob rau zos Phakhao.

    Muaj ib nhub, pom ib tsab ntawv xovtooj uas yog Koosphas 23 ntaus tuaj hu kom Lwm thiab Npliajtsab nkawv mus ua haujlwm rau Koosphas 23. Sijhawm no kuv yog tus tuav tagnrho cov ntawv thiab npe tubrog nyob hauv Phakhao. Kuv muaj cai tshawb nrhiav txhib cov tubrog kom mus nyob rau nyias pab pawg. Kuv thiaj hais rau Lwm thiab Bliajtsab kom mus raws li Koosphas 23. nkawv kuj hais tias nkawv tsis mus.

    Kuv xav tias muab Lwm thiab Bliajtsab kho npe pauv chaw nyob rov los rau Koosphas 21 los tau, tabsis twb pom tias Neejtswb saib Koosphas 21 twb yog tus neeg siab tsis ncaj. Pivtxwv: Kuv muaj ib tug kwvtij hu ua Cheeb yog tus ua mov noj, ua haujlwm (ua qhev) rau Neejtswb tsev neeg tau ntau xyoo, tabsis Cheeb yog nyuag tubrog “xab xoom” xwb. Neejtswb tsis nce qib nai rau Cheeb txawm tias nyob hauv tsab ntawv cai hais tias tus nai Koosphas muaj cai nce qib tubrog txog rau tus nom xiv thaus (Caparal Chef) los xij. Neejtswb tsis nce qib nai rau Cheeb li.

    Thaum muab tsab ntawv nce qib nom rau Cheeb ua tus “xivtri” kom Neejtswb xee kiag rau Cheeb, Neejtswb tsis xee thiab tsiv siab ces nws cem thiab muab Cheeb ncaws ib ncawstaw, thiab yuam kom Cheeb mus tiv rog tom hauvntej. Qhov xov no yog Cheeb niam ua tus pom Neejtswb ntaus Cheeb ces nws los piav qhia kuv. Qhov no ua kom yus paub txog lawv lub siab lim-hiam, xav kom yus ua lawv qhev tas musli xwb ces txawm zoo. Tsis xav pub yus ua nom ua nai kiag.

    Sijhawm cov pejxeem thiab tubrog khiav tebchaws los nyob Phakhao, kuv yog tus txawj ntawv thiab tuav tagnrho cov tubrog cov npe raws li hais no. Txawm muaj coob leej ntau tus Hmoob txawj ntawv thiab los tsuas siv tau sau tau rau nws cov Hmoob siv xwb. Tsuas txawj paub khaws ntaub ntawv cia xwb. Tsis txawj sau tej ntawv mus rau hauv nomtswv txheej siab.

    Tus Neejtswb tseem hais tias, “Tseem nce qib nai loj rau kuv (Leej Vwj) ces kuv yuav dhau mus ua lawv tus thawj coj tom ntej hauv lub Koosphas 21 los yog lub tebchaws Xeevkhuam thiab.” Tej lus no yog kuv cov kwvtij ua qhev ntaus yeeb rau Neejtswb haus tham rau kuv.

    Thaum kuv mus ua tubrog Fabkis nyob Loojhej, kuv tseem yog tub lhuas thiab txawj ntawv Blog thiab lus Blog zooheev. Kuv cov neejtsa xeem Lauj (kuv pojniam cov neejtsa) txawm thuam tias Neejtswb lawv ua nom loj, tabsis Hmoob Lauj ob tug yawmyij txawj ntawv tshaj. Ob tug ntawd yog kuv thiab Ntxhais Xyooj (kuv tus txivlaus). Lo lus qhuas thiab lus thuam no nrov ncha nthw thoob lub tebchaws Loojhej thiaj ua rau cov nom nai loj ciali muab tej lus no khaws chim, cib nyeej twjywm rau nruabsiab ib tiam dhau ib tiam txog rau nhub lawv laus tuag los daws lo lus no tsis poob rauqhov hais txog fab ntawv ces khiav tsis dhau kuv ntej li lawm. Lino, ces sijhawm lawv ho muaj cai saib xyuas nyob rau txheej siab me ntsis, lawv thiaj ua txhua yam kom cov neeg txawj ntse nce tsis dhau mus nyob tom lawv hauvntej.

    Thaum cov Hmoob thiab tubrog tawg tag los nyob rau Phakhao, tsoomfwv txheej siab kom muab cov tubnrog los sib teeb ua npe tshiab nyob kom muaj pab pawg thiab muaj be nyob rau hauv Koosthav Lao. Kuv mam xeem los muab cov be tubrog kho kom nyeem raug Hmoob cov be Hmoob thiab kho dua tshiab tagnrho. Kuv los ua haujlwm rau hauv hoobkan 1 tau muaj ib xyoos tawm ces thiaj muab cov be tubrog sau tiav tso tseg.

    Tas lintawd, kuv tseem yuav tau caij davlhau mus rau txhua lub yeej zov rog, xwsli Pajdoo, Khaaskhaib, thiab lwm qhov es mus sau cov tubrog tej be kom tiav tag huvsi. Tag tej haujlwm tseemceeb no yuav yog kuv ob txhais tes mus ua thiaj tiav. Tabsis Neejtswb lawv txiav kev txhua yam kom kuv nce tsis tau mus ua nom qib siab. Puas tsimnyog kuv txoj kev ua hauj lwm rau lawv?

    Vim pom Neejtswb lub siab tsis ncaj, kuv txawm tshem Lwm thiab Bliajtsab los nyob rau Koosphas 21 los tsuas los ua qhev, ua “Bua tshom rau dev noj” xwb. Kuv tsis tshem Lwm thiab Bliajtsab mus nyob rau Koosphas 21 los kuj tsis muaj txoj kev yuav daws tau nkawv cov teebmeem qhov tsis xav mus nyob Koosphas 23. Yog xa nkawv rau Koosphas 23 ces nkawv yuav raug txim raws txoj cai tubrog. Lub caij ua tsov ua rog, nyias tsis mus txumtim rau nyias qhov chaw nyob, tej nom yuav liam tias yus khiav tawm hauv tshav rog. Muaj txim loj heev.

    Ntawm kuv tus kheej txawm nyob hauv Koosphas 21 no mus txog nhub kawg los yeej yog cia lawv “Ua liaj rau saum kuv thiab cov kwvtij lub nraubqaum” rau cov neeg lim-hiam noj thiab siv xwb.

    Thaum hoobkas 1 uas yog kuv ua tus tuav ntawv tau txais hoobkas 2 tsab ntawv lawm, hoobkas 1 yuav tau sau ib tsab ntawv tso cai rau hoobkas 2 kom ntes tus neeg muaj kev txhaum los rau txim raws txoj cai. Kev ua lino ces yog kuv muab kwvtij coj mus rau txim ntxiv rau qhov uas kuv tuskheej tseem raug txiav kev nce qib ua nom qib siab lawm thiab. Kuv thiaj hais rau Lwm thiab Bliajtsab tias yog nkawv xav tias yuav tsis mus nyob Koosphas 23 ces nkawv mus xyuas tom tus kwvtij Xaivtuam Vwj nyob hauv tog tubrog nruabnrab (Koosles). Yog nkawv nyiam ua lintawd ces muab sijhawm 10 nhub rau nkawv mus xyuas. Lwm thiab Bliajtsab thiaj siv sijhawm mus xyuas. Kuv thiaj muab cov ntawv kaw tseg tos nkawv rov los txog mam txiav txim siab mus raws li cov lus tau hais tseg.

    Tomqab nkawv rov los txog, tas sijhawm teem tseg lawm, thiab nkawv txiav txim siab mus raws li cov lus tham tseg. nkawv npaj tawm hauv zos Phakhao mus rau tiaj rhawv zeb.

    Vim Neejtswb thiab Vaj Pov lawv yeej muaj lub siab phem raws li hais tas saum toj no, kuv thiaj tau nrog nkawv mus rau Koosles thiab coj kuv cov kwvtij ib tse mus kom tas. Yog kuv tsis mus ces yuav ua ib qho kev nyuaj. Yog nkawv ua tsis ruaj ntom ces yuav muaj teebmeem rau kuv thiab cov kwvtij. Vim lino, kuv thiaj txiav txim siab tawm mus rau Koosles lub 4 hlis 1964.

