google-site-verification: googlefbfddf59e706b96b.html

Latest topics

» Kuv 1 Vuagdua
by ibvuagdua 4th December 2016, 3:38 pm

» Keeb Kwm Hmoob mus nyob Guyane
by cvang71 28th November 2016, 7:34 pm

» cwjmemdub lub tsev pajhuam
by koojziagkabzaug 23rd November 2016, 10:53 am

» PAWG HMOOB TRUSTEES UAS TUAV LUB KOOMHAUM LAO FAMILY CENTER YAV DHAU LOS ROV LOS TXEEB TAU LUB KOOMHAUM THIAB LOS TUAV LUB TSIAB30 THIAB LUB KOOBTSHEEB JUL 4TH
by Liajntsuab 20th November 2016, 5:06 am

» Xov Xwm hmoob Nyab Laj sawv tsam mus hais vim Nyab Laj tsi hlub peb haib hmoob
by Liajntsuab 18th November 2016, 8:25 am

» NPE ME NYUAM TUB thiab NPE LAUS
by koojziagkabzaug 15th November 2016, 12:12 pm

» NPE ME NYUAM NTXHAIS
by koojziagkabzaug 15th November 2016, 12:10 pm

» QHIA TSO DUAB thiab Video HAUV VAS SAB
by Tub kev deb 8th November 2016, 3:37 am

» Pojniam Qaug Qav thaum xeeb tub
by PIJPAUJ 6th November 2016, 12:46 am

» Los qhia koj zaj dab neeg
by Khosiab 3rd November 2016, 1:27 am

» TSIS TAU LOS TSIS CHIM
by Khosiab 2nd November 2016, 1:24 am

» Leej twg puas txawj sau nkauj ( suab paj nruag)
by Khosiab 2nd November 2016, 1:11 am

» Lub Neej Lwj Siab
by Khosiab 2nd November 2016, 1:00 am

Tsev seev PajHuam

Hmong beauty nature

Compteur visitor

hnub 18/09/2010 los mus

    Paj Huam teb chaws tawg 1975

    Share

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Paj Huam teb chaws tawg 1975

    Post  koojziagkabzaug on 24th February 2012, 2:15 pm


    Paj Huam Hmoob raug tsim txom 1975



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Paj Huam teb chaws tawg 1975

    Post  Hmong ntuj tshiab on 15th December 2013, 5:53 am

    KEV TXOM NYEM XYOO -75

    Kuv thov ntos------------------piav txog peb hmoob
    Uas raug poob-------------------------faib ua peb pab
    Ntuj nram qa-----------------------txoj kev xam khib
    Xya caum tsib---------------Hmoob poob teb chaws

    Tag sawv daws------------------khiav ua tsheej npoj
    Vim tus coj------------------------tau khiav ya tawm
    Lub sij hawm--------------------------uas hais los no
    Raws li nco------------------------hmoob ua peb sob

    Sib koom nyob--------------xyaw mab xyaw nplog
    Yuav hais txog--------------------Hmoob pab zus ib
    Nplog cob ntsib----------------muab nom daws txo
    Lawv pab no-----------------------ua siab mus zeem

    Luag muab tseem-----------mus nyob xeev khuam
    Neej kob huam-----------------------nyob ua zej zog
    Tso tub rog------------------------zov txhua txoj kev
    Cov txiv tsev--------------------mas tshee ua npaws

    Raug luag ncaws-----------------quab yuam laij liaj
    Lawv tej nyiaj--------------------raug muab los faib
    Me os qaib--------------------------raug nce se txhua
    Nyuj twm npua-----------------------yug tsis tau siv

    Tej niam txiv----------------------raug kawm tas tus
    Niaj hnub mus--------------------kawm luag kev cai
    Cov tsis ntshai-------------------thiab paub tsis txog
    Niaj hnub nrog--------------------luag nqus ceg dev

