google-site-verification: googlefbfddf59e706b96b.html

Latest topics

» Kuv 1 Vuagdua
by ibvuagdua 4th December 2016, 3:38 pm

» Keeb Kwm Hmoob mus nyob Guyane
by cvang71 28th November 2016, 7:34 pm

» cwjmemdub lub tsev pajhuam
by koojziagkabzaug 23rd November 2016, 10:53 am

» PAWG HMOOB TRUSTEES UAS TUAV LUB KOOMHAUM LAO FAMILY CENTER YAV DHAU LOS ROV LOS TXEEB TAU LUB KOOMHAUM THIAB LOS TUAV LUB TSIAB30 THIAB LUB KOOBTSHEEB JUL 4TH
by Liajntsuab 20th November 2016, 5:06 am

» Xov Xwm hmoob Nyab Laj sawv tsam mus hais vim Nyab Laj tsi hlub peb haib hmoob
by Liajntsuab 18th November 2016, 8:25 am

» NPE ME NYUAM TUB thiab NPE LAUS
by koojziagkabzaug 15th November 2016, 12:12 pm

» NPE ME NYUAM NTXHAIS
by koojziagkabzaug 15th November 2016, 12:10 pm

» QHIA TSO DUAB thiab Video HAUV VAS SAB
by Tub kev deb 8th November 2016, 3:37 am

» Pojniam Qaug Qav thaum xeeb tub
by PIJPAUJ 6th November 2016, 12:46 am

» Los qhia koj zaj dab neeg
by Khosiab 3rd November 2016, 1:27 am

» TSIS TAU LOS TSIS CHIM
by Khosiab 2nd November 2016, 1:24 am

» Leej twg puas txawj sau nkauj ( suab paj nruag)
by Khosiab 2nd November 2016, 1:11 am

» Lub Neej Lwj Siab
by Khosiab 2nd November 2016, 1:00 am

Tsev seev PajHuam

Hmong beauty nature

Compteur visitor

hnub 18/09/2010 los mus

    LUS HMOOB raws li Gary Lis Yias, Australia

    Share

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    LUS HMOOB raws li Gary Lis Yias, Australia

    Post  koojziagkabzaug on 24th February 2012, 10:57 pm

    LUS HMOOB raws li Gary Lis Yias, Australia


    NTAWV TXHEEB XYUAS
    TXOG
    LUS HMOOB DAWB


    Yeeb Nyiajsua Lis
    Australia
    15/04/1998

    [ Lus qhib ]
    [ Lus piav ]


    i. LUS
    ii. LUS HMOOB
    iii. LUS HMOOB DAWB
    1. LO LUS
    2. SUAB LUS
    3. KOOG LUS
    4. NTU LUS
    5. TXOJ LUS
    iv. KEV SIV LUS
    v. NTAWV HMOOB

    LUS QHIB

    Thaum nyob rau Nplog teb, ua ntej xyoo 1975 ntawd, kuv yog ib tug xib hwb qhia ntawv nyob rau hauv tsev-kawm-ntawv theem nrab (High School). Tom qab lub teb chaws tau nchuav lawm, kuv kuj tau thoj nam tuaj nyob rau teb chaws Auvtaslias. Txij li thaum ntawd los mus, kuv kuj yog ib tug neeg khwv noj, khwv haus lawm xwb. Tiam sis, kuv muaj lub siab xav tau tias kuv yuav tsum ua kom tau ib qho dab tsi los rau peb Hmoob tau siv, los pab peb Hmoob, los txhawb peb Hmoob lub neej, es seb peb puas yuav zoo tau li luag thiab. Qhov ntawd yog sau txog Hmoob cov lus, qhia kom lawv paub txog lawv cov lus zoo tuaj thiab paub siv kom meej, kom tseeb tshaj qhov qub.

    Tiam sis, lus yog neeg ib qho txujci cov heev. Kuv tau siv sijhawm ntau xyoo los txheeb-xyuas txog lus, los mus los txog niaj hnub no, kuv tseem paub lus tsis tau zoo li thiab. Txawm li cas los, kuv xav tias lub caij, lub nyoog uas yuav qhib-nthuav kuv tej tswvyim, tej lus tseemceeb uas piav txog "lus" ntawm los txog lawm (vim kuv tau txheebxyuas los tau muaj 15 xyoos no). Txawm tias yuav muaj ntau qhov uas tseem hais tsis tau meej, ntau yam uas hais tsis tau raug los, kuv vam ntsoov tias sawvdaws yuav muab kev koom tes los sib pab txhawb, sib pab kho rau kom meej, kom raug ntxiv tuaj, es peb Hmoob thiaj li yuav muaj tau kev txawj, kev ntse thiab txujci los siv li luag.

    Cov lus thiab tswvyim nyob rau hauv no, sawvdaws muaj cai coj mus siv, coj mus hais tawm, luam tawm rau lwm tus neeg tau nyeem, tau kawm, tau paub, tiamsis tsis muaj cai coj mus siv rau sab ua lag, ua luam. Yog leej twg ho xav ua li ntawd, nws yuavtsum tau txais cai ntawm tus sau tso. Tshaj ntawd, yog leej twg ho xav nrog tus sau tham, xav qhia tswvyim rau nws paub, tus neeg ntawd yeejmeem sau ntawv tuaj rau nws raws li lub chaw nyob no: 5 Childers St, Bonnyrigg, NSW 2177, Australia. Tus sau yuav muaj lus zoo siab tos-txais nws cov ntawv los tswvyim txhua lub sijhawm.

    Thaum kawg no, kuv cia siab tias cov lus thiab tswvyim nyob rau hauv no yuav pab kom peb Hmoob to taub txog peb cov lus zoo ntxiv tuaj. Yog qhov twg ho tsis zoo, tsis raug, peb muab tso povtseg mus. Peb tsuas yuav qhov raug, qhov zoo thiab qhov muaj nqi rau peb xwb.

    =>Yeeb Nyiajsua Lis
    Australia
    15/04/1998

    LUS PIAV

    Nyob hauv lub ntiajteb no, muaj ntau tsav, ntau yam tsiaj. Hom zoo li cas los kuj muaj tas. Tsuastab, hom uas muaj kev txawjntse thiab kev vammeej loj tshaj plaws, ces kuj yog neeg xwb. Neeg yog ib tug tsiaj uas muaj lub zog me, khiav tsis ceev, tsis muaj kub los kaus hniav los pab ceev nws li tej tsiaj. Tiamsis, neeg ho muaj peevxwm ntau tshaj tej tsiaj, ua dabtsi los ua yeej tej tsiaj. Thaum kawg, neeg yog tus tsiaj uas los kav lub ntiajteb no. Vim li cas neeg ho muaj peevxwm ntau npaum li no, es tej tsiaj tseem nyob xws nkaus li yav dhau los lawm thiab xwb? Tej no kuj ntxim xav kawg nkaus.

    Tej neeg uas tau taug-xyuas txog neeg lub neej yav dhau los tau piav tias neeg muaj kev txawjntse, neeg muaj peevxwm ntau, vim neeg muaj lub hlwb loj (yog piv rau lawv lub cev), ces neeg muaj cimxeeb ntau, txawj xav, txawj ntaus tswvyim ua ub, ua no. Thaum kawg, neeg thiaj li zoo tau li nej hnub no. Tej no kuj muaj tseeb kawg nkaus. Tsuastab, tseem tshuav qho qhov ntxiv thiab.

    Neeg nyiam nyob ua ke, neeg nyiam sib-pab, sib-koom tes, thiab qhov tseemceeb tshaj plaws yog neeg txawj sib-qhia xwm thiab tswvyim. Xwm yog qhov neeg pom, neeg hnov, neeg ua, neeg siv, tsis hais yav dhau los los tamsis no. Tswvyim qhov qhov neeg nyuamqhuav xav tau xwb, es tsis tau muaj nyob rau qhov twg. Thaum neeg muaj peevxwm sib-qhia tau xwm thiab tswvyim li no lawm, ces neeg thiaj li ntse zujzus, muaj peevxwm ntau zujzus thiab pib mus rau txoj kev txawjntse thiab vammeej.

    Nyob rau hauv neeg lub neej, lawv muaj ntau txoj kev los sib qhia xwm thiab tswvyim li no:

    (1) Neeg siv lawv lub qhov-muag, ntsejmuag.
    (2) Neeg siv lawv lub taub-hau, testaw.
    (3) Neeg siv lawv lub cev, lub yeebyam.
    (4) Neeg siv suab, siv lus.
    (5) Neeg siv ntawv.
    (6) Neeg siv duab (duab kos, duab kaw thiab duab zom).
    (7) Neeg siv cim (sign, signal).

    Txoj ke uas neeg siv lawv lub ntsejmuag, qhov-muag los sib qhia xwm thiab tswvyim yog txoj ke uas yoojyim tshaj plaws, es tsis siv dag-zog ntau. Thaum neeg txiav muag, qi muag los sib zog rua qhov-muag hlawshlaws, lawv yeej qhia tau ib qho xwm los tswvyim dabtsi lawm. Qho zaus, yus ntsia ib tug neeg lub qhov muag xwb, yus yeej paub tias nws xav tau li cas, muaj kev ntxhov siab los zoo siab, nws to taub, paub txog qhov yus hais los tsis paub. Ntxiv ntawd, neeg kuj ua ntsejmuag nyha, ntsejmuag luag-nyav los ntsejmuag tsuag tsawv. Tej no kuj qhia tau ntau tsav, ntau yam rau lwm tus neeg paub.

    Qho zaus, neeg kuj ncaws hau, es qhia tias lwm tus hais mas yog lawm, los lawv pomzoo li lwm tus neeg hais lawm. Thaum lawv co hau, yog lawv tsis pomzoo los los yog tsis kam vim lawv xav tias tus hais, hais datsis tsis yog lawm. Tshaj ntawd, lawv kuj siv lawv cov ntivtes los ob txhais tes los piav, qhia txog qhov ub, qhov nov rau lwm tus neeg paub thiab. Thaum ib tug neeg "tsa nws tus ntivtes xoo" rau yus, ces yog nws qhia tias yus ua tau ib qho dabtsi zoo kawg li lawm. Thaum ib tug neeg muab nws txhais tes "co tom ntej rau tom qab" rau yus, ces yog nws xav kom yus mus rau ntawm nws. Thaum ib tug neeg xuas nws ob txhais tes pos nws ob lub qhovntsej, ces yog nws tsis xav hnov yus hais. Tej no kuj yog ib co kev uas neeg siv los qhia xwm thiab tswyim rau lwm tus neeg paub.

    Ntxiv ntawd, neeg kuj siv lawv lub cev los ua yeebyam tawm rau sawvdaws pom, es qhia tau xwm thiab tswvyim rau luag paub, xws li thaum ib tug neeg maj, nws yeej ua haujlwm ceev nrooj, thaum ib tug neeg tshaib plab, nws yeej tsis tshua muaj zog ua dabtsi thiab tsis xav nrog leej twg hais lus. Thaum yus ho mus ntsib ib tug neeg uas yus tsis tau paub dua, yus ntsia nws lub yeebyam xwb, yus yeej paub tias nws nyiam yus los tsis nyiam. Tej no kuj qhia tau ntau qhov xwm los tswvyim rau peb paub thiab.

    Tiamsis, nyob rau hauv neeg lub neej, kev siv suab, siv lus los sib qhia xwm thiab tswvyim yog txoj kev uas neeg siv ntau tshaj plaws thiab tau haujlwm zoo kawg nkaus. Tej kev piav tes, co taub-hau, zij ncaug, ntxi muag los siv lub cev ua yeebyam ntawd yeej qhia tsis tau xwm thiab tswvyim meej los ntau npaum li hais lus. Lus yog ib qho twj tseemceeb uas neeg tsim tau los siv rau sab qhia xwm thiab tswvyim. Neeg siv tau lus rau txhua lub sijhawm. Thaum neeg twb nyob sib nrug deb tsawv lawm, los muaj dabtsi thaiv lawv lawm, lawv tseem siv tau lus los sib hu, sib tham. Niaj hnub no, neeg tseem muaj peevxwm xa tau lus rau hauv xovtooj (telephone) los xa tau rau nruab cua (radio), es neeg nyob rau sab ntuj twg los tseem sib tham los sib nug tau xov. Lus, peb hais tau tias, yog neeg txoj kev sib qhia xwm thiab tswvyim uas tseemceeb kawg nkaus. Yog neeg tsis muaj lus, ces neeg yeej tsis muaj lub neej zoo li niaj hnub no hlo li.

    Tom qab neeg muaj lus, txawj siv lus los sib qhia xwm thiab tswvyim lawm, lawv kuj txawjntse, txawj ua vaj ua tsev nyob, ua noj ua haus, muaj lag, muaj luam, muaj kev vammeej thiab muaj teb, muaj chaw. Thaum ntawd, neeg yuavtsum nrhiav kev los khaws lawv tej lus, tej tswvyim, tej kev txawjntse, kev ua noj, ua haus cia. Yog li ntawd, neeg thiaj li tsim ntaubntawv los siv. Ntaubntawv yog ib qho twj uas pab tau neeg lub neej kom ruaj, kom vam ntxiv, vim ntaubntawv khaws tau ntau tsav, ntau yam txujci, kev txawjntse cia thiab nthuav tau lawv mus deb. Yog leej twg paub ntawbntawv, tus neeg ntawd kuj muaj nqi dua, vim luag sau dabtsi rau hauv ntaubntawv, los nws yeej nyeem tau, paub tau tas. Ntaubntawv muaj nqi nyob rau theem ob rau ntawm txoj kev sib qhia xwm thiab tswvyim (nyob rau tom qab lus)

    Lwm txoj kev uas neeg siv los qhia tau xwm thiab tswvyim kuj yog siv duab, saib duab, tsis hais duab kos (drawing, painting), duab kaw (photograph) los duab zom (video/motion pictures). Qho zaus, yog peb siv lus los siv ntawv xwb, tus mloog los tus nyeem kuj paub tsis meej txog qhov peb hais los peb sau pestsawg. Tsuastab, yog peb siv duab nrog lus los nrog ntawv, tus mloog los tus nyeem yuav paub tseeb dua. (Yog ib tug neeg tsis tau pom dua lub tsheb, txawm peb yuav piav npaum li cas los, nws yeej paub tsis meej. Yog peb kos duab rau nws saib, los muab duab rau nws pom, nws yeej yuav paub tseeb tias lub tsheb zoo li cas tiag.)

    Ntxiv ntawd, kev siv cim(sign) kuj qhia tau xwm thiab tswvyim rau neeg paub thiab, xws li cov cim uas luag kos rau ntawm tej kev, es qhia tias tom ntej muaj kev tshuam, kev lem, kev tws, kev nplua . Tej no kuj muaj nqi rau tus tsav tsheb kawg li, vim luag qhia kom paub ceevfaj, es thiaj li yuav ceev tau xwm txheej. Tshaj ntawd, luag kuj sau cim rau ntawm tej tshuaj, tej chaw tawm rooj, tej tsev kho mob, tej tshuab ua haujlwm los tej khoom siv kom yus paub siv. Kev siv cim kuj pab tau neeg zoo, vim ib txhia neeg tsis txawj ntawv, ces tsis paub nyeem luag tej ntawv. Tshaj ntawd, cim kuj ua kom yus paub txog qhov luag qhia ntawd yoojyim thiab sai heev. Ntxiv ntawd, qho zaus, neeg kuj siv cov cim-tsa (tsa chij, tsa tes, yoj tes, tso pa-taws, tsom teeb) los cim-suab (khob ntoo, khob hlau, ntaus nruas, tshuab hom) los qhia xwm thiab tswvyim. Tej no kuj ua tau haujlwm zoo rau neeg kawg li thiab, yog neeg txawj siv kom haum lub caij, lub nyoog.

    Tej peb hais los no yog neeg tej kev uas lawv siv los sib qhia xwm thiab tswvyim, es lawv thiaj nyob tau ua ke, muaj kev sib pab, sib txhawb, daws tau lawv tej teebmeem thiab sib qhia tau kev txawj, kev ntses. Tiamsis, txhua tsav, txhua yam yeej swb lus tas nrho. Tshaj ntawm qhov neeg siv tau lus rau txhua lub sijhawm, neeg tseem xa tau lus mus rau qhov deb (xa ntawv, ntaus xovtooj) thiab khaws tau neeg tej kev txawj, kev ntse cia ntev (zom lus cia, sau rau hauv ntaubntawv cia). Lus, peb hais tau tias, yog ib qho twj muaj nqi rau neeg kawg-nkaus.

    Nyob rau hauv no, peb yuav txheeb-xyuas txog lus, vim lus muaj kev tseemceeb rau neeg lub neej heev. Tshaj ntawd, peb kuj yuav txheeb-xyuas txog lus Hmoob Dawb. Txawm tus sau ho sau ua lus Hmoob Dawb xwb los, nws vam ntsoov tias cov tswvyim nyob rau hauv no yuav muaj nqi thiab yuav pab tau txhua leej, txhua tus neeg uas xav paub txog lus. Sawvdaws yeejmeem soj qab, tau lw tau mus lawm yav tom ntej.



    Yeeb Nyiajsua Lis
    Australia
    15/04/1998




    NTU IB

    L U S

    Peb niaj hnub hais lus, siv lus, tsuastab peb tsis paub tias lus yog dabtsi, peb tsim lus licas, peb siv lus li cas thiab lus muaj nqi npaum li cas rau peb. Nyob hauv ntu no, peb sim los teb cov lus no seb peb puas yuav paub txog lus zoo ntxiv tuaj.

    1. LUS YOG DABTSI

    Muaj ntau tus neeg tau piav, tau qhia txog lus. Lawv tau hais ntau tsav, ntau yam tias lus yog li ub, lus yog li no. Tus yuav hais li cas los muaj, nyob rau ntawm qhov nws tau kawm, tau paub los. Yog nws tau kawm rau sab "lus" (linguistics), ces nws piav mus nws ib yam lawm. Yog nws tau kawm rau sab "neeg lub neej" (anthropo-logy, sociology) los sab "neeg lub tswvyim, lub yeebyam" (psychology), ces nws kuj muaj nws cov tswvyim txawvtxawv los qhia rau sawvdaws thiab. Txawm li cas los, txhua leej, txhua tus nyias yeej muaj nyias cai zoozoo li. Peb yuav hais tias qhov twg thiaj li yuav raug los muaj tseeb tiag, peb kuj tsis muaj cai yuav los ua tau li ntawd thiab, vim lus yog ntau tsav, ntau yam, lus yog ib qho txujci tob thiab cov heev. Peb tsis muaj peevxwm yuav los hais tau rau zaj twg kom tseeb tiag. Tiamsis, yog peb yuav lub tswvyim uas yoojyim, tseeb thiab qhia kom sawvdaws to-taub txog lus zoo tiag, ces peb hais tau tias:

    "Lus yog cov suab uas neeg hais tawm hauv qhov ncauj los, muaj qhov cim, es neeg siv los sib qhia xwm thiab tswvyim."

    Peb muab cov lus no txhais tau ua ib nqe zujzus mus li no:

    (1) Lus yog cov suab uas neeg hais tawm hauv qhov-ncauj los xwb, es tsis yog lwm hom suab uas neeg ua tau rau sab nraud ( khob ntoo, khob thoob, ntaus nruas) los siv ib hom twj los ua (tshuab raj, qwv nplooj, tshuab ncas, tshuab qeej, qoj rajlaugncas). Cov suab uas peb ua tau li no, peb hu ua suab-tsim (vim peb tsim lawv los) los suab-qog-lus (vim peb ua cov suab no raws li peb cov lus). Tiamsis, lawv tsis yog lus. Lus yog cov suab uas peb hais tau tawm hauv qhov- ncauj los xwb.

    (2) Lawv yuavtsum muaj qhov cim. Qhov cim yog qhov cov suab ntawd tuav txog, hais txog, ib yam li lub suab [tsev] cim txog “neeg qhov chaw nyob”, lub suab [mus] cim txog qhov “rhais ruam lawm tom ntej”. Ob lub suab no yog lus, vim nkawv muaj qhov cim (meaning, reference). Cov suab uas peb hais tau los, tiamsis ho tsis muaj qhov cim, xws li [tsej], [mug] [sujtshawm] kuj tsis yog lus, vim lawv tsis cim txog dabtsi. Lawv yog ib co suab uas peb hais tau tawm hauv qhov-ncauj los xwb, lawv tsis yog lus thiab tsis muaj nqi dabtsi rau peb.

    (3) Peb siv lus los sib qhia xwm thiab tswvyim. Qhov nov yog lus txoj haujlwm. Nws ua ib txog haujlwm tseemceeb rau peb kawg-nkaus. Yog peb tsis muaj lus, ces peb tsis muaj peevxwm yuav qhia tau ib qho dabtsi rau lwm tus neeg paub hlo li. Peb yuav piav tes, piav taw, ua suab [ij ij- aj aj] li cas tawm los los, lwm tus neeg tsis nrog peb paub qhov tseeb. Lawv tsis to-taub tias peb hais txog dabtsi tiag. Tiamsis, yog peb hais lus, siv lus, xws li “Koj los ntawm no seb!” “Ib co neeg tuaj txog nrad. Kuv xav tias lawv yog Hmoob.”, tus hnov cov lus no yuav to-taub, paub zoo tias peb hais txog dabtsi. Peb cov lus yuav qhia tau ib qho xwm los tswvyim rau nws paub (yog nws tau kawm thiab tau paub tias cov lus no cim txog dabtsi). Xwm (event, experience) yog qhov peb tau pom, tau hnov, tau ua los lawm, los tseem pom, tseem hnov thiab tseem ua tamsis no. Ib yam li thaum peb hais: “Kuv yog Hmoob. Thaum ub, kuv nyob rau Nplog teb. Tamsis no, kuv nyob rau tebchaws Fabkis.” yog peb qhia ib co xwm rau lwm tus neeg tau paub. Tswvyim (thougth, idea) yog qhov peb xav tau rau hauv peb lub taub-hau xwb, es peb tseem tsis pom los tsis tau ua rau qhov twg, xws li thaum peb hais: “Taigkis, kuv yuav mus nram teb. Kuv yuav mus ris pobkws los ua ncuav noj.” yog peb qhia txog ib co tswvyim. Nyob hauv neeg lub neej, neeg yeej ua xwm, taug-xyuas xwm thiab xav tswvyim tas mus li.