    Vim lino, Vaj Pov thiaj ua ntxeev ua nphau muaj caub cos, muaj kev chim rau kuv, kuv pab kwvtij thiab Xaivtuam Vwj. Vaj Pov thiaj ua ntxeev ua nphau tso tubrog sojqab taug Xaivtuam lw txog nhub Vaj Pov ntes tau Xaivtuam Vwj los tua povtseg. Xaivtuam tsuas yog ib tug Tomxeem Hmoob nyob tog Koosles xwb. Xaivtuam tsis yog tus yuav txeeb Vaj Pov tus nom ua. Tsis tsimnyog Vaj Pov tua Xaivtuam Vwj!

    Thaum kuv mus txog rau Koosles ciam av lawm, kuv tau sau ib tsab ntawv thiab mua rau Tshuteeb Yaj uas yog Yaj Saub cov kwvtij nqa rau Neejtswb Thoj nyob Phakhao. Cov ntsiab lus hauv tsab ntawv, kuv hais tias, “Kuv tusiab tsis tau nrog koj koom tes ua hauj lwm mus nxiv lawm. Ntawm kuv cov kwvtij tseem nyob rau ntawm koj xubntiag, cia lawv ua noj ua haus ywj siab raws kevcai tog ywjpheej. Yog koj lam muab leejtwg rau txim es koj tsis tso, kuv yuav los tso nawb.”

    NTU 8: Kuv Tawm Kev Ua Tubrog

    Tsis ntev tomqab ntawd, tog Lao Koomsas thiab tog nruabnrab rov sib tua. Ib nrab tubrog nruabnrab tawg mus koom nrog Lao Koomsas. Ib nrab khiav nrog Naiphoo Koosles mus nyob rau Vangviang.

    Txog xyoo 1969, pom tias cov neeg Lostsuas sib tawg ua coj ua ces ntau pab ntau pawg, tsis sib haumxeeb. Tsis tas lintawd, txhua pab tubrog tseem tawg ua ntxog ua ntxwg tsis ua qhov chaw ruaj siab, kuv thiaj txiav txim siab tawm kev ua tubrog rov los ua neeg pejxeem.

    Thaum kuv tawm los ua pejxeem, kuv tau txais lub luag haujlwm ua Tojxeem saib lub Khej Najbab, Moos Pem, tebchaws Xeevkhuam nrog Lao Koomsas sib huas kev txeeb niamtxiv pejxeem rau lub caijnyoog peb tog neeg Lostsuas los sib sau rau xyoo 1973. Kuv lub thwj Tojxeem yog Huabtais Lostsuas pom zoo thiab kos nws lub be rau daim ntawv tsimtsa kuv tus Tojxeem.

    NTU 9: Xaus Lus

    Xam txij xyoo 1969 txog xyoo 1975, raug tog Lao Koomsas ntxeev tebchaws, ua rau Huabtais Lostsuas thiab tsoomfwv Huabtais poob hwjchim, tso tebchaws rau tog Lao Koomsas, kuv thiaj tau nres tsis ua haujlwm Tojxeem txij li xyoo1975.

    Txog rau xyoo 1979, kuv tau tawm hauv tebchas Lostsuas mus rau zos Vibnai, Thaibteb, los rau Phabnabnibkhoo. Kuv tau txais kev teebtsa ua tus pab UNHCR tau ib xyoo, txij 1984-85. Tau tawm hauv Phabnabnibkhoo mus America, mus ua lub neej tshiab nyob rau xeev California.

    Kev piamsij thiab kev zoo hauv kuv tsev neeg uas yog cajces koom ib tug pog ib tug yawg yug tau txais rau tiam tsovrog Fabkis thiab Vaj Pov kuj tsis muaj yam zoo ua kom kuv tsev neeg tau ua nom ua tswv qib siab lossis ua neeg nplua nuj. Tej no los vim kuv poob rau theem cov neeg lim-hiam thiab muaj kev khib, ntxub ntxaug vim lawv kev txawj caum tsis cuag kuv txiav kuv kev thaum lawv muaj sijhawm los ua cov coj txheej siab. Kuv cov kwvtij tsis muaj ib tug tau plojtuag rau kev uarog zaum no. Qhov no yog qhov kev zoo siab rau kuv mus txog nhub kawg. Peb sawvdaws muaj txoj mhoo tuaj txog rau tebchaws America. Tus tau tuag los nws tuag raws kev mob nkeeg ntuj tsim (Natural causes).

    Qhov tusiab loj tshaj ntawm kuv cov kwvtij ncau pog yawg los ntau tiam yog cov raug Vaj Pov tua. Cov raug Vaj Pov tua muaj xwsli Qhuaxab Vwj, Xaivtuam Vwj thiab Ntsuabnus Vwj. Qhuaxab thiab Ntsuabnus Vwj yog pejxeem Hmoob. Qhuaxab raug Neejtswb Thoj cov tubrog tua nyob rau Phakhao. Ntsuabnus Vwj yog Qhuaxab cov tub. Raws cov neeg pom tus xwmtxheej, tsuas pom Vaj Pov cov tubrog ntes Ntsuabnus thiab muab nws nce davlhau lawm xwb, tabsis thaum davlhau tsaws tsis pom Ntsuabnus nqis hauv davlhau los. Txog nhub no los tsis nhov Ntsuabnus moo.

    Txoojkuam thiab Txawjtoog Vwj rov sib tua tuag tag rau Loojceeb los yog Vaj Pov tswvyim ntxias kom nkawv sib tua. Qhov no tu siab qhov tias nkawv ruam thiaj raug Vaj Pov ntxias sib tua tuag tas.

    Tej keebpuam no, kom nej txheej lhuas khaws tseg ua dabneeg qhuabqhia tias ib qhov ntawm neeg Hmoob txoj kev phem yog phem li kuv piav tas no.

    Zoo siab thiab uatsaug rau ib tshoob Hmoob laus lhuas uas tau nyeem thiab totaub txog kuv lub keebpuam los xyaw rau kev pom thiab tham txog lwm tus Hmoob nyob rau hauv no. Tej no yuav dhau mus ua dabneeg rau ib tsoom tub ntxhais lub neej tomntej.

    December 3, 2010

    Ua tsaug ntau.

    Npuag Txhim(Leej Vwj)



    Last edited by Nraug Liab Toj Siab on 27th September 2011, 6:30 am; edited 5 times in total

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: Npuag Txhim(Leej Vwj) Li Keeb Kwm

    Post  koojziagkabzaug on 25th September 2011, 4:26 pm



    Nyob zoo NraugLiabTojsiab,

    Ua tsaug ntau uas nws tseem pab nrhiav tej zaj keeb kwm tuaj tso rau hauv nov thiab.
    Ua nws tsaug nawb mog...Ob hnub no kuv hauj lwm ntau dhau lawm, kuv tsis khoom tuaj nrog nej txuas lus, thov nej sawv daws ua siab ntev tuaj pab zov tsev nawb mog.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    Me qigtaub
    Developer
    Developer

    Messages : 197
    Date d'inscription : 2011-09-09

    Re: Npuag Txhim(Leej Vwj) Li Keeb Kwm

    Post  Me qigtaub on 25th September 2011, 6:38 pm

    koojziagkabzaug wrote:

    Nyob zoo NraugLiabTojsiab,

    Ua tsaug ntau uas nws tseem pab nrhiav tej zaj keeb kwm tuaj tso rau hauv nov thiab.
    Ua nws tsaug nawb mog...Ob hnub no kuv hauj lwm ntau dhau lawm, kuv tsis khoom tuaj nrog nej txuas lus, Nthov nej sawv daws ua siab ntev tuaj pab Nyo zov tsev nawb mog.

    Nyob zoo Txiv ntxawm Toojtxim,
    kuv yog koj ib tug npawg tus tub, zoo siab tau ntsib koj thiab koj tau nyeem koj li keeb kwm ua dej num pab lub tebchaws Lostsuas, kuv yog cov neeg koom nrog koj nyob ib ub zos los, thaum kuv pom koj piav txog lub zos Najtoos kuv rov nco txog kuv tsev neeg thaum ub nej nyob ib zog uake los, ntau lub xyoo lawm uas kuv tsis hnov nej moo li lawm, kuv tau hnov tias kuv ob tug npawg tau tso peb tseg tag lawm kuj yog ib qhov chaw tu siab heev, txiv ntxawm Toojtxhim koj niam thiab koj txiv thiab koj niam puas tseem nyob, yog nyob ne nkawv puas noj qab nyob zoo thiab?
    cia siab tias koj ua txiv thiab tsev neeg yuav ntsib kev noj qab nyob zoo.

    Nraug Liab Toj Siab
    Sponsor
    Sponsor

    Messages : 772
    Date d'inscription : 2011-05-31
    Age : 30
    Localisation : Nyob ntawm koj ib sab.

    Npuag Txhim(Leej Vwj) Li Keeb Kwm

    Post  Nraug Liab Toj Siab on 25th September 2011, 9:26 pm

    koojziagkabzaug wrote:

    Nyob zoo NraugLiabTojsiab,

    Ua tsaug ntau uas nws tseem pab nrhiav tej zaj keeb kwm tuaj tso rau hauv nov thiab.
    Ua nws tsaug nawb mog...Ob hnub no kuv hauj lwm ntau dhau lawm, kuv tsis khoom tuaj nrog nej txuas lus, thov nej sawv daws ua siab ntev tuaj pab zov tsev nawb mog.

    Nyob zoo os kuv me muam Koojziagkabzaug, nws me nus tojsiab no ces txhoj txhoj puab li es mus ncig toj ncig pes es mus pom lawv li txuj es lam tau lam nyiag nqa los lawm xwb os, es xyov luag tus tswv puas kam li as?
    Yog tus tswv tau tuaj pom no ho zam txim pub 6 kuv thiab nawb mog!

    Ua tsaug ntau.

    Nraug Liab Toj Siab
    Sponsor
    Sponsor

    Messages : 772
    Date d'inscription : 2011-05-31
    Age : 30
    Localisation : Nyob ntawm koj ib sab.

    Khiav Tawm Teb Chaws Los Tsuas(Laos)

    Post  Nraug Liab Toj Siab on 25th September 2011, 9:48 pm

    Npuag Txhim(Leej Vwj)
    [img][/img]


    PUAMFAB HMOOB

    KHIAV TEB-CHAWS LOS-TSUAS

    By: Buasee Vue

    Tomqab Xyoo 1975.

    Nyob rau teb-chaws Los-tsuas xyoo 1975, lub teb-chaws poob rau tog Kooj-sam (communist) los tuav, ua rau lub teb-chaws muaj kev kub ntxhov. Niam-txiv pej-xeem lub siab thiab kev nrhiav noj haus nyob tsis tus.

    Tej tub rog txij tus nom loj nqis los ti nkaus rau tus tub rog dawb (xab xoom), tej nom pej-xeem (xeebveeb) raug communist coj mus kawm (xammabnas). Tej nom loj nom me feem coob mus kawm tsis rov los lawm. Cov tseem tsis tau mus los luag tshawb nrhiav los ti zujzus, thiab tshawb nrhiav cov uas tau ua tub rog los-puas ua nom ua tswv yav tas los rau luag. Luag muab tej qub nom qub tswv txo pov-tseg. Luag mus nrhiav tej tus neeg ib txwm tsis tau nrog luag ua nom ua tswv, los-puas tej tus neeg quav-yeeb los ua tus thawj coj. Vim coj kev phem zoo li no, tej pej-xeem thiab qub nom qub tswv yuav nrog koom tsis tau txoj kev-cai tshiab.

    Ib sij hnov hais khiav ib pab hla dej Najkhoom rau Thaib-teb lawm. Qee pab hla dhau, qee pab raug tua tuag rau hauv dej thiab tom tej hav-zoov. Ib txhia khiav dim rau Thaib-teb lawm. Muaj qee pab raug tua tuag tag nrho huv-huv. Muaj ib txhia mob tuag thiab tuag tshaib ib tog kev lawm los muaj. Muaj ib txhia me nyuam yaus tshaib plab ces quaj, ua rau niam-txiv muab kua yeeb lom kom qaug es txhob quaj tsam Nplog liab hnov ces lawv caum qab tuaj. Muaj qee tus, niam-txiv muab tau kua yeeb ntau zog lawm cav zoo siab tias me-nyuam tsis quaj lawm. Mus ib tsam muab txo los noj mis. Men-yuam twb tuag lawm ntxov. Muaj ib txhia men-yuam raug niam-txiv tso tseg huas tsis tau sij-hawm raug Nplog liab tua ib tog kev. Muaj qee nkawm niam-txiv los txog tog kev, tus niam yug men-yuam mos ces los tsis taus kev. Tus txiv muab tso cia rau hauv tej qab zeb, qab ca. Tus txiv los nrhiav tau kev tso mam rov mus tos. Los lawm ces tus niam cia li tuag nrog tus men-yuam yug tshiab lawm los muaj.

    Ntev zus, cov neeg uas muaj feem-xyuam nrog tog ywj-pheej tau tawm khiav tag lawm feem coob vim tias communist txoj cai tuaj ti zus, zoo li lub voj hlua uas zawm los yau zuj-zus. Cov neeg khiav thiab khiav ces txog rau yus zos.

    Thaum xub thawj yus zos nyob tom plawv. Thaum kawg ces yus zos nyob tom ntug. Tej kwv-tij phooj-ywg txheeb-ze nyob tog vaj tog tsev sau nra khiav zuj zus lawm thiab. Qee yim hais tias mus ua teb, nrog teb mus lawm ncaj-nraim. Qee yim hais tias mus saib neej-tsa. Mus txog tog kev ces xuas kev ncaj dua pem hav-zoov rau ib qhov lawm los muaj.

    Kuv xav tias ua siab nrog luag khiav los ho xav txog yus lub teb-chaws mas tshua kawg. Xav txog tej pab neeg uas raug cov nquam nkoj muab nchuav rau hauv hav dej, tej pab raug Nplog liab tua tuag tag thiab kev nyuaj siab ntau yam ces ho ua tiag nyob hnub thiab hnub ntxiv. Yus mas nyuaj siab ua ntxeev ua nphau. Xav tias tej kwv-tij phooj-ywg khiav tag lawm ces puamchawj tsis ua teb los ho xav tias yog yus tsis ua teb ntshai cov Nplog liab ho yuav tsis ntseeg yus.

    Yus lam ncig mus txog hauv teb, neeg khiav tas ntsiag to. Nce mus rau saum tej cav, tsa pob ntseg mloog, tso qhov-muag ntsia, tshav ntuj nrig. Tawv cav nti nrov ntij ntoj xwb. Cua tuaj komsis ua rau yus twb paub tau tias yog caij luaj teb kawg lawm. Tsa qhov-muag ntsia rau tej ntug teb, pom nplooj ntoo thiab ntxhuav tauj co nplawg ntia. Cua tuaj sab twg tuaj ces nplooj qaug lais raws seem cua lawm. Cua tuaj ib vuag ces hnov tej me qhov raj xyoob nrov vibvaub pem tej tuaj. Hnov tej me xyoob ntoo sib tshiav nrov qijqej. Tig mus ntsia hauv tej kev uas muaj hmoov av, pom me hneev nas txaij-vog. Neeg twb tsis taug tej kev no los ntev lawm.
    Taug kev mus txog qhov twg los kev twb nphob xwb-xuav. hnov tej nplooj nplej nrov zig zuag. Tig saib yog yus mus phoom cov nyuag kooj txaij dhia zam yus kev rau tom ntug kev xwb. Qee niam txiv kooj tseem sib ev caij nrwb-nrees. Tsa qhov-muag ntsia tej ru-tsev, pom ru-tsev dawb-lias. Tsis muaj neeg tuaj rauv-taws ntev li 2-3 hlis lawm. Mus ze zog ntawm tej tsev teb, pom tej tus noog dub tsaws rau saum ru-tsev. Pom noog ntxias teb ya sib caum-daws tawm mus tsaws saum ceg khaub.

    Nkag mus txog hauv tej tsev teb, pom qhov-cub tshauv twb tiaj tag, ri tag. Nas-tsuag dhia-dhia ua neev nas txaij-vog. Saib saum cuam nqeeb nyob ncaj qhov-cub, pom tej tus duav do mov lo-lo mov tab-sis twb tuaj pwm dub-nyos lawm. Nhov nplooj qhua nrov kig-kuag zoo li yog neeg mus ua hauj lwm sab nraum zoov es rov los tsev. Yus tsa qhov-muag saib yog nab qas tsiav caum tom kooj es nrov xwb. Xauj hauv qab txag, pom tej tus ko hlau muab hle tso tseg puag thaum dob nplej ntev los lawm. Ntsaum twb muab kaws khis tas ib sab. Pom tej tus hmuv ntoo tawm teeb-keem cog nplej tas es luag muab hle lub ncauj lawm es muab yav ntoo tso tseg ntsaum twb xwv av rau thiab muab kaws khis tas. Muab tej cuab-yeej no piv rau neeg mas yam li luag muab ntxias noj zog tsuag tag ces muab tso tseg.

    Tig xub-ntiag rov tawm mus nraum-zoov, ntuj teb ntsiag moo to. Maj-mam taug kev rov qab los deb li 50m, rov tig mus ntsia pom cua tshuab tej nplooj tsawb cog ncig tsev teb co laim-txias. Muaj qee daim vau fee-hlo rau sab, ho vau fee-hlo rov rau sab, zoo ib yam li tus tib-neeg uas luag muab ntaus ib teg sab phlu tod, fee hlo rau sab tod.

    Pom tej tsob kab-tsib cog ze taug ntuj kev. Tshav-ntuj ziab nplooj ntsws tas. Tus kav kab-tsib nyuam-qhuav tshoom siab li ib tshim ntawm npoo av xwb. ntsia tom ntug kev, pom xwb-kuab dai daj vog. Qee lub twb qhuav tas lawm los muaj. Ntsia tej quav nyab npleg ntawm ntug kev nphob-tsus. Txheej saud twb tawm tsos liab dub nyos. Paub tias tsis muaj neeg tuaj tsuj ntev lawm. Qhov txhia chaw ntsiag-to. Cov neeg uas tsis hnov tuaj ua suab-sab ntawd yog lawv khiav tas lawm.

    Tsa qhov-muag xam puag ncig qab teb qaum teb ib lwm rov los tsis pom yam dab-tsi txawv. Pom tej xyoob ntoo nyob lig-nkoov li qub. Qee tsob ntoo twb zeeg nplooj tas. Muaj qee tsob tseem tab-tom zeeg ya dajvog. Cua tuaj ib nthwv hnov xyoob sib ntswj, sib qoj nrov qij-qej hos nplooj ntoos zeeg nrov rig-ruag

    Sijhawm ntawd mas nplooj siab nplooj ntsws ua voj ua viag, yam nkaus li tej hluas nkauj hluas-nraug uas sib-sib hlub tsis sib tau los-puas sib ncaim lawm es yus ho rov ncig mus txog tej kev uas ob leeg tau mus ncig ua-si ntag. Sim neej no yog ua neeg es txhom-nyem siab npaum li tej lub sij-hawm no xwb, thov txhob tshwm-sim los ua neeg ib zaug ntxiv lawm lau.

    Ncig mus txog tej chaw yos hav-zoov. Nyob rau tej chaw so, chaw pw sawv-daws mus yos tua nqaij nruab nrag nphob-xuav. nplooj ntoos zeeg paug chaw nyob, chaw pw tsis muaj neeg cheb, tsis muaj leej twg rauv-taws rau tej qhov-cub los ntev lawm. Hav-zoov ntsiag-to. Pom ib tug noog ntxaijxub ya nrog cov men-yuam noog ya ua-si rau-ub rau-no. Nhov men-yuam noog puj-deeb ib sij khob ntoo nrov mos mos “nrawv..nrawb..” no qhov-ub qhov-no tuaj. Cua tuaj ib nthwv nhov nas quaj ib suab “qag” no, ho nhov hos-huam quaj “kuag…kuag…kuag” no pem hauv hav tuaj. Tej kab nploos tseem tawm du-lug, tab-sis tsis muaj leej twg tsuab los-puas zaum zov tshiab qhov-twg li.

    Sawv-ntxov-tsees, cuam kau ntsuag qees, tab sis ntsiag to tsis nhov suab phom nrov li yav nram ntej ub lawm. Suab phom nrov nhub no ces yog kuv thiab ib tug kwv-tij nrog kuv ua ke. Wb ob leeg tua xwb. Ib leeg tua tau ob tug nas thiab tua tau ib tug nploos xwb. Siab ua yoj ua yees.

    Rov los txog tsev, siab nrom-nrus. Yog zoo li no xwb mas xyov luaj teb los tsis luaj lau. Tab-sis txawm ua li cas los xij, yuav txiav txim siab saib yuav khiav los yuav nyob. Xav tsawg zaj los xaus qhov khiav thiaj tag xwb. Ib nhub Nyab laj los-tsuas liab tuaj hais ib yam. Ob nhub tuaj hais ob yam. Kaum nhub hais kaum zaj tshiab. Kuv los yeej ib txwm yog neeg tog pav-tis-kas ces lis cas los yeej yuav tsis dim.

    Txiav Txim Siab Khiav.

    Hmo-ntawd yog hmo 15. Lub hli tab-tom tawm tuaj nto tim npoo-ntuj. Ntsia pom duab hli ci dawb-lias rau saum tej pob-ntoos thiab tej yav cav loj thiab siab. Ntsia rov hauv tej theem qis tseem tsaus-ntuj-nyos. Pom cav dub-vog lig nkoov rau pem-toj nram-hav.

    Nyob tej teb quav nplej twb muab nthua tau thiab hlawv du-lug, tos cog nplej rau xwb. Cua ib sij tuaj ib nthwv ntsawj tej xyoob ntoo nyob ze ntuj teb nrov zawj-qees, sib ntswj qij-qej. Nyob hauv lub tsev teb ze-ze ntug kwj- deg, muaj 10 tawm leej neeg zaum maub dub-nyos sib tham lus ntxhi. Yog sab laj txog txoj kev yuav tawm khiav. Ib leeg hais ib yam. Kaum leej hais kaum yam. Ib txhia ke hais ke rov hem kom yus ntshai.

    Txoj hau kev tawm khiav muaj ntau txoj. Txoj yoojyim ntshe yuav yog txoj ntiav tsheb caij taug kev mus txog ze rau lub rooj-vag tawm ntawm ntug Naj-khoom lawm mam nyiag hla dej. Dua li yog mus taw, lav hav-zoov kuj muaj ntau txoj. Ib txhia pom tias ua li no yuav zoo thiab yooj-yim. Ib txhia ho tsis pom zoo.

    Cov muaj me-nyuam yau coob, xav ntiav tsheb ua neeg seej tawm mus. Cov muaj neeg loj, mus taw yooj-yim ho tsis kam. Tsuas zoo luag tsis paub. Yog luag paub ces yuav raug ntes tas. Yeem mus taw, lav hav-zoov yuav zoo dua. Hais-mus hais-los, muab hais haum rau qhov tias cia nyias nrhiav nyias kev tawm. Nyob ntawm yus xam pom txoj twg yuav yooj-yim. Nyias mus raws nyias siab nyiam.

    Sawv-daws sib tham tas, tig saib moo twb txog 3:00 sawv-ntxov lawm. Nyias mam mus nrhiav chaw pw me ntsis xwb ces kaj-ntug. Txawm ua li cas los qhov yuav ntom, ua kom Nyab-laj tsis paub mas sawv-daws yeej-meem rau siab ntso ua teb. Ua zoo yam li yog tus neeg yuav muaj siab nyob ruaj tiag. Tab-sis lub siab niaj-nhub ntaus tswv-yim yuav khiav. Pob-ntseg mloog-ncuv rau pem-toj nram-hav. Qhov tseem-ceeb cov yuav caij tsheb tawm mas tseem yuav tau ua ntawv taug kev thiaj mus dhau tau tej rooj-vag tub rog zov kev. Ua ntawv dag tias yuav mus xyuas kwv-tij neej-tsa, los yog mus ua liaj ua teb rau qhov-ub qhov-no. Ib sij nhov tias tus ntawd mus rau qhov-ub, mus rau qhov-no lawm. Tab-sis yus yeej paub, twb yog khiav lawm. Txawm ua li ntawd los nyias nyob nyias twj-ywm. Ua-txuj tsis paub txog li. Luag piv lus hais tias: Qav tuag vim lub suab, nquab tuag vim lub ncauj. Hais ntau kuj tsis zoo thiab.

    Nyob muaj ib nhub txawm nhov ib co poj-niam Hmoob nyob nruab zog sib tham hais tias ntu no cov Hmoob mas khiav coob. Tus npe hu li-ub li- no los khiav lawm. Muaj ib txhia ces ntiav tsheb caij tawm rau Vees-cas mus txog rau Npajduas, Nas-nyos mam mus taw mus hla Naj-khoom ces ze lawm. Muaj ib tug poj-niam ho nug tias, “Ais ua-li haj tseem muaj tsheb mus txog Npajduas thiab?”

    Ib tug tsuas ho teb tias, “Muaj kawg. Cov tsheb mus yuav nplej, thauj nplej tom zos Hmoob Phooxai, Npajduas. Thaum tsis tau los nag tseem mus taus ti nkaus Nasnyos thiab.”

    Ib tug tsuas ho nug tias, “Es ua-li niag tsheb muaj coob muaj ntau. Ua li-cas yus thiaj paub lub twg yob lug mus? Yus mus nug ub nug no me ntsis Nyab-laj ntes yus ne?”

    Ib tug txawm teb tias, “Tsis nyuaj li. Cov tsheb mus tod mas yog tsheb loj mus thauj nplej xwb. Lawv niaj-nhub tuaj nres rau ntawm lub tshav tsheb khw tsaus-ntuj. Lawv niaj-nhub caij cov tsheb ntawd mus yuav khoom yuav nplej tom Npajduas. Yus nug cov Hmoob ntawd ces paub los mas.”

    Tej-zaum luag pheej hais tias “ntuj pab” no ntshe yuav yog li no. Ntev niaj ntau xyooj los tsis lam nhov leej twg hais tej lus no paug yus pob-ntseg. Tab-sis ua ntej yuav tau nce lub tsheb kuj tsis yooj-yim. Tseem yuav tau ua daim ntawv taug kev mam mus tau.

    Tom-qab ua tau ntawv taug kev tiav, nhub ntawd tos tau tsheb caij mus txog rau hauv khw tsaus-ntuj, nroog Vees-cas twb lig nhub tig-lho qaij lawm. Muaj ib co poj-niam Hmoob muag khoom hauv lub khw tsaus-ntuj tiag. Thiaj nug rau cov poj-niam Hmoob tias, “Nej puas paub nhub no puas muaj tsheb mus tom Npajduas?”

    Ib tug poj-niam Hmoob kuj qhia ncaj tias, “Muaj kawg. Tab-sis tsam no lig lawm. Cov mus twb mus dhau tas lawm. Hos muaj ib lub nag hmo mus. Kuv twb nrog lawv mus yuav nplej tom zos Phoo-xai los txog tsaus ntuj. Nhov niag saws-faws (tus tsav tsheb) hais tias nhub no tsis mus lawm. Yog leej twg xav mus no tos tag-kis mam rov mus dua no.”

    “Uali cov tsheb yuav mus tod nres qhov chaw twg?” Kuv nug.

    “Tuaj nres ntawd.” Tus poj-niam Hmoob teb thiab taw tes rau kuv.

    Txog rau tag-kis sawv-ntxov 8 moo xwb cov neeg twb rov tuaj sib sau tas rau ntawm chaw nce tsheb qhov qub. Cov neeg muag khoom twb teeb khoom muag puv rooj tas, rau-qhov lawv yeej qhib rooj puag-thaum kaj-ntug pom kev huv xwb. Rov mus nug tus poj-niam Hmoob tias, “Puas pom lub tsheb yuav mus tuaj?”

    Tus poj-niam Hmoob tig ntsia ntawm qhov chaw nres tsheb. Tseem tsis tau pom lub tsheb nres ces nws thiaj teb tias, “Tsis tau tuaj. Tab-sis yeej yuav tuaj. Yog tuaj txog yeej nres ntawd.”

    Tos txog 9 teev thiaj pom ib lub tsheb loj cuas-qab. Yog hom nruab 6 lub log. Lub tsheb khiav nrov kig-koog, ntxhib-qhoj ntxhib-qhawv tuaj nres kiag rau qhov chaw qub uas tus poj-niam Hmoob hais tiag. Tus poj-niam Hmoob lub rooj muag khoom los yeej nyob ze ntsia ntsoov rau ntawm lub tshav nres tsheb thiab. Tus poj-niam Hmoob thiaj rov taw tes thiab qhia tias, “Lub tsheb yuav mus yog lub ntawd ntag. Nej mus nug saib nws puas mus.”

    Tom-qab muab lus nug rau tus tsav tsheb tas ntsiag to. (Lub yeeb-yam cov neeg nrog luag muaj taus tsheb, cov neeg Los-tsuas mas yeej coj zoo li ntawd. Ua neeg muab hlob tsawv. Luag lo lus twb dhau ntsiag lawm ntev mas lawv mam teb. Neeg Lao los yog Hmoob yeej muaj pluaj siab zoo li ntawd). Cov lus nug dhau kiag ntsiag-zog me-ntsis mam nhov teb nyuag yau-tsawv tias, “Nej yuav mus qhov twg?”

    “Peb xav mus Npajduas,” kuv teb.
    Tus tswv tsheb rov hais tias, “Mus tau thiab.”
    “Koj yuav ib tug neeg nqi li cas.” Kuv nug.
    “Cov neeg laus los neeg loj ib tug 600 kis. Cov me-nyuam yaus tsis yuav nyiaj,” tus tswv tsheb teb.

    NTU 3

    Sawv-daws tsaws khoom tsuag-tsuag rau saum tsheb tas, tseem tsis tau sawv kev thiab. Tus tsav tsheb haj-tseem mus ncig khw noj fawm, haus kas-fes lawm. Yus mas txhawj hlob txhawj yau, zaum tsis tus li. Tos ib nas-thi mas ntev npaum ib xuaj-moo. Tos ib xuaj-moo ntev npaum li ib nhub. Siab xav tau ntau yam. ntshai tsam cov niag Los-tuas liab ho lam los nug tias muaj ib cov neeg yuav khiav li ub li no mas ntshe yuav nyuaj li.

    Tos-tos ntev, twb txog 10 moo mam pom tus tsav tsheb los. Qhov tseeb mas yog nws yuav tos saib puas muaj neeg mus coob me-ntsis nws thiaj tau nyiaj ntau xwb. Nhov tus tsav tsheb hais tias, “Mus nawb, mus nawb.”

    Nws kuj tsis nug txog cov neeg tias leej twg puas muaj ntawv taug kev, vim tias nws yeej niaj-nhub khiav tsheb taug txoj kev ntawm Vees-cam rau Npajduas. Cov Hmoob kuj niaj-nhub mus-mus los-los nchuav-ntws. Luag thiaj tsis nug txog cov neeg caij tsheb ntawd.

    Tsheb pib ntog, txav-zuav, tshoj tig taub-hau mus rau txoj ncauj-ke twg los yus yeej paub. Ncauj tsis hais los siab xav tau tias txhia-niaj txhia-zaus caij tsheb tawm li no yog yuav mus tsev. Tab-sis zaum no yog yuav khiav tawm teb-chaws. Xyov yuav txog nhub twg li tau rov los pom Vees-cam. Xav txog yus tej chaw nyob, kev nrhiav noj nrhiav haus, ib qho rau ib qho.

    Tos nco tsa qhov-muag ntsia tsheb twb tawm dhau tshav dav lhau Xim-khais txog puag tom twb tsis muaj zos neeg lawm. Tsheb khiav quaj-qees taug kev. Leej-twg yuav zaum saum nruab-qaum, yuav mus ua dab-tsi, ciaj tuag, nyuaj siab li cas los tsheb tsis nrog leej twg paub. Tsuas paub khiav taug txoj kev raws li tus tsav tswj lub kauj mus kom txog qhov chaw tsheb mus tau xwb. Yuav lha ib lub rooj-vag zov kev twg mas txhawj, ntshai tuav plig-rawv tsam tub-rog lam nug yuam-kev ncaj yus ces muab yus khuav cia mas xyov yuav ua li cas. Tab-sis kuj zoo hmoov. Tsis nhov nug txog los tshawb xyuas ntawv mus kev li-cas. Dhau kiag Phu-phaj, Heem-hawj ob lub chaw zov kev uas ua nruj tshaj tas mas yus thiaj mam tso siab zog.

    Hnub qaij hlo lawm mam txog rau zos Npajduas. Muaj 2-3 leeg neeg Laos nqis rau ntawm zos Npajduas lawm. Pom cov niag koos-luam kwv phom ncig zom-zaws thiab. Xyov yuav nqis los xyov yuav caij tsheb twj-ywm. Xyov tsheb tseem yuav mus tom ntej ntxiv los xyov yuav nres rau qhov-twg. Yuav tsa ncauj nug los kuj ntshai tsam luag paub tias yus yog neeg tshiab.

    Nyob hauv tsheb tseem tshuav 2 tug poj-niam Los-tsuas thiab. Ob tug poj-niam ntawd yeej tuaj ntau zaus lawm. Ob tug poj-niam thiaj hais tias, “Ua li nej yuav nqis nov los nej yuav mus nqis pem zos Hmoob?”

    Kuv teb thiab nug tias, “Ua tom ntej tseem muaj zos Hmoob thiab?”

    Nkawv teb tias, “Tseem muaj ib lub zos Hmoob coob nyob ped. Lub tsheb no yuav mus thauj nplej pem zos Hmoob. Yog nej mus no mus txog pem zos Hmoob mam nqis los tau.”

    Hnub twb tig hlo lawm tsheb tseem khiav quj qees taug ib txog kev me mus dua puag pem hav-zoov lawm. Yog yuav mus rau pem lub zos Hmoob hu ua Phoo-xai no. Kuv thiaj nug tias, “Lub zos Hmoob nyob puas deb?”

    Tus poj-niam Los-tsuas teb tias, “Nyob tsis deb heev lawm lau.”

    Tsheb mus ntev li 30 nas-thi ntxiv. Ntsia pom neeg taug kev sib-nrhav. Nhov me-nyuam yaus qw zom zaws ntawm tej ntug kev. Mloog zoo zoo yog hais lus Hmoob. Yus paub hauv lub siab tias ze yuav txog Hmoob zos lawm. Ntsia raws tej ntug kev tsis tau pom dab-tsi txawv, rau-qhov Hmoob los ua zos tshiab thiab ua tsev rau hauv hav-zoov. Hmoob tseg tej ntoo nyob ze zos tsis ntov. Ua kom tshav txhob kub.

    Mloog lub tsheb tseem mus quaj-qees ntxiv kwv-yees yuav deb li 500 mev ces tsheb txo zog, khiav qeeb swb-zuav deb li 100 mev mam nres. Tig ntsiab ntawm tej ntug kev, pom tsev xov xyoob, vov xyoob pawg-lug rau pem tej hav ntoo. Hmoob sib tham ntsho-tsuam tawm tuaj xyuas. Nhov ib txhia hais tias cov yuav mus yuav khoom nram Vees-cam kuj nrog lub tsheb no mus.

    Peb sawv-daws tsaws khoom nqis thiab them nyiaj tas rau tus tswv tsheb. Sab-laj tias hmo ntawd nrhiav chaw so ntawm lub zos ntawd tso mam mloog saib Hmoob ua li-cas, mus li-cas mam ntaus tswv-yim saib yuav ua zaj twg zoo.

    Hmoob mus ua teb tas. Muaj ib lub tsev khoom dav, nyob ze ntug kev. Peb cia-li nkag mus so hauv Hmoob lub tsev ib hmos. Twb tsaus-ntuj lawm tseem pheej nhov neeg sib tham luj-loos taug kev. Mam ua zoo mloog no yog Hmoob ib txhia pheej hu ib txhia, “Nej txawm-siv mus tam-sim no ntag?”

    Ib co ho teb tias, “Aws, peb cab nyuj thiab ces yuav mus ntxov tsam tshav ntuj kub kub mus tsis taus. Tshuav lawv cov coob. Kaj-ntug lawv mam lawv-qab.” Luag piv lus tias “cheem dej lhob zoo dov cav.”

    NTU 4.

    Tsis Muaj Ncaujkev 1

    Tag-kis peb nrog pab neeg coob coob no ua-ke rau-qhov nyob taug txoj ntug kev tsheb no mus rau Nas-nyaus muaj cov khaib Nyab-laj nyob ua ntu-zus mus. Tsis tas li xwb, cov neeg pej-xeem nyob thaj-tsam no yeej yog neeg tuaj Nyab-laj tog xwb. Yus nrog cov neeg no mus ua teb ua tib pab ces luag yeej tsis paub tau tseeb tias leej twg yog leej twg.

    Tag-kis ntawd twb tsis tau kaj-ntug, cov neeg twb mus dhau ua ntej lawm coob. Taug kev nhov neeg sib tham ntsho-tsuam. Cov lawv-qab los muaj. Nhov ib tug tshuab rab qeej nrov laus laus ua-ntej. Peb maj-mam sib maub nrog pab neeg no mus kaj-ntug rau hauv Hmoob cov teb quav nplej do-dus.

    Tus yawg Hmoob tshuab qeej ho tso kawm zaum tos cov lawv qab. Qhov tseeb mas yawg cov poj-niam me-nyuam twb tuaj ua ntej rau Nas-nyos lawm. Yawg ib leeg rov mus muag tej khoom, nplej thiab ev khoom qho me ntsis xwb. Cov twb dhau ua-ntej tas los muaj. Cov nrog yus mus ua-ke los muaj. Cov lawv-qab los muaj coob. Nyias taug nyias kev nrwb-nris, ntsiag twb-to. Ib tug tis nug ib tug.

    Yus yeej xav twj-ywm tias lub npe mas nrom tias mus ua teb no, tab-sis feem coob yeej yog npaj khiav xwb. Txoj kev no raws li yus saib hauv kab ntiaj-teb mas mus taug lub tiaj no ncaj-nraim mus rau sab nhub poob nram hav mus ti-nkaus rau ntug Naj-khoom.

    Tsuas yog tej tsiaj mus tuj-toog tas nhub los ib tug tsis paub hais lus rau tug. Yus yog tib neeg taug kev ua-ke coob leej yuav tau nrhiav lus sib tham-ub tham-no kev thiaj luv. Kuv txawm nug tias, “Txoj kev no mus ncaj qhov-twg lawm?”

    Ib yawg txawm teb tias, “Mus dua puag tom cov roob pob-tsuas dub-nciab tod lawm.” Tus yawg Hmoob ntawd nhub nyoog kwv-yees tsuas muaj li 35 xyoos. Yawg tuaj mus ua teb rau Nas-nyos. Yawg mus los ntau fij. Yawg paub txoj kev ntawd zoo.

    Kuv tsuas ho nug ntxiv tias, “Nhub no peb mus puas txog Nas-nyos?”

    Yawg Hmoob teb tias, “ntshai yuav tsis txog. Mus li peb mus no yuav yog ib nhub thiab ib tav-su thiaj txog. Yog neeg loj xwb es mus nquas thiab sawv kev puag thaum tsis tau pom kev no tsaus-ntuj-zuag kuj txog thiab.”

    Kuv ho nug tias, “Nej sawv-daws cov neeg no puav-leej mus ua liaj ua teb rau Nas-nyos tag nrho yuam?”

    Yawg Hmoob teb tias, “Yog kawg. Sawv-daws puav-leej mus ua teb tag-nrho, tab-sis tej neeg no ces, koj-e, lam ua-txuj hais tias mus ua teb no. Nyuag poj qaib, niam npua twb muag tas. Twb-yog niag npaj khiav xwb. Cov lawv qab twb mus tsis tau txhij, cov ua-ntej nws twb khiav tas. Twb tsis ua teb li-as.”

    Tshav-ntuj kub-zus, neeg taug kev sib-zus. Cov mus taus, tsis ev nra nyhav, tsis coj poj-niam me-nyuam yau twb dhau ua yus ntej lawm. Cov mus tsis taus, poob qab tas. Tshav-ntuj kub tawg-ntiv, pom dab-pog lhawv teb laim-txias tom hauv-ntej. Tsa pob-ntseg mloog nhov kab, noog puj-daub quaj ntsoog-qees tim ntav roob pob-tsuas. Ntsia ntawm tej ntug kev uas muaj dej haus pom rauv taws tshiab qub pawg-lug.

    Qee lub cub-tawg tseem pom pa taws ncho-tsawv. Yog cov neeg cab tsiaj so es rauv-taws ua mov noj. Pom raj xyoob puj-tswm pov-tseg nxeev kwb-kus ntawm tej chaw zaum, chaw so. Tej ntu kev lug roob hav deb kuj tsis muaj zos neeg thiab. Qee ntu ho rov los tshuam rau zos neeg. Qee lub zos, cov neeg yeej mus ua Nyab-laj tag. Mus nyob gaum hav-zoo, nyuam-qhuav tawm rov los ua vaj ua tsev tshiab khwb-khiv xwb los muaj. Noj sij-hawm ib nhub thiab ib tav-su li hais mam rov jib neeg.

    Nyob hauv lub zos Nas-nyos tseem muaj neeg nyob qw zom-zaws. Jia tej tsev tseem nyob nqog-bo, tab-sis jia cov nruab vov sev twb tawm tsos dawb muag-lias, txho-taws zoo li tsis raug pa taws txhawb ntev lawm. Jia ntawm tej qab vag tsi taug pom tej nrog-tsuag twb tuaj juab-xiab. Tsis pom ib yam neev tsiaj. Nag twb naus tej neev nyuj twm tsuj ntev los lawm.

    Yus nug rau cov neeg nyob tej tsev ntawd tias lawv nyob tau hov ntev los lawm. Lawv teb tias lawv nyuam-qhuav los nyob tau 3-4 nhub no xwb. Ho nug tias ua cov tswv tsev no rau qhov-twg tas lawm. Cov neeg tsuas teb tias lawv tsis paub no thiab xwb.

    Mua qee yim, yus mus xyuas hauv tsev, pom txaj chaw, pom dai vij-tsam, pua du-lug cia. Yus nug tias yog lawv muaj taus no thov qiv coj mus txiav taws rauv. Lawv teb tias lawv nyuam-qhuav los nyob tag-kis no thiab xwb. Lawv tsis muaj dab-tsi li thiab no. Yus ho rov nug tias ua tej pam vov pam pua, vij-tsam nyob pawg-lug no ho yog leej twg li. Tej neeg los ua-ntej tsuas teb tias lawv los txog ces yeej muaj li ntawd lawm. Lawv lam pua hauv av pw xwb. Lawv xav tias me-jis tus tswv yuav los. Tos tsis pom los li lawm. Xyov nws yog leej twg cov. Tsis paub tus tswv li..


    NTU 5

    Pom tej tus neeg ev ib kawm blej, nqa ib tug mhuv cog blej taug kev nruj-nris. Yus nug tias lawv yuav mus cog blej los mus dab-tsi. Lawv kuj teb tias yuav mus cog blej thiab xwb. Tab-sis tej neeg sib paub zoo ho qhia rau yus tias tsis yog mus cog blej. Twb yog lawv khiav lawm ntag. Lawv lam ua-txuj ev kawm blej mus tso rau hauv teb xwb. Xuas kev ncaj dua tom hav-zoov lawm ncaj-nraim tsis rov los cog blej lawm li, rau-qhov lawv twb xub xa cov poj-niam me-nyuam tawm ua-ntej tag lawm.

    Muaj qee yim tseem tab-tom ua neeb kho. Muab bua tua lhab dej kub, kuam tau tso tseg tsis pom tus tswv lawm. Xav tais lawv tseem mus ua lwm yam hauj-lwm, me-jis mam rov los tsev no. Tab-sis tus tswv twb khiav lawm, tso pov-tseg rau ntawd. Ua li no los muaj, vim tias luag cov twb sawv-kev khiav lawm. Yog yus tseem ua neeb kho tas ces caum tsis pom luag qab lawm ces cia-li ua siab tsis noj pluas mov ua neeb li.

    Luag hais tias neeg coob koom ua-ke mas zoo dua. Tab-sis nws tsuas zoo rau nws txoj kev xwb. Muaj qee yam neeg tsawg kuj tau txhiaj-jim zoo dua los muaj.

    Tsis Muaj Ncaujkev 2.

    Tag-kis ntawd tab-tom kaj-ntug pom kev hu- zog xwb, tseem tsis tau muaj neeg tawm nraum zoov. Ib tug kwv-tij Hmoob Vwj nyob rau lub zos Av-xiav tau qhia tias txoj kev no mus rau ntug Naj-khoom kuj tsis deb heev. “Nej taug txoj kev tid (nws taw tes rau kuv). Kuv mam tso ib tug me-nyuam xa nej mus qhia xub ke. Nej taug-nraim txoj kev ntawd mus kom txog-kiag tus kwj-deg ces nej muab-nraim tus kwj-deg taug nqis hav. Txhob tso tus kwj-deg tseg ces nej yeej tshwm Naj-khoom xwb. Peb cov neeg twb mus daus jes tshwm kiag Naj-khoom lawm. Yam qeeb los nhub jeg xwb nej tshwm ntug Naj-khoom lawm.”

    Peb taug-nraim txoj kev li nws qhia. Ncaim kiag kev loj gag rau txoj kev me deb li 100 mev xwb txawm-siv nrov plig-plawg hauv kev ua sawv-daws ceeb-gaus. Yog 2 tug qaib qus ya dua puag saum cov ntoo hav-zoov siab^ lawm. Luag tej laus hais tias mus txoj kev twg yog jib qaib qus no zoo tsis heev no. Tsuav yog ya rov tom hauv-ntej lawm tseem muaj qhov zoo thiab. Txawm li-cas los twb sawv kev lawm ces cia ua siab mus kiag.

    Ncua kev deb li 1 mais tawm mam tshwm rau tus kwj-deg. Tus kwj-deg tseem muaj dej ntws-sis. Qee ntu tob txij hauv-caug. Qee ntu ntiav dua ntawd. Ob txhais taw lam tshais ruam, lub qhov-muag xam ncig-lees rau tom ntej tom qab ib pliag-ub pliag-no. Lub siab xav tau ntau yam. Xav txhij xav txhua. Xav mus txog rau yus tej qub vaj qub tsev, tej teb tej chaw. Kev ua noj ua haus. Yam yus tsis tau pom los lub siab pheej dag yus hais tias jhai yuav zoo li-no, zoo li-ntawd. Pheej ua bau-suav pom pliag-ub pliag-no.

    Ze-zus rau lub caij-nyoog teev tseg. Yus saib tej nroj-tsuag xyoob ntoo txawv zuj-zus. Pem ntu ua roob siab no muaj cov xyoob puj-tswm tej tug loj luaj caj-bab, dab-taws, tab-sis mus ze-zus rau ntug Naj-khoom cov xyoob me-zus luaj ntiv tes ntiv taw. Mus txog rau qhov tsis muaj xyoob ntoo, dej los saus qhuav zuj-zus mus txog rau qhov tsis muaj dej.

    Tej xyoob ntoo yuav pauv ua ciam zoj ib yam li tas cov xyoob puj-tswm yuav mus txais rau cov maib pha. Dhau cov maib pha mus txuas rau cov maib laib, nxhov-nyho ua xyuv-qees. Dhau cov hav maib laib mus ib ntus, jia pom tej tsob xyoob dos juab loj jis rawv vwb-vos ua nxooj-nyes. Pom tej lub me-nyuam goj ntoo nyob xyaw blooj qhua daws hauv tejlus pas-dej; tsis paub ntws tog twg. Yus yuav ce haus los tsis pom qab cev tes rau qhov twg. Tej no qhia rau yus paub tias yus tshwm dej Naj-khoom lawm.

    Mus tsuag-tsuag ntxiv deb li ib daim me-nyuam teb. Tsa qhov-muag ntsia tom ntej, pom to qhov kaj-lug, dawb-lias. Tsis muaj xyoob ntoo loj ntis. Ua-zoo saib yog tshwm rau tus ntug dej Naj-khoom lawm, tab-sis tseem tsis tau pom dej. Feem ntau nyob rau tus ntug Naj-khoom pem toj thoob nram-hav ua tiaj tus ntau, ua rau yus ntsia tsis pom tom hauv- ntej tias zoo li-cas, thiaj yuav tau nce ntoo los yog tuaj qhov siab thiaj pom.

    Ntsia txij li tej yus qhov-muag pom txog rau pem-toj nram-hav, qee koog muaj nroj. Tej koog tsis muaj nrog, pom hav suab-puam dawb-paug. ntsia mus kawg kiag ntug suab-puam rau puag tom plawv hav, pom ci-nplas hos laim-ntoom. Ntsia hla kiag rov sab tid, pom xyoob daj-lis, lig-nkoov muaj ntsis thooj li hav txwv-yeem laus, tab-sis vim yog sab tim Thaib-teb cov xyoob ntoo yeej nka-tawv zog.

    Ntsia raws tus ntug dej rau pem-toj nram-hav, pom qee koog ua hav tsawb ntsuab-xiab, laim-txias. Dua-li, koog twg muaj nplooj moj-phob txaij-vog no koog ntawd yog zos neeg.

    Yuav ua zaj twg zoo? Lub siab xav. Thaum nyob deb mas xav tias ua kiag li no, ua kiag li ntawd. Tab-sis thaum los ti-kiag ntuj dej lawm, yuav ua txoj twg twb yog qhov nyuaj.

    Nyob deb pom tsis tseeb, xyov dej ntws zoo li-cas tiag. Cia tos tsaus-ntuj mam mus xyuas ze^ saib yuav lha tau licas. Ob yam los sib sau ua yus lub cev tib-si. Nyob raws tus ntug dej Najkhoom sab tim Los-tsuas av, cov neeg khiav los taug nce-toj nqis-taug ua kev du-lug. Tso nhab pov-tseg pawg-lug. Nyuag lauj-kaub tais-diav pov pawg-lug cia. ntshai tsam Nyab-laj tuaj pom thiab mas xyov yuav ua licas.

    Tos tsaus-ntuj mam mus xyuas dej. Paub tau tias siv phuaj xyoob yuav lha tsis tau. Yog neeg laus xwb mas kuj yuav tau nyog. Muaj me-nyuam yau thiab yuav mus tsis tau. Tau nrhiav kev lha dej dua tshiab. Kawg yuav siv nkoj lha xwb thiaj tau..

    NTU XAUS

    Nrhiav nkoj

    Kev yuav ua kom tau nkoj yuav-tsum tos txog tag-kis kaj-ntug thaum sawv-nxov mam mus nyob ntawm ntug dej tos saib puas muaj neeg Thaib tuaj cuab jes sab tim av Laos. Yog muaj no mam ntiav lawv coj nkoj tuaj tos thiaj lha tau yooj-yim. Tab-sis cov niag Los-tsuas liab pheej caij nkoj mus mus los los. Yuav kom nws tsis paub los yog tsis ua rau tej neeg ntsia txawv qhov-muag, sij-hawm tawm mus rau qhov chaw do yuav tau lhe ris-tsho ntev cia. Nhav ris-tsho luv tawm mus kom luag xav tias yog neeg cuab ntses xwb.

    Yam li ntuj pab thiab. Txog rau tag-kis 7 moo sawv-ntxov txawm muaj ib tug neeg pej-xeem Thaib nquam nkoj lha dej tuaj daws moo cuab ntses sab tim av Blog. Ncaj-nraim tuaj ze ze ntawm qhov chaws sawv-daws los nkaum. Thaum tus neeg pej-xeem Thaib tab-tom khoov mus rub moo hauv dej nyuj-nyos, thooj-txhij thaum nws nhov lo lus tias “Thov koj pab muab nkoj nquam peb mus rau sab tid puas tau?” no, nws tsa qhov-muag lho tuaj ntsia. ntsiag-zog tsis tau teb li-cas. ntsias mas yog nws tseem xav tswv-yim, thiab muab qhov-muag ntsia kiag ib puag-ncig rov los xaus saib puas muaj neeg los muaj yam dab-tsi txawv-txav. Nws mam teb tias, “Nej nkaum twj-ywm tos kuv rov mus coj nkoj tso.”

    Tus pej-xeem Thaib yaws moo nrawm-nroos tau ces nquam nkoj sis rov sab tim Thaib lawm. ntsiag-zog li 1 xuaj-moo mam pom rov loo tuaj txog thiab hais tias ntawm qhov peb nyob ntawd muaj neeg pom coob tsis zoo lha. Nws taw tes kom peb mus rau puag nram hav deb li 600-700 mev.

    Sawv-daws tab-tom mus txog-kiag ntawm ntug dej, sib hais txog nqi lha dej xwb, muaj ib lub nkoj loj pes-nrab khiav-loo taug dej tuaj txog. Tus tswv peb ntiav xa neeg muaj ib tug tub-sab loj lawv qab loo tuaj txog, txheeb-kiag cov nyiaj nqi lha dej tag-nrho tuav-kiag ua-ke thiab hais tias, “Kav-tsij nquam lawv rau sab tid sai sai. Me-ntsis Los-tsuas liab tuaj pom, lawv yeej tsis paub tias nej yog neeg Thaib no. Lawv ua luaj-zus ib tog tuaj ces peb yuav ntxi nhiav tas tus lau. Nyiaj ces mam sib faib.”

    Tshwm Thaib Teb

    Tus nquam nkoj muab peb xa tsuag-tsuag tas rau sab Thaib av. Nws ib co tau nyiaj ces rov loo ploj tag mus tsev lawm. Cov Thaib tuaj ua-ke ntawd hais tias cov pus-liv thiab tub-rog los ua phem heev. Cov neeg los poob theem nrad raug lawv ntaus thiab tsim-txom sab heev kawg li. Tus thawj tub-sab loj hais tias, “Tsis ntshai. Yus tsis hais qhia, leej twg yuav paub.”

    Thaum tus neeg nquam nkoj xa peb dhau av ces nws hais tias, “Lawv cov pus-liv thiab tub-rog zov zos ua lim hiam heev. Nruab-nhub ntshai yuav tawm tsis tau. Nej nkaum twj-ywm nov. Peb mam xa mov tuaj rau nej noj. Tos tsaus-ntuj tso mam coj nej nyiag lav kev hmo-ntuj mus lawv thiaj tsis pom.”

    Zaum xav tswv-yim. Xav tau ntau yam tsis zoo, tsis ntseeg lawv siab. Tub-sab neeg phem coob ua npoj-ntws taug dej. Cov Los-tsuas liab los kuj caij nkoj taug dej mus los npaum-li. Yog nws pom yus hneev-taw ces nws yuav taug qab tuaj muab yus tua kiag ntawm ntug dej los yeej tas-li. Twb lha dhau dej, dhau lub rooj-vag nyuaj lawm, thiab twb muaj lub zos neeg pej-xeem Thaib nyob ze ze ntawd. Xav tau li no ces kuv thiaj coj kiag cov poj-niam me-nyuam tawm kiag los rau pem kev loj no. Peb taug kev tsuag-tsuag tib-pliag xwb ces peb tshwm-plaws tom ib lub zos neeg Thaib. Cov pej-xeem Thaib pom peb ces lawv thiaj coj peb mus cuag tus tswv lub zos ntawd. Lawv nrhiav mov rau cov me-nyuam noj.

    Muaj ib tug poj-niam Thaib laus los hais rau peb kom peb txhob mus tom tej ntug zos tsam muaj neeg ntaus los tua peb rau-qhov muaj neeg phem coob coob li. Nws kom peb nyob twj-ywm ib chim tsheb ntiav los tso peb mam caij tsheb mus lawm tom nroog loj.

    Peb so ib chim ntev-loo ces muaj ib lub tsheb ntiav thiaj los txog. Peb nce rau hauv lub tsheb ntawd ces thaum kawg peb thiaj los ua neeg thoj-nam nyob rau hauv yeej tawg rog Vibnais, Thailand.

    September 15, 1991
    Ua tsaug ntau.


    Last edited by Nraug Liab Toj Siab on 5th October 2011, 2:29 am; edited 3 times in total

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: Npuag Txhim(Leej Vwj) Li Keeb Kwm

    Post  koojziagkabzaug on 25th September 2011, 11:58 pm



    Nyob zoo NraugLiabTojsiab,

    Txawm yog luag tej li los kuv ua tsaug rau nws tseem nqa los tso rau hauv lub tsev txuj no kom tau ntau yam kwv huam keeb kwm sib txawv. Yeej eoo kawg li.

    Ib qho tsis tshuam txog zaj kwv huam, yog kev sau ntawv, cov tswv zaj no zoo li yog cov uas lawv xav hloov cov ntawv Hmoob Las Tees no tsis sub. Vim lawv sau txawv txawv, kuv nyeem tsis tau lo puav. Tab sis tsis ua cas, yog khoom mam tuaj muab kho kom zoo li cov ntawv qub thiaj li yuav khaws tau yooj yim. Kev yuav hloov ib cov ntawv tshiab hauv ib Haiv, tsis yog cia li tsim tau ais coj los siv xwb ces tau lawm. Yog yuav siv mus li, yuav tsum muaj tus muaj lub peev xwm thiab nyiaj txiag los mus hloov cov phau ntawv keeb kwm txuj ci uas twb sau tau li cov ntawv qub lawm. Vim Peb Hmoob tsis muaj puav pheej dab tsi li, tsuas tshua ob peb nyuag phau ntawv kab ke txuj ci uas tus Tswv Tsim cov Ntawv Hmoob no tau khaws thiab sau tseg xwb. Yog cia li hloov li no, puas muaj leej twg yuav muaj lub peev xwm thiab thooj nyiaj los sau dua ib cov ntawv Txuj Ci, Kev Cai Hmoob ntxiv lawm?


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    Sponsored content

    Re: Npuag Txhim(Leej Vwj) Li Keeb Kwm

    Post  Sponsored content Today at 2:49 am


      Current date/time is 8th December 2016, 2:49 am