    Nyob tsis ntev-------------------ntsib xau tshua leej
    Thaum paub meej---------------nrhiav kev kom dim
    Luag nrhiav txim-------------------ntes coj mus kaw
    Xauv ko taw-------------------------coj hlua xauv tes

    Quaj nrov les--------------------nyob tsev tsaus ntuj
    Tsis muaj txuj----------------------tswv yim tsis zoo
    Nyob ntsiag moo-----------------ploj lawm tag tiam
    Lub neej piam-----------------------tsis muaj tus kho

    Lawv pab no--------------------------neej tag du dais
    Rov los hais---------------------------txog pab zus ob
    Sib sau nyob---------------------------mus ua cob fab
    Sawv loj npab------------------tuav riam tuav phom

    Raws kwv nyom------------------kev cai quab yuam
    Cov neeg ruam----------------- thiab cov neeg pluag
    Thawj zoov zuag---------------------sawv ua tus coj
    Sib tua loj-------------------------nyob roob twv pov

    Ua tsev thov---------------------------lub ntuj lub teb
    Cov nyob deb-------------------------nyob ze ib yam
    Hmoob sib tham---------------------lub neej cob fab
    Noj nplooj hmab--------------nplooj ntoos yug siav

    Sib pug khiav--------------------ncig roob quav txiaj
    Cov siab tiaj------------------kuj tseem tshuav noob
    Cov feem coob------------------pheej cem tias vwm
    Tsis ua ywm----------------------- piav qhia cob tsib

    Luag thiaj qhib------------------tig rov rhuav tshem
    Hmoob siab phem---------------tsis pab txhawb nqa
    Tseem nyiag xa---------------------zais xov rau luag
    Hmoob thiaj tuag----------------------- ua sab ua sua

    Sib yoog ua---------------------tsov tshaib tsov tsau
    Xya caum rau------------------ sawv tuav teb chaws
    Hmoob sawv daws-----------nyob txom nyem tshaj
    Noj toov laj---------------------muas thij qos ncoom

    Neeg tseem foom------------------kom cob fab tuag
    Hmoob kua muag-------------------los tsis tau txaus
    Cov neeg laus------------------thiab cov me nyuam
    Noj qos khuam---------------------kem plab tuag tas

    Zoo nkaus nas------------------mag yej mag ntxhiab
    Cov dev siab-------------------haj tseem nrog hnyos
    Hmoob noj qos----------------ntxuag pob caus ntoo
    Nto lub moo----------------------------tis npe cob fab

    Sawv sib pab---------------------tuav hmoob txoj cai
    Ua kauv sai----------------------nyob nraim toj roob
    Noj ntsuag xyoob----------ntxuag qav ntxuag ntses
    Sawv los nres--------------------lub me neej Hmoob

    Tuav lub koob---------------------txoj kev vaj huam
    Cov neeg ruam---------------------tseem lauj ko taw
    Khiav mus xyaw-----------------nplog liab cob tsib
    Nws txawm pib-----------------------coj siab tsis tog

    Mus koom nplog--------------------kev cai kooj sam
    Nrog luag tham---------------qhia nplog paub tseeb
    Hmoob lub keeb---------------txawm pib muab ntos
    Lis npuag txos-------------------thiab vaj xeem kiab

    Coj dev siab-----------------------tua Hmoob zej zog
    Tsis xav txog----------------------nrog luag muaj tug
    Cov hmoob yug--------------------rau zeem keeb no
    Tsis sib kho-------------------------lub neej thiaj ploj

    Tshaw tus loj---------------------thiaj li  plag ntshav
    Hmoob daim av---------------------kuj cuab luaj pua
    Thiaj ntxhee sua------------------ploj lawm tag nrho
    Neej tiam no-------------------txhob hais lawm mog

    Ho piav txog------------------------lawv pab zus peb
    Raws li ntxheb----------------------tuaj rau peb hnov
    Hlob vaj pov------------------------ya dav hlau lawm
    Hmoob thiaj tawm------------------raws vaj pov qab