    2. LUS LOS QHOV TWG LOS

    Muaj ntau zaj dabneeg tau hais tias yog Huabtais Ntuj los yog Saub ua tus tsim lus los rau neeg siv. Muaj qho zaj kuj hais ntxiv tias thaum ub tas-nrho tej neeg nyob hauv ntiajteb no tsuas hais ib hom lus nkaus xwb, tiamsis vim lawv tsis mloog Huabtais Ntuj hais, ces Huabtais Ntuj thiaj li ua kom lawv hais lus sib txawv tas. Los txog niaj hnub no, ib haiv neeg thiaj li hais ib hom lus lawm.

    Tej no, yog peb muab xyuas kom tseeb, kuj tsuas yog dabneeg xwb. Qhov tseeb tiag yog neeg tsim lawv cov lus los rau lawv siv, los sib-qhia xwm thiab tswvyim xws nkaus li lawv tsim tej twj los siv rau tej kev ua noj, ua haus. Thaum xubthawj, neeg kuj tsis muaj lus. Neeg tsuas yog ib tug tsiaj uas txawv tej liab, tej cuam tsis ntau. Tiamsis, vim neeg ho txawj sawv-ntsug mus kev, txawj siv lawv ob txhais tes los ua ub, ua no, ces tsis ntev, neeg kuj muaj tswvyim, txawj xav, txawj txhim-kho lawv lub neej. Txij li thaum ntawd los mus, neeg thiaj xyaum hais lus, tsim lus los siv, vim lawv yuavtsum siv lus los sib-qhia xwm thiab tswvyim, es lawv thiaj li yuav sib-pab, sib-koom tes thiab nyob ua-ke tau.

    3. NEEG TSIM LUS LI CAS

    Txoj kev tsim lus kuj tsis muaj dabtsi nyuaj. Tiamsis, nws kuj muaj ntau theem xws li no:

    (1) Ua ntej peb yuav tsim ib lo lus, peb yuavtsum muaj kev siv lo lus ntawd tso (xws nkaus li thaum peb yuav tsim ib rab txuas los ib rab taus, peb yuavtsum muaj kev siv rab txuas los rab taus ntawd tso). Peb tsis lam tau, lam tsim tej twj los tej lus los nyob dawb yam tsis muaj nqi dabtsi.
    (2) Thaum peb muaj kev siv ib lo lus lawm, xws li thaum peb pom ib qho dabtsi tshiab, ua ib qho dabtsi tshiab, es peb xav tau ib lo lus los cim qhov ntawd, peb yuavtsum nrhiav ib lub suab, los ib co suab, los tuav, los cim qhov ntawd.
    (3) Yog peb laj nrhiav ib lub suab los ib co suab los cim ib qho dabtsi tshiab, peb kuj siv ib lo lus qub los cim qhov ntawd (xws li “tsheb”, “duab”).
    (4) Yog peb tsis muaj lo lus yuav phim los cim qhov tshiab ntawd, peb kuj siv ntau los lo lus qub los piv, los cim qhov ntawd (xws li “dav-hlau”, “tshuab- xaws-khaub ncaws”).
    (5) Yog peb laj ua li hais los saum no, peb kuj cia li khaws luag tej lus los siv, es hloov suab mentsis rau kom phim li peb cov lus (xws li “kasfes”, “Asmesliv- kas”, “koospistawj”).

    Neeg txoj kev tsim lus, yog yuav hais qhov tseemceeb, ces tsuas muaj li no xwb. Qho haiv neeg kuj muaj kev tsim lus meej thiab yoojyim, xws li lawv yeej muaj ib co suab uas lawv ib txwm siv los sib-lo ua lus lawm, ces thaum lawv xav tau ib lo lus tshiab, lawv cia li muab cov suab ntawd los sib-lo tsuagtsuag xwb (ib yam li "monarch", "monarch-ist", "monarch-ism", "anti-monarch-ism"). Thaum zoo li no, lawv kuj muaj kev tsim lus yoojyim heev.

    Txhua haiv neeg, txhua pawg neeg tsim lus los siv raws li lawv txoj kev ua neej. Cov neeg ua teb yuavtsum tsim cov lus los qhia txog lawv txoj kev ua teb. Cov neeg ua lag, ua luam kuj muaj ib co lus los siv rau lawv txoj kev ua lag, ua luam. Cov neeg ua nom, ua tswv, hais plaub, hais ntug tuav kev caij lij choj kuj muaj dua ib co lus los piav, los qhia lawv tej tswvyim kom meej, kom raug. Yuav kom yus to-taub lawv tej lus, yus yuavtsum tau kawm lawv tej lus ntawd los tau nrog lawv nyob ib ntus, es thiaj yuav paub tias lawv cov lus cim txog dabtsi.

    Neeg tsim lus los tau ntau txhiab, ntau vam xyoo lawm, lawv thiaj li muaj lus ntau li peb pom, peb hnov nej hnub no. Tsis muaj leej twg yuav paub tau tias thaum-ub neeg hais lus li cas, vim lus txawj hloov. Cov lus tsib-puas xyoo dhau los lawm txawv cov lus niam no heev. Yog peb nyeem luag tej qub ntawv, peb yeej tsis to taub luag cov lus qub lus ntawd zoo li. Neeg hloov lawv cov lus, vim lawv nyob rau lub sijhawm tshiab, lawv pom, paub qhov tshiab, xav tau cov tswvyim tshiab thiab nyiam hais cov suab tshiab, ces lawv yuavtsum tsim dua cov lus tshiab los muab cov lus qub los cim qhov tshiab. Ib txhia lus qub yeej ploj tas lawm, vim tsis muaj leej twg siv txog lawm.

    4. NEEG KAWM LUS LI CAS

    Luag hais hauv ntawv tias neeg yeej yog ib tug tsiaj uas yeej muaj peevxwm hais lus, yeej yug los hais lus, vim neeg lub qa yeej ua tau ntau lub suab sib-txawv, neeg lub hlwb yeej loj (yog piv rau neeg lub cev), muaj qhov chaw tuav lus, ua kom neeg hais tau lus, siv tau lus. Tsuastab, luag hais ntxiv tias yog ib tug menyuam neeg yug tau los, es tsis nrog neeg nyob, nws kuj tsis txawj hais lus thiab, vim nws tsis hnov lus, tsis muaj neeg cob nws hais lus, ces nws tsis paub tias muaj lus siv hlo li. Yog nws nrog tsiaj nyob, ces nws tsuas txawj ua suab li tsiaj xwb. Yog nws rov los nrog neeg nyob, es neeg qhuab-qhia nws hais lus, ces nws mam li yuav rov txawj hais lus tuaj. (Qhov nov yeej muaj tseeb, vim tau muaj cov menyuam poob zoo thaum tseem yau, es mus nrog tsiaj nyob.). Yog li ntawd, peb hais tau tias neeg yeej muaj peevxwm hais lus, tsuastab, nws yuavtsum nrog ib co neeg nyob, es lawv qhia lus rau nws, nws thiaj li yuav hais tau lus, paub siv lus.

    Neeg kawm lus li cas? Qhov nov kuj yog ib qho haujlwm nyuaj uas peb yuav piav tsis tau kom meejmeej rau ntawm no. Tiamsis, peb yuav qhia mentsis raws li luag tau hais cia rau hauv tej ntaubntawv. Luag hais tias ib tug menyuam yaus, thaum nws yug tau los xwb, yeej txawj quaj, txawj ua suab lawm (tej menyuam tsiaj tsis txawj ua li ntawd, puas yog?). Thaum nws muaj tsib-rau hli li xwb, nws yeej xyaum hais suab tawm hauv qhov-ncauj los tas-zog li lawm. Thaum nws muaj ib xyoos, ces nws xyaum hais lus. Cov lus nws xub hais kuj tsis muaj puastsawg lo thiab yeej tsis meej hlo li (xws li "iv" ). Nws xyaum hais ib lo zujzus raws li tej hlob, tej laus qhia nws. Nws tsis paub tias cov suab ntawd cim txog dabtsi, tsuastab nws pheej hais, pheej siv raws li nws muaj kev siv (thaum nws nqhis dej, nws yuavtsum hais "npwv", nws thiaj tau dej haus). Thaum nws muaj hnubnyoog li peb-plaub xyoos, nws paubtab zujzus, luag hais txog dabtsi, nws thiaj li paub qhov cim zoo tuaj. Thaum nws muaj tsib-rau xyoos li, tej laus hais txog dabtsi, nws yeej paub thiab kawm tau sai kawg-nkaus li. Thaum nws muaj xya-yim xyoo li, nws yeej hais tau lus zoo ib yam li tej laus lawm (yog lawv txhob siv tej lus covcov). Luag hais ntxiv tias neeg kawm tau lus yoojyim thaum lawv tseem muaj hnubnyoog yau, vim lub hlwb tseem mos, ces lub hlwb khaws tau tej lus zoo thiab tus nplaig, lub qhov-ncauj yeej hais tau cov suab meej. Yog lawv muaj hnubnyoog loj lawm, ces lawv yeej laj kawm tau lus thiab yeej hais tau tsis tshua meej, vim lub hlwb laus lawm.

    Neeg kawm tau lus, vim lawv muaj kev siv lus. Lawv yuavtsum siv lus xwb, lawv thiaj li yuav nrog lwm tus neeg nyob tau ua-ke, muaj kev sib-pab, sib-koom tes thiab sib-to-taub. Lus muaj nqi rau neeg li no, ces neeg thiaj li rau siab kawm kom tau lus los siv.

    5. NEEG SIV LUS LI CAS

    Txhua tus neeg yeej siv lus ntau heev (qho tus ruam thiaj li tsis paub siv lus xwb). Ib hnub no, lawv siv txog txhiab, txog vam los lus. Tsuastab, lawv siv lus li cas, es lawv thiaj li yuav qhia tau xwm thiab tswvyim rau lwm tus neeg paub?

    Ua ntej ib tug neeg yuav siv tau ib co lus los qhia ib qho xwm los tswvyim rau lwm tus neeg paub, nws yuavtsum:

    (1) tau kawm, tau paub tias cov lus ntawd cim txog dabtsi.
    (2) paub tias nws xav tau datsi rau ntawm nws txoj kev siv lus ntawd (muaj lub homphiaj- goal, objective)
    (3) paub tias cov lus ntawd puas ntxim hais rau tus neeg ntawd (Yog nws yog menyuam yaus, yus kuj hais lus yoojyim. Yog nws yog neeg laus, yus kuj hais lus cov).
    (4) paub tias cov lus ntawd puas haum siv rau lub sijhawm ntawd ( Thaum luag maj, yus hais lus tsawg rau luag).
    (5) paub tias cov lus ntawd muaj kev siv li cas (lo twg nyob ua ntej, lo twg nyob ua qab).

    Thaum ib tug neeg paub tseeb txoj kev siv lus li no tas lawm, nws mam li muaj peevxwm siv tau lus los qhia xwm thiab tswvyim. Nws muab lus los txhais (encode) ib qho xwm los tswvyim kom raug raws li cov kev no, ces mam li hais tawm rau lwm tus neeg hnov. Tus neeg ntawd yuavtsum paub cov kev siv lus no zoo thiab, nws thiaj li yuav muaj peevxwm muab tau cov lus uas nws hnov ntawd los ntxeev (decode) ua duab (piv rau qhov nws tau paub, tau pom los), ces nws mam li yuav paub tau tias luag hais txog dabtsi, qhov xwm thiab tswvyim ntawd zoo li cas.

    Tiamsis, neeg lub hlwb thiab lub qhov-ncauj ua tau haujlwm nrawm heev. Thaum nws xav hais datsi, nws yeej txhais tau lus tamsis thiab hais tau nrawmnroos tawm los. Tus mloog los yeej muab ntxeev tau ua xwm thiab tswvyim tamsis ntawd thiab. Yog yuav hais qhov tseeb, thaum neeg sib-tham, lawv ke nrhiav xwm, ke xav tswvyim, ke txhais ua lus, ke hais lus tawm los, ke mloog lwm tus neeg cov lus thiab ke ntxeev luag cov lus ua xwm thiab tswyim. Neeg muaj peevxwm ua tau ntau yam li no ua-ke thiab ua tau nrawmnroos. Luag hais ntxiv tias cov tshuab Hlwb hlau txawm yuav tau haujlwm nrawm npaum li cas los tseem tsis muaj peevxwm npaum li neeg lub hlwb. Neeg lub hlwb zoo thiab muaj peevxwm ntau yam tiag, neeg thiaj li hais tau lus, siv tau lus li niaj hnub no.

    6. NEEG MUAJ NTAU TXOJ KEV SIV LUS

    Peb tau hais los lawm tias neeg siv lus los sib-qhia xwm thiab tswvyim. Tiamsis qhov ntawd yog txoj kev siv lus loj, txoj uas neeg siv ntau tshaj plaws xwb. Neeg tseem muaj lwm txoj kev siv lus li no ntxiv thiab, xws li:

    - Lawv siv lus los sib-nug xwm thiab tswvyim
    - Lawv siv lus los txib, quab-yuam lwm tus neeg kom ua li lawv nyiam.
    - Lawv siv lus los qhib siab-ntsws, qhia qhov lawv nyiam los tsis nyiam.
    - Lawv siv lus los tsa kev lomzem, kho lawv lub siab-ntsws.
    - Lawv siv lus los nrhiav kev txawjntse, nthuav txujci.
    - Lawv siv lus los teev dab, teev qhua, coj kevcai txhua yam.
    - Lawv siv lus los tswj plaub-tsaws ntug, tswj kav tebchaws.

    Yog yuav hais kom txhijtxhua, tseem muaj ntau yam hais ntxiv, vim neeg cov kev siv lus no dav kawg nkaus. Qho tus neeg tseem muaj peevxwm siv lus los dag, ntxias lwm tus neeg kom qaug nws quav, kom ua raws li qhov nws xav cia. Lus, luag hais tias, zoo li tus hluav taws, es yus yuav muab siv rau sab phem, sab zoo los yeej tau tas.

    7. LUS MUAJ TXAJNTSIM NPAUM LI CAS RAU NEEG

    Nyob rau hauv neeg lub neej, yog neeg tsis muaj lus, ces lawv yeej tsis muaj peevxwm yuav ua tau dabtsi tshaj ntawm tej tsiaj. Neeg muaj lus, neeg txawj siv lus, ces neeg thiaj li muaj kev sib koom tes zoo, sib-qhia tau tswvyim, kev txawjntse thiab tom qab lawv muaj ntawv, es sau tau lus cia lawm, ces neeg thiaj li tsim tau txujci los siv thiab kho tau lawv lub neej kom vammeej tuaj.

    Peb hais tau tias lus yog tus yuamsij uas qhib tau kev vammeej rau neeg taug. Lus yog neeg ib qho txujci loj kawg nkaus thiab muaj txiajntsim ntau rau neeg heev.








    Last edited by koojziagkabzaug on 26th February 2012, 10:57 pm; edited 4 times in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 10:58 pm



    NTU OB
    LUS HMOOB

    Peb haiv Hmoob nyob rau ntau qhov chaw, ntau lub tebchaws. Peb tau sib-ncaim ntev los tau ntau pua, ntau txhiab xyoo lawm. Tiamsis, peb tseem nco tau, xam tau tias peb yog ib haiv neeg, vim peb tseem muaj kevcai, muaj dabqhuas thiaj muaj lus sib-xws. (Ib txhia Hmoob kuj hais lus sib txawv lawm ntau, tiamsis tseem muaj qho lo sib-xws, ces ua rau luag txheeb tau tias thaum-ub lawv yeej yog tib pawg neeg.)

    1. PEB HMOOB LUB KEEBKWM

    Suav hais tias peb yog ib haiv neeg qub, neeg laus uas yeej ib txawm nyob rau hauv Suav teb los tau ntev lawm (raws li Suav paub, yog 4.000 xyoo). Tiamsis, qhov nov yuav muaj tseeb npaum li cas, peb kuj tsis paub li thiab, vim peb tsis muaj ntawv sau cia. Txawm li cas los, qhov ntawd kuj tsis tseemceeb, vim txhua haiv neeg yeej tsis paub txog lawv lub keebkwm zoo. Lawv tsuas paub mentsis li tej dabneeg thiab xwb.

    Peb haiv Hmoob, raws li peb xav, yog los ntawm yav qaum Suav teb, los tebchaws Moosnkauslias ntawd los. Peb txav los nyob rau hauv Suav teb tau ntev li 3.000 xyoo los no. Tiamsis, vim peejxeem Suav coob heev tuaj, lawv tsis muaj chaw ua noj, ua haus, ces lawv thiaj li nam teb, nam chaw, tuaj txeeb Hmoob av, Hmoob tej chaw nyob, chaw ua noj, ua haus. Txij li thaum ntawd los mus (500 xyoo dhau los no), Hmoob thiaj li tau tawg-khiav mus nyob rau ntau qhov chaw, ntau lub tebchaws. Ces niaj hnub no, Hmoob thiaj li nyob sib-nrug, sib-cais ua ntau pab, ntau pawg , muaj kevcai thiab hais lus sib-txawv mentsis lawm.

    2. PEB MUAJ PUASTSAWG PAWG HMOOB

    Tas nrho haiv Hmoob muaj txog 8.000.000 tawm tus neeg li. Feem coob (90%) nyob rau hauv Suav teb. Lawv nyob rau ntau lub xeev, xws li xeev Yusnaj, Nkim Tsawb, Huspej, Husnaj thiab Kuasxim. Dua li, lwm cov Hmoob kuj muaj nyob rau ntau lub tebchaws, xws li Nyab-laj teb, Los-tsuas teb,Thaib teb, Asmeslivkas teb, Fabkis teb, Nkwsyas teb, Auvtaslias teb thiab Aszastisnas teb.

    Thaum zoo li no, peb hais tau tias peb haiv Hmoob muaj ntau pab, ntau pawg heev. Yog peb ho xam raws li cov lus uas peb hais, peb kuj muaj txog tsib-rau pawg Hmoob, xws li Hmoob Dawb, Hmoob Ntsuab, Hmoob Sib, Hmoob Xauv, Hmoob Dud thiab Hmoob Peg (raws li Tsab Chij hais). Tiamsis, yog peb muab ua zoo txheeb ntxiv, tej zaum, peb tseem yuav muab ntau pawg tshaj ntawm no thiab.

    3. HMOOB MUAJ NTAU HOM LUS

    Yav dhau los, thaum peb tseem nyob rau Lostsuas teb, peb tsuas paub tias Hmoob muaj ob hom lus xwb, xws li lus Hmoob Dawb thiab lus Hmoob Ntsuab. Tsuastab, niaj hnub no, Suav tau qhib tebchaws, qhib kev lag, kev luam, kev mus los sib cuag, peb ib txhia Hmoob tau mus txog Suav teb los, lawv thiaj li pom tias peb haiv Hmoob nyob rau hauv Suav teb hais ntau hom lus sib txawv. Qho pawg Hmoob yeej hais cov lus uas peb tsis paub hlo li.

    Raws li Tsab Chij hais nyob rau hauv nws phau ntawv "Paj Tawg Lag teb", peb haiv Hmoob hais ntau hom lus , xws li lus Hmoob Dawb, lus Hmoob Ntsuab, lus Hmoob Sib, lus Hmoob Xauv, lus Hmoob Dub thiab lus Hmoob Peg. Tsuastab, nws ho tsis qhia kom tseeb tias cov Hmoob no yog nyob rau hauv xeev Yusnaj (Yunnan) los yog nyob rau hauv Suav teb tas nrho. Raws li peb xav mas, nws yeej hais txog tas-nrho cov Hmoob uas nyob rau hauv Suav teb. Tiamsis, tsis paub tias nws yeej txheeb tau meej lawm los, nws tsuas hais raws li nws paub xwb...Txawm li cas los, peb mam li txheebxyuas mus lawm yav tom ntej kom peb paub txog qhov tseeb ntxiv. Tamsis no, peb paub li cas, peb hnov li cas, peb hais li ntawd ua-ntej tso.

    Raws li peb pom ntau daim duab zom (video documents) uas cov Hmoob mus kaw tau los, peb haiv Hmoob hais ntau hom lus sib txawv li no :

    (1) Cov Hmoob nyob rau Nyab-laj qaum teb hais lus Hmoob Dawb txuam lus Hmoob Ntsuab ( lawv hais lo lus “sawvdaws”, tiamsis ho hais “xeem Yaaj”) Qhov nov txhais tau tias cov Hmoob no hais ib hom lus uas tsis yog lus Hmoob Dawb, tiamsis ho tsis yog lus Hmoob Ntsuab thiab. Hom lus no, peb tseem tsis tau paub tias yuav hu li cas. Raws li tus sau xav mas, cov Hmoob no, yav nram ntej, yeej hais lus Hmoob Ntsuab, tiamsis lawv hloov lawv cov lus los ua lus Hmoob Dawb lawm xwb. Raws li qho tus Hmoob hais mas, cov Hmoob no yog Hmoob Lag.

    (2) Cov Hmoob nyob rau hauv xeev Yusnas hais lus Hmoob Dawb, lus Hmoob Ntsuab thiab lus Hmoob Sib. Lus Hmoob Sib txawv lus Hmoob Ntsuab ntau npaum li cas, peb kuj paub tsis tseeb. Tsuastab, cov lus Hmoob Dawb nyob hauv lub xeev no txawv peb cov txog 10-20% li.

    (3) Cov Hmoob nyob rau lus xeev Nkim Tsawb (Guizhou ) hais lus txawv peb lawm ntau. Qho tus Hmoob uas mus pom lawv los hais tias peb tsuas paub lawv cov lus li 20% xwb. Qhov nov yuav muaj tseeb npaum li cas, lwm hnub peb mam li txheeb ntxiv.

    (4) Cov Hmoob nyob rau lub xeev Hunaj hais lus, peb yeej tsis paub hlo li. Tsuastab, cov lus suav, lus cim feem : ib, ob, peb, plaub, tsib,... kuj tseem zoo sib xws. Qhov nov qhia tau tias cov lus qub uas haiv Hmoob xub tsim tau tseem zoo sib-xws. Cov lus tshiab uas sawvdaws nyuamqhuav tsim tom qab no thiaj li sib txawv lawm xwb.

    (5) Cov Hmoob nyob rau cov xeev Kuasxim (Guangxi), xeev Kuastoob (Guangdong) thiab Xeev Hupej (Hubei) hais lus zoo li cas, peb kuj tsis paub. Cov Hmoob uas mus pom lawv los hais tias peb tsuas paub lawv cov lus li 10-20% li thiab xwb.

    Raws li peb pom los no, peb haiv Hmoob cov lus yeej sib txawv lawm ntau. Luag txheeb tau mentsis tias cov Hmoob uas hais lus Hmoob Dawb thiab Hmoob Ntsuab muaj txog li 2.000.000 tawm tus li. Dua li (6.000.000 tawm tus ) ces hais lwm hom lus uas txawv lawm . Qhov nov yuav muaj tseeb npaum li cas cia peb mam li txheeb mus ntxiv.

    4. VIM LI CAS PEB THIAJ HAIS LUS SIB-TXAWV

    Raws li tej neeg txawjntse hais, luag hais tias yog ib pab neeg tawg mus nyob rau ntau qhov chaw, es ntev thiab ntev, lawv tsis muaj kev sib cuag, sib nstsib, ces lawv cov lus yeej yuavtsum sib txawv xwb, vim neeg pheej hloov lus tsis so.

    Peb muab tau pivtxwv zoo ntawm cov menyuam uas nyuamqhuav yug los nyuam-qhuav hlob rau tej tebchaws peb nyob no. Niaj hnub no, lawv yeej hais lus Hmoob txawv lawm ntau, vim lawv cov suab yeej txawv lawm (lawv hais tsis meej), qhov cov lus cim los yeej txawv lawm thiab (tsheb, nkauj, dabneeg), cov kev siv lus los yeej txawv (Koj puas mus nrog kuv?). Tej no qhia tau tias neeg hloov lawv cov lus mus raws li cov neeg uas lawv nrog nyob. Cov Hmoob nyob rau hauv Suav teb hais lus raws li Suav hais. Cov Hmoob nyob rau lwm lub tebchaws kuj hais lus yoog mus raws li cov neeg uas lawv nrog nyob. Thaum zoo li no, ntev thiab ntev, txog ntau pua xyoo li, ces neeg kuj hais lus sib txawv tas lawm.

    5. TEEBMEEM NTAWM QHOV PEB HAIS NTAU HOM LUS

    Raws li peb pom nej hnub no, qhov peb hais ntau hom lus li no ua rau peb txoj kev sib-ntsib, sib-cuag muaj teebmeem heev, vim peb sib-tham, sib-nug xov tsis tau hlo li. Yav tom ntej no, yog peb xav daws cov teebmeem no, peb kuj muaj cov kev zoo li no los taug :

    (1) Peb siv lus Suav los ua lus nruabnrab, vim cov Hmoob nyob rau Suav teb yeej txawj lus Suav tas (nej hnub no cov Hmoob qaum teb thiab Hmoob qab teb hauv Suav teb yeej siv lus Suav los sib tham xwb). Qhov nov kuj muaj ntau yam zoo, xws li yog peb cov Hmoob nyob rau txawv tebchaws los kuj xyaum hais lus Suav, kawm ntawv Suav, ces thaum peb mus txog Suav teb, ces peb nrog Hmoob los nrog Suav tham yeej tau tas. Yog li ntawd, txoj kev txawj lus Suav, paub ntawv Suav no kuj muaj ntau qhov zoo rau peb.

    (2) Peb siv lus Askiv los ua lus nruabnrab. Qhov nov muaj teebmeem ntau dua, vim cov Hmoob uas tsis tau txawj hom lus no yeej laj kawm tau hom lus no los siv. Sawvdaws yuavtsum tau siv nyiaj, siv txiaj (ntiav xibhwb) thiab siv sijhawm ntev (5-6 xyoo yog muaj chaw kawm). Tiamsis, kuj muaj qhov zoo tias yog peb txawj hom lus no lawm, peb mus txog rooj teb twg los, peb yeej siv tau. Tshaj ntawd, peb tseem yuav kawm tau txujci, kev txawj ntse ntxiv.

    (3) Peb siv ib hom lus Hmoob los ua lus nruabnrab. Qhov nov yog qhov muaj teebmeem ntau tshaj plaws, vim peb laj xaiv tau ib hom lus los ua lus nruab nrab (nyias qhua nyias hom zoo dua), peb laj nrhiav tau chaw kawm (tsis muaj xibhwb) thiab laj luam tau ib co ntaubntawv los kawm (peb tsis muaj nyiaj). Tshaj no, txoj kev siv hom lus no yuav tsis dav, tshaj ntawm qhov peb siv los nrog peb Hmoob sib tham thiab sau ntawv sib nug moo, vim peb tsis muaj tebchaws, ces peb tsis muaj cai ua dabtsi ntau. Tsuastab, ho muaj qhov zoo tias, peb yog ib haiv neeg, peb yuavtsum siv peb lus los ua lus nruabnrab, luag thiaj li yuav tsis thuam peb.

    Tej zaum, lwm tus Hmoob ho yuav muaj tswvyim zoo tshaj ntawm no (xws li kawm Esperanto). Yog li ntawd, nws yuavtsum qhia tawm los rau sawvdaws paub. Yog nws cov tswvyim zoo, tej zaum, sawvdaws ho yuav ua li nws hais.

    6. KEV TXHEEB LUS HMOOB LAWM YAV TOM NTEJ

    Yav tom ntej no, yog peb xav paub txog peb cov lus Hmoob kom zoo ntxiv, peb yuavtsum tau siv tswvyim, dagzog thiab nyaijtxiag los txheebxyuas cov lus no ntxiv. Kev txheebxyuas lus kuj tsis nyuab luaj twg (yog peb muaj ib tug qauv zoo lawm). Yog tus Hmoob twg tau kawm Txujci txheebxyuas Lus (Linguistics) los lawm, ces nws yeej muaj tswvyim los peevxwm ua tau txoj haujlwm no. Cov tsis muaj txujci siab, tiamsis muaj lub siab nyiam xwb, kuj los pab tes, pab taw, pab dagzog, ces tsis ntev, peb kuj ua tau raws li peb lub siab nyiam, raws li lub homphaj uas peb tau tsom cia. Cov haujlwm uas peb yuav tau ua muaj mus li no:

    (1) Cov neeg uas nyiam txheebxyuas txog lus Hmoob yuavtsum los sib koom tes ua ib pab los ib lub koomhaum, es ib leeg tshwm nyiaj mentsis los ua peev los thov peev ntawm tej tebchaws uas peb nyob.
    (2) Lub koomhaum no xa cov neeg txawjntse, muaj txujci (muab nyiaj rau lawv noj) mus txheebxyuas lus Hmoob nyob rau ntau qhov chaw raws li lawv pomzoo.
    (3) Lawv luam cov ntawv, cov lus uas txheeb tau ntawd tawm los rau sawvdaws tau nyeem, tau paub.

    Lub tswvyim txheebxyuas lus Hmoob no yog xav paub tias peb haiv Hmoob hais lus zoo li cas, peb muaj puastsawg hom lus, lawv sib-txawv ntau baum li cas thiab muaj kev siv li cas. Tom qab peb paub peb cov lus Hmoob zoo lawm, peb mam li los xyuas seb hom lus twg thiaj li ntxim ua lus nruabnrab los ua lus nrhiav kev txawjntse, kev vam meej rau peb.




    Last edited by koojziagkabzaug on 27th February 2012, 1:17 pm; edited 1 time in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:16 pm



    NTU PEB

    LUS HMOOB DAW





    Lus Hmoob Dawb yog ib hom lus uas muaj Hmoob hais coob tsawv nyob rau hauv Suav teb, Lostsuas teb, Nyab-laj teb, Thaib teb thiab ntau lub tebchaws vammeej, xws li Asmeslivkas teb, Fabkis teb, Auvtaslias teb thiab Nkisyas teb. Tej zaum, cov neeg uas hais hom lus no yuav muaj txog 1 000 000 tus neeg li. Lus Hmoob Dawb zoo li cas, nws los qhov twg los thiab peb muaj puastsawg txoj kev taug-xyuas lus Hmoob Dawb, peb yuav tau hais rau ntu no.

    1. LUS HMOOB DAWB ZOO LI CAS

    Lus Hmoob Dawb yog ib hom lus uas muaj suab sib nkaus xwb, xws li: av, dej, neeg, tsiaj, mus, los,...(Cov lus uas muaj suab nchav kuj zoo li lus Nplog, lus Askiv, lus Fabkis: at, dig, team, stop). Tshaj ntawd, lus Hmoob kuj muaj ib lub suab ntau xwb (monosyllabic) ntau xwb, ib yam li : neeg, tsiaj, dej, av, nroog, zos, mus, los, zoo, phem... Qho lo lus kuj muaj ob los yog ntau lub suab, xws li : tswvyim, hwjchim, yuamsij, dab-laug, txiv-peeb-lab... Tsuastab cov lus no yeej muaj tsawg. Tshaj ntawd, Hmoob Dawb kuj hais lus ua yim ( 8 ) theem suab (tone), xws li : ka, kab, kad, kag, kaj, kam, kas, kav.

    Thaum Hmoob Dawb hais lawv cov lus, lawv hais tau nrawmnroos thiab tsuag tsawv. Lawv tsis tshua laug suab. Tshaj ntawd, cov suab kuj yoojyim, es tus hais tsis tshua laj hais los laj mloog tau. Yog peb piv rau lwm haiv neeg cov lus, kev siv lus Hmoob Dawb (grammar) kuj yoojyim kawg li: peb tsis hloov peb cov lus (no inflections), peb cov kev txuas lus (syntax) kuj yoojyim kawg li thiab: peb hais txog tus tswv (subject) ua ntej, ces peb hais txog qhov num uas nws ua (action) lawv qab, ces hais txog cov tw (complements) rau qhov kawg, piv txwv: kuv noj mov.

    Lus Hmoob Dawb, txawm tias yuav muaj neeg hais tsis coob puastsawg, muaj kev siv tsis tau dav heev (xws li lwm haiv neeg vammeej cov lus), nws kuj zoo siv, zoo hais rau Hmoob lub neej lawm thiab. Nyob rau hauv Lostsuas teb, nws yog ib hom lus uas muaj Hmoob hais coob thiab muaj kev siv dav tshaj. Nyob rau lwm lub tebchaws, xws li Asmeslivkas teb, Fabkis teb, Kasnasdas teb thiab Auvtaslias teb, Hmoob kuj siv hom lus no coob dua thiab. Hom lus no, peb hais tsis tau tias zoo tshaj lwm hom lus Hmoob, tiamsis nws yog ib hom lus uas muaj cov neeg Hmoob muaj koob nto npe hais, ces sawvdaws cia li saib tias nws muaj nqi tuaj lawm. Txawm li cas los, yav tom ntej no, yog sawvdaws siv hom lus kom dav ntxiv, ces nws yuav yog ib hom lus uas muaj nqi, muaj kev tseemceeb rau peb haiv Hmoob.

    2. LUS HMOOB DAWB LOS QHOV TWG LOS

    Tsis muaj leej twg yuav paub tseeb tias lus Hmoob Dawb los qhov twg los, tiamsis yog peb ua-zoo xav, ua zoo taug-xyuas, peb yuav pom tau tias lus Hmoob Dawb lub caj, lub ces yog los qhov twg los.

    Thaum xubthawj, tsis paub tias yog puastsawg txhiab xyoo los lawm, peb haiv Hmoob tseem muaj tsawg tus neeg thiab tseem nyob ua-ke, mas lawv tsuas hais ib hom lus nkaus xwb. Hom lus ntawd zoo li cas, kuj tsis muaj leej twg yuav paub tau. Ntev los tom qab no, peb haiv Hmoob coob ntxiv tuaj, lawv yuavtsum tau sib-ncaim mus nyob rau ntau qhov chaw (xwv thiaj li muaj av ua noj), ces txij li thaum ntawd los, lawv thiaj li hais lus sib-txawv tas lawm. Los txog niaj hnub no, peb haiv Hmoob thiaj li muaj ntau hom lus. Lus Hmoob Dawb yog ib hom lus uas tau ncau, tau tawg ntawm lub hauvpaus los, xws nkaus li ib tsob ntoo uas tau ncau ua ntau caj, ntau ceg, ntau theem. Tiamsis, lus Hmoob Dawb yog theem, yog ces uas nyob deb kawg-nkaus, vim nws txawv lwm hom lus Hmoob lawm ntau.

    Raws li Tsab Chij hais nyob hauv nws phau ntawv "Paj Tawg Lag teb", cov Hmoob Ntsuab, Hmoob Sib, Hmoob Xauv, Hmoob Peg kuj hais lus sib txawv tsis ntau. Tiam-sis, raws li peb paub, lus Hmoob Dawb kuj txawv lwm hom lus Hmoob lawm ntau. Qhov nov txhais tau tias Hmoob Dawb tau ncaim lwm pawg Hmoob los tau ntev tsawv lawm (300 xyoo?) thiab txij li thaum lawv txav los ze rau ntawm tus ciajciam Suav teb, Nyab-laj teb thiab Lostsuas teb ntawd, ces lawv hloov cov lus thiab cov suab lawm ntau zujzus. Niaj hnub no, lus Hmoob Dawb txawv lus Hmoob Ntsuab (hom lus Hmoob uas ze lus Hmoob Dawb tshaj plaws) ntau txog li 20% ntawm cov lo lus, tiamsis cov suab lus kuj txawv lawm ntau diam (yog yus tsis ua zoo mloog, yus yeej laj to-taub tau lus Hmoob Ntsuab).

    Vim li cas Hmoob Dawb thiaj li hloov lus los hais li no? Qhov nov kuj tsis muaj leej twg paub tseeb. Tiamsis, qhov peb xav tias yuav yog ces yog ib txheej neeg hloov lawv cov lus, cov suab lawm qho mentsis. Ces ntau txheej kuj hloov lawm ntau lo lus, ntau lub suab. Thaum kawg, Hmoob Dawb thiaj li hais lus li no.Qhov lawv pheej hloov (raws li peb hais dhau los) yog lawv nyiam cov suab tshiab, lawv muaj kev siv cov lus tshiab thiab muaj tswvyim los siv lus mus rau lwm txoj kev tshiab. Thaum kawg no, peb hais tau tias lus Hmoob Dawb los ntawm pawg Hmoob uas xub txav los nyob rau yav qab Xeev Yusnas, ze rau ntawm tus nrim Lostsuas teb thiab Nyab-laj teb ntawd.

    3. KEV TXHEEBXYUAS LUS HMOOB DAWB

    Kev txheebxyuas lus Hmoob Dawb, los kuj zoo li kev txheebxyuas lwm hom lus, yeej yog ib qho haujlwm loj thiab cov heev, vim muaj ntau qhov rau peb taug, muaj ntau yam rau peb xyuas. Tsis muaj leej twg yuav txheeb tau txhijtxhua los pom tau txhua tsav, txhua yam. Ib leeg tsuas pom qho qhov, tsuas paub qho mentsis xwb. Nws yuavtsum muab lwm tus neeg cov tswvyim, lwm haiv neeg cov txujci los ntxiv rau. Nyob rau hauv no, peb muab kev txheebxyuas lus Hmoob Dawb faib ua xya theem xws li no:

    1. LO LUS
    2. SUAB LUS
    3. KOOG LUS
    4. NTU LUS
    5. TXOJ LUS
    6. TOOM LUS
    7. KEV SIV LUS

    Nyob rau hauv theem ib, peb yuav hais txog lo lus. Lo lus yog cov suab uas muaj qhov cim, es peb siv los qhia xwm thiab tswvyim rau lwm tus neeg paub. Peb muaj ntau txhiab, ntau vam lo lus. Txhua lo lus nyias muaj nyias qhov cim thiab txoj kev siv. Peb muab lawv faib tau ua ntau hom, ntau pawg raws li qhov lawv cim thiab lawv txoj kev siv.

    Nyob rau hauv theem ob, peb yuav txheeb txog suab lus, vim peb xav paub tias peb cov lus muaj suab zoo li cas, peb siv puastsawg hom suab los ua lus thiab txhua lub suab muaj lub ntsiab, muaj plawv zoo li cas.

    Nyob rau hauv theem peb, peb yuav los xyuas txog koog lus. Koog lus yog cov lus uas peb muab hais ua ke, es cim kom tau ib qho dabtsi tseeb tshaj lo lus, xws li : tsev-av, tsev-lawj, tsev-vov-vuas, tsev-kawm-ntawv, tsev-kho-mob.

    Ntu lus yog cov lus uas peb hais nrog ib lo lus, es qhia txog ntau tsav, ntau yam kom tseeb ntxiv, xws li : lub tsev nrad, nws ob lub tsev, peb tus txiv-ntxawm lub tsev. Ntu lus, peb yuav hais rau hauv theem plaub.

    Nyob rau hauv theem tsib, txoj lus yog cov lus uas peb hais sib-raws, sib-tuav ua-ke, es qhia tau ib qho xwm los tswvyim tseeb rau lwm tus neeg paub, ib yam xws li:

    - Lub tsev nrad loj kawg li.
    - Nws muaj ntau tus kwvtij.
    - Lawv xav tau kev vammeej.

    Qho zaus, tej txoj lus kuj ntev thiab cov heev. Yog li ntawd, peb muab lawv faib ua ntau toom lus li nram no:

    - Nws xav/ tias nws yuav mua ua luam,/ es nws thiaj li yuav
    muaj nyiaj li luag. >

    Toom lus, peb yuav muab hais rau hauv theem rau.

    Kev siv lus, nyob rau hauv theem xya, yog qhia txog peb Hmoob txhua txoj kev siv lus thiab txhua theem kev siv lus. Tej kev siv lus no kuj cov heev, tiamsis muaj kev tseemceeb rau neeg lub neej kawg nkaus. Luag hais tias leej twg txawj siv lus, paub hais lus, ces sawvdaws saib nws muaj nqi heev. Yog li ntawd, peb yuavtsum los taugxyuas neeg cov kev siv lus no.

    Xya theem kev txheeb lus Hmoob Dawb no, peb yuav tau muab hais kom meej ntxiv rau yav tom ntej no. Sawvdaws meejyeem soj qab, taug lw tau mus.





    Last edited by koojziagkabzaug on 2nd March 2012, 10:59 am; edited 1 time in total


    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:19 pm



    NTU PLAUB

    LO LUS

    Peb nej hnub hais ntau pua, ntau txhiab lo lus, tiamsis peb tsis paub tseeb tias lus yog dabtsi, lawv muaj qhov cim zoo li cas thiab muaj puastsawg hom lus tiag. Nyob rau hauv suam no, peb yuav los txheeb txog lus Hmoob Dawb, tej kev tsim lus Hmoob Dawb thiab kev cais lus Hmoob Dawb ua ntau hom raws li qhov lawv cim thiab lawv tej kev siv.

    I. LO LUS YOG DABTSI

    Lo lus yog lub suab los cov suab uas peb hais tawm hauv qhov-ncauj los, es peb muab cim ib yam dabtsi uas peb pom, peb hnov, peb hnia tau, saj tau, chwv tau, peb ua thiab peb xav tau txog, xws li: neeg, roob, hav, dej, ntiajteb, hluavtaws, pejxeem, tswvyim, mus, los, zoo, phem, tsemtsawv, dogdig, hos, thiab, ces, txawm, tiamsis,...yog lo lus vim lawv qhov cim los muaj kev siv.

    Cov lus uas muaj ib lub suab xwb, peb hu ua lus tab. Cov lus uas muaj ob lub suab, peb hu ua lus txooj. Cov lus uas muaj peb lub suab rov yav saud, peb hu ua lus cov.

    Ib txhia lus kuj muaj qhov cim tseeb, yoojyim, es peb pom tau sai ( neeg, dej, mus, los, phem, zoo). Tiamsis, ib txhia kuj muaj qhov cim tob, cov, es peb laj pom tau (ces, thiab, tau, yuav, txawm, yog, ntag, xwb )... Txawm li cas los, txhua lo lus yeej muaj nqi tas, vim peb yuav tau siv ntau lo lus, ntau hom lus, es peb thiaj li yuav qhia tau xwm thiab tswvyim meej rau lwm tus neeg paub.

    II. HMOOB DAWB MUAJ PUASTSAWG LO LUS

    Cov lus uas Hmoob Dawb tsim tau los rau lawv siv, peb kuj tsis paub tias muaj puastsawg lo tiag, vim tsis tau muaj leeg twg yuav los txheeb kom txhijtxhua. Cov uas tau txheeb los lawm yog Txiv-plig Nyiaj Pov thiab nws cov xibhwb. Lawv sau tau ib phau ntawv-txhais-lus Hmoob Dawb-Fakis, tsuastab, lawv kuj tsis qhia tias lawv txheeb tau puastsawg lo lus Hmoob Dawb nyob rau hauv. Raws li peb xav, tej zaum, Hmoob Dawb tsuas muaj lus txog li ntawm 10 000 lo li xwb. Tiamsis, cov lus uas peb nej hnub siv tsuas muaj txog 2000 lo li. Dua li yog cov lus tob, lus cov uas tej laus, tej neeg txawjntse thiaj li siv txog xwb.

    Yog peb piv rau lwm haiv neeg uas muaj kev txawjntse ntau los muaj kev vammeej dav lawm, peb yuav pom tau tias peb muaj lus tsawg heev (lus Askiv muaj txog 600 000 lo li). Txawm li cas los, peb cov lus yeej tseev txaus siv rau hauv peb lub neej Hmoob lawm. Thaum peb los txhais luag cov lus, cov ntawv ua peb lus, peb thiaj li muaj teebmeem xwb. Tiamsis, yog peb muaj siab txhais tiag, peb tseem muaj peevxwm ua tau thiab (peb yuav tau nrhiav lus tshiab los siv). Tej no qhia rau peb paub tias txhua haiv neeg tsim lus los siv raws li lawv lub neej thiab kev txawjntse. Haiv neeg twg muaj neej dav, muaj kev txawjntse ntau, haiv neeg ntawd yeej muaj lus ntau. Tiamsis, haiv neeg uas poob qab lawm tseem raws cuag thiab, yog lawv rau siab tiag.

    III. KEV TSIM LO LUS ZOO LI CAS

    Kev tsim lus, raws li peb tau hais los lawm, kuj tsis muaj dabtsi cov. Nyob ntawm peb nyiam lub suab twg, pom tias lub suab twg zoo hais, zoo mloog, ces peb cia li muab lub suab ntawd los cim ib qho dabtsi, ces hais tawm rau lwm tus neeg hnov, los qhia rau nws paub xwb. Yog muaj neeg coob hais lo lus ntawd, siv lo lus ntawd, ces nws cia li yog ib lo lus ruaj, ib lo lus tseemceeb lawm xwb. Yog tsis muaj neeg siv (vim tsis muaj kev siv txog, los tsis nyiam hais, tsis nyiam lub suab ntawd), ces nws cia li poob, ploj mus, tsis muaj tus nqi dabtsi rau leej twg.

    Kev tsim lus kuj tsis yog peb yuav ua zoo xaiv kom tau ib lub suab los phim qhov cim ntawd, es peb mam li siv nws los ua lus. Peb lam tau, lam muab cov suab uas peb nyiam los ua lus thiab xwb, ib yam li peb muab lub suab [ntxhw] los cim ib tug tsiaj uas loj heev. Lub suab no kuj tsis yog yuav phim tus tsiaj no, es peb mam li siv nws. Tiamsis, yog peb nyiam raug los xav txog lub suab no, ces peb cia li siv nws los ua lus xwb.

    Tsuastab, ib haiv neeg nyiam siv ib pawg suab uas muajntsis sib xws los ua lus xwb, ib yam li Hmoob Dawb nyiam siv cov suab tsuag (koj, kuv, mus, los, ib, ob) los ua lus. Tshaj ntawd, lawv nyiam cov suab tab ntau xwb. Vim li cas, peb ho nyiam cov suab zoo li no los ua lus? Qhov nov, kuj tsis muaj leej twg yuav paub tseeb. Raws li peb xav, ces yog lawv pojkoob, yawmtxwv ib txwm siv cov suab zoo li no los ua lus, ces lawv tsuas paub siv cov suab zoo li no xwb. Tej zaum, yog lawv pawg neeg, haiv neeg yeej nyiam raug cov suab no, pom tias cov suab no zoo hais, zoo mloog. Tej zaum, yog lawv kho suab, hloov suab mus raws li cov neeg uas nyob ib ncig lawv. (Hmoob Dawb hloov suab mus raws li Blog thiab Nyab-laj?)

    Kev tsim lus kuj tsis yog yuav nrhiav dua ib co suab tshiab los cim qhov ub, qhov nov tas mus li xwb. Peb kuj muaj ntau txoj kev tsim lus li no ntxiv:

    (1) Peb muab ib lub/ ib co suab qub los cim ib qho dabtsi tshiab, xws li:
    lub tsib dais, tsib tug neeg, tsib nujnqi. Peb hu cov lus no ua lus koom.

    (2) Peb muab cov lus qub los cim ib qho dabtsi tshiab, ib yam li: duab, tsheb, teev, nkauj. Peb hu cov lus no ua lus txia.

    (3) Peb khaws lwm haiv neeg cov lus los siv: pais, tajlaj, kospoos, nyobhoom, taumhwv, phoojywg, xibhwb, laumhuabxeeb, kasfes, xisnesmas, koospistawj. Cov lus no, peb hu ua lus khaws.

    Yog yuav hais qhov tseeb, tsujtsawg kawg nkaus peb thiaj li siv cov suab tshiab los cim ib qho dabtsi ua lus tshiab. Feem ntau, peb yeej muab cov lus qub los cim qhov tshiab xwb los peb khaws lwm haiv neeg cov lus los siv. Cov neeg nyob sab Hnub poob nyiam muab Lus Nkliv [Greek] thiab lus Lastees [Latin] los sib-txuas ua lus tshiab heev. Tej no yog ib txoj kev uas tsim tau lus yoojyim kawg-nkaus.

    Nyob hauv peb lub neej, peb tsim lus thiab hloov lus tas mus li. Qho lo lus kuj nyob ruaj, nyob ntev, vim peb nej hnub siv nws los cim qhov qub. Tiamsis, qho lo, peb kuj ib sij hloov, ces nws ib sij txawv, vim peb pom qhov tshiab, ces peb muab nws mus cim qhov tshiab lawm. Qho lo kuj cim ntau qhov, ntau yam ua-ke. Peb yuavtsum paub tias lub sijhawm twg luag siv nws los cim qhov twg, peb thiaj li yuav to-taub tau luag cov xwm los tswvyim.

    Kev tsim lus yog ib qho haujlwm uas peb ua tas mus li nyob rau hauv peb lub neej, vim peb pom qhov tshiab, paub qhov tshiab, ua qhov tshiab, ces peb yuavtsum nrhiav cov lus tshiab los siv kom haum rau lub caij ntawd.

    IV. KEV SAU LO LUS

    Kev sau lus Hmoob Dawb kuj tsis yoojyim li peb xav. Feem ntau ntawm peb cov lus kuj yog lus tab xwb, xws li : dej, av, roob, hav, zos, neeg, zoo, phem, nyob, mus,... Thaum peb sau cov lus tab li no, kuj tsis muaj dabtsi cov. Peb sau ib lo lus ua ib koog, xws li luag lwm haiv neeg sau luag cov lus. Tiamsis, qho zaus, qho lo lus kuj muaj ntau lub suab, ib yam li: haujlwm, tswvyim, vammeej, rheevrawm, txiv-xwbkuab,.... Thaum peb sau tej lus uas muaj ntau lub suab li no, peb yuavtsum sau lawv sib-lo ua ke.

    Yog peb sau ib lub suab ua ib koog tas mus li: Sawv daws yuav tsum rau siab ua hauj lwm, es lub teb chaws thiaj yuav vam meej tau, mas yog peb sau peb cov lus tsis raug li luag tus kevcai sau lus lawm, vim luag tsis sau lus li peb sau no:

    (1) Po wer ful voi ces a re cal ling for the li be ra li sa tion of can na bis laws.

    Tiamsis, luag sau ib lo lus sib-lo ua ke ua ib koog li no:

    (2) Powerful voices are calling for the liberalisation of cannabis laws.

    Yog li ntawd, peb yuavtsum sau kom rau raws li luag sau luag cov lus thiab. Thaum zoo li no, peb yuavtsum sau peb txoj lus saum toj no ua li no: Sawvdaws yuavtsum rau-siab ua haujlwm, es lub tebchaws thiaj yuav vammeej tau.

    V. KEV TXHEEB LO LUS

    Yog peb xav kom peb paub txog lus Hmoob Dawb tseeb tiag, peb muaj 3 txog kev los txheeb lawv li hauv qab no:

    (1) Peb txheeb raws li qhov lawv cim. Cov lus uas muaj qhov cim tseeb, es peb paub meej tias lawv cim txog dabtsi, peb hu ua lus tseeb. Lawv muaj 6 hom li no:

    (1) Be ---- Noun
    (2) Tuav-be ---- Pronoun
    (3) Yeebyam ---- Verb
    (4) Meejmom ---- Adjective
    (5) Chaw ---- Location adverb
    (6) Sijhawm ---- Time adverb

    (2) Peb txheeb raws li txoj haujlwm uas lawv ua yog peb pom tias qhov lawv cim tsis tshua tseeb los cov heev. Cov lus uas peb cais tau raws li lawv txoj haujlwm muaj 10 hom. Peb hu lawv ua lus txhawb:

    (1) Cais ----- Classifier
    (2) Kem ----- Categorizer
    (3) Feem ----- Quantifier
    (4) Ntu ----- Time/ space Marker
    (5) Pab yeebyam ----- Auxiliary verb
    (6) Ntsuas ----- Adverb
    (7) Ntsuas Theem ----- Adverb of degree
    ( 8 ) Tshwm ----- Preposition
    (9) Txuas ----- Conjuction
    (10) Tsuam ----- Emphasizer

    (3) Yog ib txhia lus muaj qhov cim los txoj haujlwm tsis tseeb, peb kuj muab lawv cais tau ua lwm hom. Peb hu lawv ua lus txawv. Lawv muaj 2 hom zoo li no:

    (1) Qhia Interjection
    (2) Qog Onomatoepics

    IV. COV LUS TSEEB

    Raws li peb tau hais los saum no, peb muaj 6 hom lus uas muaj qhov cim tseeb. Tiamsis, txhua hom tseem ncau ua ntau caj, ntau ces, muaj ntau qhov sib txawv thiab. Peb muab lawv cais tau ua ntau hom li no ntxiv.

    1. BE

    Be yog cov lus uas peb muab tis rau txhua tsav, txhua yam uas muaj lub cev, es peb pom tau, chwv tau, xws li: ntuj, av, dej, roob, hav, neeg, tsiaj, vajtse, nyiajtxiag, zaub, mov, los txhua yam uas peb hnov, hnia tau thiab xav tau txog xwb, es tsis muaj lub cev rau peb pom, xws li: suab, lus, kwvtxhiaj, ntxhiab tswvyim, koob, moo, be, hmoov ,txujci, kev txawjntse, koomhaum, tebchaws. Peb cais tau be ua 2 pawg li no :

    (1) Be Koom yog cov be uas peb tis rau txhua yam uas zoo sib-xws, es lawv koom tau ib lub be, ib yam li: dej, av, roob, ntoo, tsiaj, mov, zaub.

    (2) Be Keev yog cov be uas peb tis rau ib tug neeg, ib tug tsiaj, ib qho chaw los ib lub tebchaws nkaus xwb, es xwv thaum twg luag hais txog, ces peb paub tseeb tias yog leej twg, qhov twg, xws li: Pov, Yawg Nyiaj Tsu, Baj Taj, Loojceeb, Najnyeej, Xivnij, Asmeslivkas. Yog peb txheeb raws li qhov peb lub qhov-muag pom, peb cais tau be ua 2 pawg li no ntxiv:

    (1) Be tseem yog cov be uas peb tis rau tej yam peb pom tau ntawm qhov -muag los peb tuav tau: ntuj, av, dej, tsiaj, neeg, zos, tebchaws .

    (2) Be qhuav yog cov be uas peb tis rau tej yam uas peb xav tau txog xwb, es tsis pom muaj nyob qhov twg: koob, hmoov, tswvyim, txujci.

    2. TUAV-BE

    Tuav-be yog cov lus uas peb muab siv los tuav peb lub be, tus neeg peb hais lus rau lub be, tus neeg uas peb hais txog lub be thiab txhua tsav, txhua yam uas peb twb hais dhau los lawm ib zaug lub be. Ib yam li thaum peb sib tham, peb tsis hais tias:

    - Tub Xab tau tuaj ntsib tus me leej muam. Tub Xab xav paub tias tus me leej muam muaj lub be hu ua li cas, tus me leej muam nyob rau qhov twg thiab tus me leej muam twb muaj tus hlub lawm los tsis tau.

    - Hmoob nyiam nyob rau pem tojroob. Hmoob rau siab ua noj, ua haus heev.

    Tiamsis, Hmoob tsis muaj txujci, ces Hmoob lub neej thiaj li tsis vammeej.
    Tsuastab, peb hais li no:

    - Kuv tau tuaj ntsib koj. Kuv xav paub tias koj lub be hu ua li cas, koj nyob qhov twg thiab koj twb muaj tus hlub lawm los tsis tau.

    - Hmoob nyiam nyob rau pem toj roob. Lawv rau siab ua noj, ua haus heev.

    Tiamsis, lawv tsis muaj txujci, ces lawv lub neej thiaj li tsis vammeej.

    Cov lus "kuv, koj, lawv" yog tuav-be. Lawv pab kom peb txhob tau hais lub be qub ntauntau zaus. Hmoob Dawb muaj 2 hom tuav-be li no:

    (1) Cov tuav-be ncaj muaj 9 lo li no:
    (a)Tuav-be tab tus ib (tuav yus tus hais lus): kuv
    (b) Tuav-be tab tus ob (tuav tus yus hais lus rau): koj
    (c) Tuav-be tab tus peb (tuav tus yus hais txog): nws
    (d) Tuav-be nkawm tus ib (tuav ob tug neeg hais lus): wb
    (e)Tuav-be nkawm tus ob (tuav ob tug neeg yus hais lus rau): neb
    (f) Tuav-be nkawm tus peb (tuav ob tug neeg yus hais txog):nkawv
    (g)Tuav-be coob tus ib (tuav cov hais lus):peb
    (h) Tuav-be coob tus ob (tuav cov yus hais lus rau): nej
    (i) Tuav-be coob tus peb(tuav cov yus hais txog): lawv

    (2) Cov tuav-be nrug muaj 3 los li no:
    (a) Tuav-be tus neeg hais thiab lwm tus neeg: yus, nyias
    (b) Tuav-be tus txhua tus neeg: sawvdaws
    (c) Tuav-be tus neeg deb xwb: luag

    3. YEEBYAM

    Yeebyam yog cov lus uas peb siv los qhia tias tus tswv-xwm (be thiab tuav-be) ua ib qho haujlwm dabtsi, coj ib lub yeebyam li cas los piav tias nws yog dabtsi, muaj lub neej zoo li cas.

    - Neeg noj mov.
    - Noog ya saum ntuj.
    - Kuv pom ib boj qaib qus.
    - Nws xav txog nws cov kwvtij.
    - Lawv yog neeg txawjntse.
    - Nkawv muaj tswvyim heev.

    Cov lus "noj, ya, pom, xav, yog, muaj " yog yeebyam. Peb faib tau yeebyam ua 2 hom tseemceeb li no :

    (1) Yeebyam coj qhia txog qhov haujlwm uas tus tswv-xwm ua, xws li: mus, los, noj, haus, pw, zaum, nyob, tuag, xav, bausuav, ntxias,...

    (2) Yeeyam piav qhia kom peb paub tus tswv-xwm lub yeebyam, lub neej los kev muaj peevxwm, xws li: yog, muaj, pom, hnov, paub, txawj, nyiam, dhuav, hlub, pom-zoo, txiav-txim,...

    4. MEEJMOM

    Meejmom yog cov lus uas peb siv los qhia tias tus tswv-xwm (be thiab tuav-be) zoo li cas, muaj lub cev txawm tau li cas los muaj lub meejmom zoo li cas.
    - Lub nroog Sydney loj diam.
    - Neeg nquag yeej nyiam ua haujlwm.
    - Lawv zoo rau peb kawg li.

    Cov lus loj, tuab, nquag, zoo yog meejmom. Peb muaj ntau hom meejmom zoo li no:
    - Meejmom qhia cev : loj, me, siab, qis, dav, nqaim, nkhaus, ncaj.
    - Meejmom qhia txheej-zas: dawb, dub, liab, ntsuab, daj, txho.
    - Meejmom qhia siabntsws : zoo, phem, ruam, ntse, ncaj, nkhaus.

    Qho zaus, peb kuj siv meejmom ua ntej be, xws li: zoo neeg, laus neeg.

    5. CHAW

    Chaw yog cov lus qhia txog tej chaw uas nyob ib ncig peb. Tej lo kuj qhia txog qhov chaw ze, tej lo kuj qhia txog qhov chaw deb. Tej lo kuj qhia txog qhov chaw uas nyob qis, tej lo kuj qhia txog qhov chaw uas nyob siab. Tej lo kuj qhia txog qhov chaw sab hauv, tej lo kuj qhia txog qhov chaw sab nraud. Yog yuav hais qhov tseeb, peb muaj lus los qhia txog txhua qhov chaw uas nyob ib ncig peb.

    Cov chaw (lus qhia chaw) no kuj muaj baum li no lo:
    no, nov, ntawd, ped, nrad, tid, tod, nraud, saud, hauv.

    Cov lus qhia chaw uas muaj ob los rov yav saud, xws li: ntawm no, tim ub, puag tid, peb hu ua koog chaw (xyuas KOOG LUS). Ib txhia lus kuj zoo li chaw thiab, tiamsis lawv muaj kev siv txawv, ib yam li: nram teb, pem lawv lub zos. Peb hu lawv ua taw (lus taw chaw) [xyuas cov lus txhawb nyob hauv qab no].

    6. SIJHAWM

    Sijhawm yog cov lus uas qhia txog sijhawm, txog caij, txog nyoog. Cov lus uas qhia sijhawm kuj muaj 2 hom sib-txawv li no:
    - Cov sijhawm uas muaj tsawg lo lus: nag, naghmo, thaud, taigkis.
    - Cov sijhawm uas muaj ntau lo lus sib txuas: ib pliag, ib tsam, lwm
    hnub, puag thaud, lub hlis dhau los, ob lub xyoos nram ub. (xyuas pawg sijhawm)

    Cov sijhawm no, peb muab faib tau ua 3 hom li no ntxiv:
    - Cov qhia lub sijhawm tamsis no: tamsis no, tsam no, hnub no, lub hlis no, lub xyoo no, txheej no.
    - Cov qhia lub sijhawm dhau los: puag ta, nag, naghmo, hnoob-hnub, peb hnub dhau los no, lub hlis dhau los no, tsaib no, tsib xyoo dhau los lawm, thaud, thaum-ub, puag thaum-ub, puag txheej thaud.
    - Cov qhia lub sijhawm yav tom ntej: ib pliag, ib tsam, ib chim, taigkis, neegkis, puag nraus, peb hnub tom ntej no, ob lub hlis tom ntej no, lwm xyoo, lwm txheej.

    Cov lus tseeb, peb tsuas hais mentsis li no ua ntej xwb tso. Lwm hnub, yog peb txheeb tau ntxiv, peb paub txog peb cov lus zoo tshaj ntawm no, peb mam li hais kom tseeb tshaj ntawm no ntxiv.

    V. COV LUS TXHAWB

    Lus txhawb yog cov lus uas muaj qhov cim cov, tob, es peb laj pom los laj xav tau. Lawv txoj haujlwm tseemceeb yog pab kom cov lus tseeb uas peb hais dhau los saum no kom qhia tau xwm thiab tswvyim meej ntxiv tuaj.

    1. CAIS

    Cais yog cov lus uas peb hais ua ntej be, xws li: daim ntawv, lub tsev, txoj hlua, cov neeg. Cov lus: daim, lub, txoj, cov yog cais. Cov cais no qhia tias cov be: ntawv, tsev, hlua, neeg muaj lub cev zoo li cas thiab muaj feem ntau baum li cas. Peb faib tau cov cais no ua 3 hom li no:

    (1) Cais qhia cev: daim, kaj, kauj, lub, pob, thooj, tus, tsob, txoj, yav, ntu, kab, phab, sab, thaj, txhais.
    (2) Cais qhia feem: boj, cov, koog, kheev, leej, pab, pawg, phau, xyuv, nkawm.
    (3) Cais qhia qhov sib xws: hom, yam.

    2. KEM

    Kem yog cov lus uas peb hais ua ntej be thiab lawv qab cais, ib yam li: cov niag neeg, pab nyuag Hmoob, tus me ntxhais. Cov lus: niag, nyuag, me yog kem. Lawv qhia tias yus muaj lub siab xav li cas rau cov be uas yus hais txog ntawd, yus nyiam, yus dhuav los yus ntxub. Peb faib tau cov kem no ua 2 hom li no:

    (1) Kem hmov: me.
    (2) Kem dhuav: nyuag, niag.

    3. FEEM

    Feem yog cov lus uas nyob ua ntej cais thiab be, los cais nkaus xwb, xws li: ob tug neeg, peb pab nyuj, kaum qhov, ntau daim. Cov lus: ob, peb, kaum, ntau yog feem. Feem qhia tias cov be los qhov yus hais txog ntawd muaj ntau baum li cas. Peb faib tau feem ua 2 hom li no:

    (1) Feem tseeb: ib, ob, peb, kaum, ib puas, ob txhiab, tsib puas txhiab, rau-caum plhom..
    (b) Feem xam: qho, ntau, ib nrab, ib txhia, ib co.

    4. TAW

    Taw yog cov lus uas peb hais ua ntej be los pawg be, xws li: pem zos, tim daim teb, hauv lawv lub tsev. Cov lus: pem, tim, hauv yog taw (lus taw chaw). Lawv qhia tias cov be uas peb hais txog ntawd nyob qhov twg (deb, ze, siab, qis). Peb cov taw muaj baum li no tus: ntawm, pem, nram, hauv, saum, tom, tim, nraum.

    Qho zaus, peb kuj siv cov taw no nrog cov chaw uas peb twb hais dhau los lawm, ib yam li: ntawm lub tsev ntawd, pem Hmoob lub zos ped, nram lawv daim teb nrad.

    - Lo lus ntawm yog taw, lo lus ntawd yog chaw.
    - Lo lus pem - , lo lus ped
    - Lo lus nram - , lo lus nrad

    5. NTU

    Ntu yog ib co lus uas peb siv lawv qab be, cais, chaw, taw thiab sijhawm, es qhia kom peb paub txog lawv tseeb ntxiv, ib yam li:

    - thaum ub, tim ub, tus ub, cov ub.
    - thaum i, tim i , tus i, cov i.
    - hnub no, tim no, tus no, cov no.
    - puag thaud, puag ped, puag tim lawv lub zos tid.
    - qhov nyuag ntawd, qhov nyuag tid.

    Cov lus ub, i, no, puag, qhov nyuag yog ntu. Peb muaj baum li no tus ntu xwb.

    6. PAB
    Pab yog cov lus peb hais nrog yeebyam los meejmom, es qhia kom tau xwm thiab tswvyim meej raws li lub caij, lub nyoog uas peb nyob, kom tseeb raws li tus hais lub siab los lub homphiaj uas nws xav tau, xws li:

    - Nws tabtom mus.
    - Peb twb yuav noj mov.
    - Lawv yeej tau ua li lawm.
    - Cov blej no nyuamqhuav daj zomzaws.
    - Nws tsis nyiam lub tsho no.
    - Nkawv sib hlub diam.
    - Koj puas mus?

    Cov lus tabtom, twb yuav, yeej tau, nyuamqhuav, tsis, sib, puas yog pab (cov lus pab meejmom thiab yeebyam). Peb muaj 3 hom pab li no:

    (1) Pab qhia sijhawm : tabtom, tseem, yuav, tseem yuav, twb yuav, nyuamqhuav, twb...lawm, tau, tau...lawm, twb tau...lawm...
    (2) Pab qhia lub siab, lub tswvyim: yeej, pheej, thiaj, txawm, yuavtsum, yuav tau.

    (3) Pab hloov qhov cim: sib, tsis, laj, txhob.

    7. NTXIV

    Ntxiv yog cov lus uas peb hais lawv qab yeebyam los meejmom, es pab kom yeebyam thiab meejmom qhia tau xwm los tswvyim tseeb ntxiv:

    - Lawv mus zomzaws.
    - Cua tshuab vigvwg
    - Nws sawv tsawvtsees.
    - Haujsam hnav daim ntaub daj rhuv.
    - Peb pom blooj ntoo ntsuab xwbxiab txhua chaw.

    Cov lus zomzaws, vigvwg, tsawvtsees, rhuv, xwbxiab yog ntxiv. Peb muaj 2 hom ntxiv zoo li no:

    (1) Ntxiv yeebyam yog cov ntxiv peb hais lawv qab yeebyam:
    zomzaws, zujzus, dujdig, tsees, tsawvtsees.
    (2) Ntxiv meejmom yog cov ntxiv peb hais lawv qab meejmom:
    cees, qha, qhawv, nyoos, paug, pwbpaug, rhuv, rhwbrhuv....

    8. THEEM

    Theem yog cov lus uas peb hais lawv qab yeebyam, meejmom los ntxiv, es qhia kom peb paub tseeb txog lawv zoo ntxiv thiab:

    - Nws paub mentsis xwb.
    - Lub taub no loj diam.
    - Tus nees no khiav ceev heev.
    - Lub tswvyim no zoo kawg-nkaus li.

    Cov lus mentsis, diam, heev, kawg-nkaus yog theem. Lwm lo lus uas yog theem kuj muaj li no: dogdig, mentsis, tsemtsawv, tsawv, haujsim, kawg.

    9. TXUAS

    Txuas yog cov lus uas peb siv los txuas ntau lo lus, ntau koog lus, ntau ntu lus los ntau txoj lus ua ke:

    - Neeg thiab liab sib txawv tsis ntau.
    - Koj yuav mus los yuav nyob?
    - Yog peb rau siab khwv, ces peb lub neej yeej yuav zoo.
    - Nws hais tias peb yuavtsum ua haujlwm ntau ntxiv.
    - Nkawv pom-zoo kom peb txhob nyob.
    - Nws pom tias peb tsis zoo. Yog li, nws thiaj tsis nyiam peb.
    - Vim tias neeg txawj hais lus, neeg thiaj li muaj kev vammeej.
    - Lub tsev uas nyob ntawd yog kuv lub.

    Cov lus thiab, los, yog, ces, tias, kom, yog li, vim tias, uas yog txuas.
    Peb muaj 4 hom txuas li no:

    (1) Txuas khi yog cov lus uas peb siv los khi ob lo lus, ob koog lus, ob ntu lus los ob txoj lus ua ke. Lawv muaj li no: thiab, ces, los, es, tsuastab, tiamsis.
    (2) Txuas piav yog cov lus uas peb siv ua los piav ib co xwm los tswv yim. Lawv nyob ua ntej los nyob rau nruabnrab ntawm ob txog lus.
    Peb cov txuas piav muaj li no: vim, vim tias, tim, tim tias, yog, yog tias, txawm, txawm tias, tabtxawm, tabtxawm tias, rau qhov.

    (3) Txuas qhib yog cov lus uas peb siv los qhib ib co xwm los tswvyim ntxiv. Lawv muaj li no: tias, kom.

    (4) Txuas nthuav yog lo lus uas peb siv lawv be, koog be los cais, es nthuav kom peb paub txog lawv tseeb ntxiv. Peb muaj ib tug txuas nthuav xwb : uas.
    (5) Txuas piv yog cov lus uas peb siv los txuas ob qho xwm los ob lub tswvyim ua ke, xws li:

    - Nws zoo li koj.
    - Nkawv loj tshaj neb.
    - Tus no me dua tus nrad.
    Cov lus li, tshaj, dua yog txuas piv.

    (6) Txuas cob yog lo lus uas peb hais lawv qab ib tug yeebyam thiab lwm lo lus, xws li be, tuav be, pawg be, es qhia tias qhov yeebyam ntawd mus cob rau qhov twg:
    - Nws pub mov rau cov neeg tshaib plab.
    - Lawv nqa zaub tuaj rau peb noj.
    - Nws hais rau kuv tias...

    Lo lus rau yog txuas cob.

    10. XAUS

    Xaus yog cov lus uas peb hais los xaus rau tom qab ib lo lus, ib pawg lus los ib txog lus, es pab kom lawv zoo mloog, kom lawv qhia tau tus hais lub siab, lub ntsws tseeb.

    - Koj mus yuam.
    - Nws zoo hos.
    - Nkawv rau siab ua teb diam sub.
    - Neb muaj nyiaj ntau baumd ntag.
    - Lawv cem peb heev kawg li.

    Cov lus yuam, hos, sub,ntag, li yog tsuam. Lwm lo tsuam kuj muaj li no: xwb, thiab, lasmas, sob, seb, meb, kiag.

    III. COV LUS TXAW

    Cov lus txawv yog cov lus uas tsis muaj qhov cim, tsuastab qhia txog tus hais lub siab, lub ntsws, kev zoo siab los chim siab. Ntxiv ntawd, peb tsis hais cov lus no nrog rau lwm hom lus, tiamsis lawv nyob lawv ib cag, ib yam li:
    - Tamtseeb 'os, ua cas es nws tseem ua li ne! - Aws, kuv mam los. - Ab, tsam no nws nyob qhov twg lawm ne...

    Cov lus tamtseeb, aws, ab yog lus txawv. Peb muaj 5 hom lus txawv li no:
    (1) Nthe yog cov lus uas peb hais thaum peb chim siab, bautaws los peb pom ib qho dabtsi txawvtxav heev. Lawv zoo li no:

    - Haub!
    - Bab!
    - Tamtseeb!
    - Ntuj 'es!
    - Niag tsov tom!

    (2) Teb yog cov lus uas peb teb ib tug neeg thaum nws hu peb los nrog peb

    tham. Peb cov lus Teb zoo li no:

    - Aws
    - Haf
    - lox
    - ua li
    - yog

    (3) Seev yog cov lus uas peb hais thaum yus muaj kev ntxhov siab, txob

    siab. Lus seev zoo li no:

    - Ab
    - Eb

    (4) Nyhos yog cov lus uas peb hais thaum peb pom leej twg ua ib qho tsis

    zoo los yuamkev. Cov lus nyho zoo li no:

    - Sujsum
    - Nyuamqhuav phim xwb!
    - Povkhawv nkaus lawm lasmas!

    (5) Qog yog cov lus peb hais thaum peb qog ib co suab uas peb hnov los.
    Peb yuav qog ua cov suab dabtsi los tau tas. Lawv zoo li no:
    - Qog suab ntoo vau: nkag...
    - Qog suab phom: pag, pigpag, bigboog...
    - Qog suab aub tsem: vawb-vawb...
    - Qog suab qaib qua: kumkub-lug-kus...
    - Qog suab tuav cos: dajdawglawg, dajdawglawg...

    Lo lus, peb tsuas hais mentsis li no ua ntej xwb tso. Lwm hnub, yog peb ho txheeb tau ntxiv, peb ho paub tseeb tshaj ntawm no, peb mam li hais kom ntau ntxiv thiab meej tshaj ntawm no ntxiv.



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:23 pm


    NTU TSIB

    SUAB LUS


    Cov lus uas peb tsim tau los siv kuj muaj ntau tsav, ntau yam suab sib txawv. Nyob rau hauv ntu no, peb yuav los xyuas txog cov suab uas Hmoob Dawb siv los ua lus los yog cov suab lus. Lawv zoo li cas, muaj puastsawg lub suab sib txawv, peb cais tau lawv ua puastsawg hom thiab lawv muaj lub ntsiab zoo li cas.

    I. SUAB LUS YOG DABTSI

    Suab lus yog cov suab uas peb muab siv los ua lus, ib yam li peb muab lub suab [tsev] los cim txog neeg qhov chaw nyob, ces peb hais tias nws yog ib lub suab lus. Cov suab uas tsis muaj qhov cim, xws li [suj, khsiam, ntxheeb], ces peb hu ua suab hais xwb (vim neeg hais tau xwb, tiamsis lawv tsis siv los ua lus). Lwm hom suab uas neeg siv tau los sib qhia xwm thiab tswvyim, xws li suab nruas, suab raj, suab qeej, suab ncas, suab qwv blooj..., peb hu ua suab tsim, vim peb siv ib co twj los tsim cov suab no, tiamsis lawv kuj tsis yog suab lus thiab.

    Nyob hauv txoj kev tsim lus, yog peb xav kom peb cov lus yoojyim, es luag paub tseeb, to-taub sai, peb yuavtsum siv ib lub suab los ua ib lo lus nkaus xwb, ib yam li peb siv lub suab [kawm] los cim lub pobtawb uas peb siv los ris khoom. Thaum twg, peb hnov lub suab no, peb yeej paub zoo txog qhov nws cim. Tiamsis, muaj ntau zaus, peb siv ib lub suab los cim ntau qhov ua lus, xws li [kaj] : (kaj zaub), (ntuj kaj). Tej no yog tej-zaum peb muaj suab tsis txaus, tej-zaum yog peb laj nrhiav lwm lub suab tshiab, ces peb cia li yuav lub suab qub los ua ib lo lus tshiab lawm xwb. Qhov siv cov suab qub los ua lus tshiab no kuj muajntsis muaj teebmeem rau txoj kev siv lus. Tiamsis, tom qab neeg paub lawv zoo lawm, neeg kuj siv tau zoo kawg li thiab.

    II. HMOOB DAWB COV SUAB LUS ZOO LI CAS

    Yog peb xam tas nrho cov suab uas Hmoob Dawb muab siv los ua lus, tej-zaum, tsuas muaj txog 3 000 lub suab lus li xwb, tiamsis vim lawv muaj ntau txoj kev siv cov suab no los ua lus, ces lawv kuj muaj lus txaus siv lawm thiab, ib yam li:

    (1) Lawv siv ib lub suab los ua ntau lo lus : [kub]< dej kub, muaj kub.
    (2) Lawv muab ob los ntau lub suab los sib txuas ua lus: [huab+tais],

    [laum+huab+xeeb].

    Hmoob Dawb cov suab lus yog suab sib nkaus xwb, ib yam li [ka] [ntsa] [ca] [hla]. Vim li cas Hmoob Dawb thiaj li siv cov suab sib no los ua lus nkaus xwb? Qhov nov tsis muaj leej twg paub tseeb, tshaj ntawm qhov tias Hmoob Dawb yeej nyiam hom suab zoo li no los paub hom suab no nkaus xwb.

    Tshaj no, Hmoob Dawb hais lawv cov suab ua yim theem sib txawv, xws li [ka] [kab] [kad] [kag] [kaj] [kam] [kas] [kav]. Thaum zoo li no, lawv kuj muaj kev tsim kom tau lus ntau ntxiv. Qhov Hmoob Dawb hais lus ua tej theem no, kuj tsis muaj leej twg paub tias yog vim li cas thiab. Tej-zaum yog lawv kawm ntawm lwm haiv neeg los, xws li Suav los Thaib, Blog tej, vim cov neeg no hais lus ua tej theem suab thiab.

    III. HMOOB DAWB COV SUAB LUS SIB TXAWV LI CAS

    Yog peb muab Hmoob Dawb cov suab lus los sib piv raws li txoj kev peb hais lawv, peb yuav muab lawv faib tau ua ob hom loj li no:

    (1) Cov suab lus khoob : [av] [ev] [ua] [wb] [hav] [hem] [huab] [hau].

    (Thaum peb hais cov suab lus no, peb rua qhovncauj kom khoob, es tso pa ncajqha hauv qhovncauj los.)

    (2) Cov suab lus txhuam : [cua] [kub] [xyoo] [txawj] [sim] [blooj].

    (Thaum peb hais cov suab lus no, peb xua blaig, hniav los dincauj thaiv, es tso pa los tsoo, txhuam peb tus blaig, hniav los di-ncauj.)

    Yog peb xav paub cov suab lus no kom tseeb ntxiv, peb kuj muab lawv faib tau ua ntau hom li no ntxiv thiab:

    (1a) Cov suab lus khoob bo pa : [av] [ev] [ib] [o] [ua] [wb] [aws].

    (Thaum peb hais cov suab lus no, peb rua qhovncauj kom khoob thiab peb bo pa, los yog tsis tso pa tawm hauvqhovncauj los.)

    (1b) Cov suab lus khoob tso pa : [hav] [hem] [hu] [haus] [hawb].
    (Thaum peb hais cov suab lus no, peb rua qhovncauj kom khoob thiab peb tso pa hauv qhovncauj tawm los.)

    (2a) Cov suab lus txhuam bo pa : [cav] [taws] [zuam] [txoj] [yoob]

    (Thaum peb hais cov suab lus no, peb xuas blaig, di-ncauj los hniav thaiv cov pa peb tso tawm los thiab peb bo pa ua ke).

    (2b) Cov suab lus txhuam tso pa: [chav] [thaws] [suam] [txhoj] [xyoob]

    (Thaum peb hais cov suab lus no, peb xuas blaig, di-ncauj los hniav thaiv thiab peb tso pa tawm los.)

    Cov theem suab muaj be hu ua li no:

    (1) theem suab "siab": ib, ob, peb
    (2) theem suab "ntawd": ped, nrad, tod
    (3) theem suab "neeg": yog, zaug, kawg
    (4) theem suab "ntuj": loj, koj, tej
    (5) theem suab "niam": yam, tim, thaum
    (6) theem suab "mus": los, ces, khaws
    (7) theem suab "kuv": txiv, cov, zoov
    ( 8 ) theem suab "no": no, tau, zoo

    Tiamsis, qho zaus, peb kuj hais qho lub suab lus uas muaj theem txawv dua saum no thiab, xws li: Koj mus lox? Yog tim neb xwb ntah!

    IV. NTSIAB-SUAB

    Yog peb muab peb cov suab lus los cais kom yau ntxiv, ces peb yuav pom tau tias ib txhia suab lus kuj muaj ntau lub ntsiab-suab, xws li:

    - lub suab lus [ka] muaj lub ntsiab-suab {k} thiab {a}
    - lub suab lus [blua] kuj muaj lub ntsiab-suab {b}, {l} thiab {ua}

    Tiamsis, qho lub suab lus tsuas muaj ib lub ntsiab-suab xwb, xws li : [a] [oo] [ua] [hau] [hu] [ho], vim peb muab lawv cais tsis tau kom yau ntxiv. Thaum zoo li no, peb hais tias lawv cov ntsiab-suab yog {a} {oo} {ua} {hau} {hu} {ho} thiab.

    Ib txhia suab lus, peb kuj cais tau ua ntau theem suab, xws li cov suab lus [kaj], [kab], [kag] nyob rau peb theem suab sib txawv. Peb muab lawv cais tau li no:

    - lub suab lus [kaj] muaj lub ntsiab-suab {k}, {a} thiab theem suab {j} "ntuj".
    - lub suab lus [kab] muaj lub ntsiab-suab {k}, {a} thiab theem suab {b} "siab".
    - lub suab lus [kag] muaj lub ntsiab-suab {k},{a} thiab theem suab {g} "neeg".

    Yog peb muab Hmoob Dawb cov suab lus los cais kom txhijtxhua, peb yuav pom tau tias lawv tsuas muaj baum li no lub ntsiab-suab xwb:

    (1) cov ntsiab-suab khoob: Hmoob Dawb muaj 26 lub ntsiab-suab khoob:

    (a) Cov ntsiab-suab khoob bo pa muaj 13 lub: {a}{e}{i}{o}{u}{w}{ai}{au}{aw}{ee}{ia}{oo}{ua}.

    (b) Cov ntsiab-suab khoob tso pa muaj 13 lub:
    {ha}{he}{hi}{ho}{hu}{hw}{hai}{hau}{haw}{hee} {hia}{hoo}{hua}.

    (2) cov ntsiab-suab txhuam: Hmoob Dawb muaj 57 lub ntsiab-suab txhuam. Peb muab lawv faib tau ua plaub hom li no :

    (a) Cov ntsiab-suab txhuam bo pa muaj 27 lub:

    {b} {c} {d} {k} {g} {k} {l} {m} {n} {p} {q} {r} {t}

    {v} {x} {y} {z} {nc} {nk} {nq} {nr} {nt} {ny} {ts}

    {tx} {nts} {ntx}

    (b) Cov ntsiab-suab txhuam tso pa muaj 24 lub:

    {bh} {ch} {dh} {kh} {hl} {hm} {hn} {ph} {qh} {rh}

    {th} { f } {xy} {s} {nch} {nkh} {nqh} {nrh} {nth}

    {nyh} {tsh} {txh} {ntsh} {ntxh}

    (c) Cov ntsiab-suab txhuam-nplaum npo pa muaj 3 lub:

    {npl} {pl} {ml}

    (d) Cov ntsiab-suab txhuam-blaum tso pa muaj 3 lub:

    {nplh} {plh} {hml}

    Kev txheeb suab lus thiab ntsiab-suab, peb tsuas hais li no xwb. Yog leej twg xav paub kom tseeb ntxiv, nws yuavtsum nyeem tej ntawv uas luag sau txog suab lus, vim luag muaj lus txaus, ces luag piav tau txhijtxhua dua, los xyuas tau Txiv Plig Nyiaj Pov phau ntawv txhais lus Hmoob-Fabkis, nyob rau phab plaub.




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:25 pm



    NTU RAU
    KOOG LUS


    Peb tsim tau ntau txhiab, ntau vam lo lus, tiamsis lawv tseem meej tsis txaus los muaj tsis txaus siv. Yog li ntawd, peb kuj tsim koog lus (compound) los siv ntxiv, es peb thiaj yuav qhia tau txhua tsav, txhua yam meej thiab muaj lus txaus siv. Nyob rau hauv ntu no, peb yuav los hais txog Hmoob Dawb cov koog lus, lawv tsim koog lus li cas thiab muaj puastsawg hom koog lus.

    I. KOOG LUS YOG DABTSI

    Koog lus yog ntau lo lus uas peb muab hais sib raws zws ua ke, es cim tau ib qho dabtsi tseeb tshaj lo lus. Ib yam li yog peb hais lo lus tsev no xwb, tus mloog yuav paub tsis tseeb baum li peb hais tsev-thwjcib, tsev-vov-vuas, tsev-ua-mov, tsev-kho-mob, tsev-kawm-txujci,...Cov lus uas peb muab hais sib raws ua ke no, peb hu ua koog lus, vim lawv nyob ua ib koog, ib pawg.

    II. KEV TSIM KOOG LUS

    Kev tsim koog lus los kuj tsis muaj dabtsi cov. Peb muaj cai muab tau ntau hom lus los sib txuas ua ke, es qhia kom tau ib qho dabtsi tseeb ntxiv, xws li:

    - peb muab tau ob lub be los sib txuas ua ke: tsev+ thwjcib = tsev-thwjcib.

    - peb muab tau be, yeebyam thiab be los sib txuas ua ke: tsev+ua+mov = tsev-

    ua-mov.

    - peb muab tau be, yeebyam, meejmom los sib txuas ua ke: tsev+kho+mob =

    tsev-kho-mob.

    Tshaj no, peb kuj muab ib txhia lus los cais kom yau dua, es muab txuas nrog lwm lo lus li no:

    - qhov-muag los ntawm qhov thiab (ntsej)muag.
    - plaub-hau los ntawm plaub thiab (taub-)hau.

    Kev tsim hau lus no nyob ntawm neeg muaj tswvyim xwb. Lawv yuav muab cov lus twg los sib txuas los yeej tau tas, xws li : neeg-txomnyem, thoob-rau-dej, tshuab-ntaus-ntawv, kev ua noj, ua hau, haujlwm ua vaj, ua tsev,... Qhov tseemceeb yog cov lus ntawd yuavtsum cim kom tau ib qho datsi tseeb, es lwm tug neeg paub txog qhov yus hais ntawd meej xwb.

    III. KEV SAU KOOG LUS

    Txoj kev sau cov koog lus no kuj muaj teebmeem ntau yam, vim peb muaj ntau txoj kev sau lawv, ib yam li:

    (1) peb sau lawv sib lo ua ke: cajntswm, ntsejmuag, kotaw, tshavncawspob.
    (2) peb sau lawv sib txuas ua ke: caj-ntswm, ntsej-muag, tshav-ncaws-pob.
    (3) peb sau lawv sib nrug: caj ntswm, ntsej muag, tshav ncaws pob.

    Thaum peb muaj 3 txog kev sau koog lus li no, peb kuj tsis paub tseeb tias txoj twg thiaj li yuav zoo tiag. Txoj twg los yeej muaj teebmeem huv tibsi. Raws li peb xav, txoj (1) ntshe yuav zoo dua, vim peb sau tau yoojyim thiab nyeem tau nrawm dua. Tiamsis, qho zaus, peb kuj sau tsis tau ib txhia lus sib lo ua ke, vim lawv yuav ua rau peb nyeem nyuab, xws li : haviav, liaja, plabhlaub. Peb yuavtsum sau sib txuas li no: haiv-iav, liaj-a, plab-hlaub. Yog peb ho sau sib txuas li txoj (2), peb kuj laj sau cov niag cim txuas (-) thiab ua rau peb phab ntawv tsis tshua zoo saib. Yog peb ho sau sib nrug li txoj (3), peb cov lus kuj tsis raug raws li qhov lawv cim thiab ua rau txoj kev nyeem ntawv qeeb heev. Thaum zoo li no, peb xav tias tus sau yog tus txiav txim nkaus xwb. Nws nyiam sau mus raws li txoj kev twg, ces nws sau mus li ntawd. Peb txhob sib thuam, sib cais tias txoj twg thiaj li zoo tshaj. Txoj twg los yeej muaj qhov zoo, qhov tsis tshua zoo. Yog li ntawd, peb txais tau txhua txoj kev sau cov koog lus.

    IV. PEB MUAJ TSIB HOM KOOG LUS Cov koog lus uas peb tsim tau kuj muaj ntau hom li hauv qab no:

    1. koog be
    > 2. koog meejmom
    3. koog yeebyam
    4. koog sijhawm
    5. koog chaw

    Peb muab hais kom tseeb li no ntxiv.

    1. KOOG BE

    Koog be yog cov lus uas muaj be nyob ua ntej, es lwm lo lus tsuas pab kom nws cim tau ib qho datsi meej ntxiv xwb. Peb cov koog be kuj muaj zoo li no:
    - be + meejmom : taub-dag, dib-liab, zaub-ntsuab
    - be + yeebyam : teeb-tsom, tog-zaum, chaw-pw - be + yeebyam +be : tsev-kawm-ntawv, tshav-ncaws-pob

    2. KOOG MEEJMOM

    Koog meejmom yog cov lus uas muaj meejmom nyob ua ntej lwm lo meejmom los lwm lo lus. Peb cov koog meejmom kuj zoo li no:

    - meejmom + meejmom : zoozoo, dubdub, xosxosliam, txomtxomnyem
    - meejmom + ntxiv : dawbpaug, dawbpwbpaug, qabzib-liaj, yuag-nkib
    - pab + meejmom : tsis dawb, sib zoo

    3. KOOG YEEBYAM

    Koog yeebyam yog hau lus uas muaj yeebyam nyob ua ntej lwm lo yeebyam los lwm lo lus. Lawv zoo li no:

    - yeebyam + yeebyam : muab los, nqa mus, tshawbnrhiav
    - yeebyam + be : kim-caug, rua-muag, txiav-txim
    - yeebyam + meejmom : pom-zoo
    - pab + yeebyam : tsis mus, sib ntaus

    4. KOOG SIJHAWM
    Koog sijhawm yog cov lus uas nyob ua ke, es qhia txog ib lub sijhawm. Lawv zoo li no:
    - sijhawm + ntu : hnub no, hnub i, thaum ub
    - feem + be : ib chim, ib tsam, ib pliag

    5. KOOG CHAW

    Koog chaw yog cov lus uas peb hais ua ke, es cim txog ib qho chaw. Lawv zoo li no:
    - chaw + ntu : pem no, tim ub
    - ntu + chaw : puag tid, puag nraud

    Kev txheeb koog lus tsuas muaj mentsis li no los ua qauv rau sawvdaws pom xwb. Txawm peb yuav hais tsis tau txhijtxhua los, vam ntsoov sawvdaws yuav to-taub zoo txog koog lus lawm. Ntu tom ntej no, peb ho yuav hais txog ntu lus.




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:26 pm


    NTU XYA
    NTU LUS

    Thaum peb hais ntau lo lus ua ke, es qhia tau ntau qhov, ntau yam tseeb ntxiv, ces yog peb siv ntu lus (phrase). Ntu lus yog dabtsi, peb txuas ntu lus li cas thiab peb muaj puastsawg hom ntu lus, peb yuav muab hais rau ntu no.

    I. NTU LUS YOG DABTSI

    Ntu lus yog ntau lo lus uas peb muab hais sib raws ua ke, es qhia tau ntau qhov, ntau yam tseeb ntxiv, xws li:

    - qhia txog lub cev: lub khob
    - qhia txog tus tswv: kuv lub khob
    - qhia txog feem: ob lub khob
    - qhia txog qhov chaw nyob: lub khob ntawd
    - qhia txog txhua yam: kuv ob lub khob ntawd

    Thaum peb ntxiv cov lus: kuv, ob, lub, ntawd rau lo lus khob, ces peb qhia tau ntau tsav, ntau yam rau lwm tus neeg paub ntxiv. Cov lus uas nyob sib raws ua ke li no, peb hu ua ntu lus.

    II. KEV TXUAS NTU LUS

    Peb muaj ntau txoj kevcai nruj los siv rau txoj kev txuas ntu lus. Peb tsis lam tau lam txuas ntu lus raws li peb lub siab nyiam, tiamsis yuavtsum txuas raws li cov kevcai uas peb haiv Hmoob ib txwm muaj los, xws li thaum peb txuas ntu lus kuv ob lub khob ntawd, peb muab:

    - tus tuav-be kuv ua ntej,
    - tus feem ob lawv qab kuv,.
    - tus cais lub lawv qab ob,
    - ces lo lus khob mam li lawv qab lub,
    - Lo qhia chaw ntawd nyob rau qhov kawg.

    Lo lus tseemceeb nyob rau hauv ntu lus no yog lub be khob. Lwm lo lus yog qhia kom peb paub txog nws tseeb ntxiv xwb. Qho lo kuj nyob ua ntej nws, qho lo kuj nyob tom qab nws. Txawm li cas los, nyias yeej muaj nyias qhov chaw nyob. Peb tsis lam tau, lam hloov lawv qhov chaw nyob raws li peb lub siab nyiam, ib yam li:

    - kuv khob lub ob
    - ob ntawd khob lub kuv

    Yog peb tsis muaj kevcai nruj los siv rau txoj kev txuas ntu lus, es peb xav muab lo twg los tso rau qhov twg los tau raws li peb lub siab nyiam, ces peb yeej hais lus tsis sib to-taub hlo li. Yog li ntawd, txhua leej, txhua tus neeg yuavtsum txuas cov ntu lus no mus ib yam nkaus xwb.

    III. PEB MUAJ PEB HOM NTU LUS

    Peb muaj 3 hom ntu lus zoo li no:

    (1) Ntu be
    (2) Ntu yeebyam
    (3) Ntu meejmom

    Peb yuav piav txog txhua ntu zujzus mus kom sawvdaws pom tseeb, paub meej mus li nram no:

    1. NTU BE

    Ntu be yog cov lus uas peb hais nrog be, es qhia kom peb paub tseeb txog be ntxiv, ib yam li peb qhia txog be lub cev (daim ntawv), tus tswv (nws daim ntawv), feem (ob daim ntawv), chaw (daim ntawv ntawd ), sijhawm (daim ntawv hnub-i ). Tshaj no, peb tseem muab ntau lo lus los hais nrog be, es qhia tau ntau yam ua ke: kuv ob daim ntawv hnub-i.

    Kev txuas ntu be kuj muaj li no:

    - cais + be + chaw : tus neeg no
    - cais + be + sijhawm : tus neeg naghmo
    - feem + cais + be : ob tug neeg
    - tuav-be + cais + be : kuv tus neeg
    - cais + kem + be + chaw : tus niag neeg no
    - cais + be + meejmom : cov neeg laus

    Tsis tas li no xwb, peb tseem txuas ntau lo ua ke, es qhia kom tau ntau yam ntxiv, xws li:

    - tuav-be + feem + cais + be + chaw : kuv ob tug neeg nrad
    - tuav-be + be + feem + cais + be + sijhawm : kuv txiv ob tug neeg hnub-i

    Tiamsis, qho zaus, peb kuj tsis hais be rau hauv ntu be, vim tus mloog twb paub txog lo be ntawd zoo lawm, xws li : kuv tus, cov puag-ta, ob pab nrad, nws daim niag, tsib tug laus ... Cov lus no los peb hu tau ua ntu be thiab. Txawm tsis muaj be nrog lawv los, lawv yeej siv tau ib yam li cov ntu be uas muaj be ua ke.

    2. NTU YEEBYAM

    Ntu yeebyam yog cov lus uas peb hais nrog yeebyam, es qhia kom peb paub txog yeebyam zoo ntxiv, xws li ntu caijnyoog (yuav mus, tabtom mus, twb mus lawm), tus tswv (subject) lub yeebyam, tswvyim (maj mus, lam mus, pheej mus, yuavtsum mus) thiab txheeb yeebyam kom meej ntxiv (mus nrawmnroos , khiav ceev heev).

    Kev txuas ntu yeebyam kuj muaj li no:

    - pab + yeebyam : tseem mus - pab + pab + yeebyam : tseem tabtom mus
    - pab + pab + pab + yeebyam : tseem tabtom yuav mus
    - pab + yeebyam + xaus : twb mus lawm
    - yeebyam + sijhawm + xaus: mus naghmo lawm
    - yeebyam + chaw: : mus nrad
    - yeebyam + ntxiv : mus nrawmnroos
    - yeebyam + ntxiv + theem : khiav ceev kawg
    - yeebyam + yeebyam : nyiam mus

    Tshaj no, peb tseem muaj ntau lo lus los txuas ua ntu yeebyam li no ntxiv thiab:

    - koog yeebyam + xaus + xaus : tsis-mus hlo li

    - pab + koog yeebyam + ntxiv : yuav sib-ceg heev

    Tej kev txuas ntu yeebyam no, peb lam hais mentsis ua qauv li no rau sawvdaws saib xwb. Peb tsis muaj peevxwm yuav hais kom tau txhijtxhua ntu yeebyam rau hauv no, vim txoj kev txuas ntu lus no cov thiab muaj ntau yam heev. Txawm li cas los, qhov tseemceeb yog peb txhob txua ntu lus kom txawv ntawm cov kevcai (txuas ntus lus) uas peb ib txwm muaj los xwb.

    3. NTU MEEJMOM

    Ntu meejmom yog cov lus uas peb hais nrog meejmom, es qhia kom tau ntau yam txog meejmom tseeb ntxiv, xws li ntu caijnyoog (yuav zoo, tabtom zoo), tus tswv lub yeebyam, tswvyim (pheej zoo, yuavtsum zoo) thiab txheebxyuas meejmom kom meej ntxiv (loj zomzaws , zoo diam ).

    Peb cov kev txuas meejmom zoo li no:

    - pab + meejmom : tseem zoo
    - pab + pab + meejmom : tseem yuav zoo
    - pab + pab + pab + meejmom : tseem tabtom yuav zoo
    - meejmom + ntxiv : daj zomzaws
    - meejmom + theem : daj tsawv
    - meejmom + xaus : daj hos

    Tshaj no, peb tseem muab ntau lo lus los txuas ua ntu meejmom ntxiv li no thiab:

    - pab + meejmom + ntxiv + xaus + xaus : twb daj zomzaws lawm hos

    Txoj kev txheeb ntu lus peb tsuas hais los tso tseg li no xwb. Peb tsis muaj peevxwm yuav hais kom tau txhijtxhua, tiamsis, peb vam ntsoov tias sawvdaws yuav paub tseeb tias ntu lus yog dabtsi lawm. Ntu ntxiv mus no, peb ho yuav hais txog txoj lus, uas yog ib ntu tseemceeb ntawm peb txoj ke hais lus, siv lus.




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:28 pm



    NTU YIM
    TXOJ LUS

    Thaum peb hais ntau lo lus sib-raws zws, es qhia tau ib qho xwm los tswvyim tseeb rau lwm tus neeg paub, ces yog peb siv txoj lus. Nyob rau hauv ntu no, peb yuav qhia tias txoj lus yog dabtsi, muaj puastsawg hom txoj lus thiab kev txuas ntau lo lus los ua txoj lus.

    I. TXOJ LUS YOG DABTSI

    Txoj lus yog ntau lo lus, ntau koog lus los ntau ntu lus uas peb muab hais sib raws zws, es qhia tau ib qho xwm los tswvyim tseeb, muaj chaw txawb, chaw rau, muaj hauvpaus, muaj ntsis, los yog muaj tus tswv-xwm (subject) thiab qhov peb piav txog tus tswv-xwm (predicate). Tus tswv-xwm yog qhov peb xub hais txog, ces ntxiv ntawd, peb mam li piav tias nws zoo li cas (lub meejmom), nws ua dabtsi (lub yeebyam), nws yog dabtsi (lub ntsiab) thiab nws muaj dabtsi (lub neej), xws li:

    (1) Tsob ntoo nrad siab kawg.
    (2) Noog ya saum ntuj.
    (3) Peb yog Hmoob.
    (4) Lawv muaj nyiaj.

    Plaub txog lus no qhia tau xwm thiab tswvyim tseeb rau peb paub, vim lawv muaj tus tswv-xwm thiab nws lub meejmom, lub yeebyam, lub ntsiab thiab lub neej. Peb muab plaub txog lus saum no cais tau ua li no:

    Tus tswv-xwm
    Lub meejmom
    Lub yeebyam
    Lub ntsiab
    Lub neej

    Tsob ntoo ntawd siab kawg.
    Sawvdaws mus zomzaws.
    Peb yog Hmoob.
    Lawv muaj nyiaj.

    Raws li peb pom los no, txhua txoj lus uas peb hais tawm los yuavtsum muaj tus tswvxwm thiab qhov peb piav txog tus tswvxwm ntawd tas mus li. Yog peb muab ib qho tshem tawm lawm, ces peb txoj lus tsis meej li lawm, ib yam li:

    (5) Tsob ntoo nrad.
    (6) saum ntuj.

    Ob txog lus no tsis puv, qhia tsis tau dabtsi tseeb rau peb paub, vim ib txog tsis muaj meejmom (Tsob ntoo ntawd zoo li cas ), ib txog tsis muaj tus tswv-xwm (Dabtsi ya saum ntuj).

    Tiamsis, qho zaus, yog peb maj heev los peb tsis xav hais lus ntau, ces peb yuav tsis hais txog tus tswv-xwm, yog peb pom tias tus mloog twb paub txog nws zoo lawm, ib yam li:

    (7) Los ntawm no.
    ( 8 ) Tsam no, tshaib plab kawg li lawm.

    Txawm tus hais ho hais tau li no xwb los, tus mloog yeej paub zoo tias tus hais hais txog dabtsi los leej twg lawm. Tiamsis, yog yuav kom txoj lus tseeb tiag, nws yuavtsum hais li no:

    (9) Koj los ntawm no.
    (10) Tsam no, peb tshaib plab kawg li lawm.

    II. PEB MUAJ PLAUB HOM TXOJ LUS

    Nyob hauv peb lub neej, ib hnub no, peb siv txog ntau pua, ntau txhiab txoj lus. Txoj yuav cov, yuav yoojyim, yuav ncaj, yuav nkhaus li cas los muaj. Luag hais tias peb tsis muaj peevxwm yuav los txheeb tau txhua txoj lus, vim lawv muaj ntau dhau thiab cov dhau heev lawm. Txawm peb yuav txheeb tas peb tiam neej los, peb yeej paub tsis tau tias neeg muaj peevxwm hais tau puastsawg txoj lus tiag. (The number of sentences is infinite). Txawm li ntawd los, peb kuj faib tau neeg cov txoj lus ua plaub hom li no:

    1. TXOJ LUS QHIA

    Txoj lus qhia yog txoj lus uas peb siv los qhia xwm thiab tswvyim rau lwm tus neeg paub. Lawv zoo li no:

    - Lawv twb mus lawm.
    - Puag ta, nws hais rau kuv tias lawv twb mus lawm.
    - Kuv xav tias lawv tseem tsis tau mus.

    2. TXOJ LUS NUG

    Txoj lus nug yog txoj lus uas peb siv los nug lwm tus neeg txog ib qho xwm los tswvyim uas peb xav paub txog. Lawv zoo li no:

    - Koj puas mus?
    - Lawv mus lawm los
    - Lawv tseem tsis tau mus, puas yog?
    - Koj puas xav tias lawv yuav mus?

    3. TXOJ LUS TXIB

    Txoj lus txib yog txoj lus uas peb siv los txib lwm tus neeg ua ib qho haujlwm rau peb. Txoj lus txib zoo li no:

    - Los nram no!
    - Koj pab qhib lub qhovrooj ntawm koj seb!
    - Kuv xav kom nej tuaj pab ua ib qho haujlwm rau kuv.

    4. TXOJ LUS QHIA SIAB

    Txoj lus qhib siab yog txoj lus uas peb siv los qhia txog qhov peb nyiam los peb ntxub, qhov peb txaus siab los chim siab. Lawv zoo li no:

    - Ua cas es koj yuav zoo ua luaj li
    - Niag tsov tom ntawd mas, kuv laj ntxub nws heev hwv lawm lau!
    - Koj ntsia seb: Hmoob tuaj dhia qaib coob kawg nkaus li, tus
    yuav hnav zoo li cas los muaj tas nrho.

    Txhua txoj lus uas peb hais tawm los yuavtsum yog ib ntawm plaub hom no xwb. Tsuastab, peb siv txoj lus qhia ntau tshaj plaws (70% ntawm peb txoj ke siv lus). Lwm hom txoj lus, peb yeej siv tsawg dua.

    III. KEV TXUAS TXOJ LUS

    Yog peb muab txoj lus qhia los ua qauv (vim peb siv nws ntau dua), peb yuav pom tau tias kev txuas txoj lus kuj zoo mus li no:

    (1) Cov lus uas peb siv los ua txoj lus lub hauvpaus muaj li no:

    - be: Neeg txawj hais lus.
    - koog be: Neeg-tawv-dawb muaj kev vammeej dav.
    - ntu be: Tus neeg ntawd yog Hmoob.
    Kev ua noj, ua haus tsis yoojyim.
    - tuav-be: Koj puas paub nws?
    - koog tuav-be: Nyuag-yaus tsis paub dabtsi.

    (2) Cov lus uas peb siv los ua txoj lus lub ntsis kuj muaj li no:

    - meejmom: Nws zoo.
    - koog meejmom: Nws kuj zoozoo.
    - ntu meejmom: Nws yeej zoo.
    - yeebyam: Nws mus.
    - koog yeebyam: Nws tsis nyob.

    - ntu yeebyam: Nws twb tsis mus.

    (3) Lwm hom lus uas peb siv los txuas txoj lus kuj muaj li no:

    - ntxiv: Nws khiav ceev.
    - theem: Nws loj diam.
    - xaus: Nws zoo hos.
    - chaw: Nws nyob nrad.
    - sijhawm Nws yuav mus taigkis.

    (4) Yog peb xav kom peb txoj lus meej ntxiv, peb kuj muab cov lus saum no los sib

    txuas ntxiv li no:

    - ntxiv + theem: Nws khiav ceev diam.
    - ntxiv + theem + xaus: Nws khiav ceev diam hos.
    - chaw + sijhawm: Nws yuav mus nrad tamsis no.

    Kev txuas txoj lus, peb tsuas hais mentsis li no los ua qauv xwb. Peb cov kev xuas txoj lus yeej muaj ntau tshaj ntawm no, tiamsis vim peb cov txoj lus muaj dhau heev lawm, ces peb yeej txheeb tsis tas hlo li. Txawm li cas los, peb ho txheeb txog lwm qhov, lwm phab ntawm txoj lus mus ntxiv lawm yav tom ntej.

    >

    >

    IV. TXOJ LUS YOOJYIM

    Txoj lus yoojyim yog txoj lus uas muaj ib lo meejmom los yeebyam, ib koog meejmom los yeebyam, ib ntus meejmom los yeebyam nyob rau hauv xwb. Lawv zoo li no:

    - Lawv zoo hos.
    - Nws tsis tuaj rau ntawm peb zos lawm.
    - Taigkis, peb yuav mus luaj teb bleg rau nram ntug dej Naj Nyeej.

    Peb txog lus no, txawm yuav luv, yuav ntev li cas los, tsuas muaj ib lo meejmom (zoo), ib koog yeebyam (tsis tuaj) thiab ib ntu yeebyam (yuav mus luaj) nkaus xwb. Peb hu txhua txoj lus uas zoo li no ua txoj lus yoojyim tas nrho.

    V. PEB MUAJ NTAU TXOJ LUS YOOJYIM

    Cov txoj lus yoojyim uas peb nej hnub hais kuj muaj ntau txoj sib-txawv li no:

    (1) Txoj lus yoojyim puv: Nws mus lawm.
    Lub nroog no loj heev.
    (2) Txoj lus yoojyim tshab: Nws noj mov.
    (3) Txoj lus yoojyim tshwm: Nws pub nyiaj rau kuv.
    (4) Txoj lus yoojyim rov: Nkawv sib ntaus.
    (5) Txoj lus yoojyim ntxeev: Nws mag lawv cem.
    Nws raug lawv tua.

    Txoj lus yoojyim puv yog txoj lus uas muaj yeebyam los meejmom nyob rau hauv xwb, tiamsis yeej qhia tau xwm thiab tswvyim tseeb rau peb paub lawm.

    Txoj lus yoojyim tshab yog txoj lus uas yuavtsum muaj be los tuav-be nyob raws qab yeebyam tas mus li, es thiaj qhia tau xwm thiab tswvyim tseeb rau peb paub.

    Txoj lus yoojyim tshwm yog txoj lus uas muaj lo lus rau nyob tom qab yeebyam, es qhia tias qhov xwm uas peb hais txog ntawd mus tshwm rau ntawm leej twg, qhov twg.

    Txoj lus yoojyim rov yog txoj lus uas muaj koog yeebyam: sib ntaus, sib ceg.... nyob rau hauv. Txoj lus no qhia tias ob tog tswv-xwm puavleej ua qhov xwm ntawd rov rau nkawv ris.

    Txoj lus yoojyim ntxeev yog txog lus uas muaj lo lus: mag, raug nyob rau hauv. Peb muab txoj lus no ntxeev ntawm txoj lus tshab los, xws li: Nws ntaus kuv (yog txoj lus tshab), peb muab ntxeev ua : Kuv mag nws ntaus, vim peb xav hais txog tus raug qhov xwm ntawd ua ntej (vim peb pom tias nws yog xwm uas tseemceeb dua).

    VI. TXOJ LUS COV

    Txoj lus cov yog txoj lus uas muaj ntau lo meejmom los yeebyam, ntau koog meejmom los yeebyam thiab ntau ntu meejmom los yeebyam. Lawv zoo li no:

    - Ib txhia zoo, Ib txhia phem.
    - Nws xav kom peb muaj neej zoo.
    - Lawv pom-zoo tias lawv yuav tuaj nrog peb sib tham txog cov haujlwm tseemceeb no.

    Peb txog lus no muaj ntau lo meejmom (zoo, phem), ntau lo yeebyam (xav, muaj), ntau koog yeebyam (pom-zoo, sib-tham) nyob rau hauv. Lawv qhia tau ntau qhov xwm, ntau lub tswvyim ua ke. Yog li ntawd, peb thiaj li hu lawv ua txoj lus cov.

    VII. TXOJ LUS COV MUAJ NTAU TOOM LUS

    Txhua txoj lus cov yeej muaj ob los ntau toom lus (clause). Ib toom lus yog ib co lus uas muaj ib lo meejmom los yeebyam, ib koog meejmom los yeebyam, ib ntu meejmom los los yeebyam nyob rau hauv. Peb siv ntau toom lus los sib txuas ua ke, ces peb thiaj li hais tau txoj lus cov. Peb muab tau pivtxwv li no:

    - Leej txi xav kom nws cov tub txawj ntawv, ces nws thiaj li xa lawv mus kawm ntawv rau nram nroog.

    Txoj lus cov no muaj peb lo yeebyam (xav, txawj, kawm ), thiab ib koog yeebyam (xa mus) ces peb hais tias nws muaj plaub toom lus li no:

    - Toom 1: Leej txi xav
    - Toom 2: kom nws cov tub txawj ntawv
    - Toom 3: ces nws thiaj li xa lawv mus
    - Toom 4: kawm ntawv rau nram nroog.

    Cov toom lus no yuavtsum nyob sib txuas zws li no, es thiaj sib koom ua tau ib txog lus cov. Yog peb xav muab lawv rhuav los tshem mus nyob rau lwm qhov, peb kuj muaj peevxwm ua tau, tiamsis cov ntsiab lus yuav txawv zog qhov qub lawm, xws li:

    - Leej txi xav kom nws cov tub txawj ntawv. Yog li ntawd, nws thiaj li xa lawv mus kawm ntawv rau nram nroog.
    - Vim leej txi xav kom nws cov tub txawj ntawv, ces nws thiaj li xa lawv mus kawm ntawv rau nram nroog.

    VIII. PEB MUAJ NTAU TXOJ LUS COV

    Cov txoj lus cov uas peb nej hnub siv kuj muaj li no:

    (1) Txoj lus cov txuas yog ntau txoj lus uas muab hais sib txuas ua ke, es qhia

    tau ntau qhov xwm los tswvyim. Nws zoo li no:

    - Ib txhia ua haujlwm, ib txhia kuj nyob dawb.
    - Nws nej hnub nyob, noj, pw thiab zaum nkaus xwb.
    - Hmoob nyiam nyob toj siab, tiamsis Blog nyiam nyob chaw qis.

    (2) Txoj lus cov tshooj yog txoj lus uas muaj lo lus uas nyob rau hauv, es piav kom tau ib qho dabtsi los tshooj ntxiv rau cov xwm los tswvyim uas tus hais txog ntawd. Nws zoo li no:

    - Tus neeg uas zaum nrad yog kuv ib tug phoojywg.
    - Cov khoom uas lawv nqa tuaj nyob qhov twg?

    Qho zaus, peb kuj tsis siv lo lus uas nyob rau hauv txoj lus cov tshooj no, xws li:

    - Tus neeg koj pom nrad yog kuv ib tug phoojywg.

    (3) Txoj lus cov nthuav yog txoj lus cov uas muaj lo lus tias nyob rau hauv, es nthuav kom tau ntau qhov xwm los tswvyim ntxiv. Nws zoo li no:

    - Peb pom tias qhov nws hais mas zoo heev. - Nws yeej paub tseeb tias lawv yuav tsis tuaj xyuas nws ntxiv lawm.

    Ib txhia Hmoob nyiam hais txoj lus cov nthuav mus li no:

    - Nws pom hais tias....
    - Peb paub hais tias...

    Tsuastab yog peb muab ua zoo xyuas, peb yuav pom tias lo lus hais nyob ua ntej tias ntawd tsis muaj nqi dabtsi. Nws zoo hais, es peb lam hais xwb.

    (4) Txoj lus cov ntseg yog txoj lus cov uas muaj lo lus kom nyob rau hauv, es qhia tias peb xav ua ib qho xwm los tswvyim kom tiav, kom ntseg. Nws zoo li no:

    - Nws xav kom peb mus xyuas nws.
    - Peb nyiam kom sawvdaws muaj neej zoo.

    Ib txhia Hmoob kuj hais txoj lus cov ntseg no yuamkev mus li no:

    - Nws pheej kom kuv mus xwb.

    Qhov tseeb tiag, peb yuavtsum hais ib lo yeebyam ua ntej kom tas mus li xws li:

    - Nws pheej yuam kom kuv mus xwb.
    - Nws pheej hais kom kuv mus xwb.
    - Nws pheej xav kom kuv mus xwb.

    IX. KEV CAIS TXOJ LUS

    Tom qab peb paub tias txoj lus yog dabtsi, muaj lo lus, koog lus, ntu lus thiab toom lus zoo li cas los sibtxuas uas txoj lus lawm, peb ho yuav muab txoj lus los rhuav, cais (analysis), txheebxyuas dua seb nws puag yog li peb hais tiag. Yog peb hais raug lawm, ces peb cais tau txhua txoj lus, peb paub tau txhua txoj lus, txawm nws yuav cov los yuav yoojyim baum li cas. Peb muab tau pivtxwv li no:

    (1) Taigkis, kuv yuav mus nram nroog.

    Txoj lus no yog ib txog lus yoojyim. Nws muaj:
    (a) tus tswv-xwm : kuv
    (b) qhov haujlwm uas tus tswvxwm ua: yuav mus nram nroog
    (c) lub sijhawm: taigkis

    Cov lus uas peb muab sib txuas ua txoj lus no muaj li no:
    - taigkis: sijhawm yav tom ntej
    - kuv : tuav-be, thawj tus neeg
    - yuav mus : ntu yeebyam {yuav: pab, mus: yeebyam}
    - nram nroog : ntu be {nram: chaw, nroog: be}

    (2) Tsob ntoo no yiag kawg, ntxim ua nqaj-tse diam.

    Txoj lus no yog ib txog lus cov txuas, muaj ob toom lus nyob rau hauv:
    - toom lus ib: Tsob ntoo no yiag kawg.
    - toom lus ob: ntxim ua nqaj-tse diam.

    Toom lus ib muaj: - tus tswvxwm: tsob ntoo no
    - tus tswvxwm lub meejmom: yiag kawg
    Toom lus ob muaj:
    - tus tswvxwm: tsob ntoo no
    - tus tswvxwm lub yeebyam: ntxim ua nqaj-tse diam

    Cov lus uas peb siv los ua ob toom lus no muaj li no:
    - tsob ntoo no: ntu be {tsob:cais, ntoo:be, no:chaw}
    - yiag: meejmom
    - kawg : theem
    - ntxim ua: ntu yeebyam {ntxim: pab, ua: yeebyam)
    - qhab-tse: koog be {nqaj: be, tse: be}
    - diam: theem

    Kev txheebxyuas txoj lus, peb tsuas hais los tso tseg li no xwb. Yog leej twg xav paub ntxiv, nws yeejmeem nyeem tau luag tej ntawv uas qhia txog txoj lus ntxiv. Vim peb cov lus Hmoob tseem tsawg heev, ces peb yuav piav tsis tau txhijtxhua li lwm haiv neeg piav txog luag cov lus los txoj lus.





    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:29 pm



    NTU CUAJ
    KEV SIV LUS


    Yav dhau los, peb tau hais tias peb siv lus los qhia xwm thiab tswvyim rau lwm tus neeg paub. Tiamsis, yog peb muab xyuas kom tseeb ntxiv, peb yuav pom tau tias peb muaj ntau txoj kev siv lus tshaj ntawm qhov qhia xwm thiab tswvyim. Nyob rau hauv no, peb yuav los txheeb txog cov kev siv lus no kom txhijtxhua saib lawv zoo li cas, muaj puastsawg theem, puastsawg txoj los puastsawg phab tiag.

    I. KEV SIV LUS YOG DABTSI

    Kev siv lus yog muab ib lo lus los ib co lus coj los hais tawm rau lwm tus neeg hnov (los sau tawm rau lwm tus neeg nyeem), es qhia kom tau ib qho xwm los tswvyim rau luag paub, ib yam li thaum peb hais:

    - Mus!
    - Kavtsij noj!
    - Nej yuavtsum nyob xwb.
    - Kuv xav kom nej cia li tuaj tamsis no.
    - Nws pom tias yog peb ua tau li no, mas yuav zoo heev.

    Cov lus no, txawm yuav muaj ib los los ntau los hais sib-raws ua ke, yeej qhia tau xwm thiab tswvyim meej rau lwm tus neeg paub ib yam nkaus. Qhov txawv yog thaum peb hais tsawg lo lus, ces peb qhia tau tsawg qhov xwm los tswvyim. Thaum peb hais ntau lo lus, ces peb qhia tau ntau qhov xwm los tswvyim nkaus xwb.

    II. PEB MUAJ PEEVXWM HAIS TAU TXOG TXHUA TSAV,

    TXHUA YAM

    Peb xav hais txog dabtsi nyob hauv ntiajteb no, los peb yeej hais tau tas. Cov tswvyim tob, cov los ntxhov baum li cas, peb yeej muaj peevxwm txheeb tau los hais rau sawv

    daws hnov, sawvdaws paub. Lus yog neeg ib qho twj tseemceeb thiab muaj nqi ntau kawg nkaus li ntag, tiamsis yuavtsum yog peb paub siv kom raug raug caij, raug nyoog thiab raug raws kev siv lus.

    (1) Paub siv kom raug raws caij, raws nyoog yog hais yus cov lus kom haum raws li lub caij uas yus nyob, ib yam li:

    - Thaum yus pom ntuj tshav, yus kuj hais tias: "Hnub no, ntuj tshav zoo diam.", es yus tsis hais tias " Hnub no, nag los hlob kawg."
    - Thaum luag nug tias "Koj lub be hu ua li cas?", yus yuavtsum teb tias "Kuv lub be hu ua.....", es tsis teb tias "Kuv twb muaj 40 xyoo lawm"

    (2) Paub siv kom raug raws kev siv lus yog muab cov lus, koog lus, ntu lus, txoj lus thiab toom lus tso kom sib haum, xws li:

    - Peb tsis hais tias "Mov noj kuv", tiamsis peb hais tias "Kuv noj mov"
    raws li tus kevcai siv lus uas peb ib txwm muaj los.
    - Peb tsis hais tias " Tsob ntoo nrad pw lawm", tiamsis peb hais tias "Tsob ntoo nrad vau lawm".

    Yog peb siv lus kom raug raws li ob txog kev hais los saum no, ces peb tsis muaj teebmeem txog txoj kev siv lus hlo li. Tiasmsis, qho zaus, peb kuj hais ntau lo lus, qho zaus peb kuj hais tsawg lo lus. Qho zaus, peb kuj hais tej cov lus cov thiab tob, qho zaus, peb kuj hais cov lus ncaj thiab yoojyim. Tej no yog tim cov cai li peb yuav hais rau hauv qab no:

    (a) Peb hais lus raws li lub sijhawm uas peb muaj. Thaum peb muaj sijhawm ntau, peb kuj hais ntau lo lus, ntau txoj lus, ntau zaj lus, thaum peb muaj sijhawm tsawg, peb kuj hais ib, ob lo lus xwb los muaj.

    (b) Peb hais lus raws li tus neeg uas nrog peb tham:
    Yog peb nrog ib tug menyuam yau tham, peb kuj hais cov lus yoojyim thiab hais tsawg lo lus. Yog peb nrog ib tug neeg laus los neeg txawjntse tham, peb kuj hais cov lus cov, lus tob thiab hais ntau lo lus sib raws ua ke.

    (c) Peb hais lus raws li qhov xwm los tswvyim uas peb xav qhia:
    Thaum peb hais txog ib qho xwm los tswvyim cov, peb kuj siv ntau lo lus, vim peb yuav tau piav ntau tsav, ntau yam, es luag thiaj li yuav to-taub txog qhov peb hais ntawd. Thaum peb piav txog ib qho xwm los tswvyim yoojyim, peb kuj siv tsawg lo lus.

    Peb txog cais saum no nej hnub coj peb hais lus, qhia peb siv lus. Peb yuav hais lus ntau los tsawg, peb yuav hais lus yoojyim los cov, yog tim cov cai saum no nkaus xwb.

    III. PEB MUAJ OB PHAB KEV SIV LUS

    Nyob hauv peb lub neej, peb muaj ntau txoj kev siv lus. Yog peb hais qhov yoojyim thiab ncaj xwb, ces peb hais tias peb siv lus los qhia xwm thiab tswvyim. Tiamsis, yog peb yuav muab hais kom txhijtxhua, kom meej ntxiv, ces peb hais tau tias neeg muaj ob phab kev siv lus li no:

    (1) Kev siv lus theem qis
    (2) Kev siv lus theem siab

    Kev siv lus phab qis yog cov kev siv lus uas peb nej hnub siv rau txhua lub caij, txhua lub sijhawm. Lawv zoo li no:

    (a) Siv lus los qhia xwm thiab tswvyim

    Thaum yus pom ib qhov xwm los hnov luag hais txog ib qho xwm uas tseemceeb, muaj nqi rau yus, yus kuj hais qhia rau lwm tus neeg paub. Thaum yus ho xav tau ib zag tswvyim los hnov luag hais txog ib co tswvyim zoo los muaj nqi rau yus, yus kuj hais qhia rau lwm tus neeg paub thiab:
    - Ib co Hmoob tuaj txog nrad. (qhia xwm)
    - Kuv xav kom koj mus xwb. (qhia tswvyim)

    (b) Siv lus los nug xwm thiab tswvyim

    Thaum peb xav paub txog ib qho dabtsi, ib qho xwm los tswvyim, peb kuj siv lus los nug lwm tus neeg uas ntxim yuav paub:
    - Qhov nov yog dabtsi? (nug txog ib qho khoom)
    - Leej twg tuaj txog nrad? (nug txog ib tug neeg)
    - Puag-ta, neb hais tias neb pom dabtsi no? (nug txog ib qho xwm)
    - Koj puas nrog peb mus? (nug txog ib qho tswvyim)

    (c) Siv lus los txib, los qhia lwm tus neeg ua haujlwm
    Txoj kev siv lus no kuj muajntsis zoo li qhia tswvyim. Tiamsis, tus hais muaj ib qho haujlwm nyob rau ntawd rau tus neeg uas nws hais lus rau ua:
    - Mus qhib qhovrooj.
    - Kuv xav kom koj pab sau ib tsab ntawv rau kuv.

    (d) Siv lus los qhia siab, qhia ntsws
    Thaum peb muaj kev ntxhov siab, chim siab los zoo siab, qab siab, peb kuj qhia rau lwm tus neeg paub thiab:
    - Ha, ha... lawv ua tau zoo saib kawg li.
    - Bav... ua cas es nws pheej tsis txawj tuaj ne!

    Kev siv lus phab siab yog cov kev siv lus uas cov, es peb yuavtsum tau kawm tso, peb mam li yuav siv tau. Lawv zoo li no:

    (a) Siv lus los ua kev lomzem: dabneeg, kwvtxhiaj, txhiaj-txhais, zaj nkauj, zaj ncas, zaj raj, zaj qwv blooj,...
    (b) Siv lus los ua kevcai: kab tshoob, kev kos, kev pe tsiab, kev thov luag dag, luag zog...
    (c) Siv lus los kho mob, kho nkees: ua neeb, ua khawvkoob, daws dab, hu plig, khi tes,...
    (d) Siv lus los dab, ua qhua: zaj qeej, zaj qhuab-ke, zaj txiv-xaiv, kev ua nyuj dab, kev tso plig,...

    Cov kev siv lus phab siab no, peb yuav tsis sau rau hauv no, vim muaj ntau tsav, ntau yam heev. Peb tsis muaj peevxwm yuav sau kom tau tas rau hauv no. Yog leej twg xav paub, nws mus nrhiav xyuas tau Txiv Plig Nyiaj-Pov cov ntawv. Lawv kuj sau tau ntau phau ntawv hais txog Hmoob tej txujci, kevcai dabqhua, dabneeg, kwvtxhiaj no lawm.

    Yog thaum twg, peb ho muaj sijhawm txaus, peb mam li muab Hmoob tej txujci no coj los xyuas, es txheeb seb lawv ho zoo li cas, hais txog dabtsi, muaj qhov zoo, qhov cov, qhov tob li cas thiab peb yuav siv li cas mus lawm yav tom ntej.

    IV. PEB MUAJ TSIB THEEM KEV SIV LUS Peb tau hais los lawm tias peb muaj ob phab kev siv lus: phab qis muaj plaub txog kev siv lus, phab siab los muaj plaub txog kev siv lus. Zaum no, peb ho yuav hais ntxiv tias peb muaj rau theem kev siv lus nyob rau hauv plaub txog siv lus hauv theem qis saum no. Lawv zoo li no:

    i. Kev siv lo lus
    ii. Kev siv koog lus
    iii Kev siv ntu lus
    iv Kev siv txoj lus
    v Kev siv zaj lus

    Peb yuav muab txhua txoj kev siv lus saum no los piav kom tseeb li no ntxiv:

    i. KEV SIV LO LUS

    Nyob hauv peb txoj ke siv lus, tsujtsawg zaus, peb thiaj li hais ib lo lus nkaus xwb.Qhov peb hais ib lo lus nkaus xwb yog tim peb maj heev, los peb teb lwm tus neeg cov lus:

    - Mus! Noj! Sawv!
    - Aws. Yog. Zoo.

    Txoj kev siv ib lo lus li no nkaus xwb kuj tsis muaj teebmeem dabtsi. Yog peb siv kom raug lub caij, lub sijhawm ces nws yeej qhia tau xwm los tswvyim zoo tib yam nkaus li kev siv ntau lo lus.

    ii. KEV SIV KOOG LUS

    Kev siv koog lus los kuj xws li kev siv lo lus thiab, peb tsis siv ntau puastsawg. Qho zaus xwb peb thiaj li siv nws, ib yam li thaum maj, peb teb lwm tus neeg los peb ho tsis tshua xav hais lus:

    - Txhob mus!
    - Tsis zoo.
    - Tsev-kawm-txujci.

    Tabtxawm qho zaus peb yuav hais lus li no xwb los, tus hnov yeej to-taub zoo lawm, yog peb hais kom rau lub sijhawm. Yog nyobnyob, peb cia li hais cov lus no tawm los, nws kuj xav tsis thoob li thiab.

    iii. KEV SIV NTU LUS
    Kev siv ntu lus kuj muaj dua kev siv lo lus los koog lus lawm, vim nws yeej qhia tau xwm los tswvyim mentsis lawm thiab, tabtxawm nws yuav tsis tseeb baum li txoj lus. Lawv zoo li no:

    - Mus lias!
    - Kavtsij noj!
    - nram lub zos nrad.
    - Tsis yog hlo li.

    Qhov peb siv tej ntu lus li no los yog vim peb pom tias tus nrog peb tham yeej yuav to-taub, paub zoo txog tej ntu lus zoo li no. Lub sijhawm yuam kom peb siv cov ntu lus zoo li no lawm.

    iv. KEV SIV TXOJ LUS
    < Kev siv txoj lus yog ib theem kev siv lus tseemceeb heev. Peb siv txoj lus ntau tshaj lwm theem kev siv lus, vim nws qhia tau xwm thiab tswvyim tseeb tshaj plaws. Peb paub lub hauvpaus (leej twg yog tus tswvxwm), peb paub lub ntsis (tus tswvxwm ua dabtsi). Kev siv txoj lus zoo li no:

    - Neeg txawj hais lus.
    - Peb yog Hmoob.
    - Lawv muaj kwvtij coob.
    - Nws xav kom peb mus xyuas nws.
    - Kuv pom tias qhov nej ua no tseem zoo tsis tshua heev.
    - Yog peb rau siab khwv, ces peb lub neej yeej yuav ntseg xwb.

    Ib txhia txoj lus kuj yoojyim, ib txhia txoj lus kuj cov heev. Ib txhia txoj lus, peb hais los nug lwm tus txog qhov peb tsis paub. Ib txhia, peb hais los txib neeg, thov neeg ua haujlwm rau peb. Ib txhia, peb hais los qhib siab, qhib ntsws, qhia txog qhov peb nyiam los tsis nyiam.Lawv zoo li no:

    - Koj puas mus? - Neb nyiam qhov nov los?
    - Lawv twb tuaj txog lawm, puas yog?
    - Los tom no seb!
    - Kuv xav kom koj ua txoj haujlwm no rau kuv.
    - Lub zos no ntxim nyob kawg nkaus!
    - Phib! niag tsw qia, kavtsij khiav mus deb!

    Tej kev siv cov txoj lus zoo li no yeej muaj rau txhua lub caij. Lub caij twg, ntxim hais txoj twg, peb yeej siv txoj ntawd, vim peb yeej ntsuas tau tias yuav hais txoj lus twg thiaj li yuav qhia tau xwm thiab tswvyim tseeb, txoj lus twg thiaj li yuav nug tau xwm thiab tswvyim meej, txoj lus twg thiaj yuav qhia tau haujlwm rau luag paub zoo thiab qhib tau yus lub siabntsws rau luag pom tseeb.

    v. KEV SIV ZAJ LUS

    Qho zaus, peb kuj hais ntau nqe lus ua ke, es qhia kom tau ib zag lus rau luag hnov. Txhua zaj lus yeej muaj ntau qhov xwm, ntau qhov tswvyim uas nyob sib txuas zws. Tshaj ntawd, nws muaj qhov pib thiab qhov xaus, xws li Hmoob tej dabneeg, tej kev taug xwm, taug neeg lub keebkwm, tej kev piav txujci, tswvyim... Peb muab pivtxwv mentsis rau ntawm no li no:

    Muaj ntau tus Hmoob nej hnub hais tias vim peb Hmoob phem, tsis mloog lus, tsis sib pab, es peb thiaj li tsis muaj tebchaws. Tiamsis, qhov tseeb tiag kuj tsis yog li ntawd.Yog peb ua zoo los saib cov neeg uas muaj tebchaws, peb yuav pom tau tias lawv txawv peb lawm ntau.

    Ua ntsej tshaj plaws, lawv nyob rau tej chaw tiajtus, ces muaj av ua noj, ua haus zoo, ua tau qoob ntau, tseev txaus noj, txaus haus. Ntxiv ntawd, lawv nyob rau qhov chaw qub nkaus xwb, ces lawv thiaj tsim tau vajtse zoo, kho tau nroog kom dav thiab muaj kev mus-los sib cuag yooj yim.

    Tsis ntev, lawv kuj muaj ntawv los kawm, muaj txujci los siv thiab muaj kevcai los taug. Tej no pab kom lawv lub neej zoo ntxiv, muaj tswv- yim, kev txawjntse ntau ntxiv thiab coj tau lub siab tus. Qhov nov yog thawj ruam ntawm txoj kev vammmeej, ntawm txoj kev muaj tebchaws. Thaum ntau lub zos, ntau lub nroog los sib sau ua ke, es muaj kev noj haus dav, muaj kevcai nruj los tuav lawv lawm, lawv thiaj li yuav nyob tau ua ke thiab sib koom tau ua ib lub tebchaws.

    Yog peb ho los xyuas peb Hmoob lub neej, mas tseem nyob deb ntawm qhov peb hais los no heev. Peb lub neej , ces yog tsiv thiab tsiv, nyob dhau lub roob rau lub roob, nyob dhau lub hav rau lub hav. Peb yim nyob qhov chaw deb, qhov chaw muaj havzoov, mas peb yim zoo siab xwb. Peb yeej tsis xav tias peb yuav xyaum ua raws li luag seb peb puas zoo li luag, puas vammeej xws li luag. Thaum zoo li no, peb tseem nyob deb ntawm txoj kev muaj tebchaws heev.

    Txoj kev siv zaj lus no kuj muaj raws li lub caij, lub nyoog thiab xwb. Thaum txog lub caij uas ntxim hais tej zaj lus zoo li no, xws li thaum yus hnov luag hais ib co lus tawm tias " peb Hmoob phem, es peb Hmoob thiaj tsis muaj tebchaws", ces yus yuav tau hais los tau sau cov lus no tawm rau luag paub. Ib tug kuj hais txawv mus ib yam, nyob ntawm qhov nws tau kawm, tau hnov los, los nws xav tau xwb. Qho tus kuj tsis paub dabtsi, ces nws piav tsis tau dabtsi tawm los. Qho tus kuj tsis xav tham, tsis xav hais lus, ces nws kuj qhia tsis tau dabtsi rau lwm tus neeg paub thiab.

    Nypb hauv txoj kev sau zaj lus, luag hais ib co tswvyim uas muajntsis sib xws nyob ua ke ua ib suam, xws li zaj lus uas peb hais los saum no muaj plaub suam. Peb hu tej suam lus no ua nqe lus. Qhov luag sau lus ua tej nqe no yog xav kom tus nyeem to-taub zoo txog luag cov xwm los tswvyim thiab ua rau phaj ntawv zoo saib, zoo nyeem.

    Kev siv lus Hmoob Dawb, peb tsuas hais los xaus li no xwb. Yog lwm hnub, peb txheeb tau li cas ntxiv, mam li hais ntxiv tuaj rau sawvdaws paub.

    Yeeb Nyiajsua Lis
    Australia
    15/04/1998




    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    koojziagkabzaug
    Moderator
    Moderator

    Messages : 3530
    Date d'inscription : 2010-02-28

    Re: LUS HMOOB raws li Gary Lis Yias, Australia

    Post  koojziagkabzaug on 24th February 2012, 11:31 pm



    NTAWV HMOOB


    Yeeb Nyiajsua Lis
    Australia
    15/04/1998

    Nyob rau ntu no, peb yuav los xyuas txog ntawv Hmoob. Hmoob muaj puastsawg hom ntawv, lawv zoo li cas, hom ntawv twg yog hom Hmoob siv ntau tshaj plaws thiab hom teg thiaj yuav muaj txiajntsim ntau rau Hmoob, peb yuav muab txheeb- xyuas kom tseeb rau hauv no.

    I. HMOOB MUAJ NTAWV THAUM TWG LOS LAWM

    Raws li tej dabneeg hais, Hmoob kuj muaj ntawv los tau ntev lawm thiab, tiamsis, vim Hmoob nrog Suav ua rog, Hmoob ntshais tsam Suav paub txog Hmoob cov ntawv, ces Hmoob cia li muab Hmoob cov ntawv (cov tsiaj-ntawv uas sau rau ntawm daim ntawv) nqos rau hauv plab lawm. Txij li thaum ntawd los, ces Hmoob thiaj li tsis nrog luag muaj ntawv lawm.

    Tshaj no, ib txhia Hmoob nyob rau Suav teb tseem hais ntxiv tias cov ntawv uas Suav siv nej hnub no, ces yog Hmoob cov xwb, vim Suav tuaj nyiag ntawm Hmoob mus siv.

    Tej no yuav muaj tseeb baum li cas, tsis muaj leej twg yuav paub tau. Tiamsis, ib qho tseeb tshaj plaws uas sawvdaws tseem pom tau ntawm qhovmuag, ces yog ib co Hmoob nyob rau Suav teb tseem muaj ntawv Hmoob (uas muajntsis zoo li Soob Lwj Yaj cov) thiab tseem siv cov ntawv Hmoob no. Tsis muaj leej twg paub tau tias cov ntawv Hmoob no muaj los tau ho ntev lawm (100-200 xyoo? 50-60 xyoo?). Tej no, cia peb mam li taug-xyuas ntxiv mus lawm yav tom ntej.

    Txawm li cas los, feem coob ntawm peb haiv Hmoob yeej pom tau tias peb ib txwm tsis nrog luag muaj ntawv. Yav dhau los, peb tsuas mus nrog lwm haiv neeg kawm luag tej ntawv thiab tej lus xwb. Los txog xyoo 1961, Hmoob thiaj li tau kawm, tau paub Txiv-Plig Nyiaj Pov cov ntawv Hmoob (Ntawv Hmoob Lastees, cov peb siv tamsis no rau ntawm no), ces txij li thaum ntawd los mus, Hmoob thiaj li muaj ntawv siv los txog nej hnub no. Yog peb xam txog cov ntawv Hmoob Lastees no xwb, ces peb hais tau tias Hmoob nyuamqhuav muaj ntawv los tsis tau ntev.

    Txij li thaum ntawd los mus, lwm pab Hmoob kuj tau tsim lwm hom ntawv Hmoob los siv, xws li ntawv Hmoob Lauj-Foom, ntawv Hmoob Soob-Lwj Yaj thiab ntawv Hmoob Khivtias (Christian). Tsuastab, txhua hom ntawv Hmoob yeej muaj kev siv tsis dav baum li ntawv Hmoob Latees hlo li.

    II. HMOOB COV NTAWV ZOO LI CAS

    Ntawv Hmoob Lastees yog cov ntawv uas Txiv Plig Nyiaj-Pov (Ives Bertrais) thiab Yawg P.Smalley tsim tawm los. Lawv siv cov tsiaj-ntawv Lastees (Roman characters) los tsim ua cov ntawv Hmoob no. Lawv pib tsim thaum xyoo 1957 los mus. Tsuastab, tom qab lawv muab kho ntau zaus, lawv thiaj li tau muab luam tawm rau sawvdaws tau kawm, tau siv thaum xyoo 1961 los mus. Los txog nem no, cov Hmoob uas txawj cov ntawv no kuj muaj coob txog ntau txhiab leej thiab muaj nyob rau ntau lub tebchaws.

    Ntawv Hmoob Lauj-Foom yog cov ntawv Hmoob uas Lauj Foom siv cov tsiaj ntawv Blog los tsim. Cov ntawv no kuj zoo siv lawm thiab, tiamsis, peb tsis paub tias tamsis no neeg puas nyiam siv lawm. Raws li peb xav mas, cov Hmoob yeej muab hom ntawv no tso tseg tas lawm.

    Ntawv Hmoob Soob-lwj Yaj yog ib hom ntawv Hmoob uas txawv tshaj plaws. Cov ntawv no, Yawg Soob-lwj Yaj hais tias, yog Huabtais Ntuj xa neeg los qhia rau nws thaum ib tag hmo, es sawvdaws pw tsaug-zog tas lawm. Nws kawm tau tsheej tog xyoo, ces thiaj li kawm tiav. Cov tsiaj ntawv no kuj zoo li tsiaj-ntawv Lastees, tsiaj-ntawv Lavxias, tsiaj-ntawv Blog ua ke thiab muaj txog 100 tawm tus diam. Tiamsis, txhua lo lus Hmoob tsuas siv ob tug tsiaj ntawv los sau nkaus xwb. Cov neeg uas txawj hom ntawv no hais tias hom ntawv no zoo siv thiab nyeem tau nrawm dua ntawv Hmoob Lastees.

    Ntawv Hmoob Khivtias yog cov xibhwb coj kevcai ntuj tshiab (Protestant) tsim tawm los. Lawv siv tsiaj-ntawv Blog los sau cov ntawv no. Cov ntawv no kuj muaj kev siv dav tsawv rau sab coj kevcai ntuj (lawv luam tau ib phau ntawv qhia kevcai ntuj - Bible- uas yog siv hom ntawv no los sau). Hom ntawv no kuj zoo siv lawm thiab, yog peb tseem nyob rau Blog teb.

    III. HOM NTAWV TWG YOG HOM ZOO SIV TSHAJ PLAWS

    Raws li peb pom, hom twg los nyias yeej muaj nyias qhov zoo thiab qhov tsis tshua zoo. Tsis muaj ib hom twg yuav haum siab tshaj plaws los zoo siv tshaj lwm hom tas nrho. Tsuastab, hom muaj nqi tshaj plaws yog hom uas neeg siv coob tshaj plaws, tabtxawm nws tsis tshua zoo los tsis txaus nyiam puas tsawg. Tamsis no, hom uas neeg siv ntau, siv dav dua ntais ces yog Ntawv Hmoob Lastees.

    Vim li cas Hmoob ho siv hom ntawv no ntau tshaj plaws? Yog peb ua zoo xav, peb yuav pom tau tias hom ntawv no muaj ntau qhov zoo li no:

    (1) Peb nrhiav tau tshuab ntaus ntawv, tshuab luam ntawv yoojyim.

    (2) Neeg txawj hom ntawv no coob lawm, ces yog peb sau peb cov lus, cov tswvyim los ua hom ntawv no, ntau tus neeg yuav nyeem, yuav paub txog peb cov lus, cov tswvyim.
    (3) Tej nomtswv Hmoob, tej neeg txawjntse yeej pomzoo kom peb siv hom ntawv no.

    Tsuastab, hom ntawv no kuj tseem tsis tau zoo tastas, tseem muaj ntau qhov ntxim kho, ntxim hloov, es xwv nws thiaj li yuav zoo siv zujzus mus lawm yav tom ntej.

    IV. KEV KHO NTAWV HMOOB LASTEES

    Ntawv Hmoob Lastees, raws li peb sawvdaws paub, tseem muaj kev siv tsis yoojyim kiag li, vim peb tseem nyeem tau qeeb, tseem laj sau tau ib co tswvyim kom muaj qab, muaj hau los siv. Yog peb hloov tau, es ua kom cov tsiajntawv yoojyim tshaj ntawm no, ces peb txoj kev siv cov ntawv Hmoob Lastees yuav muaj kev ruajntseg los vam dav tshaj ntawm no. Peb muaj ob txog kev li ntawm no:

    (1) Hloov cov tsiaj ntawv kom yoojyim
    (2) Sau cov lus sib lo raws li peb pom-zoo

    Yog peb tsoom Hmoob pom-zoo no, peb muab cov tsiaj ntawv hloov mus li no:

    - hloov tus np, nph, npl, nplh ua tus b, bh, bl, blh
    - hloov tus hl ua lh
    - hloov tus hm, hml ua mh, mhl
    - hloov tus hn ua nh - hloov tus ts, tsh, nts, ntsh ua j, jh, nj, njh
    - hloov tus tx, txh, ntx, ntxh ua x, xh, nx, nxh
    - muab tus s los hloov tus x
    - muab tus zh los hloov tus s
    - muab tus yh los hloov tus xy
    - muab tus g los cim lub suab {gijgaj

    Yog peb hloov tau li no, ces peb cov ntawv kuj yoojyim zog tuaj lawm. Tshaj ntawd, qho tus tshiaj ntawv kuj raug raws lawv cov suab dua, xws li tus zh thiab yh. Ib qho uas peb tsis txhob to-taub yuamkev mag yog tsiajntawv tsis zoo li zauv (leb, arithmetic), es 1 ces yeej yog 1 xwb, peb yuav muab 1 ua 2 tsis tau, los 1thiab 1 yuavtsum yog 2 nkaus xwb, es tsis yog lwm yam. Tsiaj ntawv, peb yuav muab hloov li cas los tau tas, peb yuav muab cim lub suab twg los tau tas, xws li peb twb muab tus tsiajntawv r {ar} los cim lub suab {ro}: roobris. Yog li ntawd, peb yuav muab tus tsiaj ntawv twg los cim lub suab twg los yeej tau tas, nyob ntawm peb nyiam los peb pom-zoo xwb. Tsis muaj leej twg yuav los cheem tau tias tus tsiaj ntawv no yuavtsum muab cim lub suab no xwb thiaj li yuav raug los cam tau tias tus tsiaj ntawv no txuam rau tus no mas yuav tawm lub suab no xwb (n+p = np ?).

    Yog yuav hais qhov tseeb, tsiaj ntawv yog ib co kab-kos uas peb siv los cim suab, cim lus xwb. Peb yuav muab lawv cim lub suab twg, lo lus twg los yeej tau tas.

    Lwm txoj kev kho ntawv Hmoob Lastees kuj yog sau cov lo lus sib lo ua ke, xws li:

    - Sawvdaws yuavtsum rausiab kawm txujci, es peb thiajli yuav
    muaj kev vammeej mus lawm yav tomntej.

    Yog peb nyiam sau ntawv sib lo li saum no, peb txoj kev siv ntawv Hmoob Lastees kuj yuav zoo tshaj, dav tshaj thiab raug tshaj qhov qub. Thaum peb nyeem, los peb kuj nyeem tau nrawmnroos, vim peb pom ntau lo lus ua ke. Yog peb pheej sau raws suab, muab ib suab ua ib koog ntawv, ua ib lo lus, mas kuj tsis raug raws kevcai sau lo lus lawm. Nws zoo li peb muab lus Askiv los sau li hauv qab no:

    - The Hmong, how e ver, ar ri ved in Chi na on foot, for they left
    Si be ria long be fo re the ad vent of the Si be rian hor se man.

    Yog cov neeg Askiv tsis sau lawv cov lus li peb pom saum no, ces peb txhob sau peb cov lus li peb nej hnub sau no thiab. Peb yuavtsum hloov, yuavtsum sau lus raws li lawv tej cim tiagtiag.

    Kev kho ntawv Hmoob Lastees, peb tsuas hais los xaus li no xwb. Yog leej twg ho muaj tswvyim zoo tshaj ntawm no, nws yeejmeem hais rau sawvdaws paub thiab.



    _________________


    Tes yiag tes txawj nrhia
    Siab nkiag nrhiav kev nyiam
    Ncauj npliag lus dai siab

    lifefargo
    Visitor
    Visitor

    Messages : 8
    Date d'inscription : 2013-07-28

    Re: LUS HMOOB raws li Gary Lis Yias, Australia

    Post  lifefargo on 7th August 2013, 10:13 am

    Nyobzoo Yeeb Nyaijsua Lis,

    Kuv yog ib tug uas muaj txojkev xav thiab jhaw tibyam li koj los txhimkho ntawv Mhoob (RPA) thiab txua ntau lolus Mhoob tshiab trau Mhoob tau siv yavtomntej. Xyoo 1980, kuv mus nyob USA. Tamsisnov kuv INVENTED ntaux (ntau ntau) yam khoom. Kuv yog tus INVENTED thiab DESIGN kuv cov khoom thiab mam xa mus trau COMPANY PRODUCE thiab mam coj mus muag tawm.

    Xyoo 1991, kuv tau nrog Dr. Smalley William sibtham txog qhov yuav txhimkho cov ntawv Mhoob RPA kom qog tau Mhoob covlus, suab, sauntawv Mhoob sibtxuas thiab ua kom cov tsiajntawv tsawg. Tomntej nov peb yuavtsum ua kom tau MHONG DICTIONARY MHONG TO MHONG thiab MHONG TO ENGLISH. Kuv bajsiab ua kom tau ntawv Mhoob los trau cov PROGRAM DESIGN PRODUCT vim kuv pom haistias muaj ntauyam ntawm cov PROGRAM DESIGN yuavtsum kho kom yoojyim.

    Thaum kuv nrog Dr. Smalley tham tag thiab nws pomzoo, kuv thiaj los pib txhimkho kuv cov ntawv Mhoob RPA version 2.0 es cia Dr. Smalley lawv cov ntawv Mhoob RPA ua vesion 1.0. Tamsisnov kuv phauntawv twb tiav li 90% lawm. Thaum kuv ua tiav linov lawm, kuv tau coj mus jib Naisphoo Vaj Pov, Dr. Lee Yia thiab ntau tus Mhoob kawmtiav Dr. degree. Feemcoob yeej pom haistias kuv cov ntawv Mhoob sivtau, tabsis thaum kuv thov kom lawv koomtes nrog Naisphoo Vaj Pov ENDORSE kuv tus ntawv Mhoob RPA Version 2.0 noces lawv ho tsis kam. Kuv pom qhov uas lawv tsis kam koomtes yog vim lawv qhov RELATIONSHIP. Txawm lintawd los kuv tsis txhawj vim kuv paub meejx (meej meej) haistias kuv cov ntawv Mhoob zoo txaus lawm.

    Hais txog ntawv Mhoob los kho li koj thiab kuv mas yuavtsum siv sijhawm thiab tswvyim ntau haujsim mas thiaj tau. Kuv muaj ntauyam xav SHARE nrog koj txog kev txhimkho ntawv Mhoob trau Mhoob siv. Yog haistias koj kam sauntawv mus trau (rau) es wb mam tham sabnraud. Kuv tus EMAIL yog LIFEFARGO@YAHOO.COM

    Uatsaug ntau,

    Sponsored content

    Re: LUS HMOOB raws li Gary Lis Yias, Australia

    Post  Sponsored content Today at 2:57 am


      Current date/time is 11th December 2016, 2:57 am