google-site-verification: googlefbfddf59e706b96b.html

Latest topics

» KHAWV KOOB
by koobpovtxuj 19th June 2017, 12:44 pm

» Hmong dance hiphop 2017 [ dance zoo siav heev li]
by zabyaj 15th June 2017, 12:05 pm

» Ua zaub tsib
by koobpovtxuj 3rd June 2017, 10:33 pm

» Keeb Kwm Hmoob mus nyob Guyane
by koobpovtxuj 25th May 2017, 4:13 pm

» kuv cov duab.
by koobpovtxuj 23rd May 2017, 3:47 am

» pajhuam nrhiav mekabnoog tuaj ploj dua twg lawm
by PajYeebLaim 19th May 2017, 2:52 pm

» Xiong Chang
by koobpovtxuj 1st May 2017, 5:12 am

» 22 LEEJ NEEG HMOOB FOOB XEEB XYOOJ & HMONG TEBCHAWS
by Liajntsuab 30th April 2017, 7:00 pm

» Tswv Xyas mus ua tsov
by koojziagkabzaug 21st April 2017, 1:36 pm

» Paj huam nraug nrab mag poj laib kaus poob phem nyob Nplog teb.
by koojziagkabzaug 14th April 2017, 12:18 pm

» Hais Paj Lug
by Admin 10th April 2017, 2:28 pm

» NOM TSWV TXHOM COV NEEG TUAJ U.S.A. TSIS RAWS TXOJ CAI XA ROV QAB
by Liajntsuab 31st March 2017, 3:40 pm

» Yawg Hlob Vaj Pov
by Admin 9th March 2017, 3:06 pm

Tsev seev PajHuam

Hmong beauty nature

Compteur visitor

hnub 18/09/2010 los mus

    Hmoob Ntawv & Hmoob Lus

    Share
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 30th December 2011, 11:53 am



    Nyob zoo Pijpauj,

    Wow...! Cas nws yuav txawj hais ua luaj li os tej me Hmoob tshaj lij aw...!
    Thov ua nws tsaug ntau rau cov lus muaj qab muaj quag, muaj chaw txawb chaw rau, muaj paus ntsis. Tej lus li nov mas thiaj li tseem lus Hmoob tiag tiag li. Peb txhua leej yuav tau xyaum hais cov tseem lus Hmoob kom peb thiaj li yuav ceev tau peb tej txuj ci, keeb kwm thiab cov tseem lus.

    Pijpauj, yog nws khoom no ho rov tuaj tsi ntxiv rau peb tau khaws cia thiab tau kawm mog.

    Ua tsaug ntau.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 2nd January 2012, 4:13 am

    Nyob zoo KoojZiagKabZaug,

    Lam ua daj ua dos xwb. Qhov zoo khaws los ho khaw. Qhov tsis zoo khaw los muaj cia nod es peb mam sawvdaws sib pab muab txhim muab kho rau kom yog li qhov tseeb.

    QWS PAM (QWS yog Hmoob lus=tog pas, PAM yog Suav lus=tog pas) = 1. Yog ib tug qws(pas) ntaus pob uas neeg muab txua tau zoo es hlw ko. 2. Tej khoom dai saib uas muaj tus yamntxwv zoo li tus qws ntau pob. {Koj muab niag ko txhuam-hniav no txua ob tug qwspam rau me ab seb.}

    PAM THAWJ (PAM yog Suav lus=tog pas, THAWJ yog Suav lus=tobhau)= 1. Ib rab cuabyeej uas muaj lub tobhau loj loj tawm rau ib tug ko(ib tug pas). 2. Xuas PAMTHAWJ ntau. {Nws tib niag pamthawj rau laujkaub es thiaj zuav tag li ntawd.} 3. Muab tobhau sib tsoo li xuas pamthawj ntau. {Ob tug laug tshis sib nraus mas tso pamthawj xwb xwb.} Lolus PAMTHAWJ homkheev siv nrog TSO, NOJ, TSOO. e.g. TSO PAMTHAWJ, NOJ PAMTHAWJ, TSOO PAMTHAWJ.

    Cov Lus Hmoob uas muaj lolus THAWJ:
    THAWJ CAW =Cov cawv uas xub xub tawm hauv lub tsu cub cawv los.
    THAWJ COJ =Tus uas ua lub tobhau coj lwm tus.
    THAWJ FWM TSAV =Tus ntxoov nom.
    THAWJ LWM TUB NCIG = Cov coj thiab lawv tej tub teg tub taw ncig qav ncig nug.
    THAWJ THIAB(qog kiag Suav lolus THAU THAI) =1. Xya hauv plab los. 2. Rov yug dua tshiab. 3. Nyob tsis muaj chaw rau ub rau no.
    CAM THAWJ =Cavncauj ua ua tau; tawvncauj.
    CEEB THAWJ (qog kiag Suav lolus CI-N THAUD) =Tib yam li TSOOM THAWJ.
    CHIV THAWJ (qog kiag Suav lolus TSHIM THAUD) =Lub hauvpaus pib; qhov chaw xub tshwm muaj tuaj mus.
    KHAJ THAWJ =Hem kom ntshai dawb dawb.
    LAIJ THAWJ(qog kiag Suav lolus LAIV THAUD) =1. Keebkwm qhov chaw pib. 2. Muaj qab muaj hau; muaj chaw txawb chaw rau.
    POB THAWJ =Cobpob caws nij caws nawj kauv ua ib thooj li lub tobhau.
    POV THAWJ =Yam khoom uas qhia tau tseeb tseeb.
    PUAB THAWJ (qog kiag Suav lolus PAIM THAUD) =Haiv neeg uas nyiam ntoo phuam dawb saum tobhau.
    SAB YAJ THAWJ =Ib yom nroj noj tau.
    TOM THAWJ =1. Ncaj nkaus lossis ncav nkaus. {Kuv tuaj tomthawj thaum lawv noj mov.} 2. Ti qab ti luag; kawg paus kawg ntsi. {Ua dabtsi yuavtsum ua kom tomthawj.}
    TSAM THAWJ =Ib ntu sijhawm; ib ncua caijnyoog. {Lub tsamthawj peb khiav tsovrog mas neeg txomnyem heev.}
    TSOOM THAWJ(qog kiag Suav lolus TSOOJ THAUD) =Lub thauj uas tsuam kom paub qhov sib qhov hnyav.
    XUB THAWJ (qog kiag Suav lolus XYIA-N THAUD) =Tib yam li CHIVTHAWJ.
    ZEEJ THAWJ (qog kiag Suav lolus ZWv-N THAUD) =Tobhau tibneeg.

    LOOJ THAWB (qog kiag Suav lolus LOOV THAUD) =1. Zaj lub tobhau. 2. Lub tawb voj looj tobhau.

    THAWJ kuj yog ib lolus puab ntej(prefix) uas muaj lub ntsiab hais tias: qhov pib, zaum ib kiag. THAWJ TEG, THAWJ TUG, THAWJ DAIM, THAWJ QHOV, THAWJ NPAJ...

    THAWJ yog nyob tib lo xwb ces muaj lub ntsiab hais tias mus qhauhau lossis mus nyoos loslua kom lwm tus lees txais yuav. {Peb khiav mus thawj Nplogliab no Nplogliab kuj tsis phem thiab.} {Niag hluas nkauj ntawd khiav mus thawj txiv lawm os.}

    THAWJ kuj yog lus Hmooblees lo THAWM. Hmoobdawb hais: Lub tsho no thawm hw tag lawm. Hmooblees: Lub tsho nuav thawj fw taag lawm.


    Last edited by PIJPAUJ on 6th January 2012, 7:08 pm; edited 7 times in total (Reason for editing : Added new words)
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 2nd January 2012, 12:56 pm



    Nyob zoo Xyoo Tshiab Pijpauj,

    Wow...! Me Naib aw...! Cas nws yuav txawj tso pov thawjli os me ntxawg...!
    Haib kawg nkaus, nws muab tau lub noob txiv rau peb saj lawm, zaum no yuav tuaj kom nws nrhiav laij thawj rau peb kawm ntxiv nawb...! Zoo tiag tiag li, yeej hais tau cov ntsiab lus zoo heev, xav kom Peb Hmoob rau siab nrhiav Hmoob cov lud ntau dua ntxiv. Nws khoom no rov sau dua ntxiv rau peb tau kawm nawb.

    Ua tsaug.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 3rd January 2012, 11:35 pm

    Nyob zoo KoojZiagKabZaug,

    Ua tsaug rau nws kev txhawb siab. Lus Hmoob kuj tsis paub ntau tsua yog lam sau tej nyuag uas peb pheej hnov hnov seb ho muaj licas xwb.

    LOOJ yog Hmoob qog Suav los LOOV uas muaj cov ntsiab lus li no: 1. Muab ntxig tshooj. {Muab nkawm thomkhwm los looj koj ob sab kotaw rau.} 2. Tsis meej tsis pem; tsis hnov suabsab. {Nyob tau 2-3 hmo no tsis tau pw li mas zaum qhovtwg ces yeej looj hlawv hlias lawm xwb.}
    LOOJ KOOV =Nkaus, kuskes; npau/tu-siab yooj yoojyim. Xws li, ntsujplig LOOJKOOV; menyuam LOOVKOOV.
    LOOJ LOOG =Lub fwjchim; tus hwjhuaj.
    LOOJ MEM (qog Suav lus lo LOOV MAIJ. LOOV=zaj, MAIJ=mem(mem tes mem taw)) = Zaj li hlab ntsha; mem toj.
    LOOJ TSIM =Feeb tsis meej es ua li npau-suav.
    LOOB TSWB(qog Suav lu lo LOOV TSU. LOOV=zaj lossis lagntseg, TSU=npua) = 1. Zaj npuas(npuas lagntseg) 2. Lagntseg. {Niag ntsejmuag loobtswb e! Kuv twb hais koj ntau lwm lawm ua cas xij tsis hnov li.}


    Last edited by PIJPAUJ on 6th January 2012, 5:31 am; edited 1 time in total
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 4th January 2012, 9:42 am



    Nyob zoo Pijpauj,

    Nws txhais tau lus Hmoob zoo kawg nkaus, yog muaj coob leej lim xeeb li nws mas peb yuav rov paub peb cov lus Hmoob zoo dua. Niaj hnub no mas sawv daws twb hais lus Hmoob tsis yog li, lam hais xwb tias yog lus Hmoob tab sis hais rov qab rov quav thiab tseem muab lwm xeem lus txhais los ntawm lwm xeem lus los hais, twb tsis kum siv nrhiav cov tseem lus Hmoob los hais li.

    Ua tsaug rau nws lub caij muaj nqes.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 6th January 2012, 6:12 am

    Nyob KoojZiagKabZaug,

    Ntuj os me KoojZiagKabZaug aw! Kuv ces lam ua nyuj qua ntse nees zis. Muaj qee tsam yus twb rov tsis paub hais tias xyov yog yus ua dabtsi lawm thiab.

    Hnub no peb ho los saib lolus TSIB.

    TSIB = 1. Tej lub pob tawv tawv ua thi zees uas quas xyoob ua tej ywb yav. {Yog koj yuav siv xyoob vov tsev, mas koj yuavtsum tau muab lub tsib doob tawm.}
    2. Ib lub zais uas ntim ib co kua ntsuab iab iab lo ntawm thooj siab. {Nws muaj pobzeb rau hauv nws lub tsib ces lawv thiaj muab nws phaiv.}
    3. Tus lej tsib (5).
    4. Hais tas zaj tas zog kom ntxiv nujnqi rovqab. {Naghmo nws mus tsib tsis tau nqi nram lawv es nws thiaj chim chim.}

    TSIB LIJ =Paub kev paub cai.
    TSIB NUJ TSIB NQI =Taij kom them tej nujnqi.
    TSIB XWM (lo no ntxim yog qog Suav lo TSW SWJ= Paub qav paub num) =Paub qab paub hau, paub siab paub qis, paub kev paub cai.
    KAB TSIB(qog Suav lolus KA-N TSAW) = Ib tsob tauj nyeg uas qab qab zib es zoo zoo ua suabthaj.
    COB TSIB =1. Haivneeg Nyablaj. 2. Siab phem siab nyoos.
    PAIM KUA TSIB =Haus cawv iab.
    THOOB TSIB(feem ntau hais ua THOOB TSIB TO NROG) =Paub ub paub no.
    TXIV LWM TSIB =Ib co txiv ntoo qaub qabzib liaj uas tuaj tuaj pos.
    ZAUB TSIB =Ib co zaub ntsuab hlab dab kub uas ntsws ntsee ua tej kaj es zoo noj ntev loo.


    Last edited by PIJPAUJ on 13th January 2012, 8:46 pm; edited 1 time in total
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 6th January 2012, 10:07 am



    Nyob zoo Pijpauj,

    Twb yog nws keej thiaj muaj quav nyuj ntse zis nees

    Neeg ua tem toob tab sis lub tswv yim tseem qoos qoos

    Pijpauj, nws txhob muab nws txos qes, nws yuav zoo siab tias nws tseem yog tus ua peb ntej.


    Khuv xim peb Hmoob tsis sau tseg, tej lus tseem ceeb thaum ub tsis muaj leej twg txawj hais kiag li lawm. Kuv nrhiav cov neeg txawj hais paj lug tas zog tab sis kuv nrhiav tsis tau lu lawm, khuv xim kawg li.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 6th January 2012, 7:02 pm

    Nyob zoo KoojZiagKabZaug,

    Yog lawm. Hmoob phaum neeg uas txawj txawj tej pajlug qub qub thiab pajlug Suav yeej ncaim ntiajteb tag lawm. Nimno peb twb muaj ntawv lawm ces cia peb mam khaws li peb khaws tau.

    Tej uas tsis pab kom Hmoob vammeej lawm tomntej ces lam khaws kom luag paub hais tias yus tau muaj dua los lawm no xwb. Tej ntawd txawm hais tias ho poob tag lawm los nyaj yuav tsis rub kom yus haivneeg poobqab licas. Kuv xav hais tias peb yog neeg txheej 21 mas peb li yuav zoo dua lawv tej laus li lawm. Yog lawv zoo dua peb ces lawv yeej nrog taus mabsua sib txig sib luag lawm. Vim lawv tsis zoo kiag es lawv thiaj nrog tsis taus leejtwg muaj dabtsi nyob qhovtwg rau peb khaws. Yog li ntawd, tej uas peb khaws tsis tau ces suav hais tias yog kev kobhuam xwb es thiaj tsis muaj neeg xav khaws.

    Feem ntau ntawm cov pajlug qub qub mas txawm muaj neeg txawj hais los tus neeg hais kiag yeej rov tsis paub xyov nws hais nws abtsi li lawm. Nws lam qog tau cov suab hais lus xwb. Nws yeej tsis paub lub ntsiab thiab tus qabhau li lawm. Kev ua li ntawd mas tsua zoo khav rau cov neeg tsis muaj kev kawm xwb. Yog peb coj li lawv ces peb rovqab rhuav peb tus kheej rau luag lwm tus nkaus xwb.

    TSIM = 1. Rhawv tawm los, xeeb kom txawm muaj. {Ntuj tsim lub ntiajteb} 2. Xeeb kev nyuajsiab ntxhovplawv rau, txhub kom puas tsuaj. {Txij thaum tus txiv yuav tau tus niam los nws yeej muab tus niam tsim txog hnub tuag kiag.} 3. Ras xeev hauv txoj kev tsaugzog los, kees. {Yog koj tsim tau ntxov no ces tsa kuv thiaj od.} 4. Lub meejmom ntawm tus ximxoo. {Nws poob tsim tag vim lawv pom nws tubsab.}

    TSIM NUJ =Txhua tus xav tau, raug nqi ntau, ntxim muaj nqi.
    TSIM NQI =Txhua tus xav tau, raug nqi ntau, ntxim muaj nqi.
    TSIM NYOG =Txaus ua, yuav tau leg.{Nws tu koj loj mas tsimnyog koj hlub nws nawb.}
    TSIM TXIAJ =Txhua tus xav tau, raug nqi ntau, ntxim muaj nqi.
    TSIM TXOM =Xeeb kom muaj kev nyuaj siab ntxhov plawv rau.
    MUAJ TSIM =Zoo tau muaj xim muaj xoo.
    NTUJ TSIM =xeeb txawm raws li ib txwm muaj, tsis yog mam xeem xeeb.
    POOB TSIM =Poob ntsejmuag, rhuav phlu.
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 7th January 2012, 5:54 am

    TSIJ = Ntsaws kom mus, ntxig kom mus.

    TSIJ QEES =Tsuas muaj txav zus rau tomntej, nam rau tom hauvntej.
    TSIJ PES QEES =Nam pes ntiag.
    TSIJ QUJ QEES =Nam zujzus rau tomntej.

    KAV TSIJ(qog Suav lus lo KAN TXHUIj) = Yeejmeem ua ntxiv, ua tsuagtsuag.


    TSIV = 1. Tshai rau qhovchaw tshiab. {Peb tsiv sab qaumteb rau sab qabteb.} 2. Txav tawm(Lus Hmooblees).{Koj tsiv kev me ntsiv quav kuv yuav lug moog.} 3. Heev heev, nyaum nyaum.{Tus maum dais coj tub ntawd tsiv kawg nawb.} 4. Tsis ntxim mloog/saib, ntxhib. {Tsis txhob hais tej lus txhwj txhwj thiaj tsis tsiv mloog.}

    TSIV TSAWV = Muaj ntsi ua saub tsawv?(paub tsis tshua meej lawm. Thov pab kho.)


    TSI = 1. Muab tso kua. {Zawv khaubncaws tas no ces nco ntsoov muab tsi dej nawb.} 2. Tsom/ne rau ib qho. {Yog koj poobzoo lawm no ces tsi rau sab qaumntej xwb es thiaj nrhiav tau kev los tsev.}

    TSI NTSEE = Tsom ntsoov/ne nraim rau tib qho.
    AB TSI = Yam twg tsav twg.
    DAB TSI = Yam twg tsav twg.


    TSIS = 1. Ib hom voj hlua cuab noog. {Kuv qiv koj pob tsis mus cuab yib lawm nawb.} 2. Ib lolus tig lwm lo kom ntxeev lub ntsiab rau sab yeeb(negative). { Muaj(nplua nuj, pom tau) ntxeev ua tau TSIS muaj(pluag, kug, dulug)}

    TSIS YOG ntxeev tawm ntawm YOG
    TSIS KUB ntxeev tawm ntawm KUB...

    TSIG = 1. Tej noob qoob noob loo uas ntai/lov es tsis tshua zoo ua noj lawm. {Khaws cov tsig txhuv thiab tsig kws cia pub qaib pub npua nawb.} 2. Ib lub suab sis ntawm lo TSIM. {Koj mus lawm ntev loo ces kuv twb tsaug ob tsig zog lawm las as.} 3. Ib lub suab sis ntawm lo TSIS. {Kuv mus cuab tsig nahas tsis niam mag li.}

    TSIG TXHUV = 1. Tej txhuv lov. 2. Cov noog piv
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 9th January 2012, 4:55 pm

    TSAB = 1: Hmoob lub ib lub xeem. 2: Ib zaj lus rau ib yam twg (qog Suav lus lo TSA-NG). {e.g. TSAB NTAWV, TSAB XO}. 3: Ua-txuj ua, lam ua cuav. {e.g. TSAB MOB} 4: Cejluam; faib; sam pajtshab. {e.g. TSAB YEEB TSAB TSHUAJ.}
    TSAB MOB = Ua-txuj ua li tias muaj mob.
    TSAB NTAWV = Ib zaj lus uas sau rau hauv ntawv.
    TSAB TWS = Plauj tw; tus kotw luv luv; tus kotw nqws nqws.
    TSAB XO = Ib zaj lus xa xov.
    ===============================
    TSAM = 1: Su/xob/o yam nruj nreem. 2: Tsovrog (qog Suav lolus TSAJ-N).
    TSAM CHAW = Noj chaw ntau, nkim chaw dawb dawb.
    TSAM NTOG = Nyob tau nruj nreem. {Kuv pom ib niag npua rog rog pw tsam ntog ntawd ntug kev.}
    TSAM THAWJ = Ib ncua caij nyoog, ib ntu sijhawm.
    TSAM PLAB = Lub plab nruj nruj.
    TSAM TSAM = Su nruj nreem.
    CHEEB TSAM = Ib puag ncig.
    FWV TSAM = Cibfim, lub caij nyoog haum.
    IB TSAM = 1a: Ib ncua sijhawm tom hauvntej. {Ntim pob su no rau koj es ib tsam thiaj tau noj.} 1b: Ib nyuag ncua sijhawm luv luv. {Koj tsis ua dabtsi ces tuaj nrog kuv nyob ib me tsam os.}
    NIAS TSAM = Ntau tsovrog; tuarog.
    NTAUS TSAM = Ua tsov ua rog; tuarog.
    NTSHAI TSAM = Muaj qhov txhawj tsawv.
    NYAB TSAM = Muaj qhov txhawj tsawv.
    THAJ TSAM = Ib puag ncig.
    VIJ TSAM(qog Suav lu lo VWv-N TSAj-N) = Tsev ntaub thaiv yoov tshaj cum.
    ===============================
    TSAJ = 1: Ib hom nroj uas siv tau daim tawv ua xov. {e.g. HNAB TSAJ}. 2: Tsuj nias sib law pes liag kom txag siab txag qis. {Koj tsis txhob muab yav cav ko tsaj tsaj maj!}
    TSAJ LAB TSAG = 1: Tej yam uas txag txag es txhobtxwm cia tsaj. 2: Tsaj tej yam uas txag txag.
    TSAJ QAB = Dhia maum caum nrog nkauj lossis suab paj nruag.
    HNAB TSAJ = Tej hnab uas yog xuas xov tsaj xaws ua.
    ================================
    TSAV = 1: Hmoob ib lub npe laus. {e.g. TSAV Vaj, TSAV Ntxawg...} 2: Tswj thiab fwjxwm kom mus tau li siab xav.{ e.g. TSAV CUAB, TSAV YIG, TSAV TSHEB...} 3: Ib hom twg, ib xaj twg. {Koj yog tsav tsim nuj qas tsi li neeg?} 4: Tus thawj(muaj qee lo yog qog Suav lus lo TSAM-NG. i.e. CUAB TSAV, FWM TSAV)
    TSAV PUAB = Nruab xyoob.
    TSAV XWM = Tswj haujlwm.
    CUAB TSAV = 1: Tus kav/tswj tsev neeg(qog Suav lus lo CIA TSAM-NG). 2: Tus sawvcev tsev xyomcuab uas laig ubno rau tus tuag.
    FWV TSAV = Tus kav/tswj lub tsev(qog suav lus lo FUM TSAM-NG).
    PAJ HUAM TSAV = Ib hom ntoo tawg paj dawb dawb es noj tau.
    TEEB TSAV = Cov teeb taws roj uas muab tus teebxeeb raus ib ya hauv tais roj es tus nplaim nyob tim ntug tais; teeb paj dib, teeb paj tsav.
    ====================================
    TSA = 1a: Xeeb tsim kom sawv los nyob ruaj nreb. {Thaum twg koj mam tsa koj lub tsev?} 1b: Ua kom sawv hauv lub lav pw los. {Mus tsa koj txiv los nrog kuv tham ib pliag seb.} 1c: Ua kom rov ciaj sia. {Yesxus tau tsa tej neeg tuag lawm sawv rov los.} 1d: Nqa ib tog kom siab zog lwm tog. {Koj tsa lub pobzeb no seb.} 2: Ib lub suab sis ntawm lolus TSAV. {Ib rab teb ib tsa txuj.} 3: Plim ntsejmuag saib rau qhov siab zog (qog Suav lolus TSAN). {Tsa koj lub qhovmuag saib ntiajteb ua neej thiab lauj!}
    TSA ZAM = Ntim zam.
    TSA NTSWG = Muab hlob.
    TSA CAI = Pab kom txoj cai loj tuaj.
    TSIM TSA =Xeeb kom muaj nyob.
    XAIV TSA = Muab suab muab npe kom sawv ua thawjcoj.
    ==================================
    TSAG = 1. Ib txhia Hmooblees lolus RIAM. 2. Tej plas av uas tu/sawv ua tej theem. {e.g. TSAG AV}
    TSAG TSAG = Ib lolus uas neeg nyiam hais thaum tabtom caij rawv es tsaj mus tsaj los.
    TSAJ LAB TSAG --> Saib rau lo TSAJ saud.


    Last edited by PIJPAUJ on 23rd January 2012, 5:57 pm; edited 3 times in total (Reason for editing : Add more words)
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 9th January 2012, 9:55 pm


    Nyob zoo Pijpauj,

    Ua tsaug ntau rau nws lub tswv yim laj lim nawb mog. Peb Hmoob tsawg leej thiaj li tau nws tus leej nkaub, txawj saub peb Hmoob li ntaub, txawj sawv Peb Hmoob li ntawv, txawj nthuav Peb Hmoob li lus txhua, txawj cais Peb Hmoob tej lus hais. Yog ib qho zoo tshaj li.
    Pijpauj, hnub no kuv xa ib lub hnub qub rau nws, nws tuaj no xam saum ntuj seb puas pom ya dhau los...Hahhaah...!Ua tsaug.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 10th January 2012, 10:16 am

    koojziagkabzaug wrote:
    Nyob zoo Pijpauj,

    Ua tsaug ntau rau nws lub tswv yim laj lim nawb mog. Peb Hmoob tsawg leej thiaj li tau nws tus leej nkaub, txawj saub peb Hmoob li ntaub, txawj sawv Peb Hmoob li ntawv, txawj nthuav Peb Hmoob li lus txhua, txawj cais Peb Hmoob tej lus hais. Yog ib qho zoo tshaj li.
    Pijpauj, hnub no kuv xa ib lub hnub qub rau nws, nws tuaj no xam saum ntuj seb puas pom ya dhau los...Hahhaah...!Ua tsaug.

    Nyob zoo KoojZiagKabZaug,

    Ua tsaug ntau rau nws lub hnubqub thiab tej lus txhawb siab.

    Tejzaum mas yus kuj tobtaub thiab pom npaum li yus xav xwb, tabsis yog peb coob tus mentsi no ntshe yuav totaub dav dua thiab pom mus ntxaws tshaj nod lawm thiab. Yog li ntawd, sawvdaws pom qhovtwg tsis yog los yeejmeem kho rau. Nws ho tshuav qhovtwg tsis txhij tsis ntxaws los kavtsij ntxiv rau.

    Peb Hmoob li mas ib leeg nyob ib sab ntuj ces tejzaum tib lolus los peb yuav nyias siv nyias lawm ib yam. Yog mus taus mas peb sawvdaws sib koom txhais es peb thiaj paub hais tias leejtwg nyob qhovtwg ho siv lus Hmoob licas.

    TSAUB = Tej tub ki uas pojniam xeeb yam tsis muaj txiv.
    KAS TSAUB = Ib lolus ntxhib rau menyuam tsaub.
    MENYUAM TSAUB = Menyuam uas pojniam nkawg tau tawm los yam tsis muaj txiv.

    TSAUM = Tej txhia Hmooblees lolus RAUM.

    TSAUJ = 1. Noog thiab qaib quaj uantej nteg qe. 2. Ib txhia Hmooblees los RAUJ.
    TSAUJ ZI = Nrov nplawg ntias cuag qaib tsauj.

    TSAUV = Ib txhiav Hmooblees lolus RAUV.

    TSAU = 1. Ib tug tsiaj zoo li nas uas ya tau tej ncwb ncua. 2. Ib tug tog qws lossis ib teg khaub uas muab hlawv nqa kom pom kev. 3. Noj txaus lawm. 4. Muab tso xyaw kom ntev. {e.g. TSAU DEJ, TSAU ROJ, TSAU AV...}

    TSAUS = 1a. Tsis muaj qhov kaj. 1b. Ntxoov thiab hnyoo.
    TSAUS MUAG = Ib hom mobntsaj uas ua rau neeg fos pes ntais thiab looj pes hlias.
    TSAUS NTAIS = Cia li tsis pom kev yam ntawg ntiag.
    TSAUS NTI = Ntom pes nkaus tsis pom kev li.
    TSAUS NTUJ = 1: Lub ntuj tsis muaj qhov kaj lawm.{Tsam no tsaus ntuj lawm ces wb pw qhov no ib hmos lauj.} 2: Tsis pom kev yam li hmo ntuj.{Lub qhov tsua ntawd tsaus ntuj heev.}
    TSAUS NTUJ TSAUS TEB NTI = Tsis muaj qhov pom kev li lawm.
    TSAUS TSIAV = Tej pobzeb pobca uas ci ci ntsa ntsa hmo-ntuj lossis tej hauv qhov tsaus tsaus.
    TSAUS TSI = Nias qees rau yam tsis quav-ntsej dabtsi lawm. {Dev mos tsau tsi rau tus poj-ntxoog.}

    TSAUG = 1. Ib tug tsiaj uas cov plaub yog koob nkaus xwb. 2. Lub zog ntaug nphaws.
    TSAUG LEEG = Tej cag nqaij cag txha tsis muaj zog lawm.
    TSAUG ZOG = Tus dabntub uas ua rau looj hlias thaum pw.
    NTUJ TSAUG = Lub caij uas tsis tshua pom txoj kev kaj.
    UA TSAUG = Rov kev zoo siab ua chaw pauj txiajntsig.


    Last edited by PIJPAUJ on 2nd April 2012, 8:05 am; edited 2 times in total (Reason for editing : Check spelling)
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 10th January 2012, 4:58 pm

    TSAIM = Lub kauj pob-txha qhovncauj sab hauv qab.
    KAUJ TSAIM = Lub kauj pob-txha qhovncauj sab hauv qab.
    TSIM TSAIM = Lub ncauj heev heev; nyaum nyaum.

    TSAIG = Ib lolus sis ntawm TSAIM.
    POB TSAIG = Qhov uas nkhau kiag ua lub kauj tsaim.

    TSAWB = 1.Ib hom nroj uas nplooj loj loj dav dav es txhawv cov txiv ua thij daws. {e.g. TXIV TSAWB, POB TSAWB, KAV TSAWB, NPLOOJ TSAWB} 2. Tsis yog cog kiag hauv av tuaj mus; txawb saum npoo xwb.
    TSAWB TSOOB = Muab tshoob teem kom txog caij nyoog mas ua.
    TSHOOB TSHAWB = Tshoob teem.

    TSAWM = Haislus hnyav hnyav hiav nti; cem; foom.
    MUAM PHAUJ TSAWM = Tus muam phauj tej lus foom.

    TSAWJ = Ib nyuag qhov uas zawj zog.
    TSAWJ TEG = Qhov zawj zog ntawm lub xib teg.

    TSAWV = Muab tes ntsiab kiag, xuas tes muab; nthos.
    TSAWV NEEB = Ua kev cai txheev seb tau tus txiv neeb twg.
    TSAWV YAIG = Ua kev cai txheev seb tau tus txiv yaig twg.
    TSEM TSAWV = Muaj ib tso, muaj ntsi.
    TSIV TSAWV = Muaj ib tso ua saub.

    TSAWS = 1. Muab cheej hlo ib qho rau lwm qhov. {Nra nees mas yog ob leeg tsaw.} 2. Ya ya txawb pauv ib qho twg. {e.g. NOOG TSAWS, DAV HLAU TSAWS} 3. Muab hau kom ntev ntev. {e.g. TSAWS NQAIJ, TSAWS TSHUAJ}

    TSAWG = 1. Muaj tsis npaum, muaj me dua. 2. Ib lolus puab-ntej(prefix) uas xav paub seb muaj npaum licas. {e.g. TSAWG LEEJ, TSAWG TUS, TSAWG QHOV}
    TSAWG DIA HNO = Tsis nkim zaubmov ntau vim cov neeg noj tsawg zog.
    TSAWG SAWM = Ib lolus hnyo, ib lolus to-ntswg. {Tsawg sawm, tuag tsis tuag.}
    PES TSAWG = 1. Npaum licas; zaj twg thiab licas los tsis tseev. 2. Xav paub seb yog licas.{Koj pob zaub no yuav pes tsawg?}
    TSUJ TSAWG = Ntev ntev li pom lossis li muaj ib ob nyuag zaus. {Tsuj tsawg koj li tuaj saib kuv ib zaug ces cia wb mus noj mov ib pluag.}
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 11th January 2012, 7:05 am

    TSEB = 1a. Muab noob qoob w rau hauv teb thiab hauv liaj. 1b. Muab ub muab no w rau hauv pemteb. {Nomtswv xuas davhlau tseb ntawv rau pejxeem.}

    TSEM = 1. Quav mus quav los, nkhaus vos. 2. Suabsab dev tom. {Mus txog ze Hmoob zos ces txawm hnov aub tsem tsem.}
    KAB TSEM = Tej nyiaj tshavntuj uas muab rau xyomcuab ntawm ib hauv qhua twg. {Ob qho no ib qho yog nyiaj tshavntuj ho ib qho yog kabtsem.}

    TSEV = 1. Lub chaw nyob chaw txoos. 2. Ib lolus puabntej(prefix) uas qhia tias yog ib qhov chaw nyob. {e.g. TSEV KHO MOB, TSEV TU PLAUB, TSEV TXIAS, TSEV MENYUAM...}

    TSE = Ib lub suab sis ntawm lo TSEV. {e.g. lub vaj lub TSE.}
    KAUS KWJ TSE = 1. Thob kom tus kwj ncig tsev dulug. 2. Qhuas losyog khav tuskheej rau luag.

    TSEG = 1. Ncua, tsum tsis ua ntxiv lawm.{Txij hnub no mus koj cia li tseg kiag txhob haus yeeb ntxiv lawm nawb.} 2. Muab tso cia. {Nws khiav mus lawm tseg vajtse nqha nrig cia.}
    POV TSEG = Muab laim ua-ntia es tsis yuav ntxiv lawm.
    TSO TSEG = Muab cia twjywm es tsis yuav ntxiv lawm.

    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 11th January 2012, 9:44 am

    TSIAM = Txob kev nyuaj tas zog rau. {Niag menyuam ntawd mas tsiam leejniam heev li.}
    ======================
    TSIAJ = Tej yam uas muajsia es txawj khiav txawj nti.
    TSIAJ NTAWV = Cov muagntawv uas muab txis rau cov niam ntawv kom sau tau lus hais.
    TSIAJ TXHU = Tej yam uas muajsia es txawj khiav txawj noj.
    =======================
    TSIAV = Muaj qhov fam duab hnub duab hli es ci taus.
    KHAUJ TSIAV = Cov khaujkhaum ntiv-tes uas caws nkoo es khob tob-hau ces ntxiv tawm hnub-qub ci ntsais plias.
    NAB QA TSIAV = Cov nabqa uas daiv tawv ci ci.
    TSAUS TSIAV = Tej pobzeb pobca uas ci ci ntsa ntsa hmo ntuj lossis hauv tej qhov tsaus tsaus.
    =======================
    TSIAS = Tej tsuas, tej ntsia.
    UA TSIAS = Txob kev nyuajsiab ntxhov plawv, ua nyuj.
    =======================
    TSIAG = Ib lub suab sis ntawm TSIAJ.
    TSIAG LIAS = Tus yees, ncaj qha.
    NCAUJ TSIAG = Qhov puavpheej phijcuam coglus kom txhais vauv tuaj tua tsiaj.
    TSWJ TSIAG = Tus pas uas cuab kom tsiaj dawm es yej lossis ntxiab txhais.


    Last edited by PIJPAUJ on 2nd April 2012, 8:15 am; edited 1 time in total
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 11th January 2012, 1:42 pm



    Nyob zoo Pijpauj,

    Ua tsaug nws cov lus txhais, yog ib qho zoooooo heev. Thov nws muab lub caij maj mam txhais peb cov lus Hmoob kom thoob. Yog peb tsis sau tseg, peb cov lus yuav ploj mus lawm tiag tiag li.

    Ua tsaug.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 12th January 2012, 1:19 pm



    Pijpauj,

    Nws sau tau ntau yam zoo heev, nws puas kam muab nws npe thiab duab tuaj rau kuv ua ib lub tsev rau nws cov ntawv. Kuv xav tias yuav tsum ua li tij laug Dee Vaj ua es kom lwm tus txhob muab coj mus siv yam tsis tau kev tso cai.

    Nws txhais tau cov lus Hmoob no zoo kawg nkaus.

    ua tsaug nawb.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 13th January 2012, 7:57 pm

    Nyob zoo os KoojZiagKabZaug,

    Thov txim uas tsis tau tuaj teb nws. Cia qavkaws majmam ua seb qavkaws testaw yuav kawg licas.

    Txhua yam uas kuv muab tso rau hauv nws lub tsev no ces yog nws tug li lawm. Nws yuav ua licas rau los ywj nws ua. Tej lus Hmoob no puavleej yog peb Hmoob txhua tus li. Yog leejtwg ho xav siv licas los yeejmeem coj mus siv tsuav lawv tau kev tsocai ntawm nws xwb.

    Duab ces kuv muaj thiab tabsis kuv tsis xav kom neeg paub hais tias kuv yog leejtwg thiab nyob qhovtwg es kuv thiaj muab tsis tau rau nws. Cia siab hais tias nws yuav tsis xav licas.

    Cov lus Hmoob uas kuv txhais no mas tsuas yuav txhais tej uas sawvdaws pheej ib txwm siv siv thiab lees paub xwb. Tej uas ib txhia neeg xeem xeeb xeem rhawv tshiab mas kuv yuav tsis txhais vim sawvdaws tsis lees paub ces tejzaum cov ntawd yuav peem tsis tsheej los ua Hmoob lus.

    TSEEB (qog Suav lolus TSW-N) = Tiag tiag, yog yog; muaj tiag.
    KAUS MOM TSEEB = Hom kausmom uas muaj ib daim vov thoob plaws es American cov tub zov nyuj(cowboy) nyiam ntoo.
    PAM TSEEB = Ib hom pam vov.
    TAM TSEEB(qog Suav lolus TA-N TSW-N) = Ib lolus teb kev twv kev sim uas muaj lub ntsiab tias tiag lod, tiag tiag li lod. {Tamtseeb, tus simzeej dab es yuav nrov ua luaj li ne.}
    YEEB TSEEB(qog Suav lolus YA TSW-N) = Rab koob hlawv yeeb, rab koob ntau yeeb.
    ------------------
    TSEEM = 1. Ib tug noog me me ho qhuav qhuav hlaub es pheej quaj tsuj tseev ntawm tej puam khaj. 2. Tsis yog cuav, yog tiag tiag.{Cov kub no mas yog tseem tseem kub ntag.} 3. Tsis tau tiav, tsis tau ntseg. {Tus pojniam no tseem yog nkaujxwb.} 4. Rhiav kev nyuaj siab rau. {Tos peb tsis kam nrog Nplogliab nyob los vim lawv pheej muab peb tseem.}
    TSEEM CEEB = Muab saib rau lub samxeeb tsim nuj heev; muaj nuj nqi tshaj.
    TSEEM FWV(qog Suav lolus TSAWj-Wj-NG FUM) = Tej nom tswv uas kav tebchaws thiab tsimtsa kevcai lijchoj.
    TSEEM TSWJ(qog Suav lolus TSWj-NG TSWJ) = Kev tsavxwm tebchaws; lus Nplog li yog kas moos.
    -------------------

    TSEEV = 1: Muaj leg kom zoo siv; muab lis kom tiav. {Muab tus qaib no tseev es muab nws ua peb su seb.} 2: Tej yam uas tuajplaub tsa nrha rwb ris. {e.g. QAIB TSEEV.} 3: Lees yuav, kam lees. {Twb them nyiaj lawm los nws yeej tsis tseev li.} 4: Npaum li cas los tsis txaus; pestsawg los tsis kum. {Tseev koj muaj peevxwm ntag yeej tshem tsis tau lub pobzeb no tawm.}
    TSEEV KOM = Yuavtsum yog li hais xwb xwb.
    QAIB TSEEV = Cov qaib uas xeebtxawm plaub tsa tsa.


    Last edited by PIJPAUJ on 23rd January 2012, 2:01 pm; edited 1 time in total
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 13th January 2012, 11:54 pm



    Pijpauj,

    Tsis ua cas os nawb, yog nws tsis xav qhia nws tus kheej los nws twb muab nws lub siab los pab thiab txhawb Peb Hmoob lawm ces twb yog qhov zoo tshaj li lawm. Qhov kuv xav kom tso npe rau mas ntshai tsam lwm hnub es npua tshom rau dev yuav xwb. Vim zaum no neeg ntsia qhov ci ci ntau, kuv pom coob leej muab kuv cov txuj mus tso lwm qhov yam twb tsis kam muab kuv lub npe mus tso nrog. Yog peb Hmoob coj li ntawd mas tsis zoo. Vim thaum yuav nrhiav qhov tseeb tuaj, tsis paub tias qhov xwm ntawd yog tshwm qhov twg los, leej twg yog tus chi keeb.

    Pijpauj, ua tsaug rau nws lub siab zoo nawb mog,
    Nws tej txiaj ntsim yuav nyob mus li, nws tej txiaj ntsha yuav nyob tsis txawj tag.


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 14th January 2012, 9:46 am

    koojziagkabzaug wrote:

    Pijpauj,

    Tsis ua cas os nawb, yog nws tsis xav qhia nws tus kheej los nws twb muab nws lub siab los pab thiab txhawb Peb Hmoob lawm ces twb yog qhov zoo tshaj li lawm. Qhov kuv xav kom tso npe rau mas ntshai tsam lwm hnub es npua tshom rau dev yuav xwb. Vim zaum no neeg ntsia qhov ci ci ntau, kuv pom coob leej muab kuv cov txuj mus tso lwm qhov yam twb tsis kam muab kuv lub npe mus tso nrog. Yog peb Hmoob coj li ntawd mas tsis zoo. Vim thaum yuav nrhiav qhov tseeb tuaj, tsis paub tias qhov xwm ntawd yog tshwm qhov twg los, leej twg yog tus chi keeb.

    Pijpauj, ua tsaug rau nws lub siab zoo nawb mog,
    Nws tej txiaj ntsim yuav nyob mus li, nws tej txiaj ntsha yuav nyob tsis txawj tag.

    KoojZiagKabZaug,

    Muaj tej txhia neeg mas lawv tsuas kav qhov yoojyim es thiaj muab luag li yam tsis hais; hos muaj tej txhia mas lawv xav tau koob tau npe kom luag qhua es thiaj txhobtxwm nyiag; dhau li ntawd lawm, muaj tej txhia mas yeej yog tsis paub kev tsis paub cai li___lawv lam nrog luag txawj nyeem ntawv xwb, lawv tsis paub qabhau.

    Tos cov neeg sab hnub poob hos vammeej dua los vim lawv paub kev paub cai. Lawv saib tus neeg tsimtsa rau lub samxeeb. Lawv muab lub meejmom rau tus tsimtsa kom tsimnyog qhov nws khwv khwv es nws thiaj muaj siab khwv ntxiv, thiab thiaj dib tau lwm tus kom nrog nws sib tw. Thaum sawvdaws muaj kev sib tw sib txeeb los ntawm txoj kev ncaj kev ncees ces yeej yuav pom tej yam tshiab tshiab txawv txawv tsis tu ncua.
    ---------------------
    TSOB = 1. Ib lolus ntsua uas qhia hais tias yog koom ib lub hauvpaus ncau ciaj tuaj mus. {e.g. TSOB NTOO, TSOB KAB TSIB...} 2. Paim kua, txia dej yam tsis tu. {Nws raug phom tsis sab tabsis yog tsob ntshav heev heev es thiaj kho tsis zoo.} 3. Haub yaum, pus nrog. {Tsis txhob nrog nrog laib es thiaj tsis tsob tubsab los tsev os.}
    TSOB ZEEM = Sib qhia sib fim kom sib paub; muab tso tim ntsej tim muag kom sib paub.
    THAJ TSOB = Tsim nuj tsis nqi; tsis txiaj; tsis lam ua dog pes dig.
    -------------------
    TSOM(qog Suav lolus TSAj-AUj) = 1. Hmoob ib lub npe laus.{e.g. Tsom Tooj} 2. Xauj hauv tej iav losyog tej yeebyaj tsom. 3. Xaiv; tsi. {Nws mas tsom cov zoo zoo yuav nkaus xwb.}
    TSOM IAV = 1. Tej daim pobzeb du du uas saib pom tau tus duab fam hauv. 2. Kev saib duab hauv iav.
    TSOM KWM(qog Suav lolus TSOj-AUj KUJ) = Saib xyuas; ua tibzoo povhwm kom tsis txhob raug teebmeem.
    TSOM QHOV MUAG = Tej iav uas coj los coj pab kom qhovmuag pomkev.
    YEEJ YAJ TSOM = Tej tog raj uas saib tau pom deb deb thiab saib tau kom loj loj.
    -------------------
    TSOJ = Ib luj kauj dai vas rau es siv yawm kab thiab yawm ntse.
    -------------------
    TSOV = Ib hom tsiaj qus noj nqaij uas zoo li tus me tabsis loj loj.
    TSOV TOM = 1. Raug tsov xuas qhovncauj txov siav. 2. Ib lolus cem neeg thiab foom neeg. {Niag tsovtom aw! Koj mus dua twg lawm naj.}
    TSOV TXAIJ NRAUM = Tej tsiaj qus uas tom neeg li tsov.
    TSOV TXAIJ NRAUV NEEG TXAIJ HAUV = Ib sob lus piv txwv uas muaj lub ntsiab hais tias tsov mas txaij txaij phem phem rau nraum daim tawv hos tibneeg mas siab txaij txaij phem phem tuaj hauv nruab siab.
    POS TSOV = Txiv tsov.
    -------------------
    TSO = Muab tus npoo tus ciam thaiv tshem tawm.
    TSO TSEG = Muab ncua es tsis kov lossis tsis leg ntxiv lawm.
    TSO CIA = Muab ceev tseg twjywm tsis kov tsis leg ntxiv lawm.
    TSO NRAS = Tso phluav rau tej tiaj nrag.
    TSO QUAV = Muab tej zaubmov seem hauv lub cev tso tawm los mus.
    TSO TSHAV = Tso phluav rau tshav rau nag ziab.
    TSO ZIS = Muab tej dej seem hauv lub cev tso tawm los mus.
    TSO DEJ = 1. Muab tej dej tauv qhib kom paim. 2. Ib hom kev txhab kua tshuaj rau neeg mob uas yog muab taub tshuaj dai es cia nws majmam ntws mus. 3. Ib hom kev kho mob uas yog muab dej txhuav nram qhovquav mus yuam kom quav tawm.
    TSO NTSHAV = Muab ntshav txhuav tawm.
    DAB TSO = Tej dab tej tsov.
    QHOV TSO = Qhov chaw tais nrees sab hauvqab ntawm npab ncau.
    -------------------
    TSOS = Xws, muaj ntsi thooj.
    IB TSOS = Muaj ntsi thooj, zoo li tsemtsawv.
    NRUAB TSOS = Ib thajtsam ze ntawm qhovtso.
    -------------------
    TSOG = Xyw dab, xyw tsov.
    TSOG TSUAM = Xyw dab nias thaum tsaugzog lawm.
    TSW TSOG = Ib niag ntxhiab uas tsw li tsov.


    Last edited by PIJPAUJ on 16th January 2012, 7:56 am; edited 2 times in total
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 15th January 2012, 1:18 pm

    TSOOB = Dheev, tshov.
    DEV TSOOB = 1. Dev tshov, dev deev. 2. Ib lolus yws, ib lolus cem kom mob siab. {Tus devtsoob twg es tseem muab kuv lub tawb ntses no tsoo puas tag li no ne.}
    TSOOB KUJ(qog Suav lolus TSOO KUv-AUv) = Tebchaws Suav.
    -------------------
    TSOOM(qog Suav lolus TSOOJ) = 1. Tej pab neeg, tej pawg neeg, cov tibneeg coob coob. 2. Hnyav hnyav, muaj ceebthawj.
    TSOOM THAWJ = Muaj ceebthawj, muaj nuj muaj nqi, muaj qab muaj hau. {Tus yawg no haislus muaj tsoomthawj kawg nawb.}
    ZEJ TSOOM(qog Suav lolus Zwv-N TSOOJ) = Pawg tibneeg.
    ZEEJ TSOOM = Tib yam li lo ZEJTSOOM.
    -------------------
    TSOOJ = Tseemceeb(qog kiag Suav lolus TSOOJ)
    TSOOJ LAJ = Tus nqaj ruv tsev tseemceeb uas muab cov qhabtse mus khuam rau.
    --------------------
    TSOOV = Muab tej yam ua hmoov pov txais hauv vab kom cov plaub cov xua ya tawm. {e.g. TSOOV TXHUV}
    -------------------
    TSOO = Muab ntaus kom piav; muab sib npuj.
    -------------------
    TSOOS = Ris-tsho, khaub ncaws.
    TSOOS LAUS = Tej khaub ncaws uas npaj hnav rau thaum tuag.
    -------------------
    TSOOG = Hmooblees lolus TSOOS.


    Last edited by PIJPAUJ on 25th January 2012, 11:52 pm; edited 1 time in total
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 16th January 2012, 7:49 am

    TSUB = Muab ntxiv rau kom ntau tshaj qub.

    -------------------
    TSUM = 1. Tsis ua ntxiv lawm; theem, nres, so. {Koj cia li tsum kiag tamsim no es neb thiaj tsis sib ceg ntxiv lawm.} 2a. Pluas hno ua rau rau saum rooj. {Noj mov yuav tau koom tsum.} 2b. Ib lolus ntsuas hais tias yog ib pluas noj. {Peb ua ib tsum mov tos nyab.}
    CHEEM TSUM = Ntuas kom tseg; txwv kom txhob ua ntxiv lawm.
    KOOM TSUM = Koom noj tib rooj mov.
    TIM TSUM = Ua puavpheej tim ncauj tim lus.
    -------------------
    TSUJ = 1. Hmoob ib lub npe laus. {e.g. Tsuj Kuam, Tsuj Txiab, Tsuj Riam...} 2. Xuas kotaw nias; muab tso rau kotaw mus mus los los. {Lub paj ntawd poob rau hauv kev es neeg thiaj muab nws tsuj tsuj ntsoog tag li ntawd.} 3. Ib hom ntaub. {e.g. NTAUB TSUJ}
    TSUJ NPUAM TAIG LAIG NYAG = Tej khaubhlab khaubhluas thiab tej twj tej tais laigdab uas dai nplawg ntias xyaw tej tuag.
    NTAUB TSUJ = Ib hom ntaub ruaj ruaj.
    -------------------
    TSUV = Hmooblees lolus TSOV.
    -------------------
    TSU = Ib lub thoob cub mov.
    -------------------
    TSUS = Ib lolus txhab kom paub hais tias tseem tsis tau dua; tabtom tshwmsim.
    CIG TSUS = Tseem cig cig ntsaj thuav.
    PUAS TSUS = Tseem tabtom nyob rau ncua uas piamsim. {Tsis muaj nyiaj kho tsev ces qhov twg los puastsus.}
    NTSEJ MUAG PUAS TSUS =Ntshai ntshai ua rau lub ntsejmuag thimxem tag; ntsejmuag tuag tag; ntsejmuag daj tag; plu dub.
    -------------------
    TSUG = Ib ncua sijhawm uas yog 13 hnub.
    PUV TSUG = Txwm nkaus 13 hnub.


    Last edited by PIJPAUJ on 19th January 2012, 9:58 am; edited 1 time in total
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 19th January 2012, 9:52 am

    -------------------
    TSUAB(qog Suav lolus TSU~A = ntsiab, txhom, ntes) = 1. Xuas tes ntsiab. {Nws tsuab ib niag tes pajkaws nqa lawm.} 2. Muab tog khaub tog tsuag thaiv kev. {Nws muab pos tsuab rau txoj lw ntawd kom neeg tsis txob taug ntxiv lawm.}
    TSUAB LUAB = Coj tsis tus; dag ntsuav; tshoob hawb; phlob leg; plom moj.
    TAUM TSUAB = Cov taum seem uas muab cov kua tsi ua taum paj lawm.
    VUAB TSUAB(qog Suav lolus VUAJ TSHUJ~AUJ) = Qias neeg; xos liam; liam hauv.
    -------------------
    TSUAM = Tso ceebthawj tuaj sabsauv nias.
    TSUAM CHAW = Mus hom chaw tseg.
    TSUAM PHIAJ = Ua phiaj rhais nplooj tseg.
    TSUAM TEB TSUAM CHAW = 1. Hom teb hom chaw. 2. Txeeb teb txeeb chaw.
    TSUAM TEEV = Tej yam uas ua rau lub thauj teev tog tog; hnyav hnyav; muaj ceebthawj.
    TSUAM TOB(qog Suav lolus TSAM-N TA~AU = rab riam txiav) = Rab riam uas tsim los txiav neeg txhaum txim cajdab.
    TSOG TSUAM = Ib hom mob uas neeg ntseeg hais tias yog xyw dab tsov nias thaum tsaugzog.
    -------------------
    TSUAJ = Ib lub suab qog kev txiav.
    PUAM TSUAJ = Piam sij, puas ntsoog.
    PUAS TSUAJ = Piam sij, puas ntsoog.
    TSIJ TSUAJ = Ib lolus piav ntawm kev nkaug losyog kev tsuav. {Thaum tej tubrog muastxwv tas lawm ces lawv sib nkaug tsij tsuaj li lawm xwb tiag.}
    -------------------
    TSUAV = 1. Txhoov mos mos. 2. Ua poov, ua cai me me xwb yeej tau lawm. {Tsuav koj kam mus xwb ces kuv mam tuaj txhua yam.}
    TSUAV NTXAIJ = Ib lub txee qha ubno saum qhovcub.
    TSUAV YOG = Muaj ib tso yog xwb ces tau lawm.
    -------------------
    TSUA = Tej roob uas yog pobzeb xwb xwb.
    HAUV TSUA = Tej ncov roob pobzeb.
    LIAB TAU TSUA = Ib sob piv lus uas muaj lub ntsiab hais tias yog muab chaw cuabzog ces lub peevxwm yuav pliag npaum liab nce zeb nce tsua.
    NTXIM TSUA = Ib hom nas ua nyiam nyob raws tej taw tsua.
    NYO TSUA = Cau pliaj; lub hauvpliaj cau cau li ib lub qabtsua.
    QHOV TSUA = Tej qhov uas khoob ntshuv ntawm tej pobtsua.
    QAUM TSUA
    -------------------
    TSUAS = 1. Ib tug ntsia uas siv puj ubno kom ceev lossis kom tawg. 2. Ntxaum, ntub, lo. {Nws lub tsho tsuas ntshav tag lawm.} 3. Ib lolus puabntej uas muab ntxiv rau lwm lo kom taw nrees li hais xwb. {e.g. TSUAS MUAJ, TSUAS TAU, TSUAS YOG, TSUAS YUAV...}
    TSUAS ZEEM TAU = Khaws xyeem lawm xwb.
    LIAJ TSUAS = Ib hom npe nroj uas zoo tshuaj.
    LOS TSUAS(qog Suav lolus LAM~AUM TSU~AU) = Lub tebchaws Nplog; cov neeg Nplog.
    POB TSUAS = Cov pebzob tawm tej tsua.
    QAB TSUAS = Tej taw tsua mus rau tej phaj tsua.
    QIJ TSUAS = Ib hom nroj nyob puag saum hauv tsua uas zoo li tsob qij.
    -------------------
    TSUAG = 1. Tsis qab abtsi li. 2. Ib hom nas uas nyiam nyob hauv vaj hauv tsev thiab tom tej liajteb. 3. Muab tej yam ua kua txau tawm. {Nws tsuag ntshav lo kuv lub tsho tag.} 4. Muab sua ua ib pawg. {Nws puag ib tsuag taws los mus tsev lawm.} 5. Ceev nrooj. {Tsuag maj! Ntuj yuav los nag li os.}
    TSUAG LAWS = Txau yam txaws txua; tshau lug. {Nyuamqhuav hnov nws nroos hais tias xeev xeev xiab xwb txawmsiv pom nws ntuav tsuag laws lawm.}
    TSUAG QHEV = Ib hom kab muaj testaw ntau ntau uas nyob hauv tej qabzeb, qabca, lossis qabtxiag.
    TSUAG TSUAG = 1. Tsis qab abtsi li. 2. Maj nroos, ceev nrooj.
    HAV TSUAG = Tej roob tej hav uas tsis muaj xyoob ntoo loj; tej plas nroj; tej havfab.
    KUA TXOB QUAV TSUAG = Ib hom kuatxob uas luaj lub quav nas tsuag es ntsim ntsim heev.
    KUAB LOM TSUAG = Ib hom npe tshuaj muaj taug uas zoo siv lom nas tsuag heev.
    NAS TSUAG = Ib hom nas uas nyiam nyob hauv vaj hauv tsev thiab tom tej liajteb
    NROJ TSUAG = Tej nroj thiab tej xyoob ntoo uas tseem yau.
    TSIG TSUAG = Ib lub suab piav kev plos havzoov havtsuag.
    UA TSUAG = Ua tej pwb pawg.
    XUB TSUAG = Tej chaw zoo tsoquav tsozis tom havfab.
    ZAUB TSUAG = Tej zaub uas tsis xyaw ubno.


    Last edited by PIJPAUJ on 25th January 2012, 11:48 pm; edited 2 times in total
    avatar
    koojziagkabzaug
    Moderator
    Moderator

    Messages : 3537
    Date d'inscription : 2010-02-28

    Re: Hmoob Ntawv & Hmoob Lus

    Post  koojziagkabzaug on 20th January 2012, 9:23 am



    Nyob zoo Pijpauj,

    Ib hnub nws txhais tau cov lus Hmoob ntau zuj zus ntxiv,
    Tib pliag xwb nws twb sau tau lus Hmoob ntau heev lawm. Yog ib qho zoo tshaj plaws li, yog Peb Hmoob muab coob leej ua li nws, ntshe peb yuav nrog luag vam meej thiab. Cas lub caij uas lawv mus tham lom zem tsheej niaj tsheej xyoo, lawv tsis tuaj nrog peb rhawv txuj ci Hmoob kom thiaj li khaws tau tseg. Yog peb tiam nov tsis rau siab khaws tiagtiag mas peb Hmoob txuj ci yuav plohj mus lawm tiag tiag li. Vim cov me nyuam tsis hais nyob lub teb chaws twg los yeej tsis tshua paub lus Hmoob zoo thiab tsis paub kab lis kev cai Hmoob kiag li lawm.

    Ua tsaug rau nws lub laj lim tswv yim nawb tij laug Pijpauj.



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab
    avatar
    PIJPAUJ
    Developer
    Developer

    Messages : 148
    Date d'inscription : 2010-12-25

    Re: Hmoob Ntawv & Hmoob Lus

    Post  PIJPAUJ on 23rd January 2012, 1:55 pm

    koojziagkabzaug wrote:

    Nyob zoo Pijpauj,

    Ib hnub nws txhais tau cov lus Hmoob ntau zuj zus ntxiv,
    Tib pliag xwb nws twb sau tau lus Hmoob ntau heev lawm. Yog ib qho zoo tshaj plaws li, yog Peb Hmoob muab coob leej ua li nws, ntshe peb yuav nrog luag vam meej thiab. Cas lub caij uas lawv mus tham lom zem tsheej niaj tsheej xyoo, lawv tsis tuaj nrog peb rhawv txuj ci Hmoob kom thiaj li khaws tau tseg. Yog peb tiam nov tsis rau siab khaws tiagtiag mas peb Hmoob txuj ci yuav plohj mus lawm tiag tiag li. Vim cov me nyuam tsis hais nyob lub teb chaws twg los yeej tsis tshua paub lus Hmoob zoo thiab tsis paub kab lis kev cai Hmoob kiag li lawm.

    Ua tsaug rau nws lub laj lim tswv yim nawb tij laug Pijpauj.

    Nyob zoo KoojZiagKabZaug,

    Yog peb tsis muaj ntaubntawv ces kuj tsis pom qab yuav khaws cia qhovtwg. Yog ho muaj ntaubntawv los tsis muaj chaw khaws ces kuj tsis muaj siab yuav khaws. Vim nws twb muaj qhovchaw cia rau nod lawm, ces yeej yuav khaws khaws kom txog hnub xaus.

    -------------------
    TSWB = 1: Tej khob tooj khob hlau uas dai qag es muab co nrov nrov; tej kaujtoog kaujhlau khoob uas ntim qe hlau es muab nco nrov nrov. 2: Npua (qog Suav lolus TSU).
    TSWB NEEB = Tej tswb uas tsim rau neeg ua neeb siv.
    TSWB NYUJ = Tej tswb uas tsim rau nyuj coj.
    TSWB TSHOJ = Hmoob ib tug timtswv uas yog taw npua thawj.
    LOOB TSWB = Zaj npuas; npua lagntseg.
    TWM TSWB = 1: Tej taw npua uas yog ib tug xwb es tsis poob npoj li. 2: Tej tsiaj uas ncaim npoj mus nyob twmzeem.
    XYOOJ TSWB (VUAJ VUAB) = Menyuam taw npua(Xyooj = tus txiv, tswb = npua, vuaj vuab = menyuam mos ab.)
    --------------------
    TSWM = 1: Muab ntsaws muab txhub es xuas tog pas ntuj ntuj kom ceev ceev. 2: Xyoob(qog Suav lolus TSUV). 3: Ib lolus ntsua rau xyab. {e.g. ib TSWM xyab} 4: Ciab (qog Suav lolus [LAJ] TSUV).
    TSWM CIAB = Tej quavciab uas muab npuab ua tej tug es tau taws kom pomkev.
    TSWM CIAB PAJ NTOO = Ib sob lus uas muaj lub ntsiab hais tias muaj kev teevhawm npwslaig yam logchiab.
    TSWM XEEB = Nyob ntsiagto; ua lub siab kom tus.
    PUJ TSWM = Ib hom xyoob uas yog qog Suav lus PUJ TSUV.
    TUAM TSWM = Ib hom xyoob uas yog qog Suav lus TAJ TSUV.
    --------------------
    TSWJ = Hwj kav; saib xyuas; tsav.
    TSWJ FWM = Coj kav.
    TSWJ TSIAG = Tus qag uas caws vos ntawm yej lossis ntxiab kom tsiaj dawm es mag tsiaj.
    KOM TSWJ = Daim ntawv teev sijhawm coj kev leg qav leg num(Lus Hmoob txheej tshiab nimno.)
    TXOOV TSWJ = Tus tuam thawj loj uas kav sawvdaws.
    --------------------
    TSWV = 1: Hmoob ib lub npe laus.{Tswv Riam, Tswv Vaj, Tswv Txos...} 2: Tus uas tuav ntiag tug. {e.g. TSWV tsev, TSWV liaj, TSWV zos...} 3: Cov pleb uas tsiaj ntswv hauv qhov av tawm rau nrauv.
    TSWV KAB = 1: Cov neeg tu kab; cov neeg yug kab. 2: Cov quav sab uas ua tej thooj li tej pleb uas kab muab tso tawm.
    Ntaub TSWV KAB = 1: Cov ntaub uas yog cov neeg yug kab thiaj muaj taus. 2: Cov ntaub uas yog xuas quav kab tsim tawm los.
    TSWV YIM(qog Suav lolus TSUM IJ losyog TSWJ HUJ~IJ) = Lajlim, lub lijxeeb uas xav tau ubno tawm lo.
    TSWV XYAS = 1: Ib tug yawm Hmoob uas khwvhuam tau hais tseg tias nws ciaj tsheej tsov pheej rov los tos neeg. 2: Cov neeg nyiag neeg li dab li tsov.
    TSWV ZWS = Sib law sib liag yam tej pleb uas ntswv hauv qhov av tuaj. {Neeg tawg rog khiav tswv zws ua rau kev tawm plua tshaum tog.}
    --------------------
    TSW = Muaj ntxhiab.
    TSW NTXHIAB = 1: Lub qhovntswg ntes tau tus ntxhiab. 2: Tus ntxhiab tsis xis neeg.
    TSW QAB = 1: Tus ntxhiab uas ntxim ntxim noj. 2: Tus ntxhiab uas ntxim nyiam.
    TSW TSW = 1: Hnov tus ntxhiab nyaum nyaum. 2: Ua tau yam khib khib siab; ua tau muaj muaj phlus.
    --------------------
    TSWG = Ib tug ncej khi tsiaj rau.

    Sponsored content

    Re: Hmoob Ntawv & Hmoob Lus

    Post  Sponsored content


      Current date/time is 23rd June 2017, 9:44 am