    Tuaj tsheej pab--------------------rau hauv looj ceeb
    Lawv sib txeeb---------------------tuaj nce dav hlau
    Thiaj ua rau-----------------------yawg lis neej thoob
    Plam tes poob----------------------raug tsuj sav duav
    Muaj leej puav---------------------ntsia kuj xav luag

    Nkag tsawg tsuag----------------dav hlau puv nkaus
    Neeg nkag txaus-------------------dav hlau pib nrov
    Hos lawv cov-----------------------txeeb nce tsis tau
    Rov nyo hau--------------------los nyob nphob xuav

    Nyob hnub puav--------------------lub siab tsis hwm
    Ntaus kev tshwm-------------------sab laj tsheej pab
    Noj tsis qab--------------------------pw los tsis tsaug
    Ntshai tsam raug--------------nplog liab quab yuam

    Coj me nyuam------------------------kwv tij txiv tub
    Sawv maub dub-----------------khiav tuaj thaib teb
    Taug kev tsheb--------------------tuaj txog him hawj
    Raug cov thawj-----------------------tub rog noj dev

    Nrog lis tev----------------------tuaj thaiv kwv nyom
    Tsa loo phom--------------------tua peb hmoob kiag
    Suab phom ntsiag---------------neeg tuag pawg lug
    Hmoob sib pug-----------------------tuav tes rov qab

    Muaj ib pab--------------------------nqes rau dej tauv
    Rho nyiaj xauv------------------ntiav nplog nqi nkoj
    Luag thiaj coj------------------------los dhau ib feem
    Maj mam peem--------------------los txog rau thaib

    Neeg tuaj saib----------------------- ua pliaj liab vog
    Thaum tuaj txog--------------lub nroog noom qhais
    Luag pib txais--------------------------thiab xa ib sob
    Tawm mus nyob------------------rau yeej naj phoos

    Hmoob nyob ntsoos---------npaum daum raug xub
    Muaj ib hnub-------------------Hmoob tus thawj coj
    Raug luag zoj------------------kom tawm teb chaws
    Hmoob sawv daws-----------------sab lag tsis thoob

    Vaj nom hmoob--------------------nqua hu pej xeem
    Tag txhua feem------------------------ tuaj tau ib tiaj
    Nce sam thiaj------------------------tuav lub paj taub
    Hmoob nom saub------------------tias nej nyob mog

    Kua muag nrog----------------vim yuav ncaim mus
    Hmoob txhua tus---------------quaj kua muag poob
    Vim vaj hmoob---------------yuav ncaim txhua leej
    Lus hais meej---------------------sawv daws los tsev

    Nyob tsis ntev----------------vaj hmoob lawm dhau
    Tshuav cov yau------------------nrog pej xeem nyob
    Ua ib sob-----------------------------tham kev tu siab
    Luag ho ntiab-----------------------los nyob vib nais

    Tej tub ntxhais-----------------------tau zoo sib ntsib
    Luag txawm pib-------------------qhib kev xam phaj
    Peb hmoob npaj-----------------mus luag teb chaws
    Tag sawv daws----------------------sib yaum ua npe

    Tej txheeb ze----------------------dab laug yawm yij
    Xam phaj txhij---------------------zoo siab txhua tus
    Nkauj muam nus-----------------------tau mus ua ke
    Txawm loj me------------------------peb sib faib noj

    Tau ua npoj------------------------kaj siab txhua leej
    Nqa rab qeej------------------------saib ua dab muag
    Muaj ib kuag------------------------xam phaj tsis tau
    Vim cov yau---------------------hais txawv cov hlob

    Rov los nyob------------------------sib hais sib ntxub
    Tej niam tub----------------------------sib ceg sib cav
    Txiv thiaj xav-----------------------tias cia txiv yeem
    Mam li peem-----------------------rov qab mus  thov

    Hos lawv cov------------------------uas phaj xam tau
    Muab niam yau---------------------rau npe ua muam
    Cov me nyuam--------------------uas yog neeg seem
    Lawv ho yeem----------------------------sau ua ib tse

    Tuaj muaj npe-------------------------thiaj li tau mus
    Tag txhua tus--------------------sau khoom txhij zog
    Tsheb tuaj txog---------------------nres loo nram tiaj
    Niam tub thiaj------------------- nra lawm zom zaws

    Tag sawv daws-------------------tham sib qawg quaj
    Hmoov tsis muaj---------------------tsis nyob ua kev
    Luag hu npe-----------------------ntob nkaus yus lub
    Niam txiv tub--------------------nkag loo tsheb plab

    Pog tub nyab------------------------rho tes sib plhws
    Koj kuv nws ----------------------yuav tau sib ncaim
    Siab xav nraim-----------------------tias tag zaum no
    Txoj kev nco--------------------thaum twg mam ploj

    Kuv thiab koj---------------------lub kua muag nrog
    Nce txhij zog----------------------cav tsheb pib nroo
    Tsheb khiav loo-------------------suab quaj nrov les
    Lawv rho tes----------------------sib plhws taub hau

    Zaum no lau---------------------yuav ncaim tas tiam
    Quaj khaws khiam------------ntswg pov nplij nploj
    Ua siab loj-----------------------yog txoj hmoo muaj
    Nej ho tuaj----------------------nrog peb nyob thiab

    Neej khuam siab-----------------mus nyob luag ntuj
    Yam dav yuj--------------------tsis muaj chaw tsaws
    Nej sawv daws----------------------ho xam muaj peb
    Ncaim mus deb---------------peb tseem yog Hmoob

    Mus yeej noob---------------------rau lub ntuj tshiab
    Qhov khib siab-------------------yog cov tub ntxhais
    Ais yuav pais------------------------siv nyiaj daus las
    Siab khis ras--------------------mob npaum mob rwj

    Cia sib nwj----------------------------sib kov sib hnia
    Peb sawv ntsia-------------------kua muag kuj poob
    Peb cov hmoob-------------------ncaim siab dua rhe
    Nyob ua ke-----------------------------tag loj me laus

    Saib quaj txaus---------------- ntsej muag quaj zuav
    Luag tso plhuav--------------tsheb khiav yeev tawm
    txog tim dawm--------------------rab ntaj tsuam tob
    kav hmoob nyob------------------ txawn qhib tsa hlo

    lawm tag nrho-------------------dhau plaws rooj vag
    tsheb lawm tag--------------ntsej muag mluas mlob
    Peb cov nyob--------------------los nphob tswb tsus
    Rov los mus----------------------nyias vaj nyias tsev

    Txaj chaw lev--------------------nqha nroj nqha nrig
    Me ntsuj plig------------------------los lawm du dais
    Ho los hais------------------------cov uas dhau lawm
    Lub sij hawm---------------------mus txog koos thej

    Niam tub nej------------------------zoo siab twj ywm
    Nyob puv txwm-------------------hnub nce dav hlau
    Tej me yau---------------------------tsis paub dab tsis
    Qi muag nti--------------------tsaug zog txaus nkaus

    Hos tej laus------------------------tsa muag nuam yaj
    Hiav txwv daj---------------------ti nkaus ntuj kawg
    Me txiv yawg------------------mam poob siab nthav
    Li rov xav------------------------ntsuab xwm cov lus

    Tsis tiaj tus---------------------lub teb chaws nchuav
    Dej av qhuav-------------------neej Hmoob ploj plus
    Yuav ncaim mus----------------npaum li nyuj plaub
    Txoj caij saub--------------------caij tawm caij nqov

    Tsuas tau rov----------------------npaum li nyuj kub
    Yawg plhu dub--------------------mam tsa suab quaj
    Yuav kev tuaj-------------------mus lawm ploj ntais
    Hiav txwv cais-------------------ntshe yuav tag tiam

    Tub tseg niam--------------------nyob ua ntsuag ciaj
    Khwv tau nyiaj-----------------------mam xa los pub
    Tej niam tub------------------------txoj kev sib hmov
    Ntshe tsuas hnov-------------------hau daim kab xev

    Mus lawm ntev---------------------mam ploj zuj zus
    Thaum tuaj mus-----------------txog luag teb chaws
    Lawv sawv daws--------------------so tsis tau dhuav
    Niam txiv qhuav-----------------coj tsheb cug nkaus

    Tas loj laus---------------------luag muab nwj txhua
    Ib vuag dua-----------------------txog ntua luag tsev
    Txaj chaw lev-----------------------tuab zooj du dais
    Ncauj tsis hais----------------------siab xav twj ywm

    Tias maum twm--------------yuav xyaw maum nyuj
    Neej tshav ntuj--------------------ntshe yog zaum no
    Tsis ras nco---------------------qhuas qab qhuas tsau
    Twb yog xau----------------------los tseem tsis paub

    Niaj hnub saub--------------------noj qab hnav txaus
    Xyov thaum xaus------------------ntuj tshav sab twg
    Ncauj cuag ntswg---------------------los hais tsis tau
    Lam nyob dhau------------------------los txog tav no

    Raws li nco--------------------cov ncaim txom nyem
    Raug luag cem-------------------tias hmoob vum loj
    Mus raws noj--------------------raws haus noj dawb
    Puav raj tsawb------------------------lub neej dai taw

    Mus nyob xyaw---------------------luag zej luag zos
    Hnov luag ntos------------------------tej lus moo cua
    Hmoob xyaum ua----------------neeg tsis tsheej haj
    Thiaj muab tshaj---------------rau nej txhob ntshaw

    Neej dai taw-------------------------li tiag cov nyuag
    Ho los zuag------------------------txog peb cov nyob
    Txoj kev txob---------------------kev txhawj zuj zus
    Lam sib pus--------------------nyob raws keeb kwm

    Saub ntuab xwm---------------------tau hais tseg tias
    Kom peb nyias---------------------qee nyias lub siab
    Xyoo ob txhiab------------------thaum ob txhiab rau
    Dej yuav nphau----------------------av yuav pib pob

    Hmoob nom hlob------------------yuav rau luag lim
    Luag nrhiav txim--------------------los iab hiam rau
    Hmoob mam sau-------------------rov los koom siab
    Nrhiav kev tshiab------------------los sib pab cawm

    Nom hmoob tawm------------muaj ntsej muag luag
    Hmoob sib puag----------------------rov los sib ntsib
    Ntuj rov pib------------------------kub hnyiab cig loj
    Cuag ywg roj------------------nplaim nto ntuj plaws

    Hmoob sawv daws---------------suab quaj txhua tus
    Txawm hais lus-------------------twb hais tsis tawm
    Txog sij hawm----------------vaj hmoob ncaim mus
    Ib lo lus---------------------------------twb faj tsis tau

    Loj me yau----------------------------los quaj ib yam
    Txawm muab tham-----------------raws tej liv xwm
    Hmoob keeb kwm-------------xyov puas yuav muaj
    Daim av luaj------------------------raug noj tsuag tag

    Hmoob tseem mag------------luag ntxias nce nthab
    Mag voj hmab--------------------voj hluas txhua tus
    Mloog tej lus-----------------------tsis meej tsis pem
    Raug luag lem-------------------tsis txawv nyuj twm

    Saub ntsuab xwm-----------------tau muab ntos tseg
    Nyob nruab deg---------------los yog nruab nqhuab
    Yuav tsum muab---------------tuav raws keeb kwm
    Neej Hmoob tshwm-----------------yog kev sib hlub

    Txhob sib ntxub-----------------thiaj tsis nyuab siab
    Lub neej tshiab---------------------li yuav raws cuag
    Neej Hmoob ntsuag------------yuav nrog vam meej
    Hmoob txhua leej---------------thiaj tsis txom nyem

    Txoj kev phem-----------------------li yuav tsis ntsib
    Thiaj paub pib-----------------------lub neej tom ntej
    Peb Hmoob nej-------------------tsis poob kua muag
    Lub neej ntsuag------------------thiaj yuav tsis muaj

    Txoj kev quaj----------------------li yuav tsis ntsib./.

    ( xaus li no )

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Paj Huam teb chaws tawg 1975

    Post  Hmong ntuj tshiab on 15th December 2013, 7:13 am

    Kev Txom Nyem Xyoo 75

    Ntawm no mus-----------------yog lus paj huam
    Yuav hais tshuam------Hmoob kev txom nyem
    Raug luag lem---------------xyoo xya caum tsib
    Nplog liab pib--------------sawv kav teb chaws

    Nrhiav kev raws---------neeg tawv dawb tawm
    Nplog liab txawm---------pib nrhiav kev phem
    Los rhuav tshem------------------kev cai lij choj
    Nyab laj zoj-----------------tog nplog ywj pheej

    Nom txhua leej--------------raug ntes lawm tag
    Cob tsib dag----------------coj lawv mus kawm
    Raug luag zawm-----------------pob qa tuag tas
    Tsis txawv nas--------------mag yej mag ntxiab

    Qib nom siab-------------------los txog nom me
    Tuag ua ke-------------------nyob rau moos xais
    Nrog huab tais-------------lawv tsev neeg kheej
    Cov txiv neej--------------------tsis hais leej twg

    Siab yau rwg---------------ntshai tsam raug ntes
    Muaj npe ces----------------yeej raug txhom tag
    Hmoob thiaj mag---------nplog liab quab yuam
    Txawm neeg ruam---------yeej raug tsim txom

    Hmoob tej nom------------khiav dhau thaib sab
    Cov tom qab---------------raug kev txom nyem
    Raug luag lem----------------pauj kev xam khib
    Peb Hmoob ntsib --------txhua pab txhua pawg

    Thaum Hmoob tawg -----nyob rau phuv npiab
    Nyab laj liab ----------------thiab cov pub thawj
    Tuaj sawb lawj--------------tua peb cov Hmoob
    Caum qab roob ------------------ncig rau qab ha

    Suab phom ncha ---------------cuag li xob nroo
    Yog thaum xyoo -----------------ib cuaj xya rau
    Nom Hmoob tau --------khiav tawm teb chaws
    Hmoob sawv daws-------nkaum hav xub tsuag

    Txoj kev tuag -----------------muaj xeeb loj zus
    Nom Hmoob pus ----------cov ntse tawm dhau
    Cov ruam tau-----------------raug zawm pob qa
    Tuag pob txha --------------------puv toj pus pes

    Dej naj ces --------------------thiaj hav naj phuv
    Hmoob tuag puv ------------pob txha dawb vog
    Tub rog nplog---------------koom nrog nyab laj
    Tua phuv laj---------------thiab sab pham phais

    Ntes Hmoob hlais---------------nyob rau xas las
    Muab txawj vas-----------nkawv tus me nyuam
    Khaws pov cuam-------------rau hauv qhov cos
    Raug tuav mos------------cuag tuav qos ncoom

    Pub thawj koom--------ntxeev siab rau Hmoob
    Coj nplog coob------------caum Hmoob naj kas
    Raug ntes tas-------------------coj mus moos oo
    Thaum lub xyoo-----------------ib cuaj xya yim

    Cov khiav dim-----------tseem tuav riam phom
    Sawv kwv nyom-------------txoj kev siab phem
    Tuaj rhuav tshem-----------peb Hmoob zej zog
    Sib koom nrog---------------yawg vaj tswv cim

    Sawv txheeb txhim-----------nyob rau phuv laj
    Coj kev ncaj-----------------teeb tsev teej kawm
    Nrhiav kev cawm------pab Hmoob txom nyem
    Raug luag lem---------------tsuj caij quab yuam

    Lub neej khuam----------siab kua muag ntshav
    Ntws xyaw av------------xyaw nroj xyaw tsuag
    Txoj kev tuag-------------------cov tiv tsis nyog
    Tawm mus nrog -----------cov nplog liab nyob

    Txog kev txob -------------------mas muaj tas li
    Tsaus ntuj nti ---------------nyob sib qawg quaj
    Xya caum cuaj -------Hmoob nyob phuv npiab
    Cov koom siab ------------tuav lub npe Hmoob

    Noj nplooj xyoob---------nplooj ntoos yug siav
    Sib pug khiav----------------mus nkaum txoj sia
    Muaj ib txhia ---------------poj niam tuag lawm
    Tso txij nkawm -------------nyob ua ntsuag nos

    Neeg noj qos -------------------tsis muaj tus pab
    Ua cob fab-------------------sawv tuav lub koob
    Thaiv peb Hmoob------------nyob ntuj qub qab
    Siv nplooj hmab ---------nplooj ntoos ua tshuaj

    Tsis khiav tuaj---------------tseem tuav daim av
    Vim tseem xav -----------kom hmoob muaj tug
    Daim av yug--------------Hmoob ib txwm nyob
    Yuav thaj tsob------------------daws kev tso tau

    Hmoob feem ntau-------------tham siab kub lug
    Nrhiav kev pug ----------khiav tawm teb chaws
    Hmoob sawv daws--------tuag taug kev tshuav
    Raug luag kuav------------ mag cuab luag ntaus

    Tej neeg laus------------- tuag tshaib feem ntau
    Hmoob tseem tau-----txaug ntawv hlawv xyab
    Fiv ntuj pab--------------------kom hla dhau dej
    Cov ua ntej-----------------kuj dhau lawm coob

    Ib feem poob-----------------nkaum rau hav fab
    yuav rov qab ----------------------los rov tsis tau
    Vim ntshai dhau----------thiaj tau khiav nkaum
    Roob phuv haum----------thiab roob phaj tsum

    Muab yeej cum----------------khiav tuaj nce toj
    Nplog liab soj--------------tsam khiav tsis dhau
    Me nyuam yau----------------tuag siav tsis pom
    Muab yeeb lom ------------cheem lub suab quaj

    Sib yaum tuaj ------------------mus hla dhau dej
    Cov ua ntej---------------------luag ho tuaj txais
    Nyob vib nais--------------------tuaj nyob ua ke
    Tag loj me ----------------------luag hlub ib yam

    Ho yuav tham-----------------cov tsis ntab ntws
    Xyov tem nws------------------ciaj los nws tuag
    Muaj ib kuag----------------ces nplog muab lob
    Nrog nplog nyob--------------mus zov luag tsev

    Ua lawv qhev--------------nyob nrog kua muag
    Tus raug tuag ---------------hav zoov hav tsuag
    Tsev neeg pluag -----------------tso tsis tau plig
    Tau thov ncig ----------------sawv daws sib pab

    Daws kauj vab----------------thiab daws kauj le
    Ntsuj plig nce---------------txoj kev thawj thiab
    Mus ntuj tshiab----------------kom kaj siab nrig
    Tej ntsuj plig------------------mus lawm du dais

    Ho yuav hais------------------txog peb cov nyob
    Neej pov plob---------------tam tsiaj kaw nkuaj
    Sib phoom tuaj------------nyob thaib teb chaws
    Raug luag ncaws-----------thiab raug luag cem

    Txoj kev phem-------------muaj ntau yam heev
    Luag tsis kheev--------------------mus ua dab tsi
    Hnub thawm hli---------------tsuas tos luag faib
    Me nqaij qaib------------nqaij npuas nqaij ntses

    Faib tsis nres-----------------txhua lub lim piam
    Tej txiv niam-----------------nyob tam npua rog
    Yawg thiab pog----------------seev rov ua hluas
    Neej tseem puas---------------tsis txawj sib hais

    Nyob vib nais -----------------tsis tau ntau hnub
    Txawm siv rub ---------------koj pawg kuv cov
    Los puag sov -------------------nyob noj pw rog
    Nco tsis txog ---------------txoj kev txom nyem

    Lub neej pem------------------toj roob hauv pes
    Luag caum ntes---------------------tua li tej tsiaj
    Muab cuab phiaj------------sim muv sim phom
    Lub meej mom----------------tib neeg thoj nam

    Vaj huam plam-------------poob nab qhoom tag
    Tseem los dag----------nrhiav kev rhuav tshem
    Pib ua phem -------------------rub pab rub pawg
    Kom sib tawg -----------------tsis thooj ntiaj teb

    Txav kom deb--------------tsis txhob koom siab
    Lub neej tshiab---------Hmoob ncav txhob laib
    raws kuv saib ----------------mas tsis tsim nyog
    Peb sib tog --------------------cuag dev cua txha

    Lub koob ncha-------------thoob luag lwm haiv
    Tsis nco xaiv----------------txoj kev haum xeeb
    Los nrog teeb------------------vaj huam sib luag
    Peb sib puag---------------------koom ua ib tsob

    Los pov plob-----------------nrhiav kev sib hlub
    Txhob sib ntxub -----------los kho neej Hmoob
    Nyob yeej koob--------------raws neeg ntiaj teb
    Thiaj muab ntxheb-----------ntos ua kwv huam

    Qhia cov ruam-------------kom nrog paub meej
    Nyob peem tsheej-------------lub neej thaj yeeb
    Kom paub tseeb----------------raws tu lw kawm
    Nrhiav kev tawm---------------txoj kev tsuj caij

    Nplooj siab txaij------------muab laim pov tseg
    Los koom leg--------------kho Hmoob kuj cuab
    Neej pem suab-------------thiaj yuav nrog muaj
    Daim av luaj----------------------lub me xib teg

    Muab pov tseg------------txhob nco txog lawm
    Vim peb tawm------------mus txawv teb chaws
    Peb sawv daws---------------thov tsis txhob tos
    Kuv lus ntos------------------------ces muaj li no

    Thov nej nco----------------lub neej txom nyem
    Rau luag lem--------------------yav ntuj qub qab
    Nyob hav fab------------------noj nroj noj tsuag
    Neej quaj ntsuag---------------tsis muaj tus pab

    Mag voj hmab----------------voj hluas txhua tus
    Neej ploj plus---------------nyob ua ntsuag ntuj
    Raug luag tsuj----------------luag ntaus luag tua
    Tuag sab sua-------------------puv roob puv hav

    Kua muag ntshav---------ntws nto ntawm plhu
    Tsa ncauj hu---------------------lub ntuj tsis pab
    Txawm fiv dab------------------los yeej tsis pov
    Thov txhob kov-------lawm mog peb Hmoob./.

    ( xaus li no )

    koobpovtxuj
    Sponsor
    Sponsor

    Messages : 1273
    Date d'inscription : 2010-04-05
    Age : 56
    Localisation : USA

    Re: Paj Huam teb chaws tawg 1975

    Post  koobpovtxuj on 15th December 2013, 2:46 pm

    koojziagkabzaug wrote:

    Paj Huam Hmoob raug tsim txom 1975

    Xyov yog tim li cas kuv tsis pom koj zaj paj huam li ne?

    Hmong ntuj tshiab
    Sponsor
    Sponsor

    Messages : 537
    Date d'inscription : 2011-05-25

    Re: Paj Huam teb chaws tawg 1975

    Post  Hmong ntuj tshiab on 15th December 2013, 7:06 pm

    koobpovtxuj wrote:
    koojziagkabzaug wrote:

    Paj Huam Hmoob raug tsim txom 1975

    Xyov yog tim li cas kuv tsis pom koj zaj paj huam li ne?


    koj muab block lawm paub? kuv qhib kuv twb pom nev. es ua cas mas lov? koj mus saib seb ntshe koj muab

    Sponsored content

    Re: Paj Huam teb chaws tawg 1975

    Post  Sponsored content Today at 2:46 am


      Current date/time is 8th December 2016, 2:46